حضرت شعیب علیہ السلام مکمل Life of Prophet Shuayeb AS

حضرت شعیب علیہ السلام مکمل

سلسلہ نمبر 11

تحریر شفیق احمد ابن عبداللطیف آئمی

حضرت شعیب علیہ السلام کی قوم 

قارئین کرام ، اس سے پہلے ہم آپ کی خدمت میں حضرت ایوب علیہ السلام کے حالات پیش کر چکے ہیں۔ اور اُس سے پہلے بھی حضرت اسحاق، حضرت یعقوب اور حضرت یوسف علیہم السلام کے حالات پیش کر چکے ہیں۔ اور اس سے پہلے ہم حضرت ابراہیم علیہ السلام اور حضرت اسماعیل علیہ السلام کے حالات بتا چکے ہیںکہ حضرت ابراہیم علیہ السلام کے بڑے بیٹے اسماعیل علیہ السلام دوسری بیوی سیدہ ہاجرہ رضی اللہ عنہا کے بیٹے ہیں۔ اور دوسرے نمبر کے حضرت اسحاق علیہ السلام پہلی بیوی سیدہ سارہ رضی اللہ عنہا سے ہیں۔ ان دونوں کے علاوہ حضرت ابراہیم علیہ السلام کی تیسری بیوی سیدہ قطورہ یا قنطورہ سے کئی بیٹے تھے۔ اُن میں سے ایک بیٹے کا نام مدین یا مدائن یا مدیان تھا۔ اور وہ جس علاقے میں جا کر رہائش پذیر ہوئے اس علاقے کا نام مدین پڑ گیا۔ اور اُن کی اولاد یا نسل قوم مدین کہلائی۔ اکثر علمائے کرام فرماتے ہیں کہ حضرت شعیب علیہ السلام کو اللہ تعالیٰ نے دو قوموں ”قومِ مدین اور اصحاب الایکہ“ کی طرف بھیجا ۔ لیکن تمام علمائے کرام کا اس بات پر اتفا ق ہے کہ مدین کا علاقہ اتنا بڑا تھا کہ ان میں آباد لوگ دو قوموں میں بٹ گئے تھے۔ آگے بڑھنے سے پہلے ہم ان دونوں قوموں کے بارے میں مختصراً بتا دیتے ہیں۔ تا کہ آگے الجھن نہ ہو۔

قوم ِ مدین کا علاقہ

حضرت ابراہیم علیہ السلام کے بیٹے مدین اپنے بیوی بچوں کو لے کر ایک بہت ہی خوب صورت علاقے میں آبادہو گئے۔ وہ علا قہ ملک شا م مےں علا قہ معا ن سے قریب تھا ۔اور حجاز کی سر حد سے لگ بھگ ملا ہوا تھا۔ مولانا سید ابو اعلیٰ مودودی لکھتے ہیں۔ مدین کا اصل علاقہ حجاز کے شمال مغرب اور فلسطین کے جنوب میں بحرِ احمر اور خلیج عقبہ کے کنارے پر واقع تھا ۔ مگر جزیرہ نمائے سیناءکے مشرقی ساحل پر بھی اس کا کچھ سلسلہ پھیلا ہوا تھا۔ یہ ایک بڑی تجارت پیشہ قوم تھی۔ قدیم زمانےمیں جو تجارتی شاہراہ بحر احمر کے کنارے یمن سے مکہ مکرمہ اور ینبوع ہوتی ہوئی ملک شام تک جاتی تھی۔ اور ایک دوسری تجارتی شاہراہ جو عراق سے مصر کی طرف جاتی تھی اس کے ( ان دونوں شاہراہوں کے ) عین چوراہے پر ( اور اس کے آس پاس) اس قوم کی بستیاں تھیں۔ اسی بنا پر عرب کا بچہ بچہ مدین سے واقف تھا۔ اور اس کے مٹ جانے کے بعد بھی عرب میں اس کی شہرت برقرار رہی۔ کیوں کہ عربوں کے تجارتی قافلے مصر اور شام کی طرف جاتے ہوئے رات دن ( یعنی اکثر ) اس کے آثار ِ قدیمہ کے درمیان سے گزرتے رہتے ہیں۔ 

قوم مدین کا مختصر تعارف

حضرت شعیب علیہ السلام کی قوم مدین کے علاقے کے بارے میں جان لینے کے بعد قوم مدین کے بارے میں مختصراً جان لیتے ہیں۔ مولانا سید ابو اعلیٰ مودودی لکھتے ہیں۔ اہلِ مدین کے متعلق ایک اور ضروری بات جس کو ذہن نشین کر لینا چاہیے۔ وہ یہ ہے کہ یہ لوگ در اصل حضرت ابراہیم علیہ السلام کے صاحبزادے مدیان کی طرف منسوب ہیں۔ جو اُن کی تیسری بیوی سیدہ قطورہ رضی اللہ عنہا کے بطن سے تھے۔ قدیم زمانے کے قاعدے کے مطابق جو لوگ کسی بڑے آدمی کے ساتھ وابستہ ہو جاتے تھے وہ رفتہ رفتہ اسی کی آل اولاد میں شمار ہو کر بنی فلاں کہلانے لگتے تھے۔ اسی قاعدے کی وجہ سے عرب کی آبادی کا بڑا حصہ ” بنی اسماعیل “ کہلایا۔ اور حضرت یعقوب علیہ السلام کی اولاد کے ہاتھ پر اسلام قبول کرنے والے لوگ سب کے سب ”بنی اسرائیل “ کے جامع نام کے تحت کھپ گئے۔ اسی طرح مدین کے علاقے کی ساری آبادی بھی جو مدیان بن ابراہیم کے زیر اثر آئی۔ وہ بنو عدیان کہلائی اور اس ملک کا نام ہی مدین یا مدیان مشہور ہو گیا۔

قوم اصحاب الایکہ

حضرت شعیب علیہ السلام کو اللہ تعالیٰ نے اتنے وسیع علاقے پر مبعوث فرمایا تھا کہ اس وسیع علاقے میں دو قوم آباد تھی۔ ایک قوم مدین دوسری قوم اصحاب ایکہ تھی۔ یا پھر یہ ایک ہی قوم کے دو بڑے قبیلے تھے۔ مولانا سید ابو اعلیٰ مودودی لکھتے ہیں۔ ( اصحاب الایکہ) یعنی حضرت شعیب علیہ السلام کی قوم کے لوگ ۔ اس قوم کا نام بنی مدیان تھا۔ مدین اُن کے مرکزی شہر ( راجدھانی) کو کہتے تھے۔ اور اُن کے پورے علاقے کو بھی ۔ رہا ایکہ ، تو یہ تبوک کا قدیم نام تھا۔ اس لفظ کے لغوی معنی گھنے جنگل کے ہیں ۔ آج کل ایکہ ایک پہاڑی نالے کا نام ہے۔ جو جبل اللّوز سے وادی اَفَل میں آکر گرتا ہے۔ مدین اور اصحاب الایکہ کا علاقہ بھی حجاز سے فلسطین و شا م جاتے ہوئے راستے میں پڑتا ہے۔ اس کے آگے مولانا سید ابو الاعلیٰ مودودی لکھتے ہیں۔ مفسرین کے درمیان اس امر میں اختلاف ہے کہ مدین اور اصحاب الایکہ الگ الگ قومیں ہیں یا ایک ہی قوم کے دو نام ہیں۔ ایک گروہ کا خیال ہے کہ یہ دو الگ قومیں ہیں۔ اور اس کے لئے سب سے بڑی دلیل یہ ہے کہ سورہ اعراف میں حضرت شعیب علیہ السلام کو اہل مدین کا بھائی فرمایا گیا ہے۔ ( والی مدین اخاھم شعیبا) اور سورہ الشعرا ءمیں اصحاب الایکہ کے ذکر میں ارشاد ہوا ہے کہ اذقال لھم شعیب ۔ ( جب کہ اُن سے شعیب نے کہا) ” اُن کے بھائی “ ( اخوھم) کا لفظ استعمال نہیں فرمایا۔ اس کے برعکس بعض مفسرین دونوں کو ایک ہی قوم قراردیتے تھے۔ کیوں کہ سورہ اعراف اور سورہ ہود میں جو امراض اور اوصاف اصحابِ مدین کے بیان ہوئے تھے وہی سورہ الشعراءمیں اصحاب الایکہ کے بیان ہوئے ہیں۔ حضرت شعیب علیہ السلام کی دعوت اور تعلیم ( دونوں قوموں کو ) یکساں (دی گئی ) ہے۔ اور آخر کار اُن کے انجام میں بھی فرق نہیں ہے۔

ایک ہی نسل سے دو قومیں

حضرت شعیب علیہ السلام کو دو الگ الگ قوموں کی طرف بھیجا گیا تھا یا ایک ہی نسل کی دو قوموں کی طرف بھیجا گیا تھا۔ اس کے بارے میں مولانا سید ابو الاعلیٰ مودودی لکھتے ہیں ۔ تحقیق سے معلو م ہوتا ہے کہ یہ دونوں اقوال اپنی جگہ صحیح ہیں۔ اصحاب مدین اور اصحاب الایکہ بلا شبہ دو الگ قبیلے ہیں۔ مگر ایک ہی نسل کی دو شاخیں ہیں۔ حضرت ابراہیم علیہ السلام کی جو اولاد اُن کی بیوی سیدہ قطورا رضی اللہ عنہا کے بطن سے تھی۔ وہ عرب اور اسرائیل کی تاریخ میں بنی قطورا کے نام سے معروف ہے۔ ان میں سے ایک قبیلہ جو سب سے زیادہ مشہور ہوا وہ مدیان بن ابراہیم کی نسبت سے مدیانی یا اصحاب مدین کہلایا۔ اور اس کی آبادی شمالی حجاز سے لے کر فلسطین کے جنوب تک اور وہاں سے جزیرہ نمائے سینا کے آخری گوشے تک بحر قلزم اور خلیج عقبہ کے سواحل تک پھیل گئی۔ اس کا صدر مقام شہر مدین تھا۔ جس کی جائے وقوعہ ابو الفداءنے عقبہ کے مغربی کنارے ایلہ ( موجودہ عقبہ) سے پانچ دن کی مسافت بتائی ہے۔ باقی بنی قطورا جن میں ددان نسبتاً زیادہ مشہور ہیں۔ شمالی عرب میں تیما ءاور تبوک اور العلاکے درمیان آبادہوئے۔ اور ان کا صدر مقام تبوک تھا۔ جسے قدیم زمانے میں ایکہ کہتے ہیں۔ یاقوت نے معجم البلدان میں لفظ ایکہ کے تحت بتایا کہ یہ تبوک کا پرانا نام ہے۔ اور اہل تبوک میں عام طور سے یہ بات مشہور ہے کہ یہی جگہ کسی زمانے میں ایکہ تھی۔ اصحاب مدین اور اصحاب الایکہ کے لئے ایک ہی پیغمبر مبعوث کئے جانے کی وجہ غالباً یہ تھی کہ دونوں ایک ہی نسل سے تعلق رکھتے تھے۔ ایک ہی زبان بولتے تھے۔ اور ان کے علاقے بھی بالکل ایکدوسرے سے متصل تھے۔ بلکہ بعید نہیں کہ بعض علاقوں میں یہ ساتھ ساتھ آباد ہوں اور آپس کے شادی بیاہ سے ان کا معاشرہ بھی باہم گھل مل گیا ہو۔ اس کے علاوہ بنی قطورا کی ان دونوں شاخوں کا پیشہ بھی تجارت تھا۔ اور دونوں میں ایک ہی طرح کی تجارتی بے ایمانیاں اور مذہبی و اخلاقی بیماریاں پائی تھیں۔ 

اصحاب مدین اور اصحاب الایکہ ایک قوم ہیں یا الگ الگ؟

حضرت شعیب علیہ السلام کو دو الگ الگ قوموں کی طرف مبعوث کیا گیا تھا۔ یا وہ ایک ہی قوم تھے ۔ اس کے بارے میںعلامہ غلام رسول سعیدی لکھتے ہیں کہ عکرمہ نے کہا ہے کہ حضرت شعیب علیہ السلام کے سوا کسی نبی کو دو مرتبہ نہیں بھیجا گیا۔ ان کو ایک مرتبہ مدین کی طرف بھیجا گیا پھر اس قوم کی نافرمانی کی بنا ءپر اس کو ایک زبردست گرج دار آواز سے ہلاک کر دیا گیا اور دوسری دفعہ اُن کو اصحاب الایکہ ( سر سبز جھاڑیوں والے علاقے کے رہنے والے) کی طرف بھیجا گیا ۔ جن کو سائبان والے عذاب نے پکڑ لیا تھا۔ حضرت عبداللہ بن عمرو رضی اللہ عنہ فرماتے ہیں کہ رسول اللہ صلی اللہ علیہ وسلم نے فرمایا۔ اصحاب مدین اور اصحاب الایکہ دو امتیں ہیں جن کی طرف حضرت شعیب علیہ السلام کو بھیجا گیا۔ (ہر چند کہ اس میں مفسرین کا اختلاف ہے لیکن اس حدیث کی بنا پر یہی قول راجح ہے کہ یہ دو الگ الگ امتیں ہیں۔ علامہ غلام رسول سعیدی) حضرت قتادہ رحمتہ اللہ علیہ فرماتے ہیں کہ اللہ تعالیٰ نے جو اصحاب الرس ( اندھے کنویں والے) ( الفرقان آیت نمبر38) فرمایا ہے۔ اس سے مراد حضرت شعیب علیہ السلام کی قوم ہے۔ اور ایک قول یہ ہے کہ مدین اور ایکہ ان دونوں سے مراد ایک قوم ہے۔ (مختصر تاریخ دمشق) حافظ عماد الدین بن اسماعیل بن عمر بن کثیر کی تحقیق یہ ہے کہ اصحاب الایکہ او رمدین دونوں ایک ہی قوم ہیں۔ ان کی گفتگو کا خلاصہ یہ ہے۔ مدین اس قوم کا نام ہے جو حضرت ابرہیم علیہ السلام کے بیٹے مدین کی نسل سے ہے۔ حضرت شعیب علیہ السلام بھی اسی نسل سے تھے اور قوم مدین جس علاقہ میں آباد تھی وہ سر سبز جھاڑیوں پر مشتمل تھا۔ اس لئے اس کو اصحاب الایکہ بھی کہا جاتا ہے۔ ایک قول یہ بھی ہے کہ اس علاقے میں ایکہ نام کا ایک درخت تھا اور مدین اس درخت کی پوجا کرتے تھے ۔ اسی لئے ان کو اصحاب الایکہ کہا گیا ہے۔ بہر حال مفسرین کا اس میں اختلاف ہے کہ یہ الگ الگ قومیں ہیں یا یہ دونوں ایک ہی قوم ہیں۔

دونوں بستیاں بڑی تجارتی شاہراہ پر آباد تھیں

حضرت شعیب علیہ السلام کی بعثت کے علاقے کے بارے میں علامہ غلام رسول سعیدی لکھتے ہیں ۔ اللہ تعالیٰ نے قرآن پاک میں فرمایا۔ وا نھما لبامام مبین ۔ سورہ الحجر آیت نمبر79۔ ”اور دونوں بستیاں بڑی شاہراہ ( ہائی وے) پر آباد تھیں۔“ جو شاہراہ حجاز کے قافلوں کو شام ، فلسطین ، یمن بلکہ مصر تک لے جاتی تھی۔ اور بحر قلزم کے مشرقی کنارے سے ہو کر گزرتی تھی۔ قرآن پاک میں اسی کو اللہ تعالیٰ نے ”امام مبین “ فرمایا ہے۔ یہ شاہراہ قریشی قافلوں کےلئے بھی بہت متعارف اور تجارتی سڑک ہے۔ مدین کا قبیلہ بحر قلزم کے مشرقی کنارہ اور عرب کے شمال مغرب میں ملک شام کے متصل حجاز کا آخری حصہ تھا۔ بعض متاخرین لکھتے ہیں کہ مدین کا اصل علاقہ حجاز کے شمال مغرب اور فلسطین کے جنوب میں بحر احمر اور خلیج عقبہ کے کنارے واقع تھا۔ مگر جزیرہ نمائے سینا کے مشرقی ساحل پر بھی اس کا کچھ سلسلہ پھیلا ہوا تھا۔ یہ ایک بڑی تجارت پیشہ قوم تھی۔ قدیم زمانہ میں جو تجارتی شاہراہ بحر احمر کے کنارے یمن سے مکہ مکرمہ اور ینبوع ہوتی ہوئی ملک شام تک جاتی تھی۔ اور ایک دوسری بڑی تجارتی شاہراہ جو عراق سے مصر کی طرف جاتی تھی۔ اس کے عین چوراہے پر اس قوم کی بستیاں واقع تھیں۔ اسی بنا پر عرب کا بچہ بچہ مدین سے واقف تھا۔ اور اس کے مٹ جانے کے بعد بھی عرب میں اس کی شہرت برقرار رہی۔ کیوں کہ عربوں کے تجارتی قافلے مصر اور شام کی طرف جاتے ہوئے رات دن ( اکثر) اس کے آثار قدیمہ سے گزرتے تھے۔

حضرت شعیب علیہ السلام کا نام اور نسب

حضرت شعیب علیہ السلام کے سلسلہ نسب کے بارے میں مختلف روایات ہیں۔ امام ابن عسا کر حضرت اسحاق بن بشر کی سند سے بیان کرتے ہیں کہ توریت کے ماننے والے یہ گمان کرتے ہیں کہ توریت میں حضرت شعیب علیہ السلام کانام میکائیل ہے۔ سریانی زبان میں آپ علیہ السلام کا نام جزی بن یشجر ہے۔ اور عبرانی زبان میں آپ علیہ السلام کا نام شعیب بن یشجر بن لاوی بن یعقوب علیہ السلام ہے۔ شرقی بن قطامی فرماتے ہیں کہ عبرانی زبان میں آپ علیہ السلام کا نام ثیروب ہے اور عربی زبان میں شعیب بن عیفا بن بویب بن ابراہیم علیہ السلام ہے ۔ علامہ ابن کثیر لکھتے ہیں کہ مشہور مورخ حضرت امام محمد بن اسحاق رحمتہ اللہ علیہ فرماتے ہیں کہ یہ لوگ مدین بن ابراہیم علیہ السلام کی نسل سے ہیں۔ حضرت شعیب علیہ السلام میکیل بن نیشجر کے بیٹے ہیں۔ اُن کا نام سریانی زبان میں یژون تھا۔ یہ یاد رہے کہ قبیلے کا نام بھی مدین تھا اور بستی کا نام بھی یہی تھا۔ یہ شہر معان سے ہوتے ہوئے حجاز جانے والے راستے میں آتا ہے۔ امام قرطبی لکھتے ہیں کہ حضرت عطا اور حضرت محمد بن اسحاق فرماتے ہیں کہ حضرت شعیب علیہ السلام کا سلسلہ نسب شعیب بن میکیل بن یشجر بن مدین بن ابراہیم علیہ السلام ہے۔ سریانی زبان میں آپ علیہ السلام کا نام بیروت ہے۔ اور والدہ محترمہ میکائیل بنت لوط تھی۔ ابن سمعان کہتے ہیں کہ سلسلہ نسب شعیب بن جزی بن یشجر بن لاوی بن یعقوب بن اسحاق بن ابراہیم ہے۔ اور یہ قول بھی ہے کہ شعیب بن صفوان بن عیفا بن ثابت بن مدین بن ابراہیم علیہ السلام سلسلہ نسب ہے۔ واللہ اعلم۔ قاضی ثناءاللہ پانی پتی لکھتے ہیں کہ والی مدین اخاھم شعیبا۔ یعنی ہم نے مدین بن ابراہیم کی اولاد کی طرف شعیب علیہ السلام کو مبعوث فرمایا۔ محمد بن اسحاق فرماتے ہیں کہ شعیب بن میکیل بن یشجر بن مدین بن ابراہیم علیہ السلام سلسلہ نسب ہے۔ میکیل لوط علیہ السلام کی بیٹی کانام ہے۔ بعض نے سلسلہ نسب شعیب بن یثرون بن نوس بن مدین بن ابراہیم علیہ السلام لکھا ہے۔ 

حضرت شعیب علیہ السلام کی قوم کی حالت

حضرت شعیب علیہ السلام کی قوم کے حدود اربعہ کے بارے میں آپ نے سمجھ ہی لیا ہوگا۔ مختصر میں یوں سمجھ لیں کہ جنوب میں یہ لوگ تبوک سے بھی آگے تک آباد تھے۔ مغرب میں بحر احمر یا بحر قلزم کے پورے ساحلی علاقے پر آباد تھے۔ یہاں تک کہ شمال مغرب میں جزیرہ نمائے سینا کے جنوب اور جنوب مشرقی ساحل علاقے پر بھی آباد تھے۔ اور شمال میں فلسطین کے جنوبی علاقے تک آباد تھے۔ اس طرح ایک بہت بڑے علاقے پر یہ آباد تھے۔ اور آبادی زیادہ ہونے کی وجہ سے دو ملکوں ( بستیوں ) میں تقسیم ہو گئے تھے۔ ان کے مشرق میں عراق وغیرہ تھے۔ شمال میں فلسطین تھا۔ مغرب میں مصر تھا۔ اور جنوب میں مدینہ منورہ ، مکہ مکرمہ اور یمن وغیرہ تھے۔ اسی لئے ان تمام ممالک کے لوگوں کا تجارتی راستہ حضرت شعیب علیہ السلام کی قوم کے علاقے سے ہوکر گزرت تھا۔ اور ہر ملک کے تجارتی قافلے اپنا اپنا مال و اسباب لے کر ان لوگوں کے علاقے سے گزرتے تھے۔ اس طرح انہیں ہر ملک کی ہر چیز گھر بیٹھے انتہائی آسانی سے مل جاتی تھی۔ اور وہ لوگ اپنے علاقے کی تمام چیزیں اچھے منافع پر قافلے والوں کو فروخت کر دیا کرتے تھے۔ اس طرح انہیں خرید و فروخت کے لئے تجارتی سفر نہیں کرنا پڑتا تھا۔ بلکہ خریدار اور فروخت کرنے والے چل کر ان کے پاس آتے تھے۔ دھیرے دھیرے حضرت شعیب علیہ السلام کی قوم نے اپنے علاقے میں جگہ جگہ تجارتی راستوں پر منڈیاں بنا لیں۔ اب یہ لوگ بہت بڑے بڑے بیوپاری بن چکے تھے۔ اور پورے علاقے میں آباد قوم مدین اور قوم اصحاب الایکہ اچھی خاصی امیر ہو چکی تھی۔ اور ہر طرف خوش حالی کا دور دورہ تھا۔ اور آپ علیہ السلام کی قوم کا ہر آدمی لگ بھگ بہت امیر اور دولت مند تھا۔

حضرت شعیب علیہ السلام کا مختصر تعارف 

حضرت شعیب علیہ السلام کے بارے میں مفتی احمد یار خان نعیمی لکھتے ہیں۔ کہ مدین کے متعلق بہت گفتگو ہے۔ حق یہ ہے کہ مدین حضرت ابراہیم علیہ السلام کے ایک بیٹے کانام ہے۔ پھر ایک قبیلہ کا نام مدین ہوا۔ جو مدین بن ابراہیم کی اولاد تھا۔ پھر ایک بستی کا نام ہو گیا۔ جہاں یہ قبیلہ آباد ہو گیا۔ لہٰذا سارے مفسرین ٹھیک کہتے ہیں۔ بعض نے کہا بستی کا نام ہے ۔ بعض نے کہا قبیلہ کا نا م ہے۔ وہ سب ہی ٹھیک کہتے ہیں اور اس بستی اور قبیلہ کے نبی حضرت شعیب علیہ السلام تھے۔ مدین کا علاقہ مصر سے آٹھ منزل کے فاصلہ پر یعنی افریقہ میں واقع تھا۔ حضرت شعیب علیہ السلام کے نسب شریف میں بہت اختلاف ہے۔ مگر حق یہ ہے کہ آپ علیہ السلام مدین حضرت ابراہیم علیہ السلام کی اولاد میں سے ہیں۔ حضرت اسحاق علیہ السلام اور حضرت یعقوب علیہ السلام کے سلسلہ سے نہیں ہیں۔ لہٰذا آپ علیہ السلام بنی اسرائیل سے نہیں ہیں۔ آپ علیہ السلام کا سلسلہ نسب شعیب بن میکیل بن یشجر بن مدین بن حضرت ابراہیم علیہ السلام ہے۔ مدین نے حضرت لوط علیہ السلام کے پوتے اور حضرت لوط علیہ السلام کے نواسے ہیں۔ اور حضرت شعیب علیہ السلام اُن کے ( یشجر کے ) پوتے ہیں۔ آپ علیہ السلام کی خصوصیت یہ ہے کہ اللہ تعالیٰ نے آپ علیہ السلام کو یکے بعد دیگرے چند قوموں کا نبی بنایا۔ پہلے قوم مدین کا پھر اُن کی ہلاکت کے بعد ایکہ والوں کا اور پھر اُن کی ہلاکت کے بعد اصحاب الرس کا ۔ روح المعانی میں یہاں لکھا ہے کہ حضرت شعیب علیہ السلام خوف الٰہی میں روتے ہوئے نابینا ہو گئے تھے۔ مگر حق یہ ہے کہ حضرات انبیائے کرام گونگا پن ، اندھا پن اور نفرت والے امراض سے محفوظ ہوتے ہیں۔ حضرت شعیب علیہ السلام حضرت موسیٰ کلیم اللہ علیہ السلام کے سسر ہیں اور آپ علیہ السلام کی بیٹی سیدہ صفورا رضی اللہ عنہا حضرت موسیٰ علیہ السلام کے نکاح میں آئی تھیں۔ اور آپ علیہ السلام نے ہی وہ عصا حضرت موسیٰ علیہ السلام کو دیا تھاجو حضرت آدم علیہ السلام سے ہوتا ہو ا اُن تک پہنچا تھا۔ اور حضرت موسیٰ علیہ السلام نے اسی کے ذریعے جادو گروں کو شکست دی تھی۔

حضرت شعیب علیہ السلام کی قوم کی برائیاں

حضرت شعیب علیہ السلام کی قوم مدین اور دوسری قوم اصحاب الایکہ ایک بہت وسیع و عریض علاقے میں دو پڑوسی ملکوں کی طرح رہتے تھے۔ ان کا پورا علاقہ تجارتی شاہراہوں سے بھرا ہوا تھا۔ اور ایران، عراق ، فلسطین ، مصر ، حجاز ( جس میں مکہ مکرمہ اور مدینہ منورہ آتے ہیں) اور یمن وغیرہ کے بے شمار تجارتی قافلے ان کے علاقے سے گزرتے رہتے تھے۔ ان تجارتی قافلوں کی آمد و رفت سے اس وسیع علاقے میں بڑی بڑی تجارتی منڈیاں وجود میں آگئی تھیں۔ اور ان تجارتی منڈیوں کی وجہ سے یہ دونوں قومیں بہت امیر ہو گئی تھیں۔ اور امیر ہونے کی وجہ سے ان میں بہت سی برائیاں پیدا ہو گئی تھیں۔ مولانا محمد آصف قاسمی لکھتے ہیں۔ حضرت شعیب علیہ السلام کی قوم وہ قوم ہے جو تجارت میں اپنا جواب نہیں رکھتی تھی۔ مگر انہوں نے بد دیانتی کے ہزاروں طریقوں کو رواج دے کر معاشہر کو الٹ پلٹ کر رکھ دیا تھا۔ اس تجارتی بد دیانتی کے ساتھ ساتھ کفر و شرک می بھی وہ کسی قسم سے پیچھے نہیں تھے۔ تجارت معاشی خوشحالی کا واحد ذریعہ ہے۔ پیداوار اشیاءکا تبادلہ براہ راست یا مال کے ذریعے اپنی چیزیں دیکر اپنی کمی کو باہمی رضا مندی سے پوری کرنا تجارت کے اصول ہیں۔ (لیکن حضرت شعیب علیہ السلام کی قوم میں ) گاہک کو نقصان پہنچانے کے نہ جانے کتنے طریقے ان دنوں رائج تھے اور آج بھی رائج ہیں۔ ڈنڈی مارنا، نمونہ کچھ مال مال کچھ ، بلیک مارکٹنگ ، ذخیرہ اندوزی ، لازمی اشیاءکو بازار سے غائب کرادینا۔ سنڈی کیٹ بنانا، ملاوٹ کرنا، جھوٹے اشتہارات دینا، حرام مال بیچنا، سود کھانا، غلط وعدے کرنا، خیانت کرنا اور اپنا خراب مال قسم کھا کر اچھا بتانا۔ یہ تمام برائیاں قوم مدین اور قوم ایکہ میں تھیں۔

قوم میں شرک کے علاوہ سب سے بڑی برائی

حضرت شعیب علیہ السلام کی قوم پر بھی ابلیس شیطان مسلسل محنت کرتا رہا اور انہیں بہکانے کی کوشش کرتا رہا آخر کار وہ کامیاب ہو گیا اورقو م شرک و کفر میں مبتلا ہو گئی۔ اس کے علاوہ اس قوم کا معاشی دارو مدار تجارت پر تھا۔ اسی لئے ابلیس شیطان نے انہیں تجارتی بد دیانتی کے نئے نئے اصول سکھائے۔ مولانا عاشق الٰہی مہاجر مدنی لکھتے ہیں کہ ان لوگوں میں کفر و عناد تو تھا ہی ساتھ میں کیل اور وزن میں کمی کرنا بھی ان میں رواج پذیر تھا۔ بیچتے تھے تو کیل میں یعنی ناپ کر دینے میں او ر وزن میں کمی کر دیتے تھے۔ حضرت عبداللہ بن عباس رضی اللہ عنہ فرماتے ہیں کہ ان لوگوں میں شرک بھی تھا۔ اور اپنے رب کے ساتھ کفر کرنے کے ساتھ ساتھ یہ لوگ ناپ تول میں کمی کرنے والے بھی تھے۔ وہ انتہائی سر کش اور باغی قوم تھی۔ وہ لوگ راستے پر بیٹھ جاتے تھے اور لوگوں کو ان کے مالوں میں نقصان پہنچاتے ۔ یہاں تک کہ وہ مال خرید لیتے تھے۔ اس طریقے کا آغاز سب سے پہلے انہوں نے ہی کیا ۔ جب کوئی اجنبی ان کے پاس آتا تھا تو اسے دراہم ( اُس وقت کے روپئے پیسے ) لے لیتے اور پھر کہہ دیتے تھے کہ تیرے دراہم ( درہم کی جمع) کھوٹے ہیں۔ اور انہیں توڑ دیتے پھر وہ ان ہی دراہم کو اس سے کم قیمت میں خرید لیتے تھے۔ مولانا مفتی محمد شفیع لکھتے ہیں کہ یہ لوگ اللہ تعالیٰ اور اس کے رسولوں پر ایمان نہیں لا کر حقوق اللہ کی خلاف ورزی کر رہے تھے۔ اور اس کے ساتھ خرید و فروخت میں ناپ تول گھٹا کر لوگوں کے حقوق مار رہے تھے۔

خطیب الانبیاء

حضرت شعیب علیہ السلام کی قوم جب کفر و شرک اور برائیوں میں حد سے بڑھ گئی تو اللہ تعالیٰ اُن پر رحم فرمایا اور ان کی رہنمائی اور رہبری کے لئے حضرت شعیب علیہ السلام کو اپنا رسول بنا کر بھیجا۔ حضرت ابو ذر رضی اللہ عنہ فرماتے ہیں کہ رسول اللہ صلی اللہ علیہ وسلم نے فرمایا۔ چار انبیاءعلیہم السلام کا تعلق عرب قوم سے ہے۔ حضرت ہود علیہ السلام ، حضرت صالحعلیہ السلام ، حضرت شعیب علیہ السلام اور اے ابو ذر رضی اللہ عنہ تیرے نبی صلی اللہ علیہ وسلم ۔ علامہ ابن کثیر لکھتے ہیں ۔ بعض سلف صالحین حضرت شعیب علیہ السلام کو ”خطیب الانبیاء“ کے لقب سے موسوم کرتے ہیں۔ یعنی آپ علیہ السلام نہایت فصیح و بلیغ گفتگو فرماتے تھے۔ اور جب اپنی قوم کو تبلیغ فرماتے اور ایمان برسالت کی تلقین کرتے تو عبارت ( تقریر) نہایت ہی بلند اور معنی خیز ہوتی تھی۔ امام محمد بن اسحاق رحمتہ اللہ علیہ ، حضرت عبداللہ بن عباس رضی اللہ عنہ سے روایت کرتے ہوئے کہتے ہیں کہ رسول اللہ صلی اللہ علیہ وسلم جب بھی حضرت شعیب علیہ السلام کا تذکرہ کرتے تو فرماتے تھے۔ آپ علیہ السلام خطیب الانبیاءتھے۔ علامہ محمد بن جریر طبری لکھتے ہیں ۔ حضرت سفیان ثوری رحمتہ اللہ علیہ ( جلیل القدر تابعی اور محدث) فرماتے ہیں کہ حضرت شعیب علیہ السلام کی بینائی کمزور تھی اور آپ علیہ السلام کا لقب”خطیب الانبیاء“ تھا۔ یعنی انبیائے کرام علیہم السلام میں بڑے درجے کے خطیب تھے۔

حضرت شعیب علیہ السلام کا اعلانِ نبوت

حضرت شعیب علیہ السلام کی قوم کو اللہ تعالیٰ نے بے شمار دولت اور نعمتیں عطا فرمائی تھیں۔ اور ان میں دولت کی حرص اور زیادہ پیدا ہو گئی۔ ابلیس شیطان اپنی کوشش میں لگا ہو ا تھا۔ اسی نے اُن کے دل میں دولت کی حرص پیدا کی۔ اور دولت میں اضافے کےلئے انہیں بتوں کی پوجا کی طرف مائل کیا۔ جب وہ بتوں کی پوجا کرنے لگے تو اللہ تعالیٰ نے اُن کی آزمائش کے لئے ان کے رزق میں اور اضافہ کر دیا۔ اس کے بعد اُن کی اولاد ان سے زیادہ گمراہی میں مبتلا ہو گئی۔ اور شیطان کامیاب ہو تا گیا۔ قوم مدین اور قوم ایکہ زیادہ سے زیادہ امیر اور دولت مند ہوتی جا رہی تھی ۔ مدین کا علاقہ تجارتی شاہراہ ( سب سے بڑا تجارتی راستہ ) پر تھا۔ اس لئے وہاں بہت بڑے بڑے بازار ( تجارتی منڈیاں ) تھے۔ اور ان بازاروں میں ایران، عراق ، فلسطین، مصر ، حجاز ( مکہ مکرمہ ، مدینہ منورہ وغیرہ ) اور یمن اور بھی دوسرے ممالک کے تجارتی قافلے آتے تھے۔ اور وہاں اپنا سامان فروخت کر کے اُن لوگوں سے سامان خرید کر اپنے علاقوں میں لے جا کر فروخت کر تے تھے۔ ان تجارتی منڈیوں اور بازاروں کا فائدہ یہ تھا کہ عراق والوں کو یمن کا یا مصر کا سفر نہیں کرنا پڑتا تھا۔ بلکہ اُن ملکوں کے تاجر اور تجارتی قافلے انہیں تجارتی منڈیوں میں مل جاتے تھے۔ اس طرح ہر ملکوں کے تاجر کو آسانی ہو گئی تھی۔ لیکن قوم مدین اور قوم ایکہ نے زیادہ سے زیادہ دولت کمانے کے لئے ان تجارتی قافلوں اور تاجروں کے ساتھ بد دیانتی شروع کر دی۔ دھیرے دھیرے شیطان نے ان کے اندر دولت کمانے کے لئے ناپ تول میں کمی کا احساس پیدا کیا۔ اور جب یہ لوگ ناپ تول میں کمی کرنے لگے تو شروع شروع میں ان لوگوں کا زبردست فائدہ ہوا۔ ایسے کٹھن حالات میں اللہ تعالیٰ نے حضرت شعیب علیہ السلام کو مبعوث فرمایا۔ اور آپ علیہ السلام نے قوم مدین اور قوم ایکہ میں اعلان نبوت فرمایا۔ اور انہیں اسلام کی دعوت دی اور برائیوں سے روکنے کی کوشش کی۔

قوم مدین اور قوم ایکہ کی دادا گیری اور چُنگی وصولی

حضرت وشعیب علیہ السلام نے جس وقت اپنی قوم مےںاعلا ن نبو ت فر ما ےا تو اس وقت ےہ دونو ں قوم بہت امیر تھیں۔قو م مدین تو بوں کی پوجا کرتی تھی اور قوم ایکہ ایک بہت بڑے درخت جس کا نام ایکہ تھا اس کی پوجا کرتی تھی۔ ان دونوں قوموں کے علاقوں سے ہر وقت بے شمار تجارتی قافلے گزرتے رہتے تھے۔ جب ان دونوں قوموں کے لوگوں نے ناپ تول میں کمی کرنی شروع کر دی تو شروع شروع میں ان کا زبردست فائدہ ہوا لیکن دھیرے دھیرے تجارتی قافلے والوں نے ان کی دھوکہ دہی اور بد دیانتی کو سمجھ لیا کہ یہ لوگ لیتے وقت زیادہ لیتے ہیں اور دیتے وقت کم دیتے ہیں۔ اسی لئے دوسرے ممالک کے تجارتی قافلے والوں نے آپس میں خرید و فروخت شروع کر دی اور ان دونوں قوموں سے خرید و فروخت نہیں کرتے تھے۔ ان دونوں قوموں نے جب دیکھا کہ بہت سارے قافلے ہمارے بازار میں ہم سے خرید و فروخت نہیں کرتے ہیں اور اپنا مال دوسرے ممالک کے تجارتی قافلوں کے تاجروں کو بیچ کر زیادہ منافع کماتے ہیں تو قوم مدین اور قوم ایکہ نے اپنے اپنے گروہ بنا لئے اور جو بھی قافلہ ان کے بازار میں لین دین کئے بغیر آگے بڑھتا تھا تو وہ لوگ تجارتی راستے پر اس کے انتظار میں بیٹھے رہتے تھے اور جیسے ہی وہ قافلہ قریب پہنچتا تھا تو اسے گھیر لیتے تھے اور ان کے بازار میں ان سے خرید و فروخت پر مجبور کرتے تھے۔ جو تجارتی قافلہ راضی ہو جاتا تھا تو اس کا اچھا مال سستے داموں میں خرید لیتے تھے ۔ اس کے علاوہ یہ لوگ تجارتی قافلوں سے چنگی بھی وصول کرتے تھے۔ چنگی اسے کہتے ہیں جو حکومت تجارت پر ٹیکس لیتی ہے لیکن یہ لوگ تو غنڈوں کی طرح ہفتہ وصولی کرتے تھے۔

حضرت شعیب علیہ السلام نے قوم کو سمجھایا

حضرت شعیب علیہ السلام نے قوم مدین اور قوم ایکہ میں اعلان نبوت فرمایا اور انہیں اسلام کی دعوت دی۔آپ علیہ السلام نے دونوں قوموں کو ایک ساتھ اسلام کی دعوت دی یا الگ الگ دی۔اس کے بارے میں تو اللہ تعالیٰ ہی بہتر جانتے ہیں۔ لیکن چونکہ اللہ تعالیٰ نے قرآن پاک میں دونوں قوموں کا الگ الگ ذکر فرمایا ہے۔ اسی لئے ہم قوم کا ذکر کر نے کے بعد دوسری قوم کا ذکرکریں گے تا کہ آگے الجھن نہ ہو۔ اللہ تعالیٰ نے سورہ الاعراف میں فرمایا۔ ترجمہ ” اور ہم نے مدین کی طرف اُن کے بھائی شعیب (علیہ السلام ) کو بھیجا۔ انہوں نے فرمایا۔ اے میری قوم، تم اللہ کی عبادت کرو اس کے سوا کوئی تمہارا معبود نہیں ہے۔ تمہارے پاس تمہارے پروردگار کی طرف سے واضح دلیل آچکی ہے۔ پس تم ناپ اور تول پورا پورا کیا کرو۔ اور لوگوں کو ان کی چیزیں کم کر کے مت دو۔ اور زمین پر اصلاح کر دی گئی ہے اس کے بعد فساد مت پھیلاﺅ۔ اور اگر تم جان لو تو یہی تمہارے لئے فائدے مند ہے۔“ ( سورہ الاعراف آیت نمبر 85) اللہ تعالیٰ نے آگے سورہ ہود میں فرمایا۔ ترجمہ ” اور ہم نے مدین والوں کی طرف ان کے بھائی شعیب (علیہ السلام ) کو بھیجا۔ انہوں نے فرمایا۔ اے میری قوم، اللہ کیعبادت کرو۔ اس کے سواتمہارا کوئی معبود نہیں ہے۔ اور ناپ تول میں بھی کمی نہ کرو۔ میں تو تمہیں آسودہ حال دیکھ رہا ہوں اور مجھے تم پر گھیرنے والے دن کے عذاب کا خوف ہے۔ اے میری قوم، ناپ تول انصاف کے ساتھ پوری پوری طرح کرو۔ اور لوگوں کو ان کی چیزیں کم نہ دو اور زمین میں فساد اور خرابی نہ مچاﺅ۔ اور اللہ تعالیٰ کا حلال کیا ہوا جو بیچ رہے ہو وہی تمہارے لئے بہت ہی بہتر ہے۔اگر تم ایماندار ی سے کام لو تو اور میں تم لوگوں پر کچھ نگہبان ( یعنی زبردستی کرنے والا ) نہیں ہوں۔“(سورہ ہود آیت نمبر84 سے 86تک) اللہ تعالیٰ نے آگے سورہ العنکبوت میں فرمایا۔ ترجمہ ” اور مدین کی طرف ہم نے ان کے بھائی شعیب علیہ السلام کو بھیجا ۔ انہوں نے کہا۔ اے میری قوم کے لوگو، اللہ کی عبادت کرو۔ قیامت کے دن پر یقین اور توقع رکھو۔ اور زمین پر فساد کرتے نہ پھرو۔ 

قوم کو محبت، شفقت اور وقار سے سمجھایا کرتے

حضرت شعیب علیہ السلام نے اپنی قوم کو انتہائی محبت سے سمجھایا اور اسلام کی دعوت دی اور جو برائیاں ان میں پیدا ہو گئی تھیں ان سے روکا ۔حضرت عبداللہ بن عباس رضی اللہ عنہ فرماتے ہیں ۔ حضرت شعیب علیہ السلام بڑے حلیم، صادق اور انتہائی باوقار تھے ۔ رسول اللہ صلی اللہ علیہ وسلم جب بھی آپ علیہ السلام کا ذکر فرماتے تھے کہ حضرت شعیب علیہ السلام ” خطیب الانبیاء“ تھے۔ اس لئے کہ جب آپ علیہ السلام اپنی قوم کو دعوت ِ حق ( اسلام کی دعوت) دیتے تو قوم کی طرف رجوع کا انداز حسین اور دلکش ہوتا تھا۔ اور جب وہ لوگ آپ علیہ السلام کی دعوت کا انکار کرتے ہوئے جھٹلادیتے اور آپ علیہ السلام کو رجم ( سنگسار ) کرنے اور شہر سے باہر نکال دینے کی دھمکی دیتے تو ایسی حالت میں بھی آپ علیہ السلام کا انداز انتہائی شستہ اور پُر وقار ہوتا تھا۔ علامہ ابن کثیر لکھتے ہیں کہ آپ علیہ السلام نے بھی تمام رسولوں کی طرح انہیں توحید کی اور شرک سے بچنے کی دعوت دی اور فرمایا کہ اللہ تعالیٰ کی طرف سے میری نبوت کی دلیلیں تمہارے سامنے آچکی ہیں۔ خالق کا حق بتا کر ، پھر مخلوق کے حق کی ادائیگی کی طرف رہبری کی اور فرمایا۔ ناپ تول میں کمی کی عادت چھوڑ دو۔ لوگوں کے حقوق نہ مارو۔ کہو کچھ اور کرو کچھ یہ خیانت ہے۔ قاضی ثناءاللہ پانی پتی لکھتے ہیں۔ اللہ تعالیٰ نے فرمایا۔ یعنی ہم نے مدین بن ابراہیم خلیل الرحمن کی اولاد کی طرف شعیب علیہ السلام کو مبعوث فرمایا۔ آپ علیہ السلام کو ”خطیب الانبیاء“ کا خطاب دیا گیا ہے۔ آپ علیہ السلام نے اپنی قوم کو بہت عمدہ اور حسین انداز میں توحید کی طرف اور نیک خصائل کی طرف بلایا تھا۔ لیکن آپ علیہ السلام کی قوم کفر پر اڑی ہوئی تھی۔ کم تولنا اور کم ناپنا اُن کے مشہور افعالِ قبیمہ تھے۔ آپ علیہ السلام اُن سے فرماتے کہ لوگوں کے حقوق میں کمی نہ کرو۔ کیوں کہ وہ بڑی چھوٹی عظیم و حقیر ، ہر چیز میں کمی کر دیتے تھے۔ بعض علماءفرماتے ہیں کہ ( بڑے بڑے گوداموں میں ) ذخیرہ اندوزی کرتے تھے۔ آپ علیہ السلام انہیں سمجھاتے کہ زمین میں کفر اور ظلم کے ذریعے فساد نہ پھیلاﺅ ۔ اس کے بعد کہ اللہ تعالیٰ نے تمہارے پاس اپنا نبی بھیج دیا ہے۔ جو نیکی کا حکم دیتا ہے اور برائی سے روکتا ہے۔ اور جو میں تمہیں بتا رہا ہوں اور جس کا حکم دے رہا ہوں وہ اس ظلم اور کم تولنے سے بہتر ہے۔ کیوں کہ کم تولنے اور ظلم کرنے میں حالانکہ تمہیں دنیا میں کچھ تھوڑا نفع حاصل ہوتا ہے لیکن یہ گھناﺅنے کرتوت تمہارے لئے دنیا اور آخرت دونوں میں تکلیفوں کا باعث بنتے ہیں۔ جب کہ میں جس چیز کا حکم دے رہا ہوں وہ تمہاری دنیا اور آخرت دونوں کے لئے بہتر ہے۔

قوم کا جواب 

حضرت شعیب علیہ السلام نے اپنی قوم کو انتہائی محبت سے سمجھایا اور انہیں اسلام کی دعوت دی۔ اور جس معاشی برائی میں مبتلا تھے اس کی برائیوں اور انجام سے آگاہ کیا۔ اور اسلام قبول کرنے اور تمام برائیوں کو چھوڑ دینے پر دنیا اور آخرت میں کامیابی کی بشارت دی۔ لیکن ان بد بختوں پر شیطان سوار تھا۔ حالانکہ وہ لوگ بچپن سے آپ علیہ السلام کو دیکھتے آرہے ہیں کہ آپ علیہ السلام انتہائی نیک، عزت دار، عبادت گزار اور ہر وقت لوگوں کی مدد کرنے والے ہیں۔ پھر بھی انہوں نے آپ علیہ السلام کی بات ماننے سے انکار کر دیا۔ اللہ تعالیٰ نے سورہ ہود میں فرمایا۔ ترجمہ ” انہون نے ( حضرت شعیب علیہ السلام کی قوم نے ) جواب دیا۔ اے شعیب علیہ السلام ، کیا تمہاری نماز تمہیں یہی حکم دیتی ہے کہ ہم اپنے باپ دادوں کے معبودوں کو چھوڑ دیں۔ اور ہم اپنے مالوں میں جو کچھ ( منافع کمانا) چاہیں تو اسے بھی کمانا چھوڑ دیں۔ حالانکہ تم تو بنہت ہی با وقار اور نیک چلن آدمی ہو۔ “( سورہ ہود آیت نمبر87) مولانا محمد آصف قاسمی لکھتے ہیں ۔ حضرت شعیب علیہ السلام کو اہل مدین کی اصلاح اور درستی کے لئے بھیجا گیا تھا۔ انہوں نے اپنی قوم کی اصلاح کے لئے ایک اللہ کی بندگی اور اطاعت کا درس دیا۔ یہ وہی تعلیم ہے جو تمام انبیائے کرام نے کفر و شرک میں مبتلا قوموں کو دی تھی۔ حضرت شعیب علیہ السلام نے فرمایا ۔ کہ میری قوم کے لوگو، تم اس ایک اللہ کی بندگی و عبادت کرو جس کے سوا کوئی معبود نہیں ہے۔ وہی تمہارا خالق و مالک اور کار ساز ہے۔ ان کی اخلاقی اصلاح کے لئے فرمایا کہ ناپ تول میں کمی نہ کرو۔ ورنہ مجھے ڈر ہے کہ تمہاری ان بے ایمانیوں کے نتیجے میں اللہ کا وہ عذاب آضائے گا جس سے بچ کر نکلنا ممکن نہیں ہو گا۔ ان کے معاشرہ کی اصلاح کے لئے فرمایا کہ تم فساد فی الارض نہ کرو۔ کیوں کہ اللہ تعالیٰ فساد کرنےوالوں کو پسند نہیں کرتے ہیں۔ اُن کے ایمان کی تقویت کے لئے فرمایا کہ حلال ذریعوں سے جو بھی رزق تمہارا مقدر ہے اس پر گزارہ کرو۔ اور ہوس اور لالچ کے ہر انداز کو چھوڑ دو۔ حضرت شعیب علیہ السلام نے اُن کے تمدن ، تہذیب ، اخلاق اور ایمان کی اصلاح کے بہترین اور مخلصانہ طریقے ارشاد فرمائے۔ پوری قوم کا یہی جواب تھا کہ اے شعیب ( علیہ السلام ) کیا تمہاری نماز اور عبادت تمہیں یہی سکھاتے ہیں کہ تم ہم سے ایسی باتیں کرو اور ہمارا وہ مال جس میں ہمیں ہر طرح کے تصرف کا حق حاصل ہے۔ اسے اپنی مرضی سے خرچ نہ کریں۔ اور کیا ہم اپنی کاروباری زندگی کورزق حلال کے چکر میں تباہ و بربادکر ڈالیں؟

قوم نے آپ علیہ السلام کا مذاق اڑایا

حضرت شعیب علیہ السلام کی محبت بھری دعوت و تبلیغ کے جواب میں قوم نے آپ علیہ السلام کا مذاق اڑایا۔ مولانا عاشق الٰہی مہاجر مدنی لکھتےہیں ۔ یہ لوگ بھی مشرک تھے۔ غیر اللہ کی عبادت کرتے تھے۔ اور لوگوں کو جو مال بیچتے تھے تو ناپ تول میں کمی کرتے تھے۔ حضرت شعیب علیہ السلام نےا ُن کو تبلیغ کی اور اُن سے فرمایا کہ صر ف اللہ کی عبادت کرو۔ اس کے سوا تمہارا کوئی معبود نہیںہے ۔ نیز یہ بھی فرمایا کہ لوگوں کو ان کے مال پورے پورے انصاف کے ساتھ دو۔ ناپ تول میں کمی نہ کرو۔ اللہ کا دیا ہوا جو حلال مال بچ جائے وہ تمہارے لئے بہتر ہے اس مال سے جو تم ناپ تول میں کٹوتی کر کے حاصل کرتے ہو۔ حلال میں برکت ہوتی ہے چاہے وہ کم ہی ہو۔ حرام چاہے زیادہ ہو لیکن اس میں برکت نہیں ہوتی ہے۔ اور آخرت میں دوزخ میں لے جانے والا ہوتا ہے۔ لہٰذا تم حلال پر اکتفا کرو اور زمین میں فساد نہ مچاﺅ اور ساتھ ہی یہ بھی فرمایا کہ میں تمہارا پہرہ دار نہیں ہوں کہ تم سے زبردستی وہ عمل کرواﺅں جس کا میں حکم دے رہا ہوں۔ جو ب میں وہ لوگ بیہودگی پر اتر آئے اور کہنے لگے۔ کہ واہ میاں تم بڑے نمازی آئے ، کیا تمہاری نماز یہ بتاتی ہے کہ ہم اُن چیزوں کی عبادت چھوڑ دیں جن کی ہمارے باپ دادا کرتے ہوئے آئے ہیں۔ نماز کا ذکر انہوں نے استہزاءاور تمسخر کے طور پر کیا۔ اور ساتھ ہی یہ بھی کہا کہ تمہاری نماز عجیب ہے۔ ہم جو سامان بیچتے ہیں اس پر پابندی لگا تی ہے۔ ہمارا مال ہے ۔ اسے ہم جیسے چاہیں بیچیں۔ پورا ناپ تول کر دیں یا ناپ تو ل میں کمی کرکے دیں۔ تمہیں اور تمہاری نماز کو اس سے کیا سروکار ہے۔ تم تو بڑے بردبار نیک چلن معلوم ہوتے ہو۔ یہ بھی انہوں نے بطور تمسخر کہا۔ 

کیا تمہاری نماز یہی حکم دیتی ہے؟

حضرت شعیب علیہ السلام کی محبت آمیز دعوت و تبلیغ کا اُن کی قوم طعنے بھرے جوب دے رہی تھی۔ مولانا مفتی محمد شفیع لکھتے ہیں۔ یعنی کیا تمہاری نماز تمہیں یہ بتلاتی ہے کہ ہم اُن معبودوں کو چھوڑ دیں جن کو پوجا ہمارے آباﺅ اجداد کرتے چلے آئے ہیں۔ اور یہ کہ ہم اپنے مملوک امول میں میں خود مختار نہ رہیں کہ جس طرح ہمارا جی چاہے معاملہ کریں۔ بلکہ اپنے معاملات میں بھی آپ علیہ السلام سے پوچھ پوچھ کر کریں کہ کیا حلال ہے اور کیا حرام ہے؟ حضرت شعیب علیہ السلام کی نماز پوری قوم میں معروف تھی کہ آپ علیہ السلام بکثرت نوافل و عبادات میں لگے رہتے تھے۔ مولانا سید ابو الاعلیٰ مودودی لکھتے ہیں ۔ یہ در اصل ایک طعن آمیز فقرہ ہے۔ جس کی روح آج بھی آپ ہر اُس سوسائٹی میں موجود پائیں گے جو اللہ تعالیٰ سے غافل اور فسق و فجور میں ڈوبی ہوئی ہو۔ چونکہ نماز دینداری کا سب سے پہلا اور سب سے زیادہ نمایاں مظہر ہے۔ اور دینداری کو فاسق وفاجر لوگ ایک خطرناک ، بلکہ سب سے زیادہ خطرناک مرض سمجھتے ہیں۔ اسی لئے نماز ایسے لوگوں کی سوسائٹی میں عبادت کی بجائے علامتِ مرض شمار ہوتی ہے۔ کسی شخص کو اپنے درمیان نماز پڑھتے دیکھ کر انہیں فوراً یہ احساس ہو جاتا ہے کہ اس شخص پر ”مرض دینداری“ کا حملہ ہو گیا ہے۔ پھر یہ لوگ دینداری کی اس خاصیت کو بھی جانتے ہیں کہ یہ چیز جس شخص کے اندر پیدا ہو جاتی ہے وہ صرف اپنے حسن عمل پر قانع نہیں رہتا ہے۔ بلکہ دوسروں کو بھی درست کرنے کی کوشش کرتا ہے۔ اور بے دین و بد اخلاقی پر تنقید کئے بغیر اس سے رہا نہیں جاتا۔ اسی لئے نماز پر اُن کا اضطراب صرف اس حیثیت سے نہیں ہوتا کہ اُن کے ایک بھائی پر دینداری کا دورہ پڑ گیا ہے بلکہ اس کے ساتھ ہی انہیں یہ کھٹکا بھی لگ جاتا ہے کہ اب عنقریب اخلاق و دیانت کا وعظ شروع ہونے والا ہے۔ اور اجتماعی زندگی کے ہر پہلو میں کیڑے نکالنے کا ایک لا متناہی سلسلہ چھڑ ا چاہتا ہے۔ یہی وجہ ہے کہ ایسی سوسائٹی میں ماز سب سے بڑھ کر طعن و تشنیع کی ہدف بنتی ہے۔ اور اگر کہیں نماز ی آدمی ٹھیک ٹھیک انھی اندیشوں کے مطابق جو اس کی نماز سے پہلے ہی پیدا ہو چکے تھے برائیوں پر تنقید اور بھلائیوں کی تلقین بھی شروع کر دے۔ تب تو نماز اس طرح کو سی جاتی ہے کہ ساری بلا اُسی کی لائی ہوئی ہے۔

قوم کو پھر محبت سے سمجھایا

حضرت شعیب علیہ السلام کی قوم آپ علیہ السلام کا مذاق اڑانے لگی۔ پھر آپ علیہ السلام نے انہیں بڑی محبت سے سمجھایا ۔ کہ اللہ تعالیٰ نے مجھے تمہاری طرف اپنا نبی بنا کر بھیجا ہے اور میں تمہاری دنیا اور آخرت کی بھلائی اور کامیابی کی بتا رہا ہوں۔ تم لوگ اس پر عمل کرو گے تو تمہارا ہی فائدہ ہو گااور نہیں عمل کرو گے تو تمہارا ہی نقصان ہوگا۔ اور میرا تو بالکل ایسا ارادہ نہیں ہے کہ جس عمل سے تمہیں روک رہا ہوں میں خود وہ عمل کروں۔ بلکہ میں تو خود اللہ تعالیٰ کی دی ہوئی ہدایات کے مطابق عمل کرتا ہوں۔ اور تمہارے لئے بھی یہی کوشش کرتا ہوں کہ تم بھی اللہ تعالیٰ کی ہدایات کے مطابق زندگی گزارو۔ اور میں یہ اللہ تعالیٰ کی توفیق سے ہی کرتا ہوں اور اسی پر مجھے مکمل بھروسہ ہے۔ اس کے بارے میں روشن دلیل لئے ہوئے ہوں اور اُس نے مجھے اپنے پاس سے بہترین روزی دے رکھی ہے۔ میرا یہ ارادہ بالکل نہیں ہے کہ تمہارا خلاف کر کے خود اس چیز کی طرف جھک جاﺅں جس سے تمہیں روک رہا ہوں۔ میرا ارادہ تو اپنی طاقت بھر تمہاری اصلاح کرنے کا ہے۔ اور میری توفیق اللہ ہی کی مدد سے ہے۔ اسی پر میرا بھروسہ ہے اور اسی کی طرف میں رجوع کرتا ہوں۔“

کچھ لوگوں نے اسلام قبول کیا

حضرت شعیب علیہ السلام انتہائی محبت اور شفقت سے اپنی قوم کو سمجھا رہے تھے۔ اور اس کا کافی اثر بھی قوم پر پڑا تھا۔ آپ علیہ السلام کی پوری قوم عزت کرتی تھی۔ اس لئے آپ علیہ السلام کی بات کو توجہ سے سنتی تھی۔ لیکن قوم کا دولت مند طبقہ تھا۔وہ آپ علیہ السلام کا سب سے بڑا دشمن بن گیا اور آپ علیہ السلام کی دعوت میں سب سے بڑی رکاوٹ بن گیا۔ قوم کا متوسط طبقہ اور غریب لوگ آپ علیہ السلام کی اسلام کی دعوت سے متاثر ہوئے اور اسلام قبول کیا۔ آپ علیہ السلام کی قوم تجارت پیشہ تھی اور سب لوگ تجارت سے منسلک تھے۔ اور ان کے علاقے میں بہت بڑی بڑی تجارتی منڈیاں تھیں۔ اور ان منڈیوں پر آپ علیہ السلام کی قوم کے بڑے بڑے بیوپاریوں کا قبضہ تھا۔ اور وہ لوگ اپنی قوم کے غریب تاجروں کا استحصال کرتے تھے۔ اور دوسرے ممالک کے تاجروں اور تجارتی قافلوں کے ساتھ تو ان کا سلوک بہت ہی برا تھا۔ اس زمانے میں درہم اور دینار ( اس وقت کا روپیہ اور پیسہ) چاندی اور سونے کے ہوتے تھے۔ یہ لوگ دوسرے ملکوں کے تاجروں کے درہموں اور دیناروں کو سورے سے اُن کی نظر بچا کر اُن کے کناروں کو کاٹ دیتے تھے اور کہتے تھے ، یہ کھوٹے ہیں۔ اس کے علاوہ اُن سے اچھا مال سستے داموں میں خریدتے تھے اور اپنا خراب مال مہنگے داموں میں بیچتے تھے۔ جب ان کی قوم کے کچھ لوگوں نے اسلام قبول کیا تو یہ لوگ ان کے بھی دشمن بن گئے۔ اور ان کے ساتھ انتہائی حقار ت آمیز سلوک کرنے لگے۔ لیکن جو شخص آپ علیہ السلام کی دعوت کو قبول کر لیتا تھاتو وہ سختی سے اسلام پر جم جاتا تھا۔ اور ہر تکلیف اور مصیبت کو خوشی خوشی برداشت کر تا تھا۔ اللہ تعالیٰ نے اس کے بارے میں سورہ الاعراف میں فرمایا۔ ترجمہ ” ( حضرت شعیب علیہ السلام نے فرمایا) اور تم سڑکوں پر اس غرض سے مت بیٹھا کرو کہ اللہ پر ایمان لانے والے کو دھمکیاں دو اور اللہ کی راہ سے روکو اور اس میں کجی کی تلاش میں لگے رہو۔ اور اُس حالت کو یاد کرو جب کہ تم کم تھے۔ پھر اللہ تعالیٰ نے تم کو زیادہ کر دیا۔ اور یہ بھی تو دیکھو کہ کیسا انجام ہوا فساد کرنے والوں کا۔ اور اگر تم میں سے کچھ لو گ اس حکم پر جو دے کر مجھے بھیجا گیا ہے۔ اُس پر ایمان لائے ہیں اور کچھ ایمان نہیں لائے ہیں تو ذرا ٹھہر جاﺅ، یہاں تک کہ اللہ تعالیٰ ہمارے درمیان فیصلہ کر دے۔ اور وہ سب سے بہتر فیصلہ کرنے والا ہے۔“ ( سورہ الاعراف آیت نمبر86، 87)

راستوں پر بیٹھتے تھے

سورہ الاعراف کی آیت نمبر86کی تفسیر میں مولانا عاشق الٰہی مہاجر مدنی لکھتے ہیں ۔ یہ لوگ راستوں پر بیٹھ جاتے تھے۔ اور جو لوگ بستی میں ( یعنی ان کی تجارتی منڈیوں میں ) آنے والے ہوتے تھے۔ اُن کو ڈراتے اور دھمکاتے تھے اور کہتے تھے کہ دیکھو اگر تم لوگ شعیب علیہ السلام کی بات مانو گے تو ہم تمہیں مار ڈالیں گے۔ اور ساتھ ہی حضرت شعیب علیہ السلام کے بتائے ہوئے دین میں کجی تلاش کرتے تھے اور سوچ سوچ کر اعتراض نکالتے تھے۔ علامہ ابن کثیر سورہ الاعراف کی آیت نمبر86 اور 87کی تفسیر میں لکھتے ہیں ۔ فرماتے ہیں کہ مسافروں کے راسے میں دہشت گردی نہ پھیلاﺅ۔ ڈاکہ نہ ڈالو اور انہیں ڈرا دھمکا کر اُن کا مال زبر دستی نہ چھینو۔ میرے پاس جو ہدایت کے لئے آنا چاہتا ہے تم اسے خوف زدہ کر کے روک دیتے ہو۔ ایمان والوں کو اللہ کی راہ چلنے میں روڑے اٹکاتے ہو۔ اور حق کے راستے کو ٹیڑھا کر دینا چاہتے ہو۔ ان تمام برائیوں سے بچو۔ یہ بھی ہو سکتا ہے بلکہ زیادہ ظاہر ہے کہ ہر راستے پر نہ بیٹھتے کی ہدایت تو قتل و غارت گری کے سد باب کےلئے جو اُن کی عادت تھی۔ اور پھر راہِ حق سے مومنوں کو نہیں روکنے کی ہدایت بعد میں دی ہو۔ ( اور پھر فرمایا) تم اللہ تعالیٰ کے احسان کو یاد کرو کہ گنتی میںاور قوت میں تم کچھ نہیں تھے۔ بہت ہی کم تھے۔ اس نے تمہاری تعداد بڑھادی اور تمہیں زور آور کر دیا۔ رب کی اس نعمت کا شکریہ ادا کرو۔ عبرت کی آنکھوں سے اُن کا انجام دیکھ لو جو تم سے پہلے ابھی ابھی گزر چکے ہیں۔ جن کے ظلم و جبر کی وجہ سے ، جن کی بد امنی اور فساد کی وجہ سے اللہ کے عذاب اُن قوموں پر ٹوٹ پڑے اور وہ مر مٹ گئے دیکھو میں تم کو صاف بے لاگ ایک بات بتا دوں ۔ تم میں سے ایک گروہ مجھ پر ایمان لا چکا ہے اور ایک گروہ نے میرا نکار کیا ہے۔ اور بری طرح مجھ سے کفر کیا ہے۔ اب تم خود دیکھ لو کہ اللہ کی مدد کس کا ساتھ دیتی ہے۔ اور کون اللہ تعالیٰ کی نظروں سے گر جاتا ہے؟ تم رب کے فیصلے کے منتظر رہو۔ وہ سب فیصلہ کرنے والوں سے اچھا اور سچا فیصلہ کرنے والا ہے۔

قوم شعیب علیہ السلام کی برائیوں پر عمل کرنے پر اُمت مسلمہ کی پکڑ 

حضرت شعیب علیہ السلام کی قوم جن برائیوں میں مبتلا تھی اگر اُن برائیوں میں امت مسلمہ ( رسول اللہ صلی اللہ علیہ وسلم کی امت) بھی مبتلا ہو جائے تو وہ بھی اسی سزا کی حقدار ہو گی جو حضرت شعیب علیہ السلام کی قوم کو ملی تھی۔ ( یہاں یہ بات ذہن میں رکھیں کہ حضور صلی اللہ علیہ وسلم سے لے کر قیامت تک جتنے انسان پیدا ہوں گے وہ سب آپ صلی اللہ علیہ وسلم کی امت ہیں۔ ان میں یہودی ، عیسائی، ہندو اور دیگر دوسرے مذاہب بھی آجاتے ہیں) مولانا مفتی محمد شفیع لکھتے ہیں ۔ اس سے پہلے تو ایک خاص جرم سے منع فرمایا گیا تھا۔ جو خرید و فروخت کے وقت ناپ تول میں کمی کی صورت سے کیا جاتا تھا۔ بعد میں لا تبخسو الناس اشیآ ءہم فرما کر ہر طرح کے حقوق میں کتر بیونت اور کمی کو تاہی کو عام کر دیا۔ خواہ وہ مال سے متعلق ہو یا عزت و آبرو سے یا کسی دوسری چیز سے ( بحر محیط) اس سے معلوم ہوا کہ جس طرح ناپ تول میں حق سے کم دینا حرام ہے۔ اسی طرح دوسرے حقوق انسانی میں کمی کرنا بھی حرام ہے۔ کسی کی عزت و آبرو پر حملہ کرنا۔ یا کسی کے درجہ اور رتبہ کے مطابق اس کا احترام نہ کرنا۔جس جس کی اطاعت واجب ہے اُن کی اطاعت میں کوتاہی کرنا یا جس شخص کی تعظیم و تکریم واجب ہے اس میں کوتاہی برتنا یہ سب امور اسی جرم میں داخل ہیں جو حضرت شعیب علیہ السلام کی قوم کیا کرتی تھی۔ حجتہ الوداع کے خطبہ میں رسول اللہ صلی اللہ علیہ وسلم نے لوگوں کی آبرو کو اُن کے خون کے برابر واجب الاحترام او رقابل ِحفاظت قرار دیا ہے ۔ اس کا بھی حاصل یہ ہے۔ قرآن مجید میں ”مطففین “ اور ”تطفیف “ کا ذکر آیا ہے۔ اس میں یہ سب چیزیں داخل ہیں۔ حضرت فاروق اعظم رضی اللہ عنہ نے ایک شخص کو جلدی جلدی رکوع او ر سجدے کرتے ہوئے دیکھا تو فرمایا۔ قد طففت۔ یعنی تو نے ناپ تول میں کمی کر دی۔ مراد یہ ہے کہ جو نماز کا حق تھا وہ تو نے پورا نہیں کیا۔ اس میں حق نماز کو پورا نہیں کرنے کو تطفیف کے لفظ سے تعبیر کیا گیا ہے۔ 

ہم راستوں پر بیٹھ کر کیا کرتے ہیں

حضرت شعیب علیہ السلام اور ان کے قوم کے حالات آج ہم لگ بھگ ساڑھے تین یا چار ہزار سال بعد پڑھ رہے ہیں۔ یہاں ذرا سا رُک کر ہم یہ غور کریں کہ آج ہم کیا کرتے ہیں۔ ہم راستوں میں ہوٹلوں پر ، چوک چوراہوں پر راستوں کے کنارے گھروں اور دکانوں ،پٹریوں اور پینتریوں پر بیٹھ جاتے ہیں۔ اور ہر آنے جانے والے شخص اور خصوصاً خواتین کو آتے جاتے گھورتے رہتے ہیں۔ اور ان کے بارے میں تبصر ے کرتے رہتے ہیں۔ ان آنے جانے والوں میں وہ مسلم خواتین بھی ہوتی ہیں جو پانی بھرتی ہیں اور سرکاری بیت الخلاءمیں رفع حاجت کرنے جاتی ہیں۔ اُن بے چاری خواتین کی مجبوری ہوتی ہے ۔ کیا کبھی ہم نے غور کیا ہے کہ ہم نے خود اپنی قوم کی بیٹیوں کو بے حیا بنا رہے ہیں۔ وہ بے چاری شرماتی ہوئی ، گھبراتی ہوئی اُن راستوں کی جگہوں سے گزرتی ہیں۔ جہاں ہم بڑی شان سے تشریف فرما ہوتے ہیں۔ اور انہیں گھورتے رہتے ہیں۔ دھیرے دھیرے ہماری وجہ سے قوم کی بیٹیاں بے حیائی میں مبتلا ہو جاتی ہیں۔

قوم کی دھمکی

اللہ کے حکم سے حضرت شعیب علیہ السلام اپنی قوم کو اسلام کی دعوت دے رہے تھے اور سمجھا رہے تھے ۔ لیکن قوم کی اکثریت پر ابلیس شیطان سوار تھا۔ اور وہ بد بخت لوگ آپ علیہ السلام کی دعوت کو سمجھنے کے بجائے الٹا آپ علیہ السلام کے دشمن بن گئے اور آپ علیہ السلام کو دھمکیاں دینے لگے۔ اللہ تعالیٰ نے اس کے بارے میں فرمایا۔ ترجمہ ” انہوں نے ( حضرت شعیب علیہ السلام کی قوم نے ) کہا۔ اے شعیب (علیہ السلام )، تمہاری اکثر باتیں تو ہماری سمجھ میں ہی نہیں آرہی ہیں۔ اور ہم تو تمہیں اپنے اندر بہت کمزور پاتے ہیں۔ اگر تمہارے قبیلے والوں کا خیال نہیں ہوتا تو ہم تمہیں سنگسار ( پتھر مار مار کر مار ڈالتے) کر دیتے۔ اور ہم تم کو کوئی حیثیت والی ہستی سمجھتے ہی نہیں ہیں۔ “ (سورہ ہود آیت نمبر91)مولانا محمد آصف قاسمی لکھتے ہیں ۔ حضرت شعیب علیہ السلام جو تما م انبیائے کرام میں بہترین خطیب تھے۔ جب اپنی بات سے فارغ ہو گئے تو قوم کے سردار کہنے لگے کہ اے شعیب ( علیہ السلام ) تمہاری باتیں ہماری سمجھ سے باہر ہیں ہماری سمجھ میں نہیں آرہی ہیں۔ اور کہنے لگے اے شعیب (علیہ السلام ) تمہارے خاندان کا لحاظ آڑے آجاتا ہے۔ ورنہ تمہاری ان باتوں پر جی چاہتا ہے کہ تمہیں پتھروں سے کچل دیا جاائے۔ اور پتھر برسائے جائیں۔ اور ہمارے لئے ایسا کرنے میں کوئی دشواری بھی نہیں ہے۔ لیکن تمہارے خاندان کا خیال آجا تا ہے۔ مولانا عاشق الٰہی مہاجر مدنی لکھتے ہیں۔ حضرت شعیب علیہ السلام کی دعوت برابر جاری رہی۔ قوم کی اصلاح کی کوشش کرتے رہے لیکن وہ لوگ اپنے کفر و شرک پر جمے رہے۔ انہوں نے آپ علیہ السلام کو جو جواب دیئے اُن میں سے ایک یہ بھی تھا کہ تمہاری بارتیں ہماری سمجھ میں نہیں آتیں ہیں۔ یہ بات انہوں نے استہزاءً یا تحقیراً کہی۔ جس کا مطلب یہ تھا کہ تمہاری باتیں سمجھنے کے قابل ہی نہیں ہیں۔ اپنی اس بے ہودہ بات کے ساتھ ہی انہوں نے یہ بھی کہا کہ تم ہماری جماعت کے سامنے کمزور آدمی ہو۔ لیکن تمہارے خاندان کے لوگ جو ہمارے ہم مذہب ہیں ان کے پاسداری کر رہے ہیں۔ اگر ان کا پاس نہ ہوتا تو ہم تمہیں سنگسار کر دیتے ۔ یعنی پتھر مار مار کر ہلاک کر دیتے۔ گو کہ ہمارے نزدیک تمہاری کچھ عزت اور وقعت نہیں ہے۔ بس تمہارے خاندان کا خیال ہے جس کی وجہ سے ہم حملہ کرنے سے رکے ہوئے ہیں۔

پچھلی قوموں پر اللہ کے عذاب سے سبق سیکھو

اللہ تعالیٰ نے سورہ ہود میں فرمایا۔ (حضرت شعیب علیہ السلام نے فرمایا) اے میری قوم کے لوگو، کہیں ایسا نہ ہو کہ تم کو میری مخالفت ان عذابوں کا باعث ( مستحق) بنادے جو قوم نوح اور قوم ہود او ر قوم صالح کو پہنچے ہیں۔ اور قوم لوط کا عذاب تو تم سے کچھ دو ر نہیں ہے۔ تم اپنے رب ( اللہ تعالیٰ) سے استغفار کرو اور اس کی طرف توجہ کرو۔ یقین مانو کہ میر ارب بڑی مہربانی والا اور محبت کرنے والا ہے۔“ ( سورہ ہود آیت نمبر90) مولانا مفتی محمد شفیع لکھتے ہیں۔ اس پندو نصیحت کے بعد پھر اُن کو اللہ تعالیٰ کے عذاب سے ڈرایا کہ تم سوچو سمجھو۔ ایسا نہ ہو کہ میری مخالفت اور عداوت تم پر کوئی ایسا عذاب لا ڈالے جیسا تم سے پہلے قوم نوح، قوم ہود ، قوم صالح پر آچکا ہے۔ اور حضرت لوط علیہ السلام کی قوم اور ان کا عبرتناک عذاب تو تم سے کچھ دو ربھی نہیں ہے۔ یعنی مقامی اعتبار سے بھی قوم لوط کی الٹی ہوئی بستیاں مدین کے قریب ہی ہیں اور زمانہ کے اعتبار سے بھی ۔ تم سے بہت قریب زمانہ میں ان پر عذاب آیا ہے۔ اس سے عبرت حاصل کرو اور اپنی ضد سے باز آجاﺅ۔ مولانا مفتی احمد یار خان نعیمی لکھتے ہیں۔ ( حضرت شعیب علیہ السلام نے فرمایا) اے میری قوم کہیں تم پر ویسا عذاب نہ آجائے۔ جیسا قوم نوح کے غرق ہونے کا، قوم ہود کو آندھی کا او ر قوم صالح کو زلزلے اور چیخ کا عذاب دیا گیا تھا۔ ان تاریخی واقعات کو تو تم جانتے ہی ہو اور تم نے اپنے بڑوں سے سب کچھ سن رکھا ہے۔ اور اب میں تم کو سنا رہا ہوں۔ اور قوم لوط کے عذاب اور ہلاکت کا واقعہ تو تم سے کچھ دور بھی نہیں ہے۔ نہ تو اُن کے عذاب کو زیادہ زمانہ گزرا ہے اور نہ ہی اس بستی کے کھنڈرات تم سے زیادہ دور ہیں۔ اور اس تباہ شدہ اجڑتی بستی کو تم دن رات آتے جاتے اپنے سفروں میں دیکھتے بھی ہو۔ اس لئے ان سے عبرت پکڑلو۔ علامہ غلام رسول سعیدی لکھتےہیں کہ حضرت شعیب علیہ السلام نے فرمایا۔ اے میری قوم، میرا بغض اور مجھ سے عداوت اور میرے دین سے نفرت تمہیں اس پر نہ ابھار دے کہ تم اللہ تعالیٰ کے ساتھ کفر اور بت پرستی اور ناپ تول میں کمی کرنے اور توبہ اور استغفار کو ترک کر دینے پر جمے رہو اور ڈٹے رہو۔ یہاں تک کہ تم بھی ایسا عذاب آجائے جو تم کو جڑ سے اکھاڑ کر ملیا میٹ کر دے۔ جیسا کہ قوم نوح پر پانی کے طوفان میں غرق کرنے کا عذاب آیا۔ اور قوم ہود پر ایک سخت اور زبردست آندھی کا عذاب آیا اور قوم صالح پر زلزلہ اور چنگھاڑ کا عذاب آیا۔ اور قوم لوط کے اوپر ان کی زمین کو پلٹ دیا گیا۔ اور فرمایا کہ قوم لوط تو تم سے زیادہ دور بھی نہیں ہے۔ اسی لئے تم ان کے حالات سے عبرت پکڑو اور سبق سیکھو اور اللہ تعالیٰ اور اس کے رسول کی مخالفت کرنے سے گریز کرو۔ ورنہ تم پر بھی پچھلی قوموں کی طرح عذاب آجائے گا۔ مولانا مودودی لکھتے ہیں۔ یعنی قوم لوط کا واقعہ تو ابھی تازہ ہی ہے۔ اور تمہارے قریب ہی کے علاقے میں پیش آچکا ہے۔ غالباً اس وقت قوم لوط کی تباہی پر چھ سات سو برس سے زیادہ نہیں گزرے تھے اور جغرافیائی لحاظ سے بھی قوم شعیب کا ملک اس علاقے سے بالکل متصل واقع تھاجہاں قوم لوط رہتی تھی۔

قوم کے متکبر سرداروں کا جواب

حضرت شعیب علیہ السلام اپنی قوم کو بڑی محبت سے سمجھاتے رہے لیکن اُن کی بد بختی کہ وہ بدستور کفر و شرک پر اڑے رہے اور برائیوں میں مبتلا رہے۔ بلکہ اس سے بھی آگے بڑھ کر آپ علیہ السلام کی شان میں گستاخیاں بھی کرنے لگے۔ اللہ تعالیٰ نے سورہ الاعراف میں فرمایا۔ ترجمہ ” اُن کو ( حضرت شعیب علیہ السلام کی) قوم کے متکبر سرداروں نے کہا۔ اے شعیب ( علیہ السلام )ہم آپ کو اور جو آپ کے اوپر ایمان لائے ہیں اُن کو بھی اپنی بستی سے نکال دیں گے۔ یا پھر یہ کہ تم ہمارے مذہب میں پھر آجاﺅ۔ “ ( سورہ الاعراف آیت نمبر88) جس طرح سے ہر قوم کا کنٹرول اُس قوم کے حکمرانوں ، سرداروں ، مذہبی پیشواﺅں ، بیوپاریو ں اور سرمایہ داروں کے ہاتھوں میں ہوتا ہے۔ اسی طرح قوم شعیب پر بھی اسی قسم کے لوگ حاوی تھے۔ اور حضرت شعیب علیہ السلام کے سب سے بڑے دشمن بھی یہی لوگ تھے۔ ان بد بختوں نے کھلے عام آپ علیہ السلام کو دھمکیاں دینی شروع کر دیں۔ اور اپنی قوم کے عام لوگوں کو بھی آپ علیہ السلام کے خلاف بھڑکانا شروع کر دیا۔ اللہ تعالیٰ نے اس کے بارے میں سورہ الاعراف میں فرمایا۔ ترجمہ ” اور اُن کی قوم کے کافر سرداروں نے کہا کہ اگر تم شعیب ( علیہ السلام ) کی راہ پر چلو گے تو بے شک بڑا نقصان اٹھاﺅ گے۔ “ (سورہ الاعراف آیت نمبر90) ان بد بخت کافر سرداروں نے عوام کو آپ علیہ السلام کی دعوت کو قبول کرنے سے ہر ممکن طریقے سے روک دیا۔ اور اسی پر بس نہیں کیا بلکہ آپ علیہ السلام کو دھمکی دی کہ تم اپنے ساتھ عوام کو لے کر ہماری بستی سے نکل جاﺅ۔ یا پھر اپنی اسلام کی دعوت دینا چھوڑ دو۔ اور اگر تم ایسا نہیں کرو گے تو ہم لوگ تمہیں اور تمہارے ساتھ ایمان والوں کو ہلاک کر دیں گے۔ لیکن تمہارے قبیلے اور خاندان والے ہمارے ساتھی ہیں اسی لئے ابھی تک تمہیں چھوٹ دے رکھی ہے۔ اللہ تعالیٰ اس کے بارے میں سورہ ہود میں فرماتے ہیں ۔ترجمہ ” انہوں نے کہا۔ اے شعیب علیہ السلام ، تمہاری اکثر باتیں ہماری سمجھ میں نہیں آتی ہیں۔ اور ہم تو تمہیں ہمارے درمیان بہت کمزور پاتے ہیں۔ اگر ہمیں تمہارے قبیلے کا خیال نہیں ہوتا تو ہم تمہیں سنگسار کر دیتے اور ہم تمہیں کو حیثیت والی ہستی سمجھتے ہی نہیں ہیں۔“ ( سورہ ہود آیت نمبر91)

میرا بھروسہ صرف اللہ تعالیٰ پر ہے

حضرت شعیب علیہ السلام کی قوم کے بڑے بڑے کافر سردار آپ علیہ السلام سے کھل کر دشمنی کر نے لگے۔ اور ایمان والوں کو بھی ستانے لگے۔ جب قوم کے متکبر سرداروں نے بستی چھوڑ دینے یا پھر دوبارہ ( نعوذ باللہ ) کا فر ہوجانے کے بارے میں کہا تو آپ علیہ السلام نے اپنی قوم کو بہت سخت جواب دیا ۔ اس کے بارے میں اللہ تعالیٰ نے فرمایا۔ ترجمہ ” حضرت شعیب علیہ السلام نے فرمایا۔ ہم تمہارے مذہب کو بہت ہی مکروہ سمجھتے ہیں۔ ( اس کے باوجود تم چاہتے ہو کہ ) ہم تمہارے مذہب میں آجائیں اگر ہم تمہارے دین میں آجائیں گے تو ہم اللہ تعالیٰ پر بڑی جھوٹی تہمت لگانے والے ہو ں جائیں گے۔ جب کہ اللہ تعالیٰ نے ہم کو اس ( تمہارے مذہب ) سے نجات دلائی ہے۔ اور یہ ممکن ہی نہیں ہے کہ ہم تمہارے مذہب میں آجائیں۔ لیکن ہاں یہ کہ اللہ ہی نے جو ہمارا مالک ہے مقدر کیا ہو۔ ہمارے رب کا علم ہر چیز پر محیط ہے۔ ہم اللہ پر ہی بھروسہ رکھتے ہیں۔ اے ہمارے پروردگار، ہمارے اور ہماری قوم کے درمیان حق کے موافق فیصلہ کر دے اور تو سب سے اچھا فیصلہ کرنے والا ہے۔ ( سورہ الاعراف آیت نمبر88اور 89) حضرت شعیب علیہ السلام نے اپنی قوم کے متکبر سرداروں کو صاف صاف فرما دیا کہ میرا اور ایمان والوں کا صرف اللہ تعالیٰ پر ہی بھروسہ ہے۔ اور ہم اسلام پر سختی سے قائم رہیں گے۔ اور جو قوم کے سرداروں نے کہا کہ ہم ہم تمہارے قبیلے والوں اور خاندان والوں کا لحاظ کر رہے ہیں ا سکے جواب میں آپ علیہ السلام نے فرمایا۔ کہ اللہ تعالیٰ کے سامنے میرے قبیلے والوں اور خاندان والوں کی کوئی حیثیت ہی نہیں ہے۔ اور تم لوگ اتنے کم عقل ہو کہ اللہ تعالیٰ کی طاقت کو نہیں سمجھ پا رہے ہو۔ اللہ تعالیٰ نے سورہ ہود میں اس کے بارے میں فرمایا۔ ترجمہ ” انہوں نے ( حضرت شعیب علیہ السلام نے ) جواب دیا۔ اے میری قوم کے لوگو، کیا تمہارے نزدیک میرے قبیلے کے لوگ اللہ تعالیٰ سے بھی زیادہ عزت والے ہیں؟ کہ تم نے اسے ( اللہ کو) پس پشت ڈال دیا ہے۔ یقینا میر ارب اللہ تعالیٰ ہر اُس چیز اور عمل کو گھیرے ہوئے ہے جو کچھ تم کر رہے ہو۔ “(سورہ ہود آیت نمبر92)

اب تم اللہ کے عذاب کا انتظار کرو

حضرت شعیب علیہ السلام نے ہر طرح سے محبت سے ، شفقت سے ، مہربانی سے ، حکمت سے ، دلیلوں سے اور اپنے اچھے کردار سے اپنی قوم کو سمجھایا۔ لیکن قوم مدین کفر وشرک اور دوسری برائیوں میں اسی طرح مبتلا رہی۔ ہاں قوم کے کچھ سعادت مندوں نے اسلام قبول کیا۔ لیکن ان کی حیثیت آٹے میں نمک کے جیسی تھی۔ اور اکثریت نے اسلام قبول نہیں کیا۔ پہلے تو ان لوگوں نے آپ علیہ السلام کی اسلام کی دعوت پرحیرت کا اظہار کیا۔ پھر جب دیکھا ان کی باتوں پر عمل کرکے ہماری تجارت اور سرداری پر اثر پڑے گا تو وہ آپ علیہ السلام کے مخالف ہو گئے۔ اور عوام کو بھی آپ علیہ السلام کے خلاف بھڑکانے لگے۔ غریب عوام اُن کے دباﺅ میں تھی۔ اسی لئے انہوں نے بھی آپ علیہ السلام کی مخالفت کی اور اسلام قبول نہیں کیا۔ جب آپ علیہ السلام نے انہیں سمجھایا کہ میری بات مانو کہیں ایسا نہ ہو کہ پچھلی قوموں کی طرح تم پر بھی عذاب آجائے تو آپ علیہ السلام کی قوم نے کہا کہ اب تم ہم پر وہ عذاب لے آﺅ۔ اور ہم پر تو عذاب آئے گا ہی نہیں بلکہ کہیں ایسا نہ ہو کہ ہمارے اور ہمارے باپ دادا کے معبود( بت) تم پر اور ایمان والوں پر عذاب بھیج دیں۔ آپ علیہ السلام نے فرمایا۔ ٹھیک ہے۔ اب عذاب کا انتظار کرو۔ اور دیکھو کہ کس پر عذاب آتا ہے؟ اللہ تعالیٰ نے اس کے بارے میں سورہ ہود میں فرمایا۔ ترجمہ ” ( حضرت شعیب علیہ السلام نے فرمایا ) اے میری قوم کے لوگو، اب تم اپنی جگہ عمل کئے جاﺅ اور میں بھی عمل کررہا ہوں۔ تمہیں عنقریب ( بہت جلد) معلوم ہو جائے گا کہ کس کے پاس وہ عذاب آتا ہے جو اسے رسو کر دے۔ اور کون جھوٹا ہے۔ تم انتظار کرو اور میں بھی تمہارے ساتھ انتظار کرتا ہوں۔“ (سورہ ہود آیت نمبر93)

قوم مدین پر عذاب

اللہ تعالیٰ نے سورہ الاعراف میں فرمایا۔ ترجمہ ” پس اُن کو زلزلے نے آپکڑا تو وہ اپنے گھروں میں اوندھے کے اوندھے پڑ ے رہ گئے۔ جنہوں نے شعیب ( علیہ السلام )کی تکذیب کی تھی ۔ اُن کی یہ حالت ہو گئی جیسے ان گھروں میں کبھی بسے ہی نہیں تھے۔ جنہوں نے شعیب ( علیہ السلام ) جھٹلایا تھا۔ وہی لوگ خسارے میں پڑ گئے۔“(سورہ الاعراف آیت نمبر91اور 92) اللہ تعالیٰ نے آگے سورہ ہود میں فرمایا۔ ترجمہ ” جب ہمار ا حکم ( عذاب ) آپہنچا تو ہم شعیب علیہ السلام اور ان کے ساتھ مومنوں کو اپنی خاص رحمت سے بچالیا۔ اور ظالموں کو سخت چنگھاڑ کے عذاب نے دھر دبوچا۔ جس کی وجہ سے وہ اپنے گھروں میں اوندھے پڑے رہ گئے ۔ گویا کہ وہ ان گھروں میں کبھی بسے ہی نہیں تھے۔ آگاہ رہو۔ مدین کے لئے بھی ویسی ہی دوری ہو۔ جیسی دوری ثمود کو ہوئی تھی۔ ( سورہ ہود آیت نمبر94اور 95) ان آیات میں اللہ تعالیٰ نے قوم مدین پر جو عذاب بھیجا اس کا اجمالی طور سے ذکر فرمایا ہے۔ اب ہم انشاءاللہ مختلف تفاسیر کی مدد سے آپ کی خدمت میں اس عذاب کا تفصیلی ذکر پیش کریں گے۔ انشاءاللہ ۔ علامہ محمد بن جریر طبری لکھتے ہیں۔ پھر جب انہوں نے اللہ تعالیٰ کے خلاف سر کشی اختیا ر کی تو انہیں زلزلے نے پکڑ لیا۔ وہ اس طرح کہ جبرئیل علیہ السلام نازل ہوئے اور ان کے پاس آکر ٹھہرے ۔ پھر ایک سخت چیخ لگائی۔ جس سے پہاڑ اور زمین کانپ اٹھے۔ اور اس کے ساتھ ان کی روح ان کے جسموں سے نکل گئی۔ اس کاذکر اس آیت ( سورہ الاعراف آیت نمبر91) میں کیا۔ وہ اس طرح کہ جب انہوں نے چیخ سنی تو اٹھ کھڑے ہوئے اور اس کی وجہ سے سخت گھبرا گئے اور خوف زدہ ہو گئے۔ اور اسی دوران زمین لرز اٹھی اور زلزلے نے انہیں مردہ حالت میں زمین پر پھینک دیا۔ حضرت عکرمہ اور امام سدی فرماتے ہیں کہ اللہ تعالیٰ نے حضرت شعیب علیہ السلام کے علاوہ کسی نبی کو دوبارہ نہیں بھیجا۔ ایک بار مدین کی طرف بھیجا تو اللہ تعالیٰ نے سخت چیخ اور زلزلے کے ساتھ وہاں کے رہنے والوں کو گرفت میں لے لیا۔ اور دوسری بار اصحاب ایکہ کی طرف بھیجا تو اللہ نے اُن پر سائبان کے عذاب میں پکڑ لیا۔

زلزلہ اور چنگھاڑ ( چیخ) کا عذاب 

اللہ تعالیٰ نے قوم مدین پر عذاب بھیجا۔ مولانا عاشق الٰہی مہاجر مدنی لکھتے ہیں۔ یہاں سورہ الاعراف میں اہل مدین کے بارے میں بتایا وہ رجفہ یعنی زلزلہ سے ہلاک ہوئے اور سور ہ عنکبوت میں بھی ایسا ہی فرما یا ہے۔ اور سورہ ہود میں فرمایا کہ وہ صیمہ یعنی چیخ سے ہلاک ہوئے۔ اس میں کوئی تعارض نہیں ہے۔ کیوں دونوں ہی طرح کا عذاب آیا تھا۔ علامہ ابن کثیر لکھتے ہیں ۔ اس قوم کی سر کشی ، بد باطنی ، ملا خطہ ہو کہ مسلمانوں کو اسلام سے ہٹانےکے لئے انہیں یقین دلارہے ہیں کہ شعیب علیہ السلام کی اطاعت تمہیں غارت کر دے گی اور تم بہت بڑا نقصان اٹھاﺅ گے۔ ان مومنوں کے دلوں کو ڈرانے کا نتیجہ یہ ہوا کہ آسمانی عذاب بصورت زلزلہ زمین سے آیا اور انہیں سچ مچ لرز ا دیا۔ اور وہ غارت و برباد ہو کر خود ہی نقصان میں پھنس گئے۔ یہاں اس طرح بیان ہوا ۔ سورہ ہود میں بیان ہے کہ آسمانی کڑاکے کی آواز سے یہ ہلاک کئے گئے۔ وہاں یہ بھی بیان ہے کہ انہوں نے اپنے وطن سے نکل جانے کی دھمکی ایمان والوں کو دی تھی۔ تو آسمانی ڈانٹ کی آواز نے اُن کی آواز پست کر دی۔ اور ہمیشہ کےلئے خاموش کر دیئے گئے۔ اس طرح اللہ تعالیٰ نے قوم مدین پر چنگھاڑ اور زلزلہ کا عذاب ایک ساتھ بھیجا۔ اور یہ اللہ تعالیٰ کی شان ہے کہ کافر تو اس عذاب سے ہلاک ہوئے اور مومن اس عذاب کی شدت اور ہلاکت سے محفوظ رہے۔

کافروں پر عذاب اور مومنوں کی حفاظت

اللہ تعالیٰ نے قوم مدین کے کافروں پر اپنا عذاب بھیجا ۔ علامہ غلام رسول سعیدی لکھتے ہیں ۔ اس سے پہلے اللہ تعالیٰ نے بیان فرمایاتھا کہ حضرت شعیب علیہ السلام کی قوم نے آپ علیہ السلام کو جھٹلایا ۔ اس آیت میں ان کی ایک اور گمراہی کا ذکر فرمایا کہ انہوں نے لوگوں سے کہا۔ اگر شعیب (علیہ السلام ) کی اطاعت و اتباع کی تو تمہارا نقصان ہوگا۔ اس کا ظاہر مطلب یہ ہے کہ حضرت شعیب علیہ السلام کی اتباع کے بعد تم کو وہ فائدہ حاصل نہیں ہوگا جو تم ناپ تول میں کمی کے ذریعے حاصل کرتے تھے۔ یا ان کا مطلب یہ تھا کہ تم دین میں گھاٹے میں رہو گے۔ کیوں کہ ان کے نزدیک آپ علیہ السلام کا دین باطل تھا۔ اس کے بعد دوسری آیت میں اللہ تعالیٰ نے اُن پر زلزلہ کے عذاب کو بھیجنے کا ذکر فرمایا۔ کیوں کہ آپ علیہ السلام کا دین باطل تھا۔ اس کے بعد دوسری آیت میں اللہ تعالیٰ نے اُن پر زلزلہ کے عذاب کو بھیجنے کا ذکر فرمایا۔ کیوں کہ آپ علیہ السلام کو جھٹلانے اور مخالفت کی وجہ سے وہ عذاب کے مستحق ہو چکے تھے۔ اس عذاب میں اللہ تعالیٰ کی الوہیت اور وحدانیت اور حضرت شعیب علیہ السلام کے دین کی صداقت کی کئی دلیلیں ہیں۔ اول یہ کہ آپ علیہ السلام کی دعوت قبول نہ کرنے کی وجہ سے عذاب آیا۔ اس سے معلوم ہوا کہ آپ علیہ السلام کی دعوت بر حق تھی۔ ثانی یہ کہ یہ عذاب صرف آپ علیہ السلام کی مخالفین پر آیا۔ اُن پر ایمان لانے والوں پر نہیں آیا۔ پھر اس میں مزید اعجاز یہ کہ یہ عذاب اس قوم پر نازل ہوا جو ایک علاقے میں رہتی تھی۔ یہ عذاب آسمان سے نازل ہوا اور صرف اُن لوگوں پر نازل ہوا جو حضرت شعیب علیہ السلام کے منکر یعنی کافر تھے۔ اور ان لوگوں پر نازل نہیں ہوا جو متبعین یعنی مومن تھے۔ حالانکہ وہ سب اکٹھے رہتے تھے۔ محمد لقمان سلفی لکھتے ہیں۔ جب اللہ کا عذاب قوم شعیب پر نازل ہوا تو اللہ تعالیٰ نے شعیب علیہ السلام اور ان کے مسلمان ساتھیوں کو اپنے خاص فضل سے اس عذاب سے بچا لیا۔ اور جن لوگوں نے کفر و عناد کی وجہ سے اپنے آپ پر اور لوگوں کا مال ناجائز طور سے لے کر دوسروں پر ظلم کیا تھا۔ انہیں اللہ کے عذاب نے اپنی گرفت میں لے لیا۔ وہ عذاب جبرئیل علیہ السلام کی ایک شدید چیخ تھی۔ جس کے اثر سے اُن کی روحیں اُن کے جسموں سے پرواز کر گئیں۔ سورہ الاعراف اور سورہ عنکبوت میں آیا ہے کہ شدید زلزلہ آیا ۔ جس سے متاثر ہوکر تمام لوگ ہلاک ہو گئے۔ یہ زلزلہ جبرئیل علیہ السلام کی شدید چیخ کا ہی نتیجہ تھا۔ اور یہ عذاب حضرت شعیب علیہ السلام کی بستی والوں پر آیا تھا۔ جبرئیل علیہ السلام کی چیخ کا یہ اثر ہوا کہ وہ تمام لوگ اپنے گھروں میں ہی مر گئے۔

دھتکار ہو قوم ِ مدین پر

حضرت شعیب علیہ السلام کی قوم مدین پر عذاب کی تفصیل علامہ غلام رسول سعیدی لکھتے ہیں۔ حضرت عبداللہ بن عباس رضی اللہ عنہ نے فرمایا۔ اللہ تعالیٰ نے صرف دو قوموں پر ایک ہی قسم کا عذاب نازل فرمایا ہے۔ قوم ثمود پر اور قوم مدین پر ۔ ان دونوں کو ایک زبردست چنگھاڑ نے ہلاک کر دیا تھا۔ قوم ثمود کو نیچے سے ایک چنگھاڑ کی آواز آئی تھی۔ اور قوم مدین کو اوپر سے چنگھاڑ کی آواز آئی تھی۔ جب جبرئیل علیہ السلام نے وہ گرج دار چیخ ماری تو ان میں سے ہر ایک کی روح اسی وقت نکل گئی تھی اور ان میں سے ہر شخص اسی وقت اور اسی حال میں مر گیا اور یوں لگتا تھا جیسے ان مکانوں میں کبھی کوئی شخص نہیں رہا ہو۔ پھر فرمایا ۔ قوم مدین پر دھتکار ہو۔ جیسی قوم ثمود پر دھتکار تھی۔ یعنی جیسے وہ اللہ کی رحمت سے دور کر دیئے گئے تھے اسی طرح یہ بھی دور کر دیئے گئے۔

قوم مدین سے آخری کلام

حضرت شعیب علیہ السلام نے عذاب آنے سے پہلے آخری مرتبہ اپنی قوم سے بات کی۔ مفتی احمد یا ر خان لکھتے ہیں۔ جب حضرت شعیب علیہ السلام قوم مدین کی دوستی سے مایوس ہو گئے تب آخری نتیجہ خیز کلام فرمایا۔ کہ اے میری قوم اب تمہاری ضدی طبیعت کا مجھ کو پتہ لگ گیا ہے۔ اب تم سے کچھ نہیں کہوں گا۔ تم اپنی اسی گمراہی اور کفر یہ حالت پر رہتے ہوئے جو چاہو عمل کرو اور تم سے جو ہو سکے میری مخالفت اور دشمنی میں کر لو اور میں اپنی جگہ وہ اعمال ، عبادت اور دریافت کروں گا جو رب نے مجھے عطا فرمائے۔ مراد یہ ہے کہ تم اپنی راہ لو اور میں اپنی راہ۔ یہ تم چھوٹ نہیں ہے بلکہ ڈھیل ہے۔ معافی نہیں ہے بلکہ مہلت ہے۔ اور یہ مہلت اور ڈھیل تمہارے لئے اچھائی نہیں بلکہ برائی ہے۔ اس سے تمہاری خوش قسمتی وابستہ نہیں ہے بلکہ بد بختی کا ظہور ہے۔ اور یہ کلام تہدید عظیم اور وعید شدید ہے ۔ ہوا کی یہ خاموشی کسی بڑے طوفان کا پیش خیمہ ہے کیوں کہ عنقریب جان جاﺅ گے کہ کس پر وہ عذاب آتا ہے جو ذلیل کر کے رکھ دے گا۔ اور تم بہت جلد ی جان لو گے کہ وہ عذاب دونوں جہان ( دنیا اور آخرت) میں ذلیل کر کے رکھ دے گا۔ اور یہ بھی جان لو گے کہ کون جھوٹا ہے اور کون سچا ہے۔ ابھی تو تم باتیں بنا رہے ہو ، مذاق کر رہے ہو ، مجھ کو غلط اور خود کو صحیح سمجھ رہے ہو اور عذاب کی جلدی مچا رہے ہو۔ ذرا انتظار کر و۔ میں بھی انتظار کرتا ہوں۔ مقصد ِ کلام یہ ہے کہ اے قوم ، تم سے جتنی طاقت لگ سکے گناہوں ، ظلموں اور بد دیانتیوں پر لگالو۔ اور مجھ سے جتنی ہو سکے گی نیکیاں کرتا جاﺅں گا۔ اور عنقریب ایسا ذلیل کرنے والا عذاب آئے گا جو کھوٹے کھرے ، سچے جھوٹے، اچھے برے اور صحیح اور غلط کو سب کے سامنے ظاہر کر دے گا۔ اور سب دیکھ لیں گے ۔ اور تم بھی دیکھ کو گے۔ حضرت شعیب علیہ السلام کا یہ آخری کلام ستر 70سال تبلیغ کرنے کے بعد ہوا۔ 

آخر کار قوم مدین عذاب سے ہلاک ہو گئی

اللہ تعالیٰ نے قوم مدین کے کافروں پر اپنا عذاب بھیجا۔ اور مسلمانوں کو بچا لیا۔ مفتی احمد یا ر خان نعیمی لکھتے ہیں کہ اللہ تعالیٰ کا عذاب جب آیا تو حضرت شعیب علیہ السلام اور اُن کے ساتھ ڈیڑھ لاکھ مسلمانوں کو بچالیا۔ اور اُن سرکش کافروں کو ایک زبردست چنگھاڑ نے جو الہ کے حکم سے جبرئیل علیہ السلام نے ماری تھی، پکڑ لیا۔ اس میں اختلاف ہے کہ وہ صرف دھاڑ تھی یا الفاظ تھے۔ بعض علمائے کرام نے فرمایا۔ وہ زور دار کلام تھا کہ موتو جمیعا۔ یعنی مر جاﺅ سب ۔ اکثر علمائے کرام کا قول ہے کہ وہ صرف ایک ہولناک آواز تھی۔ اس آواز سے زلزلہ بھی پیدا ہو ا۔ مکانات گر گئے اور وہ عذاب چاروں طرف سے گونج کر ظاہر ہوا۔ چیخ کی آواز بلند ہوئی۔ زلزلہ آیا ، زمین پھٹی اور کچھ لوگ چیخ سے اور کچھ لوگ زلزلے سے ہلاک ہو گئے۔ اور اپنے گھروں ، علاقوں ، محلوں اور شہروں میں گھٹنوں کے بل اوندھے پڑے رہ گئے۔ یہ قوم چھوٹی چھوٹی قریبی بستیوں میں بٹی ہوئی تھی۔ جن میں گلیاں اور محلے بنے ہوئے تھے۔ جٰثمین کے معنی اوندھے منہ گر کر مرنا۔ جیسے کوئی بیٹھے بیٹھے مر جاتا ہے۔ بڑی ذلت سے اُن کے اوپر مکانات گرے۔ جس سے دھول ، مٹی اور پتھروں اور لکڑیوں شہتیروں سے کچلے گئے۔ جثم بنا ہے جثوم سے ۔ جس کا معنی پرندوں کا پر پھیلا کر نیچے اترنا اور زمین پر بیٹھنا ہے۔ ان کے مرنے کو اس طرح سے تشبیہہ اُن کے اظہار ذلت کے لئے دی گئی ہے۔ قوم مدین پر جب اللہ کا عذاب آیا تو پہلے زبردست گڑ گڑاہٹ کی آواز پیدا ہوئی جو صرف کافروں کو سنائی دی۔ اسے سن کر وہ سب گھبرا اٹھے۔ اور اس سے پہلے کہ وہ کچھ سمجھ پاتے اچانک آواز بہت تیز ہو گئی اور زمین تھر تھرانے لگی۔ جس کی وجہ سے کافروں کے مکانات ٹوٹ کر گر گئے۔ اور وہ سب اپنے مکانات میں دب کر مر گئے۔ جو کافر تیزی دکھا کر گھروں کے باہر نکل پڑے تھے۔ وہ اس بھیانک گونج دار آواز سے اوندھے منہ گر کر مر گئے۔ حیرت کی بات تو یہ تھی کہ انہی بستیوں میں مسلمانوں کے گھر بھی تھے۔ انہوں نے آواز کو بھی نہیں سنا اور زلزلے کو بھی محسوس نہیں کیا۔ اور ان کے مکانات ویسے کے ویسے ہی محفوظ کھڑے رہے۔ جب کہ تمام کافروں کے مکانات پوری طرح سے منہدم ہو گئے تھے۔ اور ایک بھی کافر نہیں بچا تھا۔

ہلاک شدہ قوم سے خطاب

اللہ تعالیی نے قوم مدین کے کافروں کو ہلاک کر دیا۔ اور حضرت شعیب علیہ السلام اور مسلمانوں کو بچا لیا۔ عذاب کے ختم ہونے کے بعد آپ علیہ السلام ہلاک شدہ قوم مدین کے پاس آئے۔ اللہ تعالیٰ نے سورہ الاعراف میں فرمایا۔ ترجمہ ” اس وقت شعیب علیہ السلام اُن سے منہ موڑ کر چلے اور فرمانے لگے کہ اے میری قوم ، میں نے تم کو اپنے پروردگار ( اللہ تعالیٰ) کے احکام پہنچا دیئے تھے۔ اور میں نے تمہاری خیر خواہی چاہی تھی۔ پھر میں ان کافر لوگوں پر کیوں رنج کروں۔ “ ( سورہ الاعراف آیت نمبر93) تفسیر انوار البیان میں اس آیت کی تفسیر میں لکھا ہے کہ جب حضرت شعیب علیہ السلام کی قوم تباہ و برباد اور ہلاک ہو گئی تو آپ علیہ السلام نے اُن سے خطاب کرتے ہوئے فرمایا۔ اے میری قوم، میں نے تو تمہیں اپنے رب کا پیغام پہنچا دیا تھا اور تمہاری بھلائی اور خیر خواہی چاہی تھی۔ لیکن تم نے سب سنی ان سنی کر دی۔ اور برابر کفر پر جمے رہے۔ تو اب میں کافروں پر رنج کیوں کروں۔ کیوں تم نے خود اپنی بربادی کا سامان کر لیا تھا۔ آپ علیہ السلام نے اُن کی بربادی کے بعد بطور حسرت فرضی خطاب فرمایا تھا۔ اور یہ بھی ممکن ہے کہ جب عذاب آنے کے آثار نمودار ہوئے ہوں اس وقت حضرت شعیب علیہ السلام نے زندوں سے ہی خطاب فرمایا ہو۔ اور یہ خطاب فرما کر مسلمانوں کو لے کر وہاں سے چلے گئے ہوں۔

قوم ایکہ کو اسلام کی دعوت

حضرت شعیب علیہ السلام قوم مدین کی ہلاکت کے بعد اس علاقے سے مسلمانوں کو لے کر ہجرت کر گئے۔ اور قریب ہی قوم ایکہ آباد تھی۔ آپ علیہ السلام مسلمانوں کے ساتھ ہجرت کر کے قوم ایکہ کے علاقے میں پہنچے اور وہیں رہائش اختیار کر لی۔ قوم ایکہ چونکہ قوم مدین کے پڑوس میں آباد تھی۔ اور دونوں تجارتی شاہراہوں پر آباد تھیں اسی لئے دونوں کی بستیوں میں بڑی بڑی تجارتی منڈیاں تھیں۔ ہاں دونوں کے علاقوں میں یہ فرق تھا کہ قوم مدین صحرائی اور پہاڑی علاقوں میں آباد تھی اور قوم ایکہ جس علاقے میں آباد تھی وہ میدانی علاقہ تھااور جنگلوں ، درختوں ،پیڑ پودوں سے ہرا بھرا سر سبز علاقہ تھا۔ حضرت شعیب علیہ السلام نے قوم ایکہ کو بھی اسلام کی دعوت دی۔ اللہ تعالیٰ نے سورہ الشعراءمیں فرمایا۔ ترجمہ ”ایکہ والوں نے بھی رسولوں کو جھٹلایا۔ جب اُن سے شعیب علیہ السلام نے فرمایا۔ کیا تمہیں ( اللہ کے عذاب کا ) ڈر خوف نہیں ہے۔ میں تمہاری طرف ( بھیجا گیا ) امانت دار رسول ہوں۔ اللہ کا خوف کھاﺅ اور میری فرماں برداری کرو۔ میں اس پر تم سے کوئی اجرت نہیں مانگتا۔ میرا اجر تو تمام جہان کو پالنے والے ( اللہ تعالیٰ ) کے پاس ہے۔ ناپ پورا بھراکرو۔ اور کم دینے والوں میں شامل نہ ہوجاﺅ۔ اور سیدھی ترازو سے تولا کرو۔ لوگوں کو اُن کی چیزیں کم کر کے مت دو۔ اور بے باکی کے ساتھ زمین میں فساد مچاتے مت پھرو۔ اس اللہ کا خوف رکھو جس نے خود تمہیں اور اگلی مخلوق کو پیدا کیا ہے۔“( سورہ الشعراءآیت نمبر176سے 184تک)

قوم ایکہ بھی مشرک تھی

حضرت شعیب علیہ السلام نے قوم مدین کی ہلاکت کے بعد ہجرت کی اور قوم ایکہ کے علاقے میں رہائش اختیار کی۔ قوم ایکہ کے بارے میں جسٹس پیر محمد کرم شاہ ایم اے لکھتے ہیں۔ سورہ الاعراف اور سورہ ہود میں حضرت شعیب علیہ السلام کے مواعظ، آپ علیہ السلام کی قوم میں جڑ پکڑنے والے باطل عقائد اور اخلاقی خرابیوں کا تذکرہ گزر چکا ہے۔ یہاں بھی آپ علیہ السلام کے مواعظ کا وہی انداز ہے۔ اور اپنے مخاطبین کو انہیں خرابیوں سے باز آنے کی پر زور اور مخلصانہ تلقین فرما رہے ہیں جن کا بیان پہلے ہو چکا ہے۔ اس لئے بعض حضرات نے یہ خیال فرمایا کہ اہل مدین اور اصحاب الایکہ ایک ہی قوم کے دو نا م ہیں۔ لیکن صحیح یہ ہے کہ یہ دونوں علیحدہ علیحدہ قومیں تھیں۔ جو الگ الگ علاقوں میں آباد تھیں۔ لیکن چونکہ ان کے علاقے بالکل نزدیک تھے۔ اور دونوں قومیں حضرت ابراہیم علیہ السلام کی نسل سے تھیں۔ اس لئے دونوں کی ہدایت کے لئے ایک نبی حضرت شعیب علیہ السلام کو مقرر فرمایا گیا۔ نیز یہ دونوں قومیں دو بین الاقوامی شاہراہوں کے قرب و جوار میں آباد تھیں۔ اور تجارت پیشہ تھیں۔ تاجروں میں جو اخلاقی خرابیاں عام طور سے پائی جاتی ہیں وہ ان میں بطور قدر مشترک موجود تھیں۔ توحید کے عقیدہ سے دونوں قومیں برگشتہ ہو چکی تھیں۔ اور شرک کی لعنت میں گرفتار تھیں۔ اس لئے حضرت شعیب علیہ السلام کے دونوں قوموں کے مواعظ ایک ہی طرح تھے۔ وہ جگہ جہاں گھنے اور گنجان درختوں کا ذخیرہ ہو اسے عربی میں ایکہ کہتے ہیں۔ معلوم ہوتا ہے کہ یہ قوم جس علاقہ میں آباد تھی وہاں درختوں کے گھنے اور گنجان جھنڈ پائے جاتے تھے۔ اسی لئے انہیں اصحاب الایکہ کہا گیا ہے۔ اور یہ کسی خاص بستی کا نام نہیں تھا لیکن جنہوں نے لیکہ پڑھا ہے ۔ اُن کا خیال ہے کہ لیکہ ایک بستی کا نام تھا۔ امام جوہری کی رائے ہے کہ ایکہ اور لیکہ دونوں ایک ہی بستی کا نا م تھے۔ جس طرح مکہ اور بکہ ہیں۔

درخت کی پوجا کرتے تھے

حضرت شعیب علیہ السلام نے قوم ایکہ کو سمجھایا۔ مولانا محمد آصف قاسمی قوم ایکہ کے بارے میں لکھتے ہیں۔ سورہ الشعراءکی ان آیات میں حضرت شعیب علیہ السلام کی قوم کا ذکر کیا گیا ہے۔ جن کو ” اصحاب ایکہ “ فرمایا گیا ہے۔ ایکہ کے متعلق مفسرین نے مختلف معنی بیان کئے ہیں۔ (۱) ایکہ تبوک کا پرانا نا م ہے۔ اللہ تعالیٰ نے اس قوم کی اصلاح کے لئے حضرت شعیب علیہ السلام کو بھیجا۔ ۲) ایکہ ، جنگل ، بن، سر سبزو شاداب اور درختوں کے جھنڈ والے علاقے کو کہتے ہیں۔ ۳) ایکہ والے ایک درخت کو اپنا معبود مانتے تھے۔ جو اُن کے قریب کے بن کا ایک درخت تھا۔ حضرت شعیب علیہ السلام اس قوم کی اصلاح کے لئے تشریف لائے تھے۔ ۴) حضرت شعیب علیہ السلام جو حضرت ابراہیم علیہ السلام کی اولاد سے ہیں پوری زندگی اس قوم کی اصلاح کرتے رہے۔ جو خوش حالی کی وجہ سے تمام اخلاقی اور معاشرتی خرابیوں میں مبتلا ہو چکی تھی۔ خلاصہ یہ ہے کہ حضرت شعیب علیہ السلام جس قوم کی اصلاح کے لئے تشریف لائے تھے وہ نہایت متحدن، خوش حال اور تجارت پیشہ قوم تھی۔ جو ایسے علاقے میں رہتی تھی جو نہایت سر سبز و شاداب جھاڑیوں ، درختوں کی کثرت اور پُر فضامقام اور پر عیش و عشرت کی زندگی گزار رہے تھے۔ پورا علاقہ نہروں، چشموں اور درختوں کی کثرت کی وجہ سے نہایت حسین نظر آتا تھا۔ خاص طور پر خوشبو دار پھولوں کے چمن تھے۔ جو بڑا خوب صورت نظارہ پیش کرتے تھے۔ چونکہ یہ قوم تجارت پیشہ تھی اسی لئے مال و دولت کی کثرت نے اُن کو دنیاوی زندگی کا ایسا دیوانہ بنا دیا تھا کہ وہ بہت سی اخلاقی اور معاشرتی خرابیوں میں مبتلا ہو چکے تھے۔ انہوں نے تجارتی بد دیانتی کو اختیار کر کے ”میزان“یعنی توازن و اعتدال کو چھوڑ دیا تھا۔ اور بے ایمانی کرنے اور کم تولنے کا اپنا مزاج بنا لیا تھا۔ جس کا نتیجہ یہ تھا کہ اُن میں خود غرضی، لالچ اور کردار کی ہزاروں کمزوریاں پیدا ہو چکی تھیں۔

حضرت شعیب علیہ السلام نے ایکہ والوں کو سمجھایا

حضرت شعیب علیہ السلام نے ایکہ والوں کو سمجھایا اور اسلام کی دعوت دی۔ مولانا محمد آصف قاسمی لکھتے ہیں ۔ مذہبی اعتبار سے اس قوم میں مشرکانہ رسمیں اس قدر کثرت سے پھیل چکی تھیں کہ ان کے نزدیک وہی اصل دین تھا۔ حضرت شعیب علیہ السلام نے جب ان کو بتایا کہ وہ خرید و فروخت میں بد دیانتی ، مشرکانہ رسمیں اور تجارت کے راستوں کو دوسروں پر بند کرنے کی عادت چھوڑ دیں اور صر ف ایک اللہ کی عبادت و بندگی کریں ۔ جس نے یہ تمام نعمتیں عطا فرمائی ہیں۔ امام قرطبی لکھتے ہیں۔ الایکہ سے مراد گھنے کثیر درخت ہیں۔ اس کا واحد ایکہ ہے۔ حضرت قتادہ رحمتہ اللہ علیہ فرماتے ہیں کہ حضرت شعیب علیہ السلام دو قوموں کی طرف مبعوث کئے گئے تھے۔ اپنی قوم اہل مدین کی طرف اور اصحاب ایکہ کی طرف ۔ ایکہ سے مراد گھنے درختوں کا دلدلی جنگل ہے۔حضرت شعیب علیہ السلام نے قوم ایکہ کو سمجھایا اور انہیں بتایا کہ اللہ تعالیٰ نے مجھے تمہاری طرف اپنا رسول بنا کر تمہاری ہدایت کےلئے بھیجا ہے۔ تم لوگ جو اللہ تعالیٰ کے علاوہ دوسری چیزوں کی عبادت کر تے ہوتو یہ تمہیں دوزخ کی طرف لے جا رہے ہیں۔ میری بات مانو اور اسلام قبول کر کے صرف ایک اللہ تعالیٰ کی عبادت کرو۔ اسی نے تمہیں یہ تمام نعمتیں عطا فرمائی ہے۔ اسی لئے صرف اسی کی عبادت کرو اور اس کا شکر اداکرو۔

میرا اجر تو اللہ تعالیٰ کے پاس ہے۔

حضرت شعیب علیہ السلام نے قومِ ایکہ کو سمجھایا اور اسلام کی دعوت دینے کے بعد فرمایا کہ میں تمہیں جو دعوت دے رہا ہوں اور سمجھا رہا ہوں تو میں صرف تمہاری بھلائی چاہتا ہوں اور اللہ کے حکم کو پورا کررہا ہوں۔ اور میں تم سے اس کا کائی معاوضہ نہیں چاہتا ہوں اور میرا کوئی دنیاوی مفاد تم سے وابستہ نہیں ہے۔ میرا اجر تو صرف اللہ تعالیٰ کے پاس ہے۔ اللہ تعالیٰ نے اس کے بارے میں فرمایا۔ ترجمہ ” میں تمہاری طرف امانت دار رسول ہوں۔ اللہ کا خوف کھاﺅ اور میری فرماں برداری کرو۔ میں اس پر تم سے کوئی اجرت( معاوضہ ) نہیں مانگتا ہوں۔ میرا اجر تو تمام جہانوں کو پالنے والے کے پاس ہے۔ “ (سورہ الشعراءآیت نمبر178سے 180تک) مولانا محمد آصف قاسمی ان آیات کی تفسیر میں لکھتے ہیں ۔ حضرت شعیب علیہ السلام نے فرمایا کہ میں دیانت و امانت والا رسول ہوں۔ مجھے تم سے دنیا کی کوئی چیز بدلہ اور صلہ میں نہیں چاہیئے وہ تو میرے رب العالمین کے ذمہ ہے۔ میں تو یہ چاہتا ہوں کہ تم میری بات مانو۔ پورا تو لو، اس میں کمی نہ کرو ، ترازو سیدھا رکھا کرو، لوگوں کو کسی طرح نقصان نہ پہنچاﺅ۔ فسادی لوگوں کی اتباع نہ کرو۔ تمہارا اور تم سے پہلے لوگوں کا خالق صرف ایک اللہ ہے۔ جو تمام عبادتوں کا مستحق ہے۔ اگر تم نے میری بات نہیں مانی اور میری اطاعت نہیں کی تو تمہارے اوپر تمہاری بد اعمالیوں کی وجہ سے سخت عذاب آسکتا ہے۔ اس بُرے انجام سے ڈرو۔

ڈنڈی مار قوم

حضرت شعیب علیہ السلام کی قوم مدین اور قوم ایکہ پڑوسی تھے۔ اور ایک دوسرے کے حالات سے واقفیت رکھتے تھے۔ ایکہ والوں کو یہ معلوم تھا کہ آپ علیہ السلام قوم مدین کو سمجھایا کرتے تھے لیکن انہوں نے بات نہیں مانی اور ہلاک ہو گئے۔ اس کی خبر قوم ایکہ کو ہوئی تھی لیکن وہ لوگ اسے اللہ کا عذاب ماننے کو تیار نہیں تھے۔ بلکہ مکافاتِ عمل یا وبائی آفت سمجھ رہے تھے۔ در اصل آج سے ساٹھ 60ستر70ہزارسال پہلے وبائی امراض پھیلتے تھے۔ جس سے پوری پوری بستی کے زیادہ تر لوگ اس مرض کا شکار ہو کر مر جاتے تھے۔ آج کل ترقی ہو جانے کی وجہ سے وبائی امراض پر کنٹرول پا لیا گیا ہے۔ خیر تو قوم مدین اور قوم ایکہ پڑوسی تھے اور دونوں تجارت پیشہ تھے اور دونوں کے علاقوںمیں بڑی بڑی تجارتی منڈیاں تھیں۔ اور اسی لئے دونوں قومیں ڈنڈی مار تھیں۔ اسی لئے حضرت شعیب علیہ السلام نے قوم ایکہ کو بھی اس بہت بڑی برائی سے روکنے کی کوشش کی۔ اللہ تعالیٰ نے اس کے بارے میں فرمایا۔ ترجمہ ” ناپ پورا بھرا کرو اور کم دینے والوںمیں شامل نہ ہو جاﺅ ۔ اور سیدھی ترازو تولا کرو اور لوگوں کو اُن کی چیزیں کمی سے نہ دو۔ اور بے باکی سے فساد مچاتے نہ پھرو۔ ( سورہ الشعراءآیت نمبر 181سے 183تک) علامہ ابن کثیر ان آیات کی تفسیر میں لکھتے ہیں۔حضرت شعیب علیہ السلام اپنی قوم کو ناپ تول درست کرنے کی ہدایت دے رہے ہیں۔ ڈنڈی مارنے اور ناپ تول میں کمی کرنے سے روک رہے ہیں۔ اور فرما رہے ہیں کہ کوئی چیز ناپ کر دو تو پورا پیمانہ بھر کر دو۔ اس کے حق میں سے کم نہ کرو۔ اسی طرح دوسرے سے جب لو تو زیادہ لینے کی کوشش اور تدبیر نہ کرو۔ یہ کہا کہ لینے کے وقت پورے سے بھی زیادہ لیتے ہو اور دینے کے وقت پورے سے کم دیتے ہو۔ لین دین دونوں صاف رکھو اور پورا رکھو۔ ترازو اچھی رکھو کہ جس میں وزن صحیح ہو۔ بٹے ( وزن) بھی پورے رکھو۔ وزن کرنے میں عدل کرو اور ڈنڈی نہ مارو اور کم نہ تولو۔ کسی کو اس کی چیز کم نہ دو۔ کسی کا راستہ بند مت کرو۔ چوری چکاری ، لوٹ مار، غارت گری اور رہزنی سے بچو۔ لوگوں کو ڈرا دھمکا کر اور خوف زدہ کر کے اُن کے مال نہ لوٹو۔

قوم ایکہ کا جواب

حضرت شعیب علیہ السلام قوم ایکہ کو محبت سے اور حکمت سے سمجھاتے رہے۔ لیکن اُن بد بختوں کی سمجھ میں بات نہیں آرہی تھی۔ بلکہ الٹا وہ لوگ آپ علیہ السلام کی شان میں گستاخی کرنے لگے۔ اللہ تعالیٰ نے اس کے بارے میں سورہ الشعراءمیں فرمایا۔ ترجمہ ” انہوں نے ( قوم ایکہ نے ) کہا ۔ تم تو اُن لوگوں میں سے ہو جن پر جادو کر دیا جاتا ہے۔ اور تم تو ہماری طرح ہی ایک انسان ہو اور ہم تو تمہیں جھوٹ بولنے والوں میں سے سمجھتے ہیں۔ “ (سورہ الشعراءآیت نمبر185اور 186) مولانا عاشق الٰہی مہاجر مدنی ان آیات کی تفسیر میں لکھتے ہیں۔ حضرت شعیب علیہ السلام نے فرمایا کہ تم اللہ سے ڈرو جس نے تمہیں پیدا فرمایا ہے۔ اور تم سے پہلے جو لوگ گزرے ہیں انہیں بھی پیدا فرمایا ہے۔ وہ لوگ کہنے لگے۔ میاں جاﺅ، تمہاری باتیں تو ایسی ہیں جیسے تم پر کسی نے تگڑا جادو کر دیا ہے۔ اور تم تو ہماری طرح کی آدمی ہو۔ بھلا تمہیں کیسے اپنا نبی مان لیں؟ ہمارے خیال میں تو تم جھوٹوں میں سے ہو۔ جسٹس پیر محمد کرم شام ایم اے ان آیات کی تفسیر میں لکھتے ہیں۔ ان کی ساری معاشی خوشحالی کا انحصار اُن کی بے ایمانیوں اور دھوکے بازیوں پر تھا۔ وہ اتنے بھلے مانس کب تھے کہ حضرت شعیب علیہ السلام کی نصیحت سن کر اُن سے باز آجاتے۔ انہوں نے اپنی غلطی کو غلطی ماننے سے ہی انکار کر دیا۔ اور اپنی اصلاح کی طرف توجہ کرنا ہی مناسب نہیں سمجھا۔ الٹا آپ علیہ السلام پر الزام لگادیا کہ تم پر کسی نے جادو کر دیا ہے۔ جبھی تو تم ہمیں ایسے مشورے دے رہے ہو۔ جن پر اگر ہم عمل کریں تو یہ تجارت کی گہما گہمی یا دولت کی فراوانی سب کی سب ایک دم ختم ہو جائے گی۔ کوئی ذی شعور آدمی اپنی قوم کو ایسا مشورہ نہیں دے سکتا ہے جو اس کی اقتصادی تباہی کا باعث بنے۔ اے شعیب (علیہ السلام )یقینا تمہارا دماغ کام نہیں کر رہا ہے۔ پہلے اپنا علاج کراﺅ پھر ہمیں نصیحت کرنا۔ 

قوم ایکہ نے عذاب کی مانگ کی

حضرت شعیب علیہ السلام قوم ایکہ کو سمجھاتے رہے لیکن وہ بد بخت آپ علیہ السلام کی مخالفت اور اپنی پرانی برائیوں پر ڈٹے رہے۔ آپ علیہ السلام نے انہیں سمجھایا کہ ابھی بھی وقت ہے ۔ پچھلی قوموں سے سبق سیکھو اور دیکھو کہ کس طرح وہ عبرت ناک عذاب سے دوچار ہوئے۔ اور قوم مدین کا حال تو تمہارے سامنے ہے۔ لیکن وہ لوگ آپ علیہ السلام کی بات کو ماننے کی بجائے یہی فرمائش کرنے لگے کہ ٹھیک ہے تم ہمیں اللہ کے جس عذاب سے ڈرا رہے ہو وہی لے آﺅ۔ اور اس طرح آپ علیہ السلام سے عذاب کی مانگ کرنے لگے۔ اللہ تعالیٰ نے اس کے بارے میں سورہ الشعراءمیں فرمایا۔ ترجمہ ”(قوم ایکہ نے کہا) اگر تم سچے ہو تو یا سچے لوگوں میں سے ہو تو ہم پر کوئی آسمان کا ٹکڑا گرادو۔ (حضرت شعیب علیہ السلام نے ) فرمایا۔ میرا رب خوب جانتا ہے جو کچھ تم کر رہے ہو۔ “ ( سورہ الشعراءآیت نمبر186 اور 187) مولانا عاشق الٰہی مہاجر مدنی ان آیات کی تفسیرمیں لکھتے ہیں ۔ اور جو تم بار بار عذاب آنے کی رٹ لگا رہے ہو ا سے ہم پر کچھ بھی اثر نہیں ہونے والا ہے۔ اگر عذاب کی بات سچی ہے اور یوں ہی دھمکی نہیں ہے تو عذاب لا کر دکھا دو۔ چلو آسمان سے کوئی ٹکڑا ہی ہم پر گرا دو۔ حضرت شعیب علیہ السلام نے فرمایا کہ میں عذاب کا لانے والا نہیں ہوں۔ اور میں اس کی کیفیت کا تعین نہیں کر سکتا۔ تمہارے اعمال رب خوب جانتا ہے۔ اور تم پر عذاب کب آئے گا اور کس طرح آئے گا ، یہ سب اُسی اللہ کے علم میں ہے ۔ بہر حال تمہارے اعمال عذاب کو دعوت دینے والے ہیں۔ مولانا محمد آصف قاسمی لکھتے ہیں۔ حضرت شعیب علیہ السلام کی قوم کے لوگوں نے کہا۔ اے شعیب (علیہ السلام )ہم تو تم سے بہت اچھی امیدیں وابستہ کئے ہوئے تھے مگر تمہیں کیا ہو گیا ہے کہ تم ہماری ان رسموں کو برا کہہ رہے ہو۔ جس پر ہمارے باپ داد اچلتے آئے ہیں۔ تم ہمیں تجارتی آداب سکھانے آگئے ہو۔ ایسا لگتا ہے کہ تم پر کسی نے جادو کر دیا ہے۔ جس کی وجہ سے تم ایسی بہکی بہکی باتیں کر رہے ہو۔ تم ہم جیسے آدمی ہو۔ اور اگر اللہ تعالیٰ کسی کو اپنا نبی بنا کر بھیجتا تو فرشتے کو بھیجتا۔ ہمیں ایسا لگتا ہے کہ تم جو کچھ کہہ رہے ہو جھوٹ ہے۔ اور اگر تمہارے اندر طاقت اور قوت ہے تو ہمارے اوپر آسمان کا کوئی ٹکڑا ہی گرا دو۔

سائبان والے دن کا عذاب

اللہ تعالیٰ نے سورہ الحجر میں فرمایا۔ ترجمہ ”اصحاب الایکہ بھی بڑے ظالم تھے۔ جن سے ہم نے انتقام لے ہی لیا۔ یہ دونوں بستیاں کھلے ( عام) راستے پر ہیں۔ “ (سورہ الحجر آیت نمبر78,79) اللہ تعالیٰ نے سورہ الشعراءمیں فرمایا۔ ترجمہ ”چونکہ انہوں نے(قوم ایکہ )نے اسے ( حضرت شعیب علیہ السلام کو) جھٹلایا تو انہیں سائبان والے دن کے عذاب نے پکڑ لیا۔ وہبڑے بھاری دن کا عذاب تھا۔ یقینا اس میں نشانی ہے اور ان میں سے اکثر مسلمان نہیں تھے۔ (سورہ الشعراءآیت نمبر189 اور 190) ۔ حضرت عبداللہ بن عباس رضی اللہ عنہ فرماتے ہیں کہ اصحاب ایکہ سے مراد غیضہ ہیں ۔ جو ساحل سمندر سے مدین تک رہائش پذیر تھے۔ وہ اپنے کرتوتوں کی وجہ سے ہلاک کر دیئے گئے۔ اصحاب ِ ایکہ نے شرک کرنے کے ساتھ اصحاب مدین والا کام شروع کیا۔ حضرت شعیب علیہ السلام نے انہیں اسلام کی دعوت دی اور سمجھایا تو انہوں نے آپ علیہ السلام کو جھٹلایا اور انکار کر دیا تو اُن پر ”یوم اظلة“ کا عذاب یعنی سائبان یا چھتری والے دن کا عذاب آیا۔ وہیہتھا کہاللہ تعالیٰ نے جہنم سے اُن پر باد ِ سموم بھیجی۔ وہ سات دن تک ان پر چلتی رہی۔ یہاں تک کہ گرم ہوا نے انہیں پکا دیا۔ اُن کے گھر گرم ہو گئے۔ ان کے کنویں اور چشموں میں پانی جوش مارنے ( ابلنے) لگا۔ وہ اپنے گھروں اور محلوں سے بھاگتے ہوئے نکل پڑے۔ جب کہ باد ِ سموم اُن کے ساتھ تھی۔ اوپر سے اللہ تعالیٰ نے اُن پر سورج کو مسلط کر دیا۔ یہاں تک کہ اُن کے گوشت گر گئے۔ پھر اُن کے لئے سایہ پیدا کیا گیا جو کالا گھنا بادل جیسا تھا۔ جب انہوں نے سایہ کو دیکھا تو اس سے سایہ حاصل کرنے کےلئے جلدی کرنے لگے۔ یہاں تک کہ جب سب اس کے نیچے اکٹھے ہو گئے تو اللہ کا عذاب اُن پر آن پڑا اور سب ہلاک ہو گئے۔ 

پوری قوم سائبان کے نیچے جمع ہو گئی

اللہ تعالیٰ نے قومِ ایکہ پر عذاب بھیجا ۔ امام ابن منذر نے امام سدی سے روایت نقل کی ہے کہ اللہ تعالیٰ نے حضرت شعیب علیہ السلام کو اصحاب ایکہ کی طرف کی بھیجا۔ ایکہ سے مراد جنگل ہے۔ تو اس قوم نے آپ علیہ السلام کو جھٹلا دیا تو انہیں ”یوم الظلة “ سائبان والے دن کا عذاب نے پکڑ لیا۔ کہا اللہ تعالیٰ نے ان پر جہنم کا ایک دروازہ کھول دیا تو اُن پر ایسی گرمی چھا گئی جس کی وہ طاقت نہیں رکھتے تھے۔ انہوں نے پانی اور دوسری چیزوں سے ٹھنڈک حاصل کرنے کی کوشش کی ۔ وہ اسی حالت میں تھے کہ اُن کے لئے ایک بادل اٹھا یا گیا۔ جس میں پاکیزہ ٹھنڈی ہوا تھی۔ جب انہوں نے ٹھنڈک کو پایا تو اس سایہ کی طرف چل پڑے ۔ وہ ٹھنڈک حاصل کرنے کے لئے اس سایہ میں آئے۔ وہ پہلے جس چیزمیں تھے سب اس سے نکل پڑے۔ جب وہ سارے کے سارے اس کے نیچے جمع ہو گئے تو عذاب نے انہیں ہر طرف سے گھیر لیا۔ حضرت حسن بصری رحمتہ اللہ علیہ ( جلیل القدر تابعی) فرماتے ہیں ۔ اللہ تعالیٰ نے حضرت شعیب علیہ السلام کی قوم پر سات دن اور رات گرمی کو مسلط رکھا۔ یہاں تک کہ وہ گھر کے سایہ اور پانی سے بھی کوئی فائدہ نہیں اٹھا سکتے تھے۔ پھر کھلے میدان میں اُن کے لئے ایک بادل بلند کیا گیا تو انہوں نے اس سائبان کے سایہ میں آرام پایا تو ایک دوسرے کو بلانے لگے یہاں تک کہ جب وہ سب جمع ہو گئے تو اللہ تعالیٰ نے اُن پر آگ کو بھڑکا دیا۔

شدید گرمی اور گھٹن

قوم ایکہ پر جو عذاب آیا اس کے بارے میں حضرت عبداللہ بن عباس رضی اللہ عنہ سے پوچھا گیا تو انہوں نے فرمایا۔ اللہ تعالیٰ نے اُن پر رات کی گرمی اور سخت حرارت بھیجی۔ اس نے ان کی سانسوں کو گرفت میں لے لیا۔ وہ گھروں کے تہہ خانوں میں داخل ہو گئے۔ تو یہ عذاب ان کے گھروں کے تہہ خانوں میں داخل ہو گیا۔ عذاب نے انہیں شدید گھٹن میں مبتلا کر دیا وہ گھروں سے نکل کر کھلے میدان کی طرف آئے تو اللہ تعالیٰ نے اُن پر بادل کو بھیجا۔ جس نے انہیں سورج کی تپش سے سایہ دیا۔ انہوں نے اس سایہ کی ٹھنڈک اور لذت پائی تو انہوں نے ایک دوسرے کو بلایا۔ یہاں تک کہ وہ سب اُس سائبان کے نیچے جمع ہو گئے۔ تو اللہ تعالیٰ نے اُن پر آگ گرا دی۔ حضرت قتادہ رحمتہ اللہ علیہ فرماتے ہیں کہ اللہ تعالیٰ نے اُن پر گرمی کو سات دن تک مسلط کیا۔ انہیں نہ تو کوئی سایہ فائدہ پہنچاتا تھا اور نہ ہی دوسری کوئی چیز فائدہ پہنچاتی تھی۔ پھر اللہ تعالیٰ نے اُن پر بادل بھیجا تو وہ اس کے سایہ میں سکون حاصل کرنے آئے۔ اللہ تعالیٰ نے اسے اُن کے لئے عذاب بنا دیا جس نے انہیں جلا دیا۔ اُن پر آگ بھیجی گئی وہ بھڑک اٹھی جو انہیں کھا گئی۔ 

ایک شخص نے سائبان کے نیچے سب کو بلایا

قارئین کرام، قوم ایکہ پر جو سائبان کا عذاب آیا تھا اُس کے بارے میں ہم کوشش کر رہے ہیں کہ جتنی روایات ہمیں مل سکیں وہ ہم آپ کی خدمت میں پیش کر دیں۔ اوپر ہم نے چند روایات پیش کی ہیں۔ ابھی ہم کچھ اور روایات آپ کی خدمت میں پیش کر یں گے۔ پھر انشاءاللہ ہمارے الفاظ میں اس عذاب کی تفصیل پیش کریں گے۔ علامہابن کثیر لکھتے ہیں۔ بالآخر جس قسم کا عذاب یہ مانگ رہے تھے اسی قسم کا عذاب اُن پر آیا۔ انہیں سخت گرمی محسوس ہوئی ۔سات دن تک گویا زمین ابلتی رہی کسی جگہ کسی سائے میں ٹھنڈک یا راحت میسر نہیںہوئی ۔ تڑپ اٹھے، بے قرار ہو گئے۔ سات دنوں بعد انہوں نے دیکھا کہ ایک سیاہ بادل ان کی طرف چلا آرہا ہے۔ وہ کالا گھنا بادل ان کے سروں پر آکر چھا گیا۔ یہ سب گرمی اور حرارت سے زچ ہو گئے تھے۔ اس کے نیچے جا بیٹھے۔ جب سارے کے سارے اس کے سائے میں پہنچ گئے تو وہیں بادل میں سے آگ برسنے لگی۔ اس دن کے سائبان والے سخت عذاب نے اُن میں سے ایک کو بھی نہیں چھوڑا ۔ اس کے بعد آگے لکھتے ہیں۔ حضرت عبداللہ بن عمر فاروق رضی اللہ عنہ فرماتے ہیں کہ سات دن تک وہ گرمی پڑی کہ الامان والحفیظ ۔ کہیں ٹھنڈک کانام نہیں تھا۔ تلملا اٹھے۔ اسکے بعد ایک کالا گھنا بادل اٹا اور امڈا ۔ اس کے سائے میں ایک شخص پہنچا اور وہاں راحت اور ٹھنڈک پا کر اس نے دوسروں کو بھی بلایا ۔ جب سب لوگ جمع ہو گئے تو کالا گھنا بادل پھٹا اور اس میں سے اُن پر آگ برسی یہ بھی مروی ہے کہ کالا گھنا بادل جو بطور سائبان کے تھا۔ اُن کے جمع ہوتے ہی ہٹا لیا گیا اور سورج سے اُن پر آگ برسی ۔ جس نے اُن کا بھرتہ بنا دیا۔ حضرت عبداللہ بن عباس رضی اللہ عنہ فرماتے ہیں۔ کہ سخت گرج ، کڑک اور گرمی شروع ہوئی ۔ جس سے سانسیں گھٹنے لگیں۔ اور بے چینی حد کو پہنچ گئی ۔ گھبرا کر شہر چھوڑ کر میدان میں جمع ہو گئے ۔ باد ل آیا جس کے نیچے ٹھنڈک تھی۔ سب اس کے نیچے راحت حاصل کرنے کے لئے جمع ہو گئے۔ وہیں آگ برسی اور سب جل بھن گئے۔ یہ تھا سائبان والے بڑے بھاری دن کا عذاب جس نے ان کا نام و نشان مٹا دیا۔

جہنم کا دوازہ کھول دیا گیا

حضرت شعیب علیہ السلام کی قوم پر سائبان کے دن والے عذاب کے بارے میں امام قرطبی لکھتے ہیں۔ حضرت عبداللہ بن عباس رضی اللہ عنہ سے اور دوسرے علمائے کرام سے مروی ہے۔ اللہ تعالیٰ نے ان پر جہنم کا دوازہ کھول دیا۔ اللہ تعالیٰ نے ان پر شدید گرمی کو بھیجا۔ جس نے ان کی سانسوں کو گرفت میں لے لیا۔ وہ ان کے گھروں میں داخل ہو گئے۔ انہیں نہ تو کوئی سایہ فائدہ دیتا تھا اور نہ ہی پانی سے کوئی فائدہ ہوتا تھا۔ گرمی نے ان کو پکا دیا ۔ وہ بھاگ کر جنگل کی طرف چلے گئے۔ اللہ تعالیٰ نے ان پر بادل کو بھیجا۔ اس نے اُن پر سایہ کر دیا۔ انہوںنے اسکی ٹھنڈک ، راحت اور عمدہ خوشبو پائی۔ انہوںنے ایک دوسرے کو بلایا۔ جب وہ سب بادل کے نیچے جمع ہو گئے تو اللہ تعالیٰ نے اُن پر آگ کو بھڑکا دیا۔ زمین پر زلزلہ برپا ہو گیا تو وہ یوں جل گئے جس طرح کڑاہی میں مکڑی جل جاتی ہے تو وہ سارے کے سار ے راکھ ہو گئے۔ پہاڑوں کے غاروں میں گھسے ، درندوں کی کھوہوں میں گھسے تا کہ ٹھنڈک حاصل ہو۔ لیکن وہاں وہ اور زیادہ شدید گرمی پاتے تھے۔ پھر وہ جنگل کی طرف بھاگے اُن پر بادل نے سایہ کر لیا۔ یہی ظلہ تھا ۔ انہوںنے اس میں ٹھنڈک اور باد نسیم کو پایا۔ اس بادل نے ان پر آگ کو برسا یا تو وہ جل گئے۔ 

عذاب کی شروعات ۔ شدید گرمی

حضرت شعیب علیہ السلام کی قوم ایکہ نے عذاب کی مانگ کی اور کفر و شرک اور تمام برائیوں پر ڈٹے رہے۔ آخر کار اللہ تعالیٰ نے اس بد بخت قوم پر عذاب بھیجنے کا ارادہ فرمایا۔ قارئین کرام اوپر ہم نے عذاب کے تعلق سے اتنی روایات آپ کی خدمت میں پیش کی ہیں کہ اس سے عذاب کی ہر چھوٹی بڑی تفصیل آپ کی سمجھ میں آگئی ہو گی۔ لیکن یہ مختلف روایتوں میں بکھری ہوئی ہیں۔ اب ہم کوشش کریں گے کہ قوم ایکہ پر آئے عذاب کو ایک مربوط واقعہ کی شکل میںپیش کریں۔ انشا اللہ ۔ حضرت شعیب علیہ السلام کی قوم پر عذاب بھیجنے کا اللہ تعالیٰ نے ارادہ فرمایا تو ان پر شدید گرمی مسلط کر دی۔ حالانکہ اس قوم کا علاقہ بہت ہی ہرا بھرا اور ٹھنڈا علاقہ تھا۔ اور ہر کسی کا اپنا ایک باغ تھا۔ جہاں ٹھنڈک رہا کرتی تھی۔ لیکن شدید گرمی جب پڑی تو انہیں کہیں بھی آرام نہیں ملا۔ دھوپ میں بہت زبردست گرمی اور شدت پیدا ہو گئی تھی۔ سورج کی روشنی یعنی دھوپ میں اتنی تیزی اور گرمی پیدا ہو گئی تھی کہ ان لوگوں کے لئے اس میں نکلنا مشکل ہو گیا تھا۔ اور ان کے لئے دھوپ کی تپش ناقابل برداشت ہو گئی تھی۔ اس لئے وہ لوگ جب بھی باہر جاتے تو چھتری یا سی قسم کی کسی چیز کا سایہ کر لیا کرتے تھے۔

ہوا کی نمی ختم کر دی۔

اللہ تعالیٰ نے قوم ایکہ پر شدید گرمی مسلط کر دی۔ دھوپ میں اتنی تیزی اور شدت تھی کہ ان کا گھروں سے نکلنا اور اپنی دکانوں یا منڈیوں اور کھیتوں اور باغوں تک پہنچنا مشکل ہو گیا۔ دوسرے ممالک کے تاجر اور قافلے اپنے ملکوں میں واپس چلے گئے۔ اور تمام لوگوںکو اس علاقے میں آنے جانے کو منع کر دیا۔ اب قوم ایکہ کی تجارتی منڈیاں، راستے اور ان کی بستوں کی گلیاں ، سڑکیں اور راستے سب ویران پڑے ہوئے تھے۔ جانور اورمویشی وغیرہ بھی گرمی سے بے حال تھے۔ اور لوگوں کو صرف گھروں کے سائے میں ہی آرام ملتا تھا۔ درخت ، پیڑ ، پودے ،کھیت ، کھلیان اور باغوں کی ہریالی ختم ہونے لگی۔ اور تما م سوکھنے لگے۔ لیکن اس کے باوجود یہ بد بخت قوم کفر و شرک میں ہی مبتلا رہی۔ یہاں تک کہ جس درخت کی یہ لوگ پوجا کر تے تھے وہ بھی سوکھ گیا۔ ا س کے بعد اللہ تعالیٰ نے ہوا کی نمی ختم کر دی اور ہوا بھی بے حد گرم ہو گئی۔ اس سے پہلے تو یہ لوگ اپنے گھروں ، باغوں اور گھنے درختوں کی چھاﺅں میں کچھ آرام محسوس کر تے تھے۔ لیکن ہوا کے گرم ہونے کی وجہ سے اور شدید گرمی سے تمام درخت ، باغ اور جنگل کے سائے بھی ختم ہو گئے۔ اور گھروں کے سائے میں بھی اتنی گرمی لگتی تھی کہ ان کے لئے سانس لینا مشکل ہو گیا۔ ان لوگوں کو اپنے گھروںمیں بھی بے حد تکلیف ہونے لگی۔ اور ہر شخص ہر وقت پسینے میں ڈوبا رہتا تھا۔ اور تیز تیز سان لیتا رہتا تھا۔ 

پانی بھی بے حد گرم ہو گیا

اللہ تعالیٰ نے ہوا میں نمی ختم کر دی تھی۔ اور ہر وقت گرم ہوا چل رہی تھی۔ اور رات میں بھی گرم ہوا چلتی تھی ۔ ہر شخص کو شدید پیاس لگی رہتی تھی۔ پیاس بجھانے کے لئے یہ لوگ پانی بار بار پی رہے تھے۔ لیکن اس شدید گرمی میں پانی بھی اتنا گرم ہو جاتا تھا کہ بار بار پانی پینے کے باوجود بھی پیاس نہیں بجھتی تھی۔ ہر وقت بدن سے پسینہ بہتا رہتا تھا۔ اور گھٹن کا شدید شکار یہ لوگ رہتے تھے۔ اور ہر شخص ہر وقت تیز تیز سانس لیتا رہتا تھا۔ گرمی سے بچنے کے لئے یہ لوگ اپنے گھروں کے تہہ خانوں میں پہاڑوں کے غاروں میں یہاں تک کہ درندوں کی کھوہوں میں بھی گھس گئے کہ شاید گرمی سے کچھ راحت مل جائے۔ لیکن زمین بھی اتنی گرم ہو چکی تھی کہ انہیں تہہ خانوں، غاروں اور زمین کے اندر کی دوسری جگہوں پر بھی آرام نہیں ملا۔ بلکہ وہ وہاں اور زیادہ گھٹن کا شکار ہو گئے۔ لیکن افسوس، یہ بد بخت اتنی تکلیف اور پریشانی اٹھانے کے باوجود حضرت شعیب علیہ السلام کی مخالفت کرتے رہے۔ اور اللہ تعالیٰ پر ایمان نہیں لائے۔

سائبان بنا دیا گیا

حضرت شعیب علیہ السلام کی قوم شدید گرمی سے پریشان تھی۔ نہ باہر آرام تھا اور نہ ہی گھروں میں آرام تھا۔ تمام درخت، پیڑ ، پودے اور جنگل سوکھ گئے تھے۔ جانور اور مویشی وغیرہ مرتے جا رہے تھے۔لیکن انسانوںکو ان کی پرواہ نہیں تھی۔ بلکہ ہر شخص اپنی فکر میں مبتلا تھا۔ ان کی بستی سے کچھ دور پر ایک بڑا اور گھنا جنگل تھا۔ جو پہلے ہر وقت ہرا بھرا رہتا تھا۔ لیکن سخت تیز دھوپ اور گرم ہوا اور پانی کی کمی کی وجہ سے اس جنگل کے تمام درخت سوکھ گئے تھے۔ اور پورے جنگل میں سوکھے درخت کھڑے تھے۔ اللہ تعالیٰ نے ایک بہت بڑا کالا گھنا بادل بھیجا۔ وہ بادل آیا اور اس جنگل کے اوپر آکر رک گیا۔ اور سائبان کی طرح پورے جنگل کو ڈھک لیا۔ اور جنگل میں سایہ ہو گیا۔ اب حالت یہ تھی کہ چاروں طرف سخت تپش والی دھوپ تھی اور ہو ا بے حد گرم تھی۔ گھروں کے اندر بھی گرمی تھی۔ لیکن اس جنگل میں گہری ٹھنڈی چھاﺅں تھی۔ حضرت شعیب علیہ السلام کی قوم کے لوگوں نے دور سے اس جنگل میں گھنے سائے کو دیکھا تھا۔ لیکن وہاں تک اتنی شدید گرمی میں کسی کے جانے کی ہمت نہیں تھی۔ ہر کوئی یہ سوچ کر وہاں نہیں جا رہا تھا کہ اتنی تکلیف اٹھا کر وہاں جائیں گے اور وہاں بھی گرمی کا یہی عالم ہو گا تو ہمارے لئے ہمارے گھروںمیں واپس آنا مشکل ہو جائے گا۔ اس لئے ہم اپنے گھروں میں ہی ٹھیک ہیں۔ قوم ایکہ کی آبادی کئی لاکھ تھی۔ اور کافی دور تک پھیلی ہوئی تھی۔ اور پوری آبادی والے دیکھ رہے تھے کہ ایک بادل سائبان کی طرح جنگل پر چھایا ہوا ہے۔ اور پورے جنگل میں گھنی چھاﺅ ں ہے۔

ایک شخص نے قوم کو سائبان کے نیچے بلایا

اللہ تعالیٰ نے جنگل کے اوپر سائبان بنا دیا تھا۔ اور اس کی ٹھنڈی چھاﺅں پورے جنگل میں تھی۔ وہاں بہت ٹھنڈک تھی۔ اور باقی ہر جگہ شدید گرمی تھی۔ لیکن قوم ایکہ والوں کو اس کی ٹھنڈک کا اندازہ نہیں تھا۔ ایک دن اتفاق سے ایک شخص یوں ہی اس جنگل کے سائے میں چلا گیا۔ جیسے ہی وہ اس سائبان کے سائے میں پہنچا تو اسے وہاں بہت ٹھنڈک اور سرور محسوس ہوا۔ وہ شدید حیرت میں پڑ گیا اور اندازہ لگا نے کے جنگل کے باہر نکل کر آیا تو سائبان کے نیچے سے نکلتے ہی پھر اسی شدی گرمی اور گھٹن نے اس کا استقبال کیا۔ وہ فوراً جنگل کے اندر سائبان کے سائے میں آگیا۔ اور وہاں آتے ہی اسے راحت ، سکون اور ٹھنڈک ملی۔ اس نے جنگل میں گھوم کر دیکھا۔ وہاں زمین میں سے ٹھنڈا پانی بھی نکل رہا تھا۔ اور کچھ چھوٹے چھوٹے پیڑ بھی پھلوں سے لدے ہوئے تھے۔ اس نے ٹھنڈا پانی پیا اور پھلوں کو کھایا اور تازہ دم ہو گیا۔ یہ سب دیکھ کر اسے بے حد خوشی ہوئی اور وہ خوشی سے چیختا چلاتا ہوا بھاگتا ہوا بستی کی طرف آیا اور انہیں بتانے لگا کہ جنگل میں سائبان کی چھاﺅں میں بہت ٹھنڈک ہے۔ 

قوم سائبان کے نیچے جمع ہونے لگی

اللہ تعالیٰ کی مرضی تھی کہ پوری قوم ایکہ جنگل میں سائبان کے نیچے جمع ہو جائے۔ وہ شخص خوشی خوشی بھاگتا ہوا آبادی میں آیا اور خوشی سے چلاچلا کر لوگوں کو کہنے لگا۔ کہ اے میری قوم کے لوگو، باہر نکلو اور میرے ساتھ جنگل میں سائبان کے نیچے چلو۔ وہاں بہت ٹھنڈک اور راحت ہے۔ اور ٹھنڈا پانی بھی ہے اور کھانے کے لئے پھل بھی ہیں۔ لوگ اپنے اپنے گھروں میں بے حال پڑے ہوئے تھے ۔ پہلے اس کی خوشی سے بھری آواز سن کر حیران ہو ئے اور جیسے تیسے گھروں سے باہر آئے ۔ حالانکہ باہر نکلنے کی ہمت کسی میں نہیں تھی۔ لیکن اس شخص کی جوش و خروش سے بھروی ہوئی آواز اور الفاظ سن کر باہر نکل آئے۔ اور حیرت سے اس کی باتیں سننے لگے اور اس کی خوشی دیکھنے لگے۔ وہ شخص خوشی خوشی دوڑ دوڑ کر ہر گھر اور محلے والوں کو بتانے لگا ۔ اس کے بعد دوڑتا ہوا جنگل کی طرف سائبان کے نیچے جانے لگا۔ کچھ لوگ جیسے تیسے پیچھے بھاگتے ہوئے جنگل میں جائے میں داخل ہو ئے اور زیادہ تر لوگ کھڑے ان کو دیکھ رہے تھے۔ جو لوگ اس شخص کے ساتھ جنگل میں سائبان کے سائے میں داخل ہوئے تھے انہوں نے سائے میں آتے ہیں ٹھنڈک اور راحت محسوس کی۔ اور یہ احسا س ہوتے ہی وہ خوش ہو گئے اور خوشی سے ناچنے لگے۔

پوری قوم سائبان کے نیچے آگئی

قوم ایکہ کی آبادیوں میں سائبان کے سائے کی خبر پھیلنے لگی۔ جو لوگ اپنی جگہ کھڑے ہو کر اس شخص کے ساتھ کچھ لوگوں کو جنگل میں داخل ہوتے دیکھ رہے تھے انہوں نے دیکھا کہ جو بھی شخص جنگل میں چھاﺅں میں داخل ہوتا تھا تو وہ خوش ہو کر ناچنے لگتا تھا۔ یہ کیفیت دیکھ کر وہ لوگ بھی سائبان کی چھاﺅں کی طرف بھاگنے لگے۔ ان سب کی حالت پہلے ہی سے خراب تھی لیکن جیسے تیسے گرتے پڑتے جنگل تک پہنچنے کی کوشش کر رہے تھے۔ جو بھی شخص سوکھے جنگل میں داخل ہوتا تھا۔ وہ سکون اور راحت محسوس کر کے خوش ہو جاتا تھا اور خوشی کے مارے ناچنے لگتا تھا۔ اور اس کی یہ حالت بقیہ آنے والوں میں نیا جرش بھر دیتی تھی۔ دھیرے دھیرے یہ خبر پوری قوم ایکہ کی آبادیوں میں پھیل گئی۔ اور ہر جگہ سے لوگ تیزی سے بھاگتے ہوئے سوکھے جنگل میں سائبان کی تنے ہوئے کالے گھنے بادل کی چھاﺅں میں آنے لگے۔ قوم ایکہ کی آبادی کئی لاکھ تھی۔ اور دور دور تک پھیلی ہوئی تھی۔ اور جیسے جیسے لوگوںکو معلوم ہوتا جا رہا تھا وہ تیزی سے سوکھے جنگل میں آتے جارہے تھے۔ اور یہ سلسلہ مسلسل جاری رہا۔ پورا دن لوگ آتے رہے اور پوری رات آتے رہے۔ اور دوسرے دن بھی لوگوں کے آنے کا سلسلہ جاری رہا ۔ یہاں تک کہ پوری قوم سائبان کے نیچے آگئی۔ حضرت شعیب علیہ السلام اورمسلمان اس سوکھے جنگل سے کافی دور رہے۔

آگ برسا دی گئی

حضرت شعیب علیہ السلام نے مسلمانوں کو فرما دیا تھا کہ اس سوکھے جنگل میں کالے گھنے بادل کی چھاﺅں میں نہیں جانا۔ کیوں کہ وہی اللہ تعالیٰ کا آخری اور فائنل عذاب ہے۔ اسی لئے مسلمان آپ علیہ السلام کے ساتھ رہے۔ اور قوم ایکہ کے کافروں کو سوکھے جنگل میں ٹھنڈی چھاﺅں میں داخل ہوتے دیکھتے رہے۔ آخر کار قوم ایکہ کا ایک ایک فرد اس سوکھے جنگل میں کالے گھنے بادل کی گھنی چھاﺅں میں داخل ہو گئے جو سائبان کی طرح تنا ہوا تھا۔ یہ سلسلہ کئی دنوں تک چلا۔ اور جب تمام کافر اس سائبان نما عذاب کے بادل کی چھاﺅں میں جمع ہو گئے تو اللہ تعالیٰ نے اپنا عذاب اُن پر نازل فرما دیا۔ وہ کالا گھنا بادل جو سائبان کی طرح پورے سوکھے جنگل پر چھایا ہوا تھا اچانک اس بادل کے کناروں سے آگ برسنے لگی اور اس آگ کی بارش سے سوکھے جنگل کے ہر طرف کنارے کے سوکھے درختوں میں آگ لگ گئی۔ اب ان لوگوں کے چاروں طرف جنگل میں آگ لگی ہوئی تھی اور یہ آگ تمام کافروں کو گھیرے ہوئے تھی۔ اور ان کے نکل بھاگنے کا کوئی راستہ نہیں تھا۔

پوری قوم ایکہ کے کافر ہلاک ہو گئے

اللہ تعالیٰ کے عذاب نے پوری قومِ ایکہ کے کافروں کو اپنی لپیٹ میں لے لیا تھا۔ سوکھے جنگل کے کنارو ں پر آگ برس رہی تھی اور سوکھے درختوں کو جلاتی جا رہی تھی۔ اور دھیرے دھیرے آگ بڑھتی جا رہی تھی اور قوم ایکہ پر آگ کا دائرہ تنگ ہو تا جا رہا تھا۔ تمام کافر جان بچانے کے لئے دوسرے کناروں کی طرف بھاگ رہے تھے لیکن وہاں بھی آگ استقبال کر رہی تھی۔ اور وہ ہر طرف سے آگ کے گھیرے میں آچکے تھے۔ پھر اللہ تعالیٰ نے حکم دیا تو وہ کالا گھنا بادل اچانک پھٹ پڑا اور پورے سوکھے جنگل پر ہر طرف آگ کی بارش ہونے لگی۔ اور قوم ایکہ کے کافر اس آگ میں کڑاہی میں گری مکڑیوں کی طرح جلنے لگے۔ اور دیکھتے ہی دیکھتے پورا جنگل جلنے لگا۔ اور یہ آگ اس وقت تک برستی رہی جب تک ایک بھی کافر زندہ رہا۔ جب تما کافر ہلاک ہو گئے تو اللہ تعالیٰ کے حکم سے آگ کی بارش رک گئی۔ اور دھیرے دھیرے جنگل کی آگ بجھنے لگی۔ 

کافروں اور ظالموں کا عبرتناک انجام

اللہ تعالیٰ کے حکم سے قوم ایکہ پر عذاب آیا۔ اور پوری قوم کے کافر اور ظالم لوگ سائبان کے عذاب میں سوکھے جنگل میں جل کر ہلاک ہو گئے۔ جب تک ایک بھی کافر اور ظالم زندہ رہا تب تک ان پر آگ برستی رہی ۔ حضرت شعیب علیہ السلام مسلمانوں کے ساتھ دور سے اس سوکھے جنگل پر کالے گھنے بادل میں سے آگ برستے اور کافروں اور ظالموں کا عبرتناک انجام دیکھتے رہے۔ جب تمام کافر اور ظالم لوگ ختم ہو گئے تو جنگل کی آگ بچھ گئی اور کام پورا ہو گیا۔ اللہ تعالیٰ نے سورہ الحجر میں فرمایا۔ ترجمہ ”اصحاب الایکہ ( ایکہ بستی کے رہنے والے ) بھی بڑ ے ظالم تھے۔ جن سے ہم نے انتقام لے ہی لیا ۔یہ دونوں بستیاں کھلے راستے پر ہیں۔“ ( سورہ الحجر آیت نمبر78, اور 79) یہ تھا اللہ تعالیٰ کا انتقام ۔ اس دنیا میں سب سے بڑا گناہ اللہ تعالیٰ کے ساتھ شرک ( اللہ تعالیٰ کے ساتھ ساتھ کسی اور کو بھی معبود ماننا اور عبادت کرنا) ہے۔ اور کفر ( اللہ تعالیٰ اور اس کے رسولوں کا انکار کرنا) ہے۔ کافر اور مشرک شخص کو اللہ تعالیٰ اس وقت تک معاف نہیں فرمائے گا جب تک وہ اسلام قبول نہیں کر ے گا۔ اگر اسلام قبول کر لیا تو اس کا حساب کتا ب ہوگا۔ اور اگر کافر اور مشرک ہی مر گیا تو دوزخ میں سیدھا جائے گا۔ اور کافروں سے اللہ تعالیٰ دنیا میں بھی انتقام لیتا ہے۔ اور آخرت میں بھی انتقام لے گا۔ 

حضرت شعیب علیہ السلام کا ذکر آگے ہوگا۔

 حضرت شعیب علیہ السلام مسلمانوں کے ساتھ دور کھڑے قوم ایکہ کے کافروں کا عبرتناک انجام دیکھتے رہے ۔ اس کے بعد آپ علیہ السلام مسلمانوں کو لے کر مدین کے ساحلی علاقے میں جزیرہ نما ئے سینا میں آباد ہو گئے۔ 

اگلی کتاب

حضرت موسیٰ علیہ السلام کا ذکر انشاءاللہ ہم اس کے بعد کریں گے۔ اور ان کے ذکر میں حضرت شعیب علیہ السلام کا ذکر آئے گا انشا اللہ ۔ کیوں کہ آپ علیہ السلام کے علاقے میں ہجرت کر کے موسیٰ علیہ السلام آئے تھے۔ اور آپ علیہ السلام نے ان کو اپنا داماد بنا لیا تھا۔ یہ تمام تفصیل انشاءاللہ حضرت موسیٰ علیہ السلام کے حالات میں بیان کریں گے۔

  ٭........٭........٭

 

روح کی بیماری کا علاج

روح کی بیماری کا علاج

' تمہیں پتہ ہے عائشہ اتنے سال گزر گئے اس کے باوجود تھماری اس کیفیت میں کوئی تبدیلی رونما نہیں ہوئی تم پہلے سے بھی زیادہ مایوس ہو اپنے رب سے ناامید اور اسکی مغفرت کے بارے میں بے یقین ہو ۔

کیوں ؟

آخر کیوں تم اپنے اللہ سے اتنی مایوس؟؟ میں نہیں جانتی عائشہ کہ تم سے ایسے کونسے گناہ سرزد ھوئے جو تمہیں لگتا ھے کہ اللہ کبھی معاف نہیں کر پائے گا ۔ لیکن میں اتنا ضرور جانتی ہوں گناہ چاہے جس بھی نوعیت کا ہو کتنا ہی سنگین کیوں نہ ہو میرے اللہ نے کہا ہے کہ 

تم سمندروں پہاڑوں جتنے گناہ بھی لے آؤ گئے تو صرف ایک خشیت الٰہی کا آنسو ، صرف ایک آنسو ان تمام گناہوں کو دھو ڈالے گا ۔

پھر تم اس کی رحمت سے اتنی مایوس کیوں ہو ؟

کیا تھمیں اس کے رحمان ہونے پر شبہ ہے یا تم اسکی صفت الغفار سے واقف نہیں ؟

وہ تو الودود ہے بے پناہ محبت کرنے والا ماؤں جتنا بھی نہیں ان سے بھی زیادہ محب 

تم اپنی ایک ماں کی محبت کا حق ادا نہیں کر سکتیں اس کی محبت کو جانچ نہیں سکتیں تو پھر وہ جو لا تعداد ماؤں سے بھی زیادہ محبت کرتا ہے اس کی محبت کو تم اپنے گناہوں کی کسوٹی پر رکھ کر کیوں پرکھ رہی ہو؟

وہ بڑا رحیم ہے عائشہ اس کی صفتِ رحمانیت کی انتہا نہیں ۔

وہ خود کہتا ہے مانگو مجھ سے تمہارہ مانگنا مجھے اچھا لگتا ہے، ہے کوئی مغفرت چاہنے والا؟؟

تم کیوں پریشان ہوتے ہو۔

کیا میری قدرت پر یقین نہیں ہے تم کو ......؟

میں تو تمہاری شہ رگ سے بھی زیادہ قریب ہوں۔

مجھ سے مکمل یقین کہ ساتھ مانگ کر تو دیکھو۔

عرش پر کن کہہ کر پوری دنیا کو تھمارا وسیلہ بنا کر تمہیں نہ نوازا تو کہنا .....!

تمہیں لگتا ہے تم ٹوٹ چکی ہو۔

اپنے خالق سے جو تم منہ موڑ چکی ہو۔گناہوں کی چکی میں جو تم پس چکی ہو۔دامن خالی لیے جو تم پھر رہی ہو۔

تو کھولو قرآن اور پڑھو

" لا تقطو من رحمتہ اللّہ " ( الزمر)

جب اللہ خود کہہ رہا ہے کہ میری رحمت سے مایوس نہ ہو میری رحمت میرے غضب پر بھاری ہے ۔

حضرت ابو ہریرہ رضی سے روایت ہے کہ رسول اللہ صلی اللہ علیہ وسلم نے فرمایا:

جب اللہ نے مخلوقات کو پیدا فرمایا تو لوح محفوظ میں یہ لکھ دیا ۔

"میری رحمت میرے غضب پر غالب ہے"

یہ تحریر اللہ سبحان و تعالیٰ کہ پاس عرش پر موجود ھے (صیحیح مسلم : 7145)

تو پھر کیوں نا امید ہو جبکہ تمہارے پاس ربِ غفور بھی ہے 

تھمیں پتہ عائشہ اللہ نے یہ کیوں کہا کہ مایوسی کفر ھے ؟ 

دراصل جب تم یہ کہتے ہو کہ اللہ معاف نہیں کرے گا وہ توبہ قبول نہیں کرے گا ۔ تو یہ کہہ کر تم اس کہ اختیارات کو محدود کر رہے ہوتے ہو ۔ کہ اللہ کہ پاس وہ اختیارات نہیں کہ وہ کچھ کر سکے ۔

تم حقیقت میں اس کہ التواب اور الرحمان ہونے کو جھٹلاتے ہو اور یہ خود میں کتنی بڑی بات ہے کہ تم اپنے قول ، فعل اور عمل سے اللہ کی صفات کا انکار کرتے ہو نعوذ باللہ۔

تم نے کہا اللہ تم سے بیزار ہے ؟

تو پریشان نہ ہو اللہ خود کہہ رہا ہے 

" ما ودعک ربک وما قلی " 

'نہ تو تیرے رب نے تجھے چھوڑا ہے اور نہ وہ بیزار ہو گیا ہے'۔(الضحی: 3)

تھمیں لگتا ہے کہ اللہ نے تھمارے دل پر مہر لگا دی کہ حق تم پر اثر انداز نہیں ہوتا وہ تمہیں ہدایت نہیں دینا چاہتا ۔

اللہ کیوں نہیں چاہے گا تمہیں معاف کرنا 

وہ تو بہانے بہانے سے تمہیں معاف کر دیتا ہے ذرا سی نیکی کہ خلوص کو گناہوں کہ پلڑے کہ مقابلے میں بھاری کر دیتا۔

ایسا نہیں ہے عائشہ اگر ایسا ہوتا تو جب تم گناہ کرتی ہو اس کے بعد احساس شرمندگی اور پچھتاوا یہ سب اللہ ہی کی طرف سے تو ہوتا ہے وہ تو چاہتا ہے تمہیں معاف کرنا ۔ 

اللہ ظالم تو نہیں ہے سراپا پیکر محبت ہے 

ظالم تو ہم ہیں

گناہوں کی زیادتی سے خود کو کند غن اور روح کو بوسیدہ کر دیتے جب کہ اس سب کے باوجود بھی اللہ نے اپنے بندوں کو اکیلا نہیں چھوڑا۔

اللہ کہتا ھے:

" اے بندوں جنہوں نے اپنی جانوں پر زیادتی کی ھے اللہ کی رحمت سے نا امید نہ ہو ۔ بے شک اللہ تمام گناہوں کو بخش دیتا ہے اور وہ خوب بخشنے والا مہربان ہے

'تو کیسے پتہ چلے گا میم کہ اللہ ہم پر مہربان ھے؟

چلو مان لیا اس نے معاف کر دیا لیکن کیا وہ مجھ جیسے گنہگار سے محبت بھی کرتا ھو گا جیسی اپنے کسی نیک بندے سے کرتا ھے ؟'

' اللّٰہ کب مہربان نہیں ھوتا وہ تو کافروں کے لئیے بھی شفیق ہے انکی اتنی نافرمانیوں کے باوجود انکی ضروریات سے غافل نہیں ہوتا اس کی رحمت کی پہلی نشانی یہ ھے کہ انسان کو اپنے عیوب نظر آنا شروع ھو جاتے ھیں ۔

اور رھی بات محبت کی تو یقین جانو اللّٰہ کو اپنے نیک بندوں سے زیادہ اپنے گنہگار بندوں کی پروا ھوتی ھے ۔ سورۃ زمر میں وہ گناہگاروں کو سپنا بندہ کہہ کر مخاطب کرتا ہے اس سے بڑھ کر محبت کیا ہو گی؟؟ اسے آپکی پروا ہے وہ آپ سے غافل نہیں ہےاور یقین کرو پروا کرنا محبت کرنے سے زیادہ special ھوتا ھے

اس کہ نیک بندے تو ھیں ھی اس کے وہ جانتا ھے یہ میری ہر آن فرمانبرداری کریں گے لیکن اپنے گنہگار بندوں کا وہ انتظار کرتا کہ نا جانے کب یہ لوٹ آئیں۔تو مایوس مت ہوں بلکہ سچی توبہ کر کے اللہ سے یہ دعا کیا کریں کہ مجھے توبہ پر قائم رہنے والا بنا دے

"اللّٰہ سے یہ کہا کرو اللہ تیری رحمت کی امیدوار ھوں۔ لمحے بھر کہ لیے بھی مجھ کو میرے نفس کے حوالے نہ کر نا اور میرے معاملات درست فرما تیرے سوا کوئی الہ نہیں میں کیا کروں میرے پاس تیرے سوا کوئی در نہیں اور تیرے علاوہ کوئی میرا رب نہیں 

'پر میں کیا کروں میم ؟ مجھے اللّٰہ کہ سامنے جاتے ھوئے ڈر لگتا خوف آتا جب اس کے سامنے کھڑی ھوتی ھوں کہ وہ ......

میم ایسا لگتا جیسے وہ مجھ سے ناراض ھے۔'

'یہ کیسا خوف ھے عائشہ جو تھمیں تھمارے رب سے مایوس کر دے خشیت الٰہی تو وہ ھوتی ھے کہ جب تم گناہ کا ارادہ یا خیال کرو تو اللّٰہ کہ خوف سے تم اس سے باز رہو یا پھر اگر گناہ ھو گیا تو اللّٰہ کی ناراضگی اس کہ ڈر کی وجہ سے فوراً توبہ کر کے اس کی طرف رجوع کرو یہ ھوتا ھے رحمان کا خوف باقی تم یہ کہو کے اس کہ ڈر کی وجہ سے تم اس کا سامنا نہیں کر پا رھی تو یاد رکھو یہ سب شیطانی وسوسے ھیں جو رحمان کا دشمن پہلے تو گناہ کو تھمارے سامنے مزین کر کے پیش کرتا ہے اور جب تم اس کی مرتکب ٹھہرتی ھو تو پھر تھمیں ھی مظلوم بنانے کی کوشش کرتا ھے کہ تم تو بڑی مظلوم ھو دیکھو اپنے اللّٰہ کی طرف پلٹنا چاہتی ھو پر نہیں تم گنہگار بھی تو بہت ھو تھمارا اللّٰہ تھمیں کبھی معاف نہیں کرے گا۔'

' ٹھیک ھے میم مجھے سمجھ آ گئ اللّٰہ کی ذات پر بھروسہ اور کامل یقین رکھنا اور توبۃ النصوح کرنا یہی اصل معافی ہے اور اللّٰہ مجھے معاف کر دے گا ھمیشہ ....جب بھی میں اس سے توبہ کرو گی لیکن میرا مسئلہ تو وھی ھے میں اپنی توبہ میں مستقل استحکام نہیں لا پا رھی '

' ھمممم .....ہاں جانتی ھو تم اپنی توبہ کو مستقل کیوں نہیں کر پا رھی کیونکہ تھماری روح بیمار ھے اس کو حقیقی مسیحائی کی ضرورت ھے اور تم اس کو وہ مہیا نہیں کر پا رھی'

'مطلب؟'

'دیکھو عائشہ جیسے ھمارا جسم کسی بیماری میں مبتلا ھوتا ھے تو تم ڈاکٹر کہ پاس جاتی ھو دوائی لیتی ، علاج کرواتی ہو ، ڈاکٹر کی بتائی ھوئی احتیاطی تدابیر پر عمل کرتی ھو ، پرہیز اور دعا کرتی ھو تب جا کر جسم کی وہ بیماری دور ھوتی بلکل اسی طرح ھماری روح بھی بیمار ھوتی گناہ کر کر کہ وہ اس قدر لاغر ھو چکی ھوتی ھے کہ صرف دعا کرنے سے وہ ٹھیک نہیں ھو سکتی اس لیے اسے دعا کہ ساتھ ساتھ دوا کی بھی اشد ضرورت ہوتی ھے '

'اور وہ کیسے ممکن ھے میم میں روح کا علاج کیسے کروں اسکی دوا کیسے کروں؟'

'اس کے لیے دو باتیں ضروری ھیں وہ تھمیں سمجھنی ھو گی سب سے پہلی بات یہ کہ تم یہ چاہتی ھو کے ایک بار اگر تم توبہ کر لو تو دوبارہ کبھی وہ گناہ تم سے سرذد نہ ھو تو ایسا نہیں ھو سکتا دیکھو انسان نکلا ھی نسیان سے ھے جس کا مطلب ھی بھول جانا غلطی کرنا ھے تو پھر تم کیسے چاہ سکتی ھو کہ تم سے دوبارہ کبھی کوئی گناہ یا غلطی نہ ھو نیکی برائی کا یہ سلسلہ تا ابد جاری رھے گا انسان کی خاصیت یہ ھے کہ وہ ھمیشہ ایک مزاج میں نہیں رہ سکتا اگر آپ کہیں کہ مستقل وہ ایک ھی کیفیت میں رھے تو ایسا نہیں ھو سکتا کبھی اس پر اچھائی غالب آتی ھے تو کبھی برائی this is a normal لیکن ھمیں یہ کوشش کرنی چاہیے کہ زیادہ تر ھم پر اچھائی ھی غالب رھے اور جب برائی کا غلبہ ھو تو اس صورت میں اس سے نکلنے کی تدابیر کرنی چاہیے نا کہ اللّٰہ سے ھی بندہ مایوس ھو جائے۔

اور دوسری اھم بات ہر کسی سے اپنے مسائل شئیر کرنا چھوڑ دو کیونکہ ہر کسی کہ پاس تھمارے مسئلہ کا حل نہیں ھے ہر کوئی ڈاکٹر نہیں ھو سکتا چاہے وہ کتنا ھی پڑھا لکھا کیوں نہ ھو ۔

بلکل اسی طرح ہر نیک بندہ تھماری روح کا طبیب نہیں ھو سکتا ۔

اور بعض اوقات ایک لمبے عرصے تک علاج کروانے کہ بعد بھی انسان صحتیاب نہیں ہوتا بلکہ بیماری کی اس stage پر آ جاتا ھے حہاں ڈاکٹر کہتا ھے کہ اب صرف احتیاط اور ان کہ اندر کی قوت مدافعت ھی انہیں مکمل صحت مند کر سکتی اب ڈاکٹر کچھ نہیں کر سکتا اس نے جو کرنا تھا وہ کر دیا بلکل اسی طرح ھماری زندگی میں بھی ایک مقام ایسا آتا ھے جہاں سب سے زیادہ ضرورت ھمیں اپنی ھوتی ھے وہ مسیحا جس کی تلاش میں ھم سرگرداں ھوتے ھیں جو اس تھکی ماندی روح میں جان ڈال سکے وہ کوئی اور نہیں ھم خود ھی اپنے مسیحا ھوتے اور جب ھم یہ بات نہیں سمجھتے اپنے اندر نہیں جھانکتے پھر اللّٰہ ھمیں اکیلا کر دیتا ھم سے دوست ، فیملی تختہ دار سب دور کر دیتا اور ہاتھ پیر باندھ کر بے بس کر کے زیست میں ننگے پیر تپتے صحرا میں جھلسنے کو چھوڑ دیتا ہے وہ چھوٹے چھوٹے عذاب دیتا ہے تا کہ ھم تنہائی میں اس بے بسی کی کیفیت میں غورو فکر کر سکیں اس رب تعالیٰ کہ فیصلوں پر اپنے آپ کو کھوج کر سکیں اور اس کی سمت لوٹ سکیں

تھماری روح کو بھی اس وقت تھماری ضرورت ھے تھماری مسیحائی کی اپنی روح کا دردماں خود بن جاؤ کیونکہ یہ۔ تھماری جنگ ھے جس کو تم کسی دوسرے کہ بل بوتے پر نہیں جیت سکتی یہی جہاد بالنفس ھے اس جہاد میں امید اور صبر کو اپنا ہتھیار بنا لو دوسرے لوگ صرف صحیح اور غلط کو تھمارے لیے واضح کر سکتے ہیں اب اس صیحیح اور غلط کہ دوران تم نے راستوں کا انتخاب کیسے کرنا ھے ان پر چلنا کیسے ھے یہ تم پر ھے کسی دوسرے کہ پاؤں پر پیر رکھ کر تم نہیں چل سکتیں اپنے حصے کا بوجھ تکلیفوں سمیت تھمیں خود ھی اٹھانا ھے ۔'

' لیکن وہ گناہ اگر سنگین ھو اس پر سخت عذاب کی وعید سنائی گئی ھو اسے ترک کرنے کا فوری طور پر حکم دیا گیا ھو ....اور وہ آپ نہ کر پا رھے ھوں ....تو کیسے کریں میم ؟؟؟؟

'اس کے لیے صرف گناہ ترک کرنے کا ارادہ کرنا کافی نہیں ھے بلکہ مکمل سد باب کرنا ضروری ھے۔'

' پر وہ لوگ بھی تو ھوتے ھیں نا جو ایک بار گناہ چھوڑنے کا تہیہ کریں تو تائب ھونے کہ بعد کبھی اس گناہ کی طرف پلٹتے نہیں اور اللّٰہ کہ محبوبان میں شامل ھو جاتے ھیں پھر میں کیوں نہیں ایسا کر پا رھی؟'

' دیکھو عائشہ گناہ چھوڑنے کا تعلق ھمارے ایمان سے ھے جتنا مضبوط ایمان ھو گا اتنا جلدی گناہ چھوڑنا ہمارے لئیے آسان ہو گا

'لیکن میرا ایمان ابھی اتنا مضبوط نہیں ھے میں کیا کروں؟'

' اس کے لیے تھمیں اپنے آپ کو وقت دینا ھو گا صبر کہ ساتھ step by step تدبیر کرنی ھو گی ۔ کچھ گناہ ایسے ھوتے ھیں جن میں ھم مسلسل involve رھے ہوتے ہیں تو وہ ایک عادت بن جاتی ھے اور عادتیں ھمیشہ رویوں سے بنتی ھیں اور اگر وہ رویہ تبدیل نہ کیا جائے تو عادتیں مزید پختہ ھوتی جاتی ھیں پھر ان کو چھوڑنا مشکل ھوتا ھے تو گناہ کی عادت چھوڑنے کہ لیے ضروری ھے کہ وہ رویہ بدلا جائے جو اس سب کی وجہ بنا اس وجہ کا سد باب کرنے کی کوشش کرو ۔ 

دیکھو وہ اللّٰہ ھے تھماری نیت دیکھے گا یہ نہیں پوچھے گا کہ تم نے ارادہ کیا گناہ کو ترک کرنے کا سوچا تو پھر چھوڑا کیوں نہیں ، وہ ھونے سے پہلے چاہنے کو دیکھتا ھے کیونکہ وہ چاہت رکھنے والا ھے لیکن اس کے لیے ضروری ھے self power کی اس کو بڑھانے کی اس کہ بغیر تم اپنے ارادوں میں مضبوطی نہیں لا سکتی ان میں استحکام نہیں لا سکتی ھو۔

ایک اور بات عائشہ جب تم اس کہ رستے پر چلو تو یہ ذہن میں رکھنا اس کا راستہ آسان نہیں ھے اور منزل کا کوئی نام نہیں ھے ضروری نہیں ھے کہ تم اس کہ راستے پر چلو تو منزل پر بھی پہنچو ضروری یہ ھے کہ جب موت آئے تو تم اللّٰہ کے راستے پر ھوں چاہے دوڑ رھے ھوں چل رھے ھوں یا خود کو گھسیٹ رھے ھوں ضروری صرف اس راستے پر ھونا ھے ۔

دوسری بات یہاں قدم قدم پر آزمائشوں سے تھمارے ایمان کو امتحان میں ڈالا جائے گا لیکن تم گھبرا کر پیچھے مت ہٹنا مایوس مت ھونا کیونکہ یہاں میرے اللہ نے یہ کہا ہے کہ 

ھم آزمائیں گے تھمیں تھمارے مال ، اولاد اور جان سے اور جہاں اس نے یہ کہا وہیں اللہ نے یہ بھی کہا ہے کہ کسی نفس پر اس کی طاقت سے زیادہ بوجھ نہیں ڈالتا تو یہ سوچ کر پریشان مت ہونا کہ یہ آزمائش تمہارے لیے بہت بڑی ہے اس تکلیف کو سہنا تمہارے بس کی بات نہیں یقین رکھو اس بات پر کہ تمہارا رب وہ ہے جو کبھی بھی اس تکلیف میں یا آزمائش میں مبتلا نہیں کرے گا جس کو تم سہار نہ سکو راستہ ذرا کٹھن ھے لیکن منزل آسائشوں سے بھری پڑی ھے اس کا تم سے تھمارے رب نے قرآن میں بہترین انعام کا وعدہ کیا ھے راستے کی یہ وقتی تکلیف کو برداشت کر کے صبر کے ساتھ تم حقیقی آرام و سکون کی متحمل ھو سکتی ھو ۔ میں امید کرتی ھوں تھمیں میری بات سمجھ میں آ گئ ھو گئ ۔'

'ہاں بہت سی الجھنیں سلجھی ھوئی نظر آتی میم ' جزاک اللہ خیرا کثیرا

'خوشی ھوئی جان کر اللّٰہ تھمارے رستے آسان کرے تھمارا سینہ اپنے دین کہ لیے کھول دے تھمیں اپنے دین پر استقامت عطا کرے آمین مجھے امید ھے کہ اگلی بار جب ھماری ملاقات ھو گی تو صورت حال آج سے بہت مختلف ھو گی

ان شاءاللہ'

'ان شا ء اللہ'

ختم شد

01 حضرت ایوب علیہ السلام Story of Prophet Ayoob

01 حضرت ایوب علیہ السلام

تحریر شفیق احمد ابن عبداللطیف آئمی

قسط نمبر 1

حضرت ایوب علیہ السلام کا سلسلۂ نسب

قارئین کرام ، اس سے پہلے ہم آپ کی خدمت میں حضرت اسحاق، حضرت یعقوب اور حضرت یوسف علیہ السلام کے حالات پیش کر چکے ہیں۔ اُس میں ہم نے بتایا تھا کہ حضرت یعقوب علیہ السلام اپنے بارہ بیٹوں کے ساتھ مصر میں رہائش پذیر ہو گئے تھے۔ اُن بارہ بیٹوں کی اولاد بارہ قبیلہ بنی۔ اور ان بارہ قبیلوں کے مجموعہ کو بنی اسرائیل کہا گیا۔ یعنی اسرائیل کی اولاد ۔ حضرت یعقوب علیہ السلام کا لقب اسرائیل تھا ، کہیں کہیں بنی اسرائیل کو بنی یعقوب یعنی یعقوب کی اولاد بھی کہا گیا ہے۔ بنی اسرائیل کا ذکر آگے حضر ت موسیٰ علیہ السلام کے حالات میں کریں گے۔ فی الحال ہم آپ کی خدمت میں حضرت ایوب علیہ السلام کے حالات پیش کریں گے۔ یہ اس لئے کہ حضرت ایوب علیہ السلام کا زمانہ حضرت یوسف علیہ السلام سے سب سے قریبی زمانہ ہے۔ حالانکہ حضرت ایوب علیہ السلام کا ذکر اللہ تعالیٰ نے قرآن پاک میں بہت کم کیا ہے۔ لیکن اکثر علمائے کرام اس بات پر متفق ہیں کہ آپ علیہ السلام کی زوجہ ¿ محترمہ حضرت یوسف علیہ السلام کی پوتی ہیں۔ اور آپ علیہ السلام کی والدہ محترمہ حضرت لوط علیہ السلام کی بیٹی ہیں۔ اس سے یہ ثابت ہوتا ہے کہ حضرت ایوب علیہ السلام کا زمانہ حضرت لوط علیہ السلام اور حضرت یوسف علیہ السلام سے قریبی زمانہ ہے۔ اسی لئے ان کے فوراً بعد ہم ان کے حالات بیان کر رہے ہیں۔ علامہ ابن کثیر لکھتے ہیں کہ ایک قول یہ ہے کہ آپ علیہ السلام کی زوجہ محترمہ حضرت یعقوب علیہ السلام کی بیٹی ہیں۔ تفسیر مظہری میں حضرت ایوب علیہ السلام کا سلسلہ نسب اس طرح ہے۔ حضرت ایوب علیہ السلام بن احوس ، رزاخ بن روم، بن عیص، بن حضرت اسحاق علیہ السلام ہے۔ علامہ ابن کثیر آپ علیہ السلام کا سلسلہ نسب اس طرح لکھتے ہیں۔ حضرت ایوب علیہ السلام بن موص بن زاوح بن عیص بن اسحاق علیہ السلام ہے۔ آگے لکھتے ہیں کہ ایک اور مورخ آپ علیہ السلام کا سلسلہ نسب اس طرح لکھتے ہیں۔ حضرت ایوب علیہ السلام بن موص بن رعویل بن عیص بن حضرت اسحاق علیہ السلام ہے۔ امام ابن عسا کر لکھتے ہیں کہ حضرت ایوب علیہ السلام کی والدہ حضرت لوط علیہ السلام کی بیٹی ہیں۔ تفسیر ابن کثیر میں ہے کہ امام ابن عسا کر لکھتے ہیں کہ آپ علیہ السلام کی زوجہ محترمہ کا نام ”لیا “ ہے۔ اور وہ حضرت یوسف علیہ السلام کی پوتی ہیں۔ اور ان کا سلسلہ نسب اس طرح ہے۔ حضرة لیا بنت منشا بن یوسف علیہ السلام بن یعقوب علیہ السلام بن اسحاق علیہ السلام ہے۔

حضرت ابراہیم علیہ السلام کی اولاد میں سے ہیں

حضرت ایوب علیہ السلام کے بارے میں امام محمد بن اسحاق رحمتہ اللہ علیہ لکھتے ہیں کہ آپ علیہ السلام اہل ِ روم میں سے ہیں۔ علامہ محمد بن جریر طبری لکھتے ہیں کہ امام محمد بن اسحاق نے ثقہ لوگوں کے حوالے سے حضرت وہب بن منبہ رحمتہ اللہ علیہ کا قول نقل کیا ہےکہ حضرت ایوب علیہ السلام اہل روم میں سے ہیں۔ اور سلسلہ ¿ نسب اس طرح ہے۔ حضرت ایوب علیہ السلام بن حوص بن زازح بن عیص بن حضرت اسحاق علیہ السلام بن حضرت ابراہیم علیہ السلام ہے۔ اور دوسرا سلسلہ نسب اس طرح ہے۔ حضرت ایوب علیہ السلام بن حوص بن رغویل بن عیص بن حضرت اسحاق علیہ السلام بن حضرت ابراہیم علیہ السلام ۔ بعض علمائے کرام نے رغویل کے بجائے رعویل لکھا ہے۔ اس سے پہلے ہم آپ کو حضرت ابراہیم علیہ السلام اور حضرت اسماعیل علیہ السلام کے ذکر میں بتا چکے ہیں کہ حضرت اسماعیل علیہ السلام نے ( مکہ مکرمہ میں رہتے تھے) اپنے چھوٹے حضرت اسحاق علیہ السلام سے ( اُس وقت کے ملک کنعان اور آج کے فلسطین میں رہتے تھے) فرمایا کہ اپنے بڑے عیص کا نکاح میری بیٹی سے کر دو۔ حضرت اسحاق علیہ السلام اپنے بڑے بیٹے عیص کو پیار سے عیصو پکارتے تھے۔ جو اہلِ کتاب نے عیسو بنا دیا ہے۔ اور بائیبل میں عیسو ہی نام لکھا ہوا ہے۔ حضرت اسحاق علیہ السلام نے اپنے بڑے بھائی کا حکم مانتے ہوئے اپنے بڑے بیٹے عیص کا نکاح اپنے بڑے بھائی کی بیٹی سے کر دیا ۔ آپ علیہ السلام کے اس وقت دو بیٹے تھے۔ چھوٹے بیٹے حضرت یعقوب علیہ السلام تو اپنے والد کے ساتھ اس وقت کے ملک کنعان اور آج کے فلسطین میں رہتے تھے۔ جسے یہودی یروشلم کہتے ہیں۔ اور بڑے بیٹے عیص اپنے بیوی بچوں کو لے کر ملک شام چلے گئے اور وہیں رہائش پذیر ہو گئے۔ اُن کی اولاد پورے ملک شام میں پھیل گئی۔ عیص کے ایک بیٹے روم کی اولاد یورپ تک پھیل گئی اور یہی لوگ رومی کہلائے۔ روم کے نام پر آج بھی یورپ میں ایک شہر کا نام روم ہے۔ حضرت ایوب علیہ السلام اسی روم کی اولاد میں سے ہیں۔ ا س وقت وہ ملک شام میں ہی رہتے تھے۔ کچھ علمائے کرام فرماتے ہیں کہ آپ علیہ السلام بنی اسرائیل میں سے تھے۔ اور اس کے لئے آپ علیہ السلام کا زمانہ حضرت موسیٰ علیہ السلام کے بعد کا بتاتے ہیں۔ لیکن اس کے کوئی مستند شواہد نہیں ہیں ۔ کیوں کہ حضرت موسیٰ علیہ السلام ، حضرت لوط علیہ السلام اور حضرت یوسف علیہ السلام کے کئی سو سال بعد کے زمانے میں پیدا ہوئے۔ اور اگر حضرت ایوب علیہ السلام اُن کے بھی کئی سو سال بعد پیدا ہوئے تو کس طرح حضرت لوط علیہ السلام کی بیٹی آپ علیہ السلام کی والدہ ہوئیں۔ اور کس طرح حضرت یوسف علیہ السلام کی پوتی آپ علیہ السلام کی زوجہ محترمہ ہوئیں۔ اس لئے زیادہ قرین قیاس یہی ہے کہ حضرت ایوب علیہ السلام کا زمانہ اس وقت ہے جب بنی اسرائیل کے بارہ قبیلے وجود میں نہیں آئے تھے۔ اب حقیقت کا علم تو صرف اللہ تعالیٰ کو ہی ہے۔ بہر حال تمام علمائے کرام اس بات پر متفق ہیں کہ حضرت ایوب علیہ السلام کے جدِ امجد حضرت ابراہیم علیہ السلام ہیں۔ اور حضرت ابراہیم علیہ السلام کے پوتے عیص کی اولاد میں سے ہیں۔

حضرت ایوب علیہ السلام نبوت سے سرفراز

حضرت ایوب علیہ السلام ملک شام کے ایک علاقہ ” بثنیہ “ میں رہتے تھے۔ اللہ تعالیٰ نے آپ علیہ السلام کو بہت ہی خوب صورت بنایا تھا۔ اور بہت زیادہ مال و دولت سے نواز ا تھا۔ اور اولاد سے بھی نواز اتھا۔ آپ علیہ السلام کے پاس بہت ساری زمینیں تھیں یوں سمجھ لیں اچھی خاصی جاگیر تھی۔ ایک روایت کے مطابق دو ہزار بیلوں کی جوڑی تھی۔لیکن اکثر علمائے کرام اور روایات کے مطابق پانچ سو بیلوں کی جوڑی تھی۔ جن کو پانچ سو غلام سنبھالتے تھے۔ اور ہر غلام کو اپنی بیوی اور بچے اور مال و دولت تھی۔ ایک ہزار بکریاں تھیں۔ پانچ سو خچر سامان اٹھانے کے لئے تھے۔ جس علاقے میں آپ علیہ السلام رہتے تھے اسی علاقے میں اللہ تعالیٰ نے آپ علیہ السلام کو مبعوث فرمایا تھا۔ اور آپ علیہ السلام اپنے علاقے کے لوگوں کو اسلام کی دعوت دیتے تھے۔ اور بہت سے لوگوں نے اسلام قبول کیا لوگ آپ علیہ السلام کے کردار اور عمل سے بہت متاثر تھے اور ہر کوئی آپ علیہ السلام کی عزت کرتا تھا ۔ آپ علیہ السلام اللہ تعالیٰ کی بہت عبادت کرتے تھے۔ ہر ضرورت مند اور مستحق کی مدد کرتے تھے۔ اور اللہ تعالیٰ پر بہت بھروسہ رکھتے تھے۔

حضرت ایوب علیہ السلام کا حلیۂ مبارک

حضرت ایوب علیہ السلام کے حلیہ مبارک کے مبارک کے بارے میں حضرت کعب رضی اللہ عنہ فرماتے ہیں کہ حضرت ایوب علیہ السلام اللہ تعالیٰ کے نبی ہیں۔ آپ علیہ السلام کا قد لمبا تھا۔ اور بال گھنگھریالے تھے۔ آنکھیں بڑی بڑی اور انتہائی خوب صورت تھیں۔ اللہ تعالیٰ نے آپ علیہ السلام کو انتہائی خوب صورت بنایا تھا۔ آپ علیہ السلام کی پیشانی مبارک پر ” المبتلی ، الصابر “ یعنی آزمائش میں ڈالا گیا، صبر کرنے والا۔ آپ علیہ السلام کی گردن مبارک چھوٹی تھی۔ اور سینہ مبارک چوڑا تھا۔ پنڈلیاں اور بازو بھرے بھرے تھے۔ آپ علیہ السلام بیوہ عورتوں اور ضرورت مندوں اور مستحقوں کو مال دولت عطا فرماتے تھے۔ اور اللہ کی رضا کے لئے انہیں نئے کپڑے عطا فرماتے تھے۔ حضرت وہب بن عنبہ رضی اللہ عنہ فرماتے ہیں۔ حضرت ایوب علیہ السلام اپنے زمانہ میں سب سے بڑے عابد و زاہد تھے۔ اور سب سے زیادہ مال دار تھے۔ آپ علیہ السلام اس وقت تک بھوکے رہتے تھے جب تک کسی بھوکے کو پیٹ بھر کر کھانا نہیں کھلا دیتے تھے۔ آپ علیہ السلام کسی نہ کسی ضرورت مند کو نیا لباس پہنانے کے بعد ہی نیا لباس پہنتے تھے۔ ابلیس شیطان، حضرت ایوب علیہ السلام کی طاقت و قوت اور اللہ تعالیٰ پر بھروسہ اور اعتماد سے عاجز آگیا تھا۔ اور اس کا کوئی داﺅ بیچ آپ علیہ السلام پر نہیں چل پاتا تھا۔

حضرت ایوب علیہ السلام کی شریعت

حضرت وہب بن عتبہ رضی اللہ عنہ سے دریافت کیا گیا کہ حضرت ایوب علیہ السلام کی شریعت کیا تھی تو انہوں نے فرمایا۔ تو حید یعنی صرف اللہ تعالیٰ کی عبادت کی یعنی اسلام کی دعوت دینا۔ اور لوگوں کو کفر اور شرک سے روکنا ۔ جھگڑا کرنے والوں میں صلح کروانا۔ اگر کسی کی حاجت پوتی تو اللہ تعالیٰ کی بارگاہ میں سجدہ ریز ہو جانا۔ پھر اپنی حاجت طلب کرنا۔ ان سے پوچھا گیا کہ حضرت ایوب علیہ السلام کا مال و دولت کتنا تھا تو انہوں نے فرمایا۔ تین ہزار 3000فدان یعنی بیلوں کی جوڑیاں تھیں اور ہر فدان کے ساتھ ایک غلام ہوتا تھا۔ اور ہر غلام کے ساتھ ایک عورت ہوتی تھی۔ اور ہر عورت کے ساتھ ایک خچر اور چودہ ہزار بکریاں تھیں۔ آپ علیہ السلام کے مہمان خانے میں ہر وقت ایک نہ ایک مہمان رہتا تھا۔ اور کبھی کبھی تو سو100سے زیادہ مہمان بھی ہو جاتے تھے۔ اور حضرت ایوب علیہ السلام ہمیشہ کسی نہ کسی مسکین کے ساتھ مل کر ہی کھانا کھاتے تھے۔

اوروں کے مقابلے میں آزمائش سخت تھی

حضرت ایوب علیہ السلام کے بارے میں تفسیر انوار البیان میں لکھا ہے کہ قرآن پاک میں حضرت ایوب علیہ السلام کا خصوصی ذکر صرف دو جگہوں پر آیا ہے۔ ایک تو سورہ الانبیاءاور دوسرے سورہ ص میں آیا ہے۔ اور سورہ ص میں اُن کی تکلیف اور دعا اور شفا یاب ہونا مذکور ہے۔ قرآن پاک میں دونوں جگہ اجمال ( مختصر) میں ہے اور اس کا ذکر نہیں ہے کہ تکلیف کیا تھی اور مصیبت کیسی تھی اور کتنے دن رہی۔ اور کسی صحیح ، صریح اور مرفوع حدیث میں بھی اس کی کوئی تفسیر نہیں ملتی۔ البتہ قرآن پاک کے سیاق سے اتنا ضرور معلوم ہوتا ہے کہ انہیں بہت زیادہ تکلیف تھی۔ اور عام طور سے انبیائے کرام اور صالحین کی جو آزمائشیں ہوتی ہیں ان سے زیادہ سخت آزمائش تھی۔ اور ساتھ ہی یہ بات بھی تھی کہ آل اولاد سب مفقود ہو کر ہلاک ہو کر جدا ہو گئے تھے۔ اس بارے میں عام طور سے جو روایات ملتی ہیں وہ عمومی اسرائیلی روایات ہیں۔ قرآن پاک تصریح سے معلوم ہو اکہ حضرت ایوب علیہ السلام کے دعا کرنے پر اللہ تعالیٰ نے انہیں صحت و عافیت عطا فرمادی۔ اور یہ صرف اللہ کی رحمت سے تھا۔ اللہ تعالیٰ نے جو یہ فرمایا کہ ہم نے ان کا کنبہ واپس کر دیا اور ان جیسے اور بھی دیئے۔ اس کے بارے میں مفسرین نے دونوں احتمال لکھے ہیں کہ صحت و عافیت کے بعد یا تو ان کی گمشدہ اولاد واپس کر دی گئی جو ان سے جدا ہو گئی تھی۔ اور اگر وہ سب وفات پا گئے تھے تو اتنے ہی اُن کی جگہ اللہ تعالیٰ نے پیدا فرما دیئے تھے۔ اور مشلھم معھم بھی ساتھ فرمایا ہے۔ جس کا مطلب یہ ہے کہ جتنی سابق اولاد تھی اتنی ہی مزید اولاد ان کی صلب سے یا ان کی اولاد کی صلب سے عطا فرما دی۔

صبر اور شکر کرنے والے

حضرت ایوب علیہ السلام اللہ تعالیٰ کے بہت زیادہ صبر اور شکر کرنے والے بندے تھے۔ تفسیر بصیرت القران میں لکھا ہے کہ اللہ تعالیٰ صبر اور شکر کے پیکر حضرت ایوب علیہ السلام کا ذکر کرتے ہوئے فرماتے ہیں کہ جب اللہ تعالیٰ نے اُن کو ہر طرح کی نعمتوں سے نوازرکھا تھا تو وہ ہر وقت اللہ کے سامنے شکر گزاری کے جذبے کے ساتھ جھکے رہتے تھے۔ اور اُن کو ایسی بیماری اور تکلیف سے واسطہ پڑا کہ اُن کی بیوی کے علاوہ ہر شخص اُن کے قریب جاتے ہوئے گھبراتا تھا۔ فرمایا کہ اس حال میں بھی وہ انتہائی صبر سے کام لیتے تھے۔ ایک مرتبہ جب اُن کی بیماری اس درجے کو پہنچ گئی جو اُن سے برداشت نہیں ہو سکی تو انہوں نے اللہ تعالیٰ کو پکارا۔ اے اللہ تعالیٰ، میری تکلیف اور بیماری حد درجہ بڑھ گئی ہے۔ اور تو تمام رحم کرنے والوں میں سب سے زیادہ رحم کرنے والا ہے۔ اللہ تعالیٰ نے اُن کی فریاد کو سنا اور اُن کی شدید بیماری اور تکلیف سے نجات عطا فرما دی۔ اور پہلے سے بھی زیادہ صحت ، مال و دولت اور اولاد سے اُن کو نواز دیا۔ حضرت ایوب علیہ السلام کا صبر اور شکر ایک بہترین مثال ہے۔ دوسری بات یہ ہے کہ اللہ تعالیٰ کو جب دل سے پکارا جاتا ہے تو وہ ایسا مہربان اور کریم ہے کہ ہر شخص کی فریاد سنتا ہے۔ اور اس کو ہر طرح کی تکلیفوں سے نجات دے دیتا ہے۔ بے شک اللہ تعالیٰ دعا سننے والا اور سب سے زیادہ رحم فرمانے والا ہے۔ 

باقی ان شاءاللہ اگلی قسط میں.........!

 

02 حضرت ایوب علیہ السلام Story of Prophet Ayoob

02 حضرت ایوب علیہ السلام

تحریر شفیق احمد ابن عبداللطیف آئمی

قسط نمبر 2

انبیائے کرام پر سخت آزمائشیں آتی ہیں

حضرت ایوب علیہ السلام کے صبر اور اللہ پر توکل ( بھروسہ ) کی آزمائش اللہ تعالٰی نے کی۔ تفسیر معارف القران میں لکھا ہے کہ حضرت ایوب علیہ السلام کے قصہ میں اسرائیلی روایات بڑی طویل ہیں۔ اُن میں سے جن کو محدثین حضرات نے تاریخی درجہ میں قابل اعتماد سمجھا ہے اُن کو نقل فرمایا ہے۔ قرآن پاک سے توصرف اتنی بات ثابت ہے کہ اُن کو کوئی بہت ہی شدی مرض پیش آیا تھا۔ جس پر وہ صبر کرتے رہے۔ بالآخر اللہ تعالٰٰ سے دعا کی توا س سے نجات ملی اور یہ کہ اس بیماری کے زمانے میں اُن کی اولاد اور احباب سب غائب ہو گئے تھے۔ چاہے وہ موت کی صورت میں ہو یا کسی دوسری وجہ سے ۔ پھر اللہ تعالیٰ نے ان کو صحت و عافیت دی اور جتنی اولاد تھی وہ سب ان کو دے دی بلکہ اس سے اور زیادہ عطا فرما دی۔ باقی حصے کے اجزاءبعض تو مستند احادیث میں موجود ہیں اور زیادہ تر تاریخی روایات ہیں۔ حافظ ابن کثیر لکھتے ہیں کہ حضرت ایوب علیہ السلام کو ابتداءمیں اللہ تعالیٰ نے مال و دولت اور جائیداد اور شاندار مکانات اور سواریاں اور اولاد اور غلام و خدام بہت کچھ عطا فرمایا تھا۔ پھر اللہ تعالیٰ نے آپ علیہ السلام کو پیغمبر انہ آزمائش میں مبتلا کیا اور یہ سب چیزیں اُن کے ہاتھ سے نکل گئیں۔ اور بدن میں ایسی بیماری لگ گئی کہ جیسے جذام ہوتا ہے کہ بدن کا کوئی حصہ سوائے زبان اور دل کے اس بیماری سے نہیں بچا۔ آپ علیہ السلام ایسی حالت میں بھی اپنی زبان اور دل کو اللہ تعالیٰ کی یاد میں مشغول رکھتے اور تکلیف پر صبر کرتے اور اللہ تعالیٰ کا شکر ادا کرتے رہتے تھے۔ اس شدید بیماری کی وجہ سے سب عزیزوں ، دوستوں اور پڑوسیوں نے اُن کو الگ کر کے آبادی کے باہر ڈال دیا۔ کوئی ان کے پاس نہیں جاتا تھا۔ صرف آپ علیہ السلام کی بیوی اُن کی خبر گیری کرتی تھی۔ جو حضرت یوسف علیہ السلام کی بیٹی یا پوتی تھی۔ جس کا نام لیابنت میشا بن یوسف علیہ السلام بتایا جاتا ہے۔ مال و جائیداد تو سب ختم ہو چکا تھا ۔ ان کی زوجہ محترمہ محنت مزدوری کر کے اپنے اور ان کے لئے روزی فراہم کرتی تھیں۔ اور آپ علیہ السلام کی خدمت کرتی رہتی تھیں۔ حضرت ایوب علیہ السلام کا یہ ابتداءاور امتحان کوئی تعجب اور حیرت کی بات نہیں ہے۔ رسول اللہ صلی اللہ علیہ وسلم کا ارشاد ہے کہ سب سے سخت بلائیں اور آزمائشیں انبیائے علیہم السلام کو پیش آتی ہیں۔ ان کے بعد دوسرے صالحین کو درجہ بہ درجہ اور ایک روایت میں ہے کہ ہر انسان کا ابتلاءاور آزمائش اس کی دینی صلابت اور مضبوطی کے مطابق ہوتی ہے۔ جو جتنا مضبوط ہوتا ہے اتنی ہی اس کی ابتلاءاور آزمائش زیادہ ہوتی ہے۔ ( تاکہ اس مقدار اسے اس کے درجات بلند ہوں ) حضرت ایوب علیہ السلام کو اللہ تعالیٰ نے زمرہ¿ انبیاءعلیہم السلام میں دینی صلابت میں صبرکا ایک امتیازی مقام عطا فرمایا تھا۔ مصائب و شدائد پر صبر میں حضرت ایوب علیہ السلام ضرب المثال ہیں۔

بائیبل اعتبار کے قابل نہیں ہے

حضرت ایوب علیہ السلام کے بارے میں مولانا سید ابو الاعلیٰ مودودی لکھتے ہیں۔ حضرت ایوب علیہ السلام کی شخصیت ، زمانہ ، قومیت ہر چیز کے بارے میں اختلاف ہے۔ جدید زمانے کے محققین میں سے کوئی ان کو اسرئیلی قرار دیتا ہے کوئی مصری اور کوئی عرب کہتا ہے۔ کسی کے نزدیک ان کا زمانہ حضرت موسیٰ علیہ السلام سے پہلے کا ہے۔ کوئی انہیں حضرت داﺅد اور حضرت سلیمان علیہم السلام کے زمانے کا قرار دیتا ہے۔ اور کوئی اس زمانے کے بعد کا قرار دیتے ہیں۔ لیکن سب کے قیاسات کی بنیاد اس سفرِ ایوف یا صحفیہ¿ ایوب پر ہے جو بائیبل کے مجموعہ کتب میں شامل ہے۔ اسی کی زبان ، انداز بیان اور کلام کو دیکھ کر یہ مختلف رائیں قائم کی گئی ہیں نہ کہ کسی اور تاریخی شہادت پر ۔ اور اس سفرایوب کا یہ حال ہے کہ اس کے اپنے مضامین میں بھی تضاد ہے۔ اور اس کا بیان قرآن پاک کے بیان سے بھی اتنا مختلف ہے کہ دونوں کو بیک وقت نہیں مانا جاسکتا۔ لہٰذا ہم اس پر ( بائیبل پر) قطعاً اعتماد نہیں کر سکتے۔ زیادہ سے زیادہ قابل اعتماد شہادت اگر کوئی ہے تو وہ یہ ہے کہ بیعیا نبی آٹھویں صدی قبل مسیح اور حنرقی ایل ( حزقیل) نبی چھٹی قبل مسیح ( حضرت عیسیٰ علیہ السلام کی پیدائش سے پہلے ، ہمارے زمانے میں جو یہ اکیسویں صدی چل رہی ہے یہ حضرت عیسی علیہ السلام کی پیدائش سے چل رہی ہے) اس لئے یہ امر یقینی ہے کہ حضرت ایوب علیہ السلام نویں صدی قبل مسیح یا اس سے پہلے کے زمانے میں رہے ہوں گے۔ رہی قومیت کی بات تو سورہ نساءآیت نمبر63اور سورہ الانعام آیت نمبر84میں جس طرح ان کا ذکر آیا ہے اس سے گمان ہوتا ہے کہ وہ نبی اسرائیل ہی میں سے تھے۔ مگر حضرت وہب بن عنبہ رضی اللہ عنہ کا یہ بیان بھی کچھ بعید از قیاس نہیں ہے کہ وہ حضرت اسحاق علیہ السلام کے بیٹے عیسو( عیص) کی نسل سے تھے۔ 

حضرت ایوب علیہ السلام کا زمانہ

حضرت ایوب علیہ السلام کے بارے میں تفسیر تیسرالرحمن لبیان القران میں لکھا ہے کہ کہتے ہیں ۔ حضرت ایوب علیہ السلام کا زمانہ حضرت ابراہیم علیہ السلام کے بعد کا ہے۔ اور ان کا ہر علاقہ بحرمیت ( بحر مردار) کے جنوب مشرق میں تھا۔ وہ اللہ کے بڑے ہی صابر و شاکر بندے تھے۔ اللہ تعالیٰ نے انہیں خوب مال و دولت سے اولاد سے نواز تھا۔ اس لئے اپنے رب کا خوب شکر ادا کرتے تھے۔ اس کے بعد اللہ تعالیٰ نے انہیں بیماری میں مبتلا کر دیا اور اولاد اور دولت سب جاتی رہی۔ تو آپ علیہ السلام اپنے رب کی رضا کے لئے بہت ہی صبر سے کام لیتے رہے۔ اور دل میں شکوہ کو بھی جگہ نہیں دی۔ جب ان کی تکلیف حد سے بڑھنے لگی اور اٹھارہ ( 18) سال کا زمانہ گزر گیا تو انہوں نے اپنے رب سے دعا کی۔ اللہ تعالیٰ نے ان کی دعا قبول کر لی اور ان کی بیماری جاتی رہی۔ اور اللہ تعالیٰ نے انہیں پہلے سے بھی زیادہ مال و دولت اور جائیداد سے نوازدیا۔ اس واقعہ سے نصیحت ملتی ہے کہ صبر کا انجا م ہمیشہ اچھا ہوتا ہے۔ اور اسمائے حسنیٰ اور صفات علیا کے واسطے سے اللہ کے حصور دعا اور گریہ وزاری سے مصیبت دور ہوتی ہے۔ اور دنیا کی مصیبت و تکلیف اس بات کی دلیل نہیں ہے کہ وہ بندہ اپنے رب کی نگاہ میں ذلیل و بد بخت ہے اور ایمان و اخلاص کے ساتھ صبر کرنے والوں سے اللہ تعالیٰ پہلے سے کئی گنا زیادہ دیتا ہے۔ 

حضرت ایوب علیہ السلام آزمائش میں صبر و شکر پر قائم رہے

حضرت ایوب علیہ السلام کے بارے میں تفسیر صیاءالقرا ٓن میں لکھا ہے کہ اللہ تعالیٰ اپنے ایک بندے حضرت ایوب علیہ السلام کا ذکر فرمایا ہے۔ جس پر تکلیف اور شدائد کی انتہا ہو گئی لیکن ان کے ہاتھ سے صبر اور شکر کا دامن نہیں چھوٹا۔ ہر حال میں اپنے رب ( اللہ تعالیٰ ) کی حمد و ثنا میں سر گرم رہے تا کہ ہر انسان اپنے حالات میں انبیائے کرام علیہم السلام کے اُسوہ¿ حسنہ سے روشنی حاصل کر سکے۔ حضرت ایوب علیہ السلام کے نسب اور قوم اور زمانہ کے متعلق بہت کچھ اختلاف پایا جاتا ہے۔ اگر چہ وثوق سے کوئی بات نہیں کہی جا سکتی۔ لیکن بعض قرائن سے پتہ چلتا ہے کہ آپ علیہ السلام کا زمانہ نویں صدی قبل مسیح یا اس سے پہلے کا ہے۔ آپ علیہ السلام حضرت اسحاق علیہ السلام کے بڑے بیٹے عیسو ( عیص یا عیصو) کی نسل سے ہیں۔ آپ علیہ السلام بہت بڑے دولت مند تھے۔ زرعی زمین کا اندازہ اس بات سے لگائیے کہ آپ علیہ السلام کے پاس کھیتی باڑی کے لئے بیلوں کی پانچ سو500جوڑیاں تھیں۔ ہزاروں کی تعداد میں بکریاں تھیں۔ سات بیٹے اور سات بیٹےاں تھیں۔ زوجہ ¿ محترمہ کا نام رحمتہ بتایا گیا ہے۔ جو حضرت یوسف علیہ السلام کے بیٹے ایفرائین (یا ایفرائیم) کی بیٹی تھیں بڑی حسین و جمیل اور صحت مند تھیں۔ ان گوناگوں انعامات کے باوجود آپ علیہ السلام اپنے خالق کی عبادت اور اس کی مخلوق کی خدمت میں ہر طرح سے سر گرم رہا کرتے تھے۔ مشیت الٰہی نے آزمانا چاہا ۔ کھیتیاں جل کر راکھ ہو گئیں۔ مال مویشی میں ایسی وبا پھوٹی کہ ایک بھی زندہ نہیں رہا۔ آپ علیہ السلام کے سارے بیٹے بیٹیاں اپنے بڑے بھائی کے یہاں مدعو تھے کہ مکان گر گیا اور سب کے سب کا انتقال ہو گیا۔ آپ علیہ علیہ السلام کے جسم مبارک پر آبلے نمودار ہو تے گئے خارش کی وجہ سے انہیں کھجلایا تو انہوں نے ناسوروں کی شکل اختیار کر لی۔ اور ان میں چھوٹے چھوٹے کیڑے رینگنے لگے جس سے پیپ بہنے لگی۔ سب نیاز مند اپنا سلسلہ ¿ نیاز و عقیدت توڑ کر الگ ہو گئے۔ سب دوستوں نے آنکھیں پھیر لیں۔ شہر والوں نے بستی سے نکال دیا کہ ان سے دوسرے لوگوں میں بیماری پھیلنے کا اندیشہ ہے ۔ آزمائش کی ان گھڑیوں میں بھی زبان پر کوئی حرف شکایت نہیں آیا۔ اور دل میں کبھی بھی اپنے مالک و خالق سے شکوہ کا خیال بھی پیدا نہیں ہوا۔ کافی عرصہ اسی حالت میں گزر گیا بعض نے سات سال اور بعض نے اس سے بھی زیادہ لکھے ہیں۔ زبان پھر بھی اپنے خالق و مالک کی حمد و ثنا میں مصروف رہی۔ آخر یہ التجا زبان پر آہی گئی ” انی مسّنی الضر “ الٰہی مجھے مصیبتوں اور بیماریوں نے چاروں طرف سے گھیر لیا ہے اور اس کے بعد یہ عرض نہیں کی کہ میری تکلیفوں اور بیماریوں کو دور فرما دے اور مجھے ان مصیبتوں سے رہائی بخش ۔ صرف اتنا عرضی کیا۔ ” انت ارحم الراحمین“ تو سب رحم کرنے والوں میں سب سے بڑا رحم کرنے والا ہے۔ گویا یہ کہہ کر سب کچھ ہی کہہ دیا۔

اللہ تعالیٰ کا فخر فرمانا

حضرت ایوب علیہ السلام بے انتہا دولت مند ہونے کے باوجود ہر وقت اللہ تعالیٰ کی عطا کی ہوئی نعمتوں کا شکر ادا کرتے رہتے تھے اور جتنا ہو سکتا تھا اللہ کی مخلوق کی مدد کرنے کی کوشش کرتے رہتے تھے۔ اور جب دوسرے لو گ آپ علیہ السلام کا شکریہ ادا کرتے تھے تو آپ علیہ السلام فرماتے تھے۔ تمہاری یہ مدد میں نے نہیں کی ہے بلکہ اللہ تعالیٰ نے تمہاری مدد کی ہے۔ اس لئے تم صرف اللہ تعالیٰ کا شکر ادا کرو۔ صر ف اسی کی عبادت کرو اور اسی سے مدد مانگو۔ وہ اللہ تعالیٰ سب سے جلدی سننے والا ہے اور مدد کرنے والا ہے۔ اللہ تعالیٰ آپ علیہ السلام کی عبادت ، لوگوں کی غم گساری اور اللہ کی شکر گزاری سے بہت خوش تھے۔ اور مقرّب فرشتوں کی مجلس میں آپ علیہ السلام پر فخر کرتے تھے۔ اور آپ علیہ السلام کی تعریف فرماتے تھے۔ اور بتایا کرتے تھے کہ میر ایہ بندہ اتنی نعمتیں ملنے کے بعد بھی شکر ادا کر رہا ہے۔ اکثر لوگ مال و دولت اور دوسری نعمتیں ملنے کے بعد گھمنڈ ، تکبر ، اور سر کشی میں مبتلا ہو جاتے ہیں۔ میں نے اس بندے کو مال و دولت دے کر آزمایا تو اس نے اس آزمائش میں عظیم کامیابی حاصل کی ہے۔ اور جتنی اسے مال و دولت اور نعمتیں اور خوشیاں ملتی جا رہی ہیں میرا یہ بندہ اتنا ہی زیادہ شکر گزار بندہ بنتا جا رہا ہے۔ اسے میرے اوپر بہت بھروسہ ہے۔ اور اگر میں اس سے تمام مال و دولت اور تمام نعمتیں چھین لوں تب بھی یہ مجھ پر بھروسہ ( توکّل) رکھے گا۔ اور صبر کرے گا۔ اور میرا شکر ادا کرتا رہے۔ فرشتے اللہ تعالیٰ کے اس اعتماد کا آپس میں ذکرکرتے رہتے تھے اور آپ علیہ السلام کے لئے دعا کرتے رہتے تھے۔ تفسیر کبیر میں لکھا ہے کہ جبرئیل علیہ السلام کو اللہ تعالیٰ کی بارگاہ جو قرب حاصل ہے وہ دوسرے فرشتوں کو حاصل نہیں ہے اللہ تعالیٰ اُن سے براہ راست کلام فرماتا ہے۔ اللہ تعالیٰ اپنے بندوں میں سے جب کسی کو پسند فرماتا ہے تو اس کا ذکر جبرئیل علیہ السلام سے کرتا ہے وہ میکائیل علیہ السلام سے ذکر کرتے ہیں۔ وہ دوسرے مقرب فرشتوں سے ذکر کرتے ہیں۔ جب اُن مقرب فرشتوں میں اللہ تعالیٰ کے اس خاص بندے کا ذکر ہوتا ہے اور وہ آپ میں تذکرہ کرتے ہیں تو اس آسمان کے سب فرشتے اس خاص بندے کا تذکرہ آپس میں کرتے ہیں اور اس کے لئے دعا کرتے ہیں۔ وہ نیچے کے آسمان کے فرشتے سنتے ہیں اور تذکرہ اور دعا کرتے ہیں۔ اس طرح آسمان ِ دنیا ( پہلے آسمان) کے فرشتوں تک وہ ذکر پہنچ جاتا ہے۔ اور وہ سب فرشتے بھی آپس میں اس خاص بندے کا ذکر یعنی تذکرہ کرتے ہیں اور اس کے لئے دعا کرتے ہیں ۔ اسی طرح حضرت ایوب علیہ السلام کا تذکرہ بھی ساتوں آسمانوں میں ہوتا رہتا تھا۔ اور تمام فرشتے آپ علیہ السلام کے لئے دعا کرتے رہتے تھے۔

ابلیس شیطان کا حسد

حضرت ایوب علیہ السلام کی فضیلت اور ان کے لئے فرشتوں کی دعا ابلیس شیطان نے سنی تو وہ حسد کے مارے جل بھن گیا۔ وہ تو انسان کا ازلی دشمن ہے۔ اور حضرت آدم علیہ السلام کی پیدائش سے لے کر آج تک وہ بد بخت ملعون شیطان انسانوں سے دشمنی کر رہا ہے۔ آج کے زمانے میں اس کے خاص مدد گار یہودی، عیسائی اور کافر ہیں۔ حضرت ایوب علیہ السلام سے تو ابلیس شیطان پہلے ہی دشمنی کر رہا تھا اور آپ علیہ السلام کی اسلام کی دعوت میں رکاوٹیں پیدا کر رہا تھا۔ لیکن جب اس نے فرشتوں کی باتیں اور دعائیں سنی تو وہ آپ علیہ السلام سے بہت زیادہ حسد کرنے لگا۔ قاضی ثناءاللہ پانی پتی اس کے بارے میں لکھتے ہیں کہ یہ وہ دور ( یعنی حضرت ایوب علیہ السلام کا زمانہ ) تھا۔ جب ابلیس شیطان پر آسمانوں پر جانے کی پابندی نہیں تھی۔ وہ آسمانوں میں جہاں جانا چاہتا جا سکتا تھا۔ جب اللہ تعالیٰ نے حضرت عیسیٰ علیہ السلام کو آسمانوں میں اٹھا لیا تو ابلیس شیطان کو چار آسمانوں میں جانے سے روک دیا گیا۔ پھر جب انبیائے کرام کے سردا ر حضرت محمد مصطفیٰ صلی اللہ علیہ وسلم تشریف لائے تو ابلیس شیطان کو تمام آسمانوں پر جانے کی پابندی لگا دی گئی۔ یعنی اسے سب آسمانوں جانے سے روک دیا گیا۔ جب حضرت ایوب علیہ السلام اللہ کا ذکر اور حمد و ثنا ءمیں مصروف تھے تو فرشتوں نے آپ علیہ السلام کے لئے مل کر دعا کی تو ابلیس شیطان یہ سن کر بغاوت اور حسد کی آگ میں جلنے لگا۔

باقی ان شاءاللہ اگلی قسط میں........! 

03 حضرت ایوب علیہ السلام Story of Prophet Ayoob

03 حضرت ایوب علیہ السلام

تحریر شفیق احمد ابن عبداللطیف آئمی

قسط نمبر 3

حضرت ایوب علیہ السلام کی آزمائش کی شروعات

اللہ تعالیٰ کی بارگاہ میں حضرت ایوب علیہ السلام کی فضیلت دیکھ کر ابلیس شیطان کو آپ علیہ السلام سے بہت زیادہ حسد ہو گیا تھا۔ اس نے اللہ تعالیٰ سے درخواست کی کہ تیرا یہ بندہ ( حضرت ایوب علیہ السلام ) مصیبتوں اور تکلیفوں پر صبر نہیں کر سکے گا۔ اگر تو ( اللہ تعالیٰ) ااسے آزمانا چاہتا ہے تو اس کے مال پر مجھے قابول دیدے۔ اللہ تعالیٰ نے فرمایا۔ جا میں نے تجھے اس کے مال پر اختیار دیا۔ ابلیس شیطان نے اپنے شاگردشیطانوں کو جمع کیا اور کہا۔ اللہ تعالیٰ نے حضرت ایوب علیہ السلام کے مال پر اختیار دے دیا ہے۔ اب ہمیں اُن کے تمام مال کو تباہ کرنا ہے۔ اور یہ ایسا غم ہے جس پر آپ علیہ السلام صبر نہیں کر سکیں گے۔ قاضی ثناءاللہ پانی پتی لکھتے ہیں۔ ابلیس شیطان نے کہا۔ اے اللہ تعالیٰ، میں نے بندے ایوب ( علیہ السلام ) کو دیکھا ہے ۔تو نے اس پر انعام کیا ہے۔ اس لئے وہ تیرا شکر ادا کرتا ہے۔ تو نے اسے عافیت دی ہے اس لئے وہ تیری حمد و ثنا میں رطب اللسان رہتا ہے۔ اگر تو اس سے یہ ساری نعمتیں چھین لے گا تو پھر یہ تیرا شکر ادا نہیں کرے گا۔ اللہ تعالیٰ نے فرمایا۔ اے ابلیس شیطان مردود میں نے تجھے اس کے مال پر اختیا ر دے دیا۔ ابلیس تیزی سے زمین پر آیا اور اپنے تمام چیلوں کو جمع کیااور انہیں کہا۔ مجھے ایوب ( علیہ السلام )کے مال پر اختیار دے دیاگیا ہے۔ کس کو طاقت ہے کہ وہ ان کا مال تباہ کر دے۔ مال کا خسارہ ایسا خسارہ ہے کہ جس کی وجہ سے بڑے بڑے دل گردے والے بھی ہمت ہار دیتے ہیں۔ ایک شیطان نے کہا۔ مجھے یہ قوت ہے میں آگ کا بگولہ بن کر اُس کی ہر چیز جلا دوں گا۔

پہلی آزمائش میں کامیابی کے بعد دوسری آزمائش

حضرت ایوب علیہ السلام کو اللہ تعالیٰ نے بے شمار مال و دولت عطا فرما کر پہلی آزمائش لی تھی۔ اور آپ علیہ السلام نے صحیح معنوں میں اللہ تعالیٰ کا شکر ادا کر کے اس آزمائش میں کامیابی حاصل کر لی تھی۔ اب اللہ تعالیٰ نے آپ علیہ السلام کے صبر کی آزمائش شروع کی اور ابلیس شیطان کو آپ علیہ السلام کے مال پر اختیاردے دیا۔ قاضی ثناءاللہ پانی پتی آگے لکھتے ہیں کہ ابلیس شیطان کے ایک چیلے نے کہا میں آگ کا بگولہ بن اس کی ہر چیز جلا دوں گا۔ ابلیس نے کہا۔ جا اور جب اس کے اونٹ چراگاہ میں چر رہے ہو ں تو انہیں جلا دے۔ وہ شیطان زمین کے نیچے سے آگ کا شعلہ بن کر نکلا جو چیز اس کے قریب آتی جل جاتی تھی۔ اس نے آپ علیہ السلام کے سب اونٹوں کو جلا دیا پھر یہ شیطان اونٹوں کے نگراں کی شکل میں حضرت ایوب علیہ السلام کے پاس آیا۔ اس وقت آپ علیہ السلام کھڑے ہو کر نماز ادا کر رہے تھے۔ شیطان جو انسانی شکل میں آیا تھا کہنے لگا۔ اے ایوب ( علیہ السلام ) تو نے دیکھا کہ ایک آگ آئی اور اس نے تیرے اونٹ جلا دیئے۔ اور دوسرے کے اونٹ بھی راکھ کر دیئے۔ حضرت ایوب علیہ السلام نے فرمایا۔ سب تعریفیں اس اللہ کے لئے ہے جس نے مجھے وہ اونٹ عطا فرمائے تھے اسی نے لے لئے۔ میں جانتا ہوں کہ مال اور جان فنا ہونے والی چیز ہے۔ علامہ ابن کثیر لکھتے ہیں کہ حضرت نوف رحمتہ اللہ علیہ کہتے ہیں کہ جو شیطان حضرت ایوب علیہ السلام کے پیچھے پڑا تھا اس کا نام مسبوط تھا۔ علامہ عبدا لرزاق بھترالوی لکھتے ہیں۔ اللہ تعالیٰ کبھی اپنے مقرب بندوں کو شدید مشکلات میں مبتلا کر کے آزماتا ہےکہ میرا یہ بندہ کتنا صبر کرتا ہے۔ اور مصائب و آرام میں کوئی شکوہ تو زبان پر نہیں لاتا اور کبھی اللہ تعالیٰ بہت مال و دولت دے کر آزماتا ہے کہ میر ابندہ کتنا شکریہ ادا کرتا ہے؟ حضرت ایوب علیہ السلام کو اللہ تعالیٰ نے پہلے آرام و صحت ، مال و دولت ، اولاد اور ہر طرح کی خوشیاں عطا کر کے آزمایا۔ اس آزمائش میں بھی آپ علیہ السلام نے عظیم کا میابی حاصل کی۔ اور آپ علیہ السلام نے شکریہ ادا کر کے بے مثال نمونہ پیش کیا۔ اس کے بعد آزمائش کا دوسرا مرحلہ یا دور شروع ہوا۔ وہ اس طرح ہوا کہ زمین کے نیچے سے قدرتی آگ نے آپ علیہ السلام کے باغات ، کھیتیاں ، اونٹ ، بکریاں ، چرواہے جلا کر راکھ کر دیئے۔ جب آپ علیہ السلام کو پتہ چلا تو فرمایا۔ یہ سب مال و دولت اللہ تعالیٰ نے ہی عطا فرمایا تھا۔ اور وہی اس کا حقیقی مالک ہے۔ جب وہی اس کا حقدار ہے تو اسے حق پہنچتا ہے کہ جب چاہے واپس لے لے۔ میری کوئی مجال نہیں ہے کہ میں کچھ کہوں۔

اولاد کی ہلاکت

حضرت ایوب علیہ السلام پر اللہ تعالیٰ کی آزمائش جاری تھی۔ دھیرے دھیرے آپ علیہ السلام کا مال و دولت ختم ہونے لگا۔ آپ علیہ السلام کے مویشی مرتے جا رہے تھے اور کھیت اور باغ مرجھاتے جا رہے تھے۔ یہاں تک کہ ایک وقت ایسا آیا کہ آپ علیہ السلام کے پاس چند مینڈھیوں کے علاوہ کچھ نہیں بچا اور آپ علیہ السلام اپنی قوم کے سب سے غریب ہو گئے مال و دولت چھن جانے کے بعد بھی آپ علیہ السلام اپنے دعوتی کاموں کو اور تیزی سے کرنے لگے۔ اور اللہ تعالیٰ کی اور زیادہ حمد و ثنا اور عبادت کرنے لگے اور اللہ تعالیٰ پر آپ علیہ السلام کا بھروسہ اور مضبوط ہو گیا۔ یہ دیکھ کر ابلیس شیطان اور زیادہ حسد کا شکار ہوگیا۔ اس نے اللہ تعالیٰ سے درخواست کی کہ حضرت ایوب علیہ السلام کی اولاد پر مجھے قابو دے دے۔ اللہ تعالیٰ نے فرمایا۔ جا تجھے اس کی اولاد پر قابو دیا۔ لیکن ایوب (علیہ السلام )کے جسم پر تجھے قابو نہیں ہوگا۔ اب ابلیس شیطان آپ علیہ السلام کی اولاد کو تباہ کرنے لگا۔ آپ علیہ السلام کے بیٹے اور بیٹیاں مال و دولت چھن جانے کے بعد بھی آپ علیہ السلام کی خدمت کرتے تھے اور آپ علیہ السلام کو ہر ممکن آرام دینے کی کوشش کرتے تھے۔ قاضی ثناءاللہ پانی پتی لکھتے ہیں ۔ جب حضرت ایوب علیہ السلام کا سارا مال ضائع ہو گیا تو آپ علیہ السلام اور زیادہ اللہ تعالیٰ کی حمد و ثنا کرنے لگے اور صبر کا دامن مضبوطی سے تھامے رکھا۔ ( اور ابلیس شیطان اور زیادہ حسد کا شکار ہو گیا) ابلیس نے اللہ تعالیٰ سے کہا ۔ اے اللہ تعالیٰ ، تو نے جو ایوب علیہ السلام کو اولاد عطا فرمائی ہے اسی وجہ سے وہ تیر ا شکر ادا کرتا ہے۔ کیا تو مجھے اس کی اولاد پر قابو دے گا؟ کیوں کہ اولاد کی تکلیف ایسی ہے جس سے بڑے بڑے مردوں کے کلیجے پگھل جاتے ہیں۔ اللہ تعالیٰ نے فرمایا۔ جا تجھے اس کی اولاد پر بھی قابو دیتا ہوں۔ لیکن اس کے جسم پر تیرا کوئی قابو نہیں رہے گا۔ وہ بد بخت مردود آیا۔ اس وقت حضرت ایوب علیہ السلام کی تمام اولاد ایک محل میں جمع تھی۔ ابلیس شیطان نے محل کو ہلایا اور دیواروں کو آپس میں ٹکرا دیا۔ پھر لکڑیاں اور پتھر اُن کے اوپر پھینکے یہاں تک کہ سب زخمی ہو گئے۔ پھر اس مردود ابلیس شیطان نے محل کو اٹھا کر الٹا کر کے پھینک دیا۔ علامہ عبدالرزاق بھترالوی لکھتے ہیں۔ آپ علیہ السلام کی اولاد ایک مکان میں جمع تھی۔ ( ایک اور روایت میں ہے کہ وہ سب بھائی بہن اپنے چچا کے یہاں ایک تقریب میں جمع تھے) وہاں زلزلہ آیا اور مکان گر گیا اور آپ علیہ السلام کی تمام اولاد کا انتقال ہو گیا۔ مکان کی چھت اور دیوار گرنے سے آپ علیہ السلام کے بچوں پر کیا حال گزرا ہوگا؟جسم چکنا چور ہو ئے ہوں گے ہڈیاں ٹوٹی ہو ں گی۔ سر پھٹے ہوں گے اور خون کے فوارے اڑے ہوں گے۔ لیکن یہ حال سن کر بھی اللہ کے نبی علیہ السلام نے کمال کے صبر کا مظاہرہ کیااور زبان پر ہی الفاظ آئے کہ سب کچھ اللہ تعالیٰ کا ہے۔ وہ جو چاہے کر سکتا ہے۔

ابلیس شیطان کی مایوسی اور حسد زیادہ بڑھ گیا

حضرت ایوب علیہ السلام پر اللہ تعالیٰ کی آزمائش چل رہی تھی۔ جب اللہ تعالیٰ نے آپ علیہ السلام کو مال و دولت اور اولاد کے ختم کرنے کے ساتھ آزمائش میں ڈالا تو آپ علیہ السلام کے پاس کچھ بھی نہیں رہا تھا۔ تب آپ علیہ السلام نے اللہ تعالیٰ کا بہت عمدہ ذکر کیا اور فرمایا۔ الحمد للہ رب العالمین ۔ پھر اللہ تعالیٰ کی بارگاہ میں عرض کیا۔ اے اللہ تعالیٰ، میں تیرا شکر ادا کرتا ہوں کہ تو نے مجھ پر احسان فرمایا۔ تو نے مجھے مال اور اولاد کی نعمت سے نوازا۔ جن کی محبت میرے دل کے ہر گوشہ میں داخل ہو گئی تھی۔ پھر یہ سب کچھ مجھ سے چھین لیا اور میرے دل کی دنیا کو ہر فکر سے آزاد کر دیا۔ اب میرے اور تیرے درمیان کوئی چیز حائل نہیں ہوتی ہے۔ میں نے جو تیری تعریف کی ہے ۔ میرا دشمن ( ابلیس شیطان) اس کی وجہ سے حسد کرنے گا۔ پس ابلیس شیطان کو حضرت ایوب علیہ السلام کے ان عجز و نیاز میں ڈوبے الفاظ سے بہت تکلیف ہوئی۔ آپ علیہ السلام کے اس صبر اور اللہ پر توکّل یعنی بھروسے کی وجہ سے بہت مایوسی ہوئی اور اس بد بخت کا آپ علیہ السلام سے حسد اور بڑھ گیا۔

حضرت ایوب علیہ السلام کو رُلایا

حضرت ایوب کی تمام اولاد اللہ کو پیاری ہو گئی۔ اندازہ کریں آپ علیہ السلام نے کس طرح جوان اولاد وں کو اپنے کاندھے پر لے جا کر دفن کیا ہوگا۔ اور کس طرح صبر کیا ہوگا؟ اولاد سے انسان کو بہت محبت ہوتی ہے لیکن اس غم کو بھی آپ علیہ السلام انتہائی صبر سے برداشت کر تے رہے اور اپنی ہر تکلیف پر آپ علیہ السلام بس اتنا فرماتے تھے ۔ انا للہ وانا الیہ راجعون۔ ہم اللہ تعالیٰ کی طرف سے آئے ہیں اور اسی کی طرف ہمیں لوٹ کر جانا ہے۔ ابلیس یہاں بھی ناکام ہو گیا اور آپ علیہ السلام کے صبر کو نہیں توڑ سکا۔ پھر اس نے ایک چال چلی۔ بچوں کے چھن جانے کے بعد ایک دن آپ علیہ السلام غور و فکر کرتے ہوئے بیٹھے تھے کہ ابلیس شیطان بچوں کے معلم یعنی استاد کی شکل میں آپ علیہ السلام کے پاس آیا اور غمگین شکل بنا کر رونے لگا اور بچوں کی خوبیاں بیان کرنے لگا۔ اور آپ علیہ السلام کے غمگین دل میں اور زیادہ غم کے جذبات پیدا کرنے لگا۔ تا کہ آپ علیہ السلام کا صبر ٹوٹ جائے۔ حضرت ایوب علیہ السلام خاموش بیٹھے سن رہے تھے اور دھیرے دھیرے آنکھوں میں آنسو بھر نے لگے۔ ادھر لگاتار ابلیس شیطان کی کوشش جاری تھی اور وہ آپ علیہ السلام کے بچوں کا ذکر اس انداز میں کر رہا تھا کہ آپ علیہ السلام کے صبر کا باندھ ٹوٹ جائے۔ آخر کار آپ علیہ السلام رونے لگے اور آنکھوں سے آنسو بہنے لگے۔ قاضی ثناءاللہ پانی پتی لکھتے ہیں ۔ پھر ابلیس بد بخت حضرت ایوب علیہ السلام کے پاس بچوں کا معلم بن کر آیا جو ان کو حکمت سکھایا کرتا تھا۔ اس نے کہا۔ اے ایوب (علیہ السلام ) اگر آپ علیہ السلام اپنے بیٹے اور بیٹوں کو دیکھتے کہ انہیں کیسی موت دی گئی ہے اور کیسے الٹا گرایا گیا ہے جس کی وجہ سے اُن کے بھیجے اور خون بہہ رہے تھے اور اگر آپ علیہ السلام دیکھتے کہ کس طرح اُن کے پیٹ پھٹے ہوئے تھے اور انتڑیاں بکھری ہوئی تھیں تو آپ علیہ السلام کا دل ٹکڑے ٹکڑے ہو جاتا۔ وہ اسی طرح حضرت ایوب علیہ السلام کو اولاد کا غم اور تکلیف یاد دلاتا رہا۔ یہاں تک کہ آپ علیہ السلام کا دل پسیج گیا اور آپ علیہ السلام رونے لگے پھر آپ علیہ السلام نے مٹھی بھر مٹی اپنے اوپر ڈال لی۔

باقی ان شاءاللہ اگلی قسط میں.......! 

04 حضرت ایوب علیہ السلام Story of Prophet Ayoob

04 حضرت ایوب علیہ السلام

تحریر شفیق احمد ابن عبداللطیف آئمی

قسط نمبر 4

توبہ پہلے پہنچ گئی

حضرت ایوب علیہ السلام کے دل میں ابلیس شیطان نے اولاد کے لئے پدرانہ جذبات کو اکسایا اور آپ علیہ السلام کے آنسو نکل آئے۔ حضرت سفیان ثوری رحمتہ اللہ علیہ فرماتے ہیں ( یہ جلیل القدر تابعی اور مفسر اور محدث ہیں) ابلیس مردود نے حضرت ایوب علیہ السلام سے ان کی آزمائش کے دوران رونے کے علاوہ کچھ نہیں پایا۔ حضرت ایوب علیہ السلام نے بس اتنا ہی کیا کہ رونے لگے اور مٹی اٹھا کر اپنے سر پر ڈال لی اور زبان سے کوئی شکوہ اور شکایت نہیں کیا۔ لیکن مردود ابلیس کے لئے یہ بھی کافی ہو گیا اور وہ اللہ تعالیٰ کو بتانے کے لئے فوراً چل پڑا کہ میں نے حضرت ایوب علیہ السلام کے صبر کو توڑ دیا۔ اس کے اس طرح اچانک چلے جانے سے آپ علیہ السلام سمجھ گئے کہ یہ ابلیس شیطان تھا اور مجھے بہکانے کے لئے آیا تھا۔ حالانکہ سر پر مٹی ڈالنا اور آنکھوں سے آنسو بہنا کوئی گناہ نہیں ہے اور آپ علیہ السلام تو معصوم عن الخطاءہیں۔ لیکن اس کے باوجود انہوں نے فوراً توبہ کر لی اور اللہ تعالیٰ کی بارگاہ میں فوراً رجوع کیا۔ فرشتے اللہ تعالیٰ کی بارگاہ میں ابلیس سے پہلے آپ علیہ السلام کی توبہ لے کر پہنچ گئے اور اللہ تعالیٰ نے قبول کر لی۔ اور ابلیس مردود ایک مرتبہ پھر ناکام ہو گیا۔

بیماری سے آزمائش

حضرت ایوب علیہ السلام سے ابلیس شیطان بہت حسد کرنے لگا تھا۔ کیوں کہ آپ علیہ السلام آزمائش کے ہر مرحلے میں کامیاب ہوتے جا رہے تھے۔ اور ہر مرحلے کی کامیابی کے بعد اللہ تعالیٰ آپ علیہ السلام کا مرتبہ بڑھا دیتا تھا۔ اور پہلے سے زیادہ مقرّب بنا لیتا تھا۔ اور ہر مرحلے کی آزمائش میں ناکام ہونے کے بعد ابلیس شیطان کاآپ علیہ السلام سے حسد بڑھتا جا رہا تھا۔ اور وہ مردود پھر سے آپ علیہ السلام کے صبر کو توڑنے کے لئے اللہ تعالیٰ سے نئی درخواست کر دیتا تھا۔ اس مرتبہ اس نے اللہ تعالیٰ سے درخواست کی کہ حضرت ایوب علیہ السلام کے جسم مبارک پر مجھے اختیار دے کیوں کہ آپ علیہ السلام نے مال و دولت اور اولاد کے صدمے کو اس لئے برداشت کر لیا کہ آپ علیہ السلام کا جسم مبارک تندرست ہے ۔ اللہ تعالیٰ نے فرمایا۔ مرد ود لعین اپنی یہ حسرت بھی پوری کر لے۔ جا میں نے تجھے اس کے جسم پر اختیار دیا۔ لیکن اس کی زبان اور دل پر تیرا کوئی اختیار نہیں رہے گا۔

حضرت ایوب علیہ السلام کا صبر نیک لوگوں کے لئے نمونہ

حضرت ایوب علیہ السلام کے صبر کو توڑنے میں ایک مرتبہ پھر ناکام ہونے کے بعد ابلیس شیطان نے آپ علیہ السلام کے جسم پر قابو کی درخواست کی جو اللہ تعالیٰ نے اسے دے دیا۔ قاضی ثناءاللہ پانی پتی لکھتے ہیں کہ ابلیس ذلیل و رسوا ءہو کر ٹھہر گیا اور کہا ۔ اے اللہ تعالیٰ، ایوب علیہ السلام پر مال اور اولاد کا غم تو آسان تھا۔ کیوں کہ انہیں تو نے صحت مند اور تندرست جسم عطا فرمایا ہے۔ اور اسے یقین ہے کہ اللہ تعالیٰ مال اور اولاد پھر عطا فرما دے گا۔ کیا تو مجھے اس کے جسم پر قابو عطا کرے گا؟ اللہ تعالیٰ نے فرمایا۔ جا تجھے میں نے اس کے جسم پر بھی قابو عطاکیا۔ لیکن اس کی زبان اور دل پر تجھے قابو نہیں ہوگا۔ اللہ تعالیٰ جانتے تھے اور ( ابلیس شیطان کو ) ان چیزوں ( یعنی مال و دولت ، اولاد اور جسم ) پر قابو اپنی رحمت کی وجہ سے نہیں دیا تھا بلکہ اس لئے قابو دیا تا کہ حضرت ایوب علیہ السلام کے اجر میں اضافہ ہو جائے اور صبر کرنے والوں کے لئے آپ علیہ السلام کی سیرت مبارکہ ایک نمونہ بن جائے۔ اور ابتلاءو آزمائش میں نیک اور عبادت گزار بندوں کے لئے نصیحت بن جائے۔ تا کہ دنیا والے صبر اور ثواب کی امید میں اللہ تعالیٰ سے مانوس ہوں۔

بیماری کی تکلیف

حضرت ایوب علیہ السلام کی آزمائش ابھی ختم نہیں ہوئی تھی۔ مال و دولت اور اولاد چھن جانے کے بعد آپ علیہ السلام صبر و شکر کے ساتھ اللہ کی عبادت اور لوگوں کی خدمت میں زیادہ دل و جان سے مصروف ہو گئے۔ آپ علیہ السلام ایک دن اللہ تعالیٰ کی بارگاہ میں سجدے میں تھے کہ ابلیس شیطان مردود نے آپ علیہ السلام کی گردن کے پچھلے حصے پر پھونک ماری۔ مردود ابلیس کو اللہ تعالیٰ نے آگ سے بنایا ہے۔ اس کے پھونک مارنے سے آپ علیہ السلام کو بہت زیادہ تکیف ہوئی اور پورا بدن بے حد گرم ہو گیا۔ اتنا گرم ہو گیا کہ پور ے بدن پر چھالے آگئے اور دھیرے دھیرے یہ چھالے زخم بن گئے اور یہ زخم دن گزرنے کے ساتھ ساتھ خراب ہو تے گئے اور اُن میں مواد ( پیپ) پید اہو گئی۔ آپ علیہ السلام کو بے انتہا درد تکلیف تھی لیکن برداشت کر رہے تھے۔ بدن مبارک سے بدبو آنے لگی دھیرے دھیرے آپ علیہ السلام کے رشتہ دار، پڑوسی اور جان پہچان کے لو گ آپ علیہ السلام سے دور ہوتے چلے گئے۔ قاضی ثناءاللہ پانی پتی لکھتے ہیں کہ اللہ تعالیٰ سے اجازت مل جانے کے بعد ابلیس شیطان جلدی سے حضرت ایوب علیہ السلام کے پاس آیا تو دیکھا کہ آپ علیہ السلام سجدے میں ہیں اس مردود نے سجدے کی حالت میں ہی آپ علیہ السلام کے اوپر پھونک ماری۔ جس کی وجہ سے آپ علیہ السلام کا پورا جسم پھول گیا اور سر سے پاﺅں تک پورے جسم مبارک پر پھنسیاں نکل آئیں۔ وہ پھنسیاں پھوڑے کی طرح بکریوں کے جگر اتنی بڑی بڑی تھیں۔ آپ علیہ السلام کے جسم پر خارش ( کھجلی) شروع ہو گئی۔ پہلے آپ علیہ السلام اپنے ناخنوں سے کھجلاتے رہے یہاں تک کہ ناخن گر گئے یعنی جھڑ گئے۔ پھر کھردرے ٹاٹ سے کھجلانے لگے یہاں تک کہ ٹاٹ بھی ٹکڑے ٹکڑے ہو نے لگے۔ پھر ٹھیکریوں اور پتھر سے کھجلانے لگے۔ آپ علیہ السلام ااسی طرح کھجلاتے رہے یہاں تک کہ گوشت گرنے لگا۔ اور جسم مبارک سے بدبو آنے لگی۔

زوجۂ محترمہ ( بیوی) مسلسل خدمت کرتی رہی

حضرت ایوب علیہ السلام کی بیماری اتنی شدید تھی کہ لوگ آپ علیہ السلام سے دور ہونے لگے۔ اور آپ علیہ السلام کو بستی سے نکال دیا۔ صرف آپ علیہ السلام کی زوجہ محترمہ ( بیوی) آپ علیہ السلام کے ساتھ رہی اور مسلسل دیکھ بھال اور خدمت کرتی رہی۔ حضرت ایوب علیہ السلام کی تکلیف کا ذرا تصور کریں ہمیں ایک چھوٹا سا زخم لگ جاتا ہے اور وہ کچھ دنوں میں اچھا ہو جاتا ہے۔ لیکن اس زخم کی تکلیف اور درد کو ہم کتنا محسوس کرتے ہیں۔ اور یہاں تو حضرت ایوب علیہ السلام کا پورا جسم ہی خطرناک قسم کے زخموں سے بھرا ہوا تھا اور پورے جسم میں ایسی تکلیف اور دود ہور ہا تھا جس کا ہم اندازہ بھی نہیں کر سکتے ہیں۔ اور آپ علیہ السلام ایسی تکلیف اور ایسا درد ایک دن نہیں ، ایک ہفتہ نہیں ، ایک مہینہ نہیں بلکہ کئی سال تک برداشت کرتے رہے اور صبر کرتے رہے۔ روایات میں آتا ہے کہ دنیا میں چیچک میں مبتلا ہونے والے سب سے پہلے شخص حضرت ایوب علیہ السلام ہیں۔ آپ علیہ السلام کے جسم کا تمام گوشت گل گیا تھا۔ صرف پٹھے اور ہڈیاں کچھ حد تک محفوظ تھے۔ آپ علیہ السلام کی بیوی نے ایسے نازک حالات میں بھی آپ علیہ السلام کی بھر پور خدمت کی۔ جب کہ ایسے وقت میں ہر ایک نے آپ علیہ السلام کا ساتھ چھوڑ دیا تھا۔ لیکن آپ علیہ السلام کی بیوی رضی اللہ عنہا مسلسل خدمت کرتی رہیں ۔ وہ راکھ اٹھا اٹھا کر لاتی تھی۔ اور اسے بچھا کر اس پر آپ علیہ السلام کو لٹایا کرتی تھی۔ علامہ عبدالرزاق بھتر الوی لکھتے ہیں کہ حضرت ایوب علیہ السلام کے جسم میں شدید حرارت سے ایسا اثر ہوا کہ یوں محسوس ہوتا تھا کہ آپ علیہ السلام کے جسم مبارک کے اندر شعلے بھڑک اٹھے ہوں۔ سر سے لے کر قدم تک آبلے ( چھالے) پڑ گئے۔ شدید خارش ( کھجلی) ہونے لگی۔ ناخنوں سے جسم کو کھجلاتے رہے یہاں تک کہ ناخن گر ( جھڑ) گئے۔ سارے جسم میں صرف آنکھیں ، دل اور زبان محفوظ تھے۔ امام ابن عسا کر بیان کرتے ہیں کہ حضرت ایوب علیہ السلام کے جسم سے اگر کوئی کیڑا نیچے گر جاتا تو آپ علیہ السلام پھر سے اسے اٹھا کر اپنے زخموں پر رکھ لیتے تھے اور فرماتے تھے ۔ اللہ تعالیٰ نے جو رزق تمہیں دیا ہے وہ کھاﺅ۔ 

بیماری کے دوران مناجات

حضرت ایوب علیہ السلام بیماری کے دوران انتہائی صبر کا مظاہرہ کرتے رہے۔ علامہ ابن کثیر لکھتے ہیں کہ یزید بن میسرہ رحمتہ اللہ علیہ فرماتے ہیں جب آپ علیہ السلام کی آزمائش شروع ہوئی اور مال و دولت اہل و عیال سب فنا ہو گئے اور کوئی چیز ہاتھ میں باقی نہیں رہی تھی تو حضرت ایوب علیہ السلام ، اللہ تعالیٰ کا اور زیادہ ذکر کرنے لگے۔ اور فرمانے لگے۔ اے اللہ تعالیٰ ، اے تمام پالنے والوں کو پالنے والے، تو نے مجھ پر بڑے احسان کئے۔ مال و دولت عطا فرمایا اور اولاد عطا فرمائی اس وقت میر ا دل ( تیری دی ہوئی نعمتوں میں ) مشغول تھا۔ اب تو نے سب کچھ لے کر میرے دل کو ان کی فکروں سے مجھے آزاد کر دیا ۔ اب میرے اور تیرے درمیان کوئی حائل نہیں ہے۔ اگر میرا دشمن ابلیس تیری اس مہربانی کو جان لے گا تو مجھ سے بہت حسد کرنے لگے گا۔ اس وقت ابلیس لعین جل بھُن کر رہ گیا۔ آپ علیہ السلام اللہ تعالیٰ سے جو مناجات کرتے تھے اُن میں سے ایک یہ بھی ہے اے اللہ تعالیٰ، آپ نے مجھے تو نگر اور اولاد اور اہل و عیال والا بنا رکھا تھا۔ آپ تو خوب جانتے ہیں کہ اس وقت میں نے کبھی غرور اور تکبر نہیں کیا۔ اور کبھی کسی پر ظلم و ستم بھی نہیں کیا۔ میرے پروردگار ، آپ پر یہ بات بھی خوب روشن ہے کہ میر انرم و گرم بستر تیار ہوتا تھا اور میں راتوں کو آپ کی عبادتوں میں گزارتا تھا۔ اور اپنے نفس کو اس طرح ڈانٹ دیتا تھا کہ تو اس لئے نہیں پیدا کیا گیا ہے ۔ اور میں اے اللہ آپ کی رضا مندی کی طلب میں اپنی راحت اور آرام ترک کر دیا کرتا تھا۔ 

تندرستی کے برابر تکلیفیں برداشت کروں گا

حضرت ایوب علیہ السلام کا پورا جسم پھوڑوں اور زخموں سے بھرا ہوا تھا۔ اس لئے آپ علیہ السلام کسی بھی سخت یا نرم چیز پر بیٹھ بھی نہیں سکتے تھے۔ اور لیٹ بھی نہیں سکتے تھے۔ علامہ ابن کثیر لکھتے ہیں کہ حضرت حسن رحمتہ اللہ علیہ اور حضرت قتادہ رحمتہ اللہ علیہ ( دونوں جلیل القدر تابعی ہیں) فرماتے ہیں۔ سات سال اور کئی مہینے آپ علیہ السلام بیماری میں مبتلا رہے۔ لوگوں نے بستی کے باہر آپ علیہ السلام کو ڈال دیا تھا۔ بدن میں کیڑے پڑ گئے تھے۔ پھر اللہ تعالیٰ نے آپ علیہ السلام پر اپنا رحم و کرم فرمایا اور تما م بلاﺅں سے نجات دی اور اجر و ثواب عطا فرمایا اور تعریفیں کیں۔ حضرت وہب بن منبہ رضی اللہ عنہ فرماتے ہیں کہ آپ علیہ السلام پورے تین سال تکلیف میں مبتلا رہے۔ سارا گوشت جھڑ گیا۔ صرف ہڈیاں اور چمڑی رہ گئے تھے۔ آپ علیہ السلام کی بیوی رضی اللہ عنہا ہی پاس رہتی تھیں۔ اور خدمت کرتی تھیں۔ ایک روز آپ رضی اللہ عنہا عرض کرنے لگیں کہ اے اللہ کے نبی علیہ السلام ، آپ اللہ تعالیٰ سے دعا کیوں نہیں کرتے کہ وہ اس مصیبت کو ہم پر سے ٹال دے۔ آپ علیہ السلام نے فرمایا۔ اے اللہ کی نیک بندی اور میری پیاری بیوی رضی اللہ عنہا، اللہ تعالیٰ نے مجھے ستر70برس تک تندرست رکھا اور صحت و عافیت عطا فرمائی ہے۔ اگر میں ستّر سال تک اس بیماری اور تکلیف میں مبتلا رہوں او ر صبر کروں تو یہ بھی بہت کم ہے۔ اس پر آپ علیہ السلام کی بیوی رضی اللہ عنہا کانپ اٹھیں۔ آپ رضی اللہ عنہا شہر میں جاتی تھیں اور لوگوں کا کام کاج کر کے جو کچھ بھی ملتا تھا وہ لے کر اپنے شوہر کے پاس آتی تھیں اور آپ علیہ السلام کو کھلاتی پلاتی تھیں۔

باقی ان شاءاللہ اگلی قسط میں.......! 

05 حضرت ایوب علیہ السلام Story of Prophet Ayoob

05 حضرت ایوب علیہ السلام

تحریر شفیق احمد ابن عبداللطیف آئمی

قسط نمبر 5

اللہ تعالیٰ دیکھنا چاہتا ہے کہ میں صبر کرتا ہوں یا نہیں 

اللہ تعالیٰ کی حضرت ایوب علیہ السلام پر آزمائش جاری تھی۔ اور آپ علیہ السلام انتہائی صبر و شکر سے اس عظیم آزمائش سے گزر رہے تھے۔ لیکن ابلیس شیطان سے آپ علیہ السلام کا صبر وہ شکر برداشت نہیں ہو رہا تھا۔ اور وہ آپ علیہ السلام کی کامیابی کو ناکامی میں بدلنا چاہتا تھا۔ علامہ ابن کثیر لکھتے ہیں کہ آپ علیہ السلام کے دو دوست اور دلی خیر خواہ فلسطین ( اُس وقت کا ملک کنعان) میں رہتے تھے۔ ابلیس شیطان نے انسانی شکل میں جا کر اُن دونوں کو خبر دی کہ تمہارا دوست سخت مصیبت میں مبتلا ہے۔ تم جاﺅ اور ان کی خبر گیری کرو اور اپنے یہاں سے شراب اپنے ساتھ لے جاﺅ۔ وہ اسے پلا دینا اور وہ تندرست اور اچھا ہو جائے گا۔ دونوں دوست حضرت ایوب علیہ السلام کے پاس آئے۔ اور آپ علیہ السلام کی حالت دیکھ کر بلبلا کر رونے لگے۔ آپ علیہ السلام نے دریافت فرمایا۔ تم دونوں کون ہو؟ انہوں نے یاد دلایا تو آپ علیہ السلام پرانے دوستوں کو دیکھ کر بہت خوش ہوئے اور انہیں مرحبا( خوش آمدید) کہا۔ وہ دونوں کہنے لگے۔ اے دوست، آپ علیہ السلام شاید کوئی چھپاتے رہے ہوں گے اور ظاہر کے خلاف کر رہے ہوں گے؟ آپ علیہ السلام نے آسمان کی طرف دیکھ کر فرمایا۔ اللہ تعالٰ سب سے بہتر جانتا ہے کہ میں نے کیا چھپایا ہے اور کیا ظاہر کیا ہے۔ اور میرے رب نے مجھے اس آزمائش میں اس لئے مبتلا کیا ہے تاکہ وہ دیکھے کہ میں صبر کرتا ہوں یا بے صبری کرتا ہوں ۔ وہ دونوں کہنے لگے۔ اچھا ہم آپ علیہ السلام کے لئے دو ا لائے ہیں۔ آپ یہ دوا پی لیں آپ علیہ السلام کی بیماری اچھی ہو جائے گی اور شفاءحاصل ہو گی۔ آپ علیہ السلام نے فرمایا۔ یہ کیا ہے؟ تو اُن دونوں نے جواب دیا۔ یہ وہ شراب ہے جو ہم اپنے علاقے سے لے کر آئے ہیں۔ یہ سن کر آپ علیہ السلام اُن دونوں پر بہت شدید ناراض ہو گئے اور فرمایا۔ تمہیں ابلیس شیطان خبیث لایا ہے اور تم دونون سے بات کرنا اور تمہارا لایا ہوا کھانا اور پینا مجھ پر حرام ہے۔ یہ سن کر وہ دونوں واپس چلے گئے۔

زوجہ محترمہ رضی اللہ عنہا کی خدمت گزاری

حضرت ایوب علیہ السلام کی بیماری کے دوران آپ علیہ السلام کی زوجہ محترمہ یعنی بیوی رضی اللہ عنہا دل و جان سے خدمت کرتی تھی۔ علامہ ابن کثیر لکھتے ہیں کہ اس خوش قسمت خاتون رضی اللہ عنہا نے آپ علیہ السلام کا خوب ساتھ نبھایا۔ اور اُن کی شفقتوں اور گزرے ہوئے احسانات کی پوری پاسداری کی۔ وہ آپ علیہ السلام کو قضائے حاجت کے لئے جاتی تھیں۔ وہ آپ علیہ السلام کی بیماری میں آپ علیہ السلام کی مسلسل دیکھ بھال کرتی رہتی تھیں۔ اور ایک لمحہ کے لئے جدا نہیں ہوئیں۔ آپ علیہ السلام کے لئے راکھ اٹھا کر لاتیں اور دوسری ضروریات کو پورا کرنے کی کوشش کرتیں۔ یہاں تک اس بے چاری کی بھی حالت نا گفتہ ہو گئی۔ ایک پھوٹی کوڑی بھی ہاتھ میں نہیں رہی۔ لیکن لوگوں کے گھروں میں اجرت پر کام کرکے اپنے شوہر کے لئے کھانے اور دوا کا بندو بست کرتی رہیں۔ مال و دولت چھن گیا تھا۔ اولاد ِ داغِ جدائی دے گئی۔ حضرت ایوب علیہ السلام بیماری سے لاچار ہو گئے۔ تمام غلام اور خدام ساتھ چھوڑ گئے۔ اپنوں نے منہ موڑلیا۔ لیکن سعادت مند اور صابر و شاکر اللہ کی بندی نے اپنے شوہر ، اللہ کے نبی علیہ السلام کا ساتھ نہیں چھوڑا ۔ بلکہ اُن کی زبان سے ایک ہی کلمہ نکلتا رہا۔ انا للہ وانا الیہ راجعون۔ اللہ کی طرف سے آئے ہیں اور اسی کی طرف لوٹ کر جانا ہے۔

بیماری کے دوران بھی دوسروں کے حقوق کا خیال

حضرت ایوب علیہ السلام کی زوجہ محترمہ دوسروں کے گھروں میں کام کرتی تھیں اور بدلے میں وہ لوگ کھانا اور پیسے دے دیا کرتے تھے۔ علامہ ابن کثیر لکھتے ہیں کہ ایک دن حضرت ایوب علیہ السلام کی زوجہ محترمہ نے ایک گھر میں روٹیاں پکائیں تو جب وہ لوگ آپ رضی اللہ عنہا کوکھانا دینے لگے تو اس وقت اُن کا بیٹا سویا ہوا تھا۔ اسی لئے اُن لوگوں نے اس بچے کے حصے کی ٹکیا بھی آپ رضی اللہ عنہا کو دے دی۔ جب وہ اپنے شوہر کے پاس آئیں تو آپ علیہ السلام نے اس ٹکیا کے بارے میں دریافت فرمایا۔ انہوںنے پورا واقعہ بیان کر دیا۔ آپ علیہ السلام نے فرمایا۔ ابھی فوراً واپس جاﺅ۔ ممکن ہے بچہ جاگ گیا ہو اور اسی ٹکیا کے لئے ضد کر رہا ہو اور رو رو کر سارے گھر والوں کو پریشان کر رہا ہو۔ آپ رضی اللہ عنہا فوراً وہ ٹکیا لے کر واپس چلیں۔ اُس گھر والوں کی ڈیوڑھی پر ایک بکری بندھی ہوئی تھی تو اس نے زور سے آپ رضی اللہ عنہا کو ٹکر ماری ۔ تو آپ رضی اللہ عنہا کی زبان سے بے ساختہ نکل گیا ۔ اللہ تعالیٰ میرے شوہر پر رحم فرمائے۔ بلا وجہ مجھے تکلیف دی۔ پھر گھر کے اندر گئیں تو دیکھا کہ واقعی بچہ جاگا ہوا اور ٹکیا کے لئے مچل رہا ہے۔ اور گھر بھر کا ناک میں دم کر رکھا ہے۔ یہ دیکھ کر آپ رضی اللہ عنہا کی زبان سے بے ساختہ یہ نکلا۔ اللہ تعالیٰ میرے شوہر پر رحم فرمائے۔ انہوں نے اچھے موقع پر ٹکیہ واپس پہنچا کر حقدار کو اس کا حق ملنے میں مدد کی۔

زوجہ محترمہ رضی اللہ عنہا کے ذریعے بہکانا چاہا

حضرت ایوب علیہ السلام انتہائی صبر اور شکر سے اللہ کی آزمائش سے گزر رہے تھے۔ اور مسلسل اللہ تعالیٰ کا شکر ادا کر رہے تھے اور تکلیفوں پر صبر کر رہے تھے۔ ابلیس شیطان آپ علیہ السلام کا یہ صبر اور شکر اور اللہ تعالیٰ پر بھروسہ دیکھ کر چیخ پڑا اور روئے زمین پر موجود اپنے تمام چیلوں کو جمع کیا۔ انہوں نے پوچھا ۔ تم اتنے پریشان کیوں دکھائی دے رہے ہو؟ اُس مردود ملعون ابلیس نے کہا۔ مجھے تو اللہ کے اس بندے ( حضرت ایوب علیہ السلام ) نے عاجز کر دیا ہے۔ جس کا میں نے مال اور اولاد تباہ کر دیا۔ لیکن ہر تکلیف پر اس کے صبر اور شکر میں اضافہ ہوتا تھا۔ پھر مجھے اس کے جسم پر قابو دیا گیاتو میں نے اسے بہت زیادہ جسمانی تکلیف میں مبتلا کر دیا۔ لیکن اس کے بعد اس کا اللہ تعالیٰ پر توکل یعنی بھروسہ اور زیادہ بڑھ گیا۔ اور میں اپنی ہر کوشش کر کے بھی اس کے ، اللہ تعالیٰ کے بھروسے کو نہیں توڑ سکا۔ اور اس کے صبر کو نہیں توڑ سکا۔ اور یہ اس عالم میں بھی اللہ تعالیٰ کا شکر ادا کر رہا ہے ۔ چیلوں نے کہا۔ تم وہ چال اور حیلہ سازیاں استعمال کیوں نہیں کر تے جن کی وجہ سے پچھلے لوگوں کو گمراہ کیا ہے۔ ابلیس بولا میں اپنا ہر حربہ استعمال کر چکا ہوں۔ اب تم لوگ کوئی تدبیر سوچو۔ ایک چیلے نے کہا۔ تم عورت کے ذریعے انہیں بہکانے کی کوشش کر سکتے ہو۔ حضرت ایوب علیہ السلام کی زوجہ محترمہ اُن کی بہت خدمت کرتی ہے۔ اسی لئے وہ اس کی بات نہیں ٹالیں گے۔ ابلیس نے کہا ٹھیک ہے ۔ اور ایک طبیب( ہماری زبان میں ڈاکٹر) بن کر انسانی شکل میں آپ علیہ السلام کی زوجہ محترمہ رضی اللہ عنہا کے پاس آیا اور پوچھا ۔ اے اللہ کی بندی تیرے شوہر کہاں ہیں؟ انہوں نے جو اب دیا۔ یہ راکھ پر پڑے ہیں۔ یہی میرے شوہر ہیں۔ ابلیس مردود نے اُن کے دل میں وسوسہ پیدا کیا۔ اور پچھلی نعمتوں اور آرام و آسائش اور تندرستی کے جو حالات گزر چکے ہیں انہیں اس انداز میں اُن کے سامنے پیش کیا کہ وہ سنہرے دن اُن کی آنکھوں کے سامنے گزرنے لگے اور وہ رونے لگیں۔ ابلیس نے فوراً موقع دیکھ کر کہا کہ اپنے شوہر سے کہو کہ غیر اللہ کے نام پر اس بکری کو ( وہ اپنے ساتھ لایا تھا) ذبح کردیں تو تندرست ہو جائیں گے۔ انہوں نے بکری لی اور آپ علیہ السلام سے آکر گذارش کی کہ ایک طبیب نے کہا ہے کہ اسے غیر اللہ کے نام پر ذبح کر دیں آپ علیہ السلام تندرست ہو جائیں گے۔

اللہ تعالیٰ پر توکل ( بھروسہ)

حضرت ایوب علیہ السلام کی زوجہ محترمہ نے طبیب کی بات بتائی۔ علامہ ابن کثیر لکھتے ہیں کہ ابلیس شیطان ایک طبیب کی شکل میں زوجہ محترمہ رضی اللہ عنہا کے پاس آیا اور بولا ۔ تمہارے شوہر برسوں سے اس تکلیف میں مبتلا ہیں ۔ اور تم بھی اتنی تکلیف اٹھا رہی ہو۔ اپنے شوہر سے کہو کہ فلاں بت کے نام پر ایک مکّھی مار دیں۔ وہ تندرست ہو جائیں گے ۔ آپ رضی اللہ عنہا اپنے شوہر کی خدمت میں آئیں اور طبیب کی بات عرض کی۔ حضرت ایوب علیہ السلام یہ سن کر غصے میں آگئے اور فرمایا۔ اے اللہ کی بندی، وہ ابلیس شیطان تھا۔اور تیرے ذریعے میرے صبر اور شکر کو توڑنا چاہتا تھا۔ حالانکہ تو یہ بات اچھی طرح جانتی ہے کہ مجھے اپنے اللہ تعالیٰ پر اتنا بھروسہ ہے کہ میں صرف ایک دعا کروں گا اور اللہ تعالیٰ فوراً میری تکلیف اور مصیبت ختم کر دے گا۔ لیکن میں بھی یہ دیکھنا چاہتا ہوں کہ مجھ سے کب تک صبر اور شکر ہو سکتا ہے۔ اور اللہ تعالیٰ بھی یہ دیکھنا چاہتا ہے کہ میرا بندہ ایوب ( علیہ السلام ) میری آزمائش پر کتنا صبر اور شکر ادا کر سکتا ہے۔ اور میں قسم کھاتا ہوں کہ جب اللہ تعالیٰ مجھے تندرستی اور شفاءعطا فرمائے گا تو میں تجھے سو 100کوڑے ماروں گا۔ آپ علیہ السلام کی زوجہ محترمہ نے یہ گفتگو سنی تو سمجھ گئیں کہ ابلیس شیطان نے مجھے بہکایا ہے ۔ وہ فوراً توبہ کرنے لگیں۔

حضرت ایوب علیہ السلام کی دعا

اللہ تعالیٰ نے سورہ الانبیاءمیں فرمایا۔ ترجمہ ” اور ایوب ( علیہ السلام ) کی اُس حالت کو یاد کرو جب اُس نے اپنے رب ( اللہ تعالیٰ) کو پکارا۔ ( اے اللہ تعالیٰ) مجھے یہ بیماری لگ گئی ہے۔ اور تو سب سے زیادہ رحم کرنے والا ہے۔ “ ( سورہ الانبیاءآیت نمبر83) اللہ تعالیٰ نے سورہ صٓ میں فرمایا۔ ترجمہ ” اور ہمارے بندے ایوب ( علیہ السلام ) کا ذکر کرو۔ جب اُ س نے اپنے رب ( اللہ تعالیٰ ) کو پکارا کہ شیطان نے مجھے رنج اور دکھ پہنچایا ہے۔“ ( سورہ ص ٓ آیت نمبر41) ان دو آیتوں میں اللہ تعالیٰ نے حضرت ایوب علیہ السلام کی دعا کا ذکر فرمایا ہے۔ ان الفاظ پر غور کریں اور حضرت ایوب علیہ السلام کا اللہ تعالیٰ پر توکل یعنی بھروسہ کا اندازہ کریں ۔ سورہ الانبیاءکی آیت میں الفاظ ” مَسَّنی ِ الضُّرُّ “ ہے۔ یعنی تکیف نے مجھے چھو لیا ہے۔ ان آیات میں اللہ تعالیٰ سے آپ علیہ السلام نے صرف اپنی تکلیف کا ذکر کیا اور اللہ تعالیٰ کی تعریف بیان فرمائی۔ آپ علیہ السلام کو اتنا یقین تھا کہ اللہ تعالیٰ ضرور میری تکلیف دور فرمائیں گے۔ اتنے برسوں تک بیماری میں مبتلا رہنے کے بعد آخر آپ علیہ السلام نے کیوں دعا مانگی اور کس تکلیف نے آپ علیہ السلام کے دل کو چھو لیا تھا۔ اس کی وجہ ایک واقعہ ہے۔

دعا مانگنے کی وجہ

حضرت ایوب علیہ السلام کی آزمائش جاری تھی۔ اور آپ علیہ السلام انتہائی صبر اور شکر سے اللہ تعالیٰ پر بھروسہ کر رہے تھے۔ لیکن ایک واقعہ نے آپ علیہ السلام کےدل کو چھو لیا۔ آپ علیہ السلام اپنی زوجہ محترمہ رضی اللہ عنہا سے بہت محبت کرتے تھے۔ اور وہ بھی بے حد محبت کرتی تھیں۔ اور برسوں آپ علیہ السلام کی ایسے وقت میں خدمت کرتی رہیں ۔ آپ علیہ السلام کے پورے بدن پر پھوڑے تھے اور اُن سے مواد ( پیپ) بہتی رہتی تھی۔ اگر آپ علیہ السلام کی زوجہ محترمہ رضی اللہ عنہا ہاتھ پکڑ کر اٹھانے کی کوشش کرتیں تو پھوڑوں کی وجہ سے آپ علیہ السلام کو بہت شدید تکلیف ہوتی تھی اور اُن کی بیوی رضی اللہ عنہا کے ہاتھوں میں مواد بھر جاتی تھی۔ اسی لئے انہوں نے اس کاراستہ یہ نکالا کہ اُن کے بال بہت لمبے لمبے تھے وہ اپنے بالوں کو لٹکا کر آپ علیہ السلام پر جھک جاتی تھیں۔ حضرت ایوب علیہ السلام کی ہتھیلیاں اور تلوے کسی حد تک محفوظ تھے۔ اسی لئے حضرت ایوب علیہ السلام اپنی ہتھیلیوں سے مضبوطی سے اُن کے بالوں کو پکڑ لیتے تھے۔ اور ان کے سہارے اٹھ کر کھڑے ہوتے تھے۔ اور پیشاب اور پاخانے کے لئے جاتے تھے۔ پھر واپس آکر اسی طرح اپنی بیوی رضی اللہ عنہا کے بالوں کو پکڑ کر بیٹھتے یا لیٹے تھے۔ جب کئی برس گزر گئے تو ابلیس شیطان نے لوگوں کے دلوں میں وسوسے پیدا کرنا شروع کر دیاکہ حضرت ایوب علیہ السلام کی بیوی رضی الہ عنہا کو کام نہیں دیا جائے ۔ کہیں ایس انہ ہو کہ ان کے ذریعے حضرت ایوب علیہ السلام کی بیماری ہمارے اندر آجائے۔ اس طرح تمام بستی والوں نے آپ رضی اللہ عنہا کو کام نہیں دیا۔ اور بھوکوں مرنے کی حالت ہو گئی۔ کئی دنوں کی بھوکی آپ رضی اللہ عنہا لوگوں سے کام مانگ رہی تھیں کہ ایک امیر عورت نے کہا۔ تمہارے بال بہت خوب صورت ہیں۔ یہ مجھے دے دو تو میں تمہیں بہت سارا کھانا دوں گی۔ آپ رضی اللہ عنہا نے اپنا سر منڈوا کر سارے بال اسے دے دیئے۔ اور بدلے میں بہت سارا کھانا لے کر اپنے شوہر کے پاس آئیں۔ آپ علیہ السلام نے حیرانی سے دریافت فرمایا کہ اتنا سارا کھانا کہاں سے آیا تو آپ رضی اللہ عنہا خاموش رہیں۔ جب بہت اصرار کیا تو بتایا کہ اپنا سارا بال اس کھانے کے بدلے دے آئی ہوں۔ اور اپنا سر کھول کر دکھایا تو وہ منڈا ہوا تھا۔ آپ علیہ السلام نے اپنی پیاری بیوی کی یہ حالت دیکھی تو دل دکھ گیا اور پھر آپ علیہ السلام نے دعا فرمائی۔

اللہ تعالیٰ نے رحم فرمایا

حضرت ایوب علیہ السلام نے جب اپنی پیاری زوجہ محترمہ کو اس حال میں دیکھا تو بہت تکلیف ہوئی اور اس تکلیف نے آپ علیہ السلام کے دل کو چھو لیا۔ آپ علیہ السلام نے اللہ تعالیٰ سے دعا کی۔ اے اللہ تعالیٰ، مجھے بیماری ہے اور تکلیف نے میرے دل کو چھو لیا ہے۔ اور شیطان نے مجھے بہت تکلیف پہنچائی ہے۔ اور اے اللہ تعالیٰ، آپ ہی سب سے زیادہ رحم کرنے والے ہیں۔ دیکھا آپ نے ، اگر ہم بیمار ہوتے ہیں تو پہلے تو اپنی تکلیف لوگوں کو بار بار بتاتے ہیں۔ اور پھر اس کے بعد بار بار اللہ تعالیٰ سے یہ دعا مانگتے ہیں کہ وہ ہمیں اس بیماری اور تکلیف سے نجات دے۔ اور اب حضرت ایوب علیہ السلام کی دعا پر غور کریں۔ آپ علیہ السلام نے تو دنیا میں کسی سے اپنی تکلیف بیان نہیں فرمائی۔ اور جب اللہ تعالیٰ سے بھی عرض کیا تو بس اتنا ہی کہا کہ شیطان نے مجھے بہت دکھ اور تکلیف پہنچائی ہے۔ اور اب یہ درد میرے دل تک پہنچنے لگا ہے۔ اس کے بعد یہ دعا نہیں فرمائی کہ مجھے اس بیماری سے نجات دے۔ بلکہ صرف اللہ تعالیٰ کی تعریف بیان فرمائی۔ یہ اللہ تعالیٰ پر آپ علیہ السلام کا مکمل یقین اور بھروسہ تھا کہ اللہ تعالیٰ ہی سب سے زیادہ رحم فرمانے والا ہے۔ اور اللہ تعالیٰ بھی اپنے پیارے بندے کے انتظار میں تھا کہ میرا بندہ کب مجھے پکارے اور میں اس کے اوپر رحم کروں ۔ اور رحم بھی کر دیا۔

باقی ان شاءاللہ اگلی قسط میں.......! 

06 حضرت ایوب علیہ السلام Story of Prophet Ayoob

06 حضرت ایوب علیہ السلام

تحریر شفیق احمد ابن عبداللطیف آئمی

قسط نمبر 6

مَسَّنِی الضُّرُُّّ ( تکلیف نے میرے دل کو چھو لیا ہے ) 

اللہ تعالیٰ نے سورہ الانبیاءمیں فرمایا۔ ترجمہ ” اور ایوب ( علیہ السلام ) کی حالت کو یاد کرو جب اس نے اپنے رب ( اللہ تعالیٰ ) کو پکارا ۔ کہ مجھے بیماری لگ گئی ہے۔ ( تکلیف نے میرے دل کو چھو لیا ہے) اور تو سب سے زیادہ رحم فرمانے والا ہے۔ یا تو سب رحم کرنے والوں میں سے سب سے زیادہ رحم فرمانے والا ہے۔“ (سورہ الانبیاءآیت نمبر83) حضر ت ایوب علیہ السلام کی اس دعا کے بارے میں بہت سی روایات ہیں۔ ان میں سے سترہ یا اٹھارہ روایتیں امام قرطبی نے اپنی تفسیر میں لکھی ہیں۔ اُن میں سے چند ہم آپ کی خدمت میں پیش کر رہے ہیں۔ امام قرطبی لکھتے ہیں کہ اللہ تعالیٰ کے اس ارشاد کے بارے میں حضرت عبداللہ بن عباس رضی اللہ عنہ نے فرمایا۔ حضرت ایوب علیہ السلام کو ایوب اس لئے کہا جاتا ہے کیوں کہ وہ ہر حال میں اللہ تعالیٰ کی طرف ہی رجوع کرنے والے تھے۔ حضرت ایوب علیہ السلام کے قول ” مَسَّنِی الضُّرُّ“کے بارے میں تو علمائے کرام کے پندرہ اقوال ہیں اور مجھے ( امام قرطبی کو) تحقیق کے بعد دو اقوال معلوم ہوئے ہیں۔ 

مَسَّنِی الضُّرُّکے بارے میں اقوال

حضرت ایوب علیہ السلام نے اللہ تعالیٰ سے عرض کیا کہ تکلیف نے میرے دل کو چھو لیا ہے۔ امام قرطبی لکھتے ہیں اس بارے میں یہ اقوال ہیں۔ 1) حضرت ایوب علیہ السلام نماز پڑھنے کے لئے اٹھے تو آپ علیہ السلام اٹھ نہیں سکے تو اللہ تعالیٰ سے عرض کیامَسَّنِی الضُّرُّ۔ 2) یہ عجز کا اقرار ہے اور صبر کے منافی نہیں ہے۔ 3) اللہ تعالیٰ نے آپ علیہ السلام کی زبان سے یہ الفاظ جاری کروائے۔ تا کہ آزمائش میں مبتلا ہونے والے لوگوں کے لئے حجت بن جائے۔ 4) حضرت ایوب علیہ السلام پر چالیس دن تک وحی کا سلسلہ منقطع رہا۔ آپ علیہ السلام کو خوف ہوا کہ اللہ تعالیٰ نے کہیں آپ علیہ السلام کو چھوڑ تو نہیں دیا۔ اسی لئے فرمایامَسَّنِی الضُّرُّ۔ 5) اللہ تعالیٰ نے آپ علیہ السلام کی زبان پر یہ کلمہ اس لئے جاری کروایا کہ انسان تکلیف برداشت کرنے میں ضعیف اور کمزور ہے۔ اسی لئے تمام انسانوں پر اپنی مہربانی کرنے کے لئے آپ علیہ السلام سے کہلوایامَسَّنِی الضُّرُّ۔ 6) آپ علیہ السلام کو کیڑے کھاتے رہے تو آپ علیہ السلا م صبر کرتے رہے۔ یہاں تک کہ جب ایک کیڑے نے دل پر حملہ کیا اور دوسرے کیڑے نے زبان پر حملہ کیا تو آپ علیہ السلام نے فرمایامَسَّنِی الضُّرُّ۔ تاکہ آپ اللہ کے ذکر سے محروم نہ ہو جائیں۔ 7) جب لوگوں نے آپ علیہ السلام کی بیوی رضی اللہ عنہا کو کام نہیں دیا تو آپ علیہ السلام نے فرمایامَسَّنِی الضُّرُّ۔ 8) دو شخصوں نے کہا کہ ( نعوذ باللہ ) آپ علیہ السلام کی کسی غلطی کی سزا ہے تو آپ علیہ السلام نے فرمایامَسَّنِی الضُّرُّ۔ 9) حضرت ایوب علیہ السلام کی بیوی رضی اللہ عنہا کو جب کسی نے کام نہیں دیا تو انہوں نے اپنے بالوں کو بیچ دیا۔ اور کھانا لے کر آئیں ۔ آپ علیہ السلام اپنی زوجہ محترمہ رضی اللہ عنہا کے بالوں کا سہارا لے کر اٹھتے بیٹھتے تھے جب بالوں کو نہیں پایا تو حرکت نہیں کر سکے تو فرمایا مَسَّنِی الضُّرُّ۔

اپنے پیر کو زمین پر مارو

اللہ تعالیٰ نے سورہ ص ٓ میں فرمایا۔ ترجمہ ” ( حضرت ایوب علیہ السلام سے فرمایا) اپنا پاﺅں زمین پر مارو ۔ یہ نہانے کا ٹھنڈا اور پینے کا پانی ہے “ ( سورہ ص ٓ آیت نمبر42) اللہ تعالیٰ نے آپ علیہ السلام کو حکم دیا کہ زمین پر اپنا پیر مارو۔ آپ علیہ السلام نے اپنا پیر مارا تو زمین میں گڑھا ہو گیا اور اس میں سے پانی نکلنے لگا۔ اللہ تعالیٰ نے فرمایا۔ یہ ٹھنڈا اور میٹھا پانی ہے۔ اسے پیﺅ اور اس سے نہاﺅ۔ آپ علیہ السلام کی زوجہ محترمہ رضی اللہ عنہا اس وقت کہیں کام کی تلاش میں گئی ہوئی تھیں۔ آپ علیہ السلام نے اس پانی کو پیا اور اس سے غسل کیا۔ غسل کرتے ہی آپ علیہ السلام کی بیماری اچھی ہو گئی۔ اور پورے بدن کے زخم اچھے ہو گئے اور ان کا نام و نشان بھی مٹ گئے۔ اور آپ علیہ السلام کا بدن مبارک اور چہرہ مبارک اور زیادہ خوب صور ت ہو گئے۔ علامہ عبدالرزاق بھترالوی لکھتے ہیں۔ آپ علیہ السلام کو حکم ہو ا کہ اپنا پاﺅں زمین پر ماریں تو اس سے چشمہ جاری ہو گا اس پانی کو پیﺅ اور اس سے غسل کرو۔ آپ علیہ السلام نے غسل کیا تو جسم مبارک کی تمام ظاہری بیماری اچھی ہو گئی۔ اور پینے سے اندرونی طور پر شفاءحاصل ہو گئی۔ اللہ تعالیٰ نے آپ علیہ السلام کو جنتی لباس پہنایا۔ اور آپ علیہ السلام وہاں سے کچھ دور پر بیٹھ گئے۔ علامہ قرطبی لکھتے ہیں ۔ اللہ تعالیٰ نے جبرئیل علیہ السلام کو حضرت ایوب علیہ السلام کی طرف بھیجا تو انہوں نے اپنا پیر زمین پر مارا تو گرم پانی کا چشمہ ظاہر ہوا۔ جبرئیل علیہ السلام نے آپ علیہ السلام کا ہاتھ پکڑا اور اسے جھاڑا تو تمام کیڑے گر گئے۔ اور آپ علیہ السلام کو پانی میں داخل کر دیاتو گوشت پیدا ہو گیا اور آپ علیہ السلام اپنی جگہ واپس لو ٹ آئے۔ علامہ محمد بن جریر طبری لکھتے ہیں۔ حضرت ایوب علیہ السلام نے زمین پر پاﺅں مارا تو پانی کا چشمہ جاری ہو گیا۔ آپ علیہ السلام نے اس سے غسل فرمایا تو جسم مبارک پر بیماری کا کوئی نشان نہیں رہا۔ اللہ تعالیٰ نے آپ علیہ السلام کی ہر تکلیف اور ہر بیماری دور فرما دی اور آپ کا حسن و شباب پہلے سے کہیں زیادہ نکھر کر آگیا۔ پھر آپ علیہ السلام نے ایک قیمتی جوڑا زیب تن کیا۔ اس کے بعد آپ علیہ السلام ایک بلند جگہ پر بیٹھ گئے۔

٭ زوجہ محترمہ ( بیوی) رضی اللہ عنہا پہچان نہیں سکیں

 اللہ تعالیٰ نے جس وقت حضرت ایوب علیہ السلام کو مکمل شفاءاور خوب صورتی عطا فرمائی تو اس وقت آپ علیہ السلام کی زوجہ محترمہ رضی اللہ عنہا کام کی تلاش میں گئی ہوئی تھیں۔ جب آپ رضی اللہ عنہا کو کام نہیں ملا تو خالی ہاتھ واپس اپنے شوہر کے پاس آئیں۔ تو دیکھا جس راکھ کے بستر پر ان کے شوہر لیٹے رہتے تھے وہ خالی ہے۔ آپ رضی اللہ عنہا پریشان ہو گئیں اور حیرانی اور پریشانی کے عالم میں بے تابی سے اپنے شوہر کو تلاش کررہی تھیں ۔ انہوں نے دیکھا کہ کچھ دور پر ایک انتہائی خوب صورت شخص بہترین لباس میں بیٹھا ان کی طرف دیکھ رہا ہے۔ آپ علیہ السلام اپنی زوجہ محترمہ رضی اللہ عنہا کی بے تابی اور پریشانی مسکراتے ہوئے دیکھ رہے تھے۔ آکر کار وہ آپ علیہ السلام کے پاس آئیں لیکن پہچان نہیں سکیں اور پوچھنے لگیں ۔ اے اللہ کے نیک بندے، یہاں ایک بیمار شخص تھے۔ تم جانتے ہو وہ کہاں گئے ہیں۔ کہیں بھیڑ یا تو نہیں اٹھا لے گیا۔ بار بار پریشانی سے آپ رضی اللہ عنہا پوچھ رہی تھیں۔ حضرت ایوب علیہ السلام مسکراتے ہوئے اسے دیکھتے رہے۔ پھر ان کا ہاتھ پکڑ کر فرمایا۔ اری نیک بخت اللہ تجھ پر رحم فرمائے، میں ہی ایوب ( علیہ السلام ) ہوں اور اللہ تعالیٰ نے مجھے شفاءعطا فرمائی ہے۔

پہلے سے زیادہ مل گئے

اللہ تعالیٰ نے سورہ ص ٓ میں فرمایا۔ ترجمہ ” اور ہم نے اسے ( حضرت ایوب علیہ السلام کو ) اس کا پورا کنبہ عطا فرمایا۔ بلکہ اتنا ہی اور بھی عطا فرمایا۔ اسی کے ساتھ اپنی خاص رحمت بھی عطا فرمائی۔ اور یہ عقل مندوں کے لئے نصیحت ہے۔ “ (سورہ ص ٓ آیت نمبر43) اس کی تفسیر میں تفسیر انوار البیان میں لکھا ہے کہ یہ جو فرمایا کہ ہم نے اُن کا کنبہ واپس کر دیا اور اُن جیسے اور بھی دیئے۔ اس کے بارے میں مفسرین نے دونوں احتمال لکھے ہیں۔ کہ صحت و عافیت کے بعد یا تو اُن کو اتنی گمشدہ اولاد واپس کر دی گئی جو اُن سے جدا ہو گئی تھی۔ اور اگر وفات پا گئی تو اتنے ہی اُن کی جگہ اللہ تعالیٰ نے پیدا فرما دیئے۔ علامہ ابن کثیر اس آیت کی تفسیر میں لکھتے ہیں کہ مروی ہے کہ آپ علیہ السلام سے فرمایا گیا کہ تمہارے سب آل اولاد جنت میں ہیں ۔ تم کہو تو ان سب کو دنیا میں لا دیا جائے اور اگر کہو تو وہیں جنت میں رہنے دیا جائے۔ اور دنیا میں تمہیں ان کا عوض عطا فرما دیا جائے۔ آپ علیہ السلام نے دوسری بات پسند فرمائی۔ پس آخرت کا اجر اور دنیا کا بدلہ دونوں آپ علیہ السلام کو ملا۔

مال و دولت بھی زیادہ عطا کر دیئے گئے

اللہ تعالیٰ نے جب حضرت ایوب علیہ السلام کو شفا عطا فرمائی تو اولاد کے ساتھ ساتھ مال و دولت سے بھی نواز۔ علامہ ابن کثیر لکھتے ہیں۔ روایت میں ہے کہ جب اللہ تعالیٰ نے حضرت ایوب علیہ السلام کو شفا و عافیت عطا فرمائی تو آسمان سے اُن کے اوپر سونے کی ٹڈیاں برسائیں۔ جنہیں لے کر آپ علیہ السلام نے اپنے کپڑے میں جمع کرنی شروع کر دی۔ تو آواز آئی۔ اے ایوب (علیہ السلام ) کیا تم آسودہ نہیں ہوئے؟ تو آپ علیہ السلام نے فرمایا۔ اے اللہ تعالیٰ ، تیری رحمت سے کون آسودہ حال ہو سکتا ہے؟ علامہ عبدالرزاق لکھتے ہیں کہ ایک روایت میں یہ بھی ہے کہ آپ علیہ السلام پر اللہ تعالیٰ نے سونے کی مکڑیوں کی بارش کی۔ آپ علیہ السلام پکڑ پکڑ کر اپنے کپڑے میں رکھتے رہے۔ پھر آپ علیہ السلام نے اپنی چادر بچھادی اور اس میں جمع کرنے لگے۔ اللہ تعالیٰ نے فرمایا۔ اے ایوب ( علیہ السلام ) ، تم سیر نہیں ہوئے؟ تو انہوں نے عرض کیا۔ اے اللہ تعالیٰ، تیرے فضل سے کون سیر ہو سکتا ہے؟ قاضی ثناءاللہ پانی پتی لکھتے ہیں کہ جس پانی سے آپ علیہ السلام نے غسل فرمایا تھا اس کے چھینٹوں سینے پر سونے کی مکڑیاں اڑنے لگیں اور آپ علیہ السلام نے انہیں جمع کر کے رکھنے لگے۔ اللہ تعالیٰ نے وحی بھیجی۔ اے ایوب علیہ السلام ، کیا میں نے تجھے غنی نہیں کر دیا؟ تو آپ علیہ السلام نے فرمایا۔ کیوں نہیں ۔ لیکن اے اللہ تعالیٰ یہ تیری رحمت اور برکت ہے اور تیری رحمت اور برکت سے کون سیر ہو سکتا ہے؟

بیماری کا عرصہ 

حضرت ایوب علیہ السلام کتنے عرصہ بیماری میں مبتلا رہے؟ اس کے بارے میں علمائے کرام کی مختلف روایات ہیں۔ قاضی ثناءاللہ پانی پتی لکھتے ہیں۔ کہ امام بغوی فرماتے ہیں کہ ابن شہاب ( جلیل القدر تابعی اور مفسر) نے حضرت انس بن مالک رضی اللہ عنہ سے حدیث نقل فرمائی ہے کہ حضرت ایوب علیہ السلام اٹھارہ 18سال مصیبت میں مبتلا رہے۔ حضرت وہب بن منبہ رضی اللہ عنہ فرماتے ہیں کہ آپ علیہ السلام پورے تین3سال مصیبت میں گرفتار رہے۔ ایک دن بھی زائد نہیں تھا۔ حضرت کعب رضی اللہ عنہ فرماتے ہیں آپ علیہ السلام سات7سال مصیبت میں مبتلا رہے۔ بعض علمائے کرام نے لکھا ہے کہ سات سال ، سات مہینے اور سات دن مصیبت میں مبتلا رہے۔ امام قرطبی لکھتے ہیں ۔ حضرت ایوب علیہ السلام کتنی مدت آزمائش میں مبتلا رہے اس میں اختلاف ہے۔ حضرت عبداللہ بن عباس رضی اللہ عنہ فرماتے ہیں۔ آزمائش کی مدت سات سال ، سات مہینے، سات دن اور سات راتیں تھیں۔ حضرت وہب بن عنبہ رضی اللہ عنہ فرماتے ہیں کہ تیس سال آزمائش میں مبتلا رہے۔ امام حسن رضی اللہ عنہ فرماتے ہیں کہ سات سال چھ مہینے آزمائش میں مبتلا رہے۔ میں (امام قرطبی) کہتا ہوں ان میں اصح، اٹھارہ سال ہے جو امام ابن شہاب رحمتہ اللہ علیہ نے رسول اللہ صلی اللہ علیہ وسلم سے روایت کی ہے۔ اور امام عبداللہ بن مبارک رحمتہ اللہ علیہ نے بھی اسی کو روایت کیا ہے۔

قسم پوری کرنے کا حکم

اللہ تعالیٰ نے سورہ ص ٓ میں فرمایا۔ ترجمہ ” اور اپنے ہاتھ میں تنکوں کا ایک مٹھا ( جھاڑو) لے کر ماردو اور اپنی قسم پوری کرو ۔ سچ تو یہ ہے کہ ہم نے اسے ( حضرت ایوب علیہ السلام کو) بڑا صابر بندہ پایا۔ وہ بڑا نیک اور رغبت رکھنے والا بندہ تھا۔ “ (سورہ ص ٓ آیت نمبر44) آپ کو یاد ہو گا کہ حضرت ایوب علیہ السلام نے قسم کھائی تھی کہ وہ اپنی زوجہ محترمہ رضی اللہ عنہا کو سو 100کوڑے ماریں گے۔ جب آپ علیہ السلام کی آزمائش ختم ہو گئی تو یہ فکر ہوئی کہ قسم کو پوری کیا جائے۔ لیکن آپ علیہ السلام کی بیوی رضی اللہ عنہا نے اتنی زیادہ تکلیفیں اور مصیبتیں آپ علیہ السلام کے ساتھ اٹھائی تھیں اسی لئے اللہ تعالیٰ نے سزا میں تخفیف کا حکم فرمایا۔ علامہ محمد بن جریر طبری لکھتے ہیں۔ پھر اللہ تعالیٰ نے حضرت ایوب علیہ السلام کی بیوی رحمت پر رحم فرمایا۔ کیوں کہ انہوں نے تکلیف کے وقت آپ علیہ السلام کے ساتھ صبر کیا تھا۔ اللہ تعالیٰ نے اس کے لئے حکم میں تخفیف فرما دی۔ اور حضرت ایوب علیہ السلام کو قسم پوری کرنے کی یہ تدبیر بتائی کہ چھوٹی چھوٹی لکڑیوں کا گٹھا لو اور اس سے مارو۔ یہ سب کچھ اس لئے تھا کہ انہوں نے آپ علیہ السلام کا آزمائش میں ساتھ دیا تھا اور صبر کیا تھا۔ حضرت عبداللہ بن عباس رضی اللہ عنہ فرماتے ہیں کہ اللہ تعالیٰ نے آپ علیہ السلام کو حکم دیا کہ ایک گھاس کا گٹھا لو جس میں سو100شاخیں ہوں تو آپ علیہ السلام نے ایک شاخ لی جس میں سو باریک شاخیں تھیں۔ اس سے اپنی بیوی محترمہ رضی اللہ عنہا کو ایک دفعہ مارا۔ تو قسم پوری ہو گئی۔ اس بارے میں کئی روایات ہے کہ گھاس کے گٹھے سے مارا۔ سو 100تنکے والی لمبی جھاڑو سے مارا۔ اب حقیقت کا علم تو صرف اللہ تعالیٰ کو ہی ہے۔

حضرت ایوب علیہ السلام کی شان میں بائیبل میں گستاخیاں

اللہ تعالیٰ نے قرآن پاک میں حضرت ایوب علیہ السلام کو اپنا ایک انتہائی صابر اور شاکر بندہ بتایا ہے۔ اور آزمائش میں آپ علیہ السلام نے ایک ایسے صابر اور شاکر شخص کی سیرت پیش کی ہے جس میں ہر نیک اور اچھے انسان کے لئے نمونہ ہے۔ اس کے الٹ بائیبل میں آپ علیہ السلام کو ایک ایسا انسان بتایا گیا ہے جس میں آپ علیہ السلام کی شان میں گستاخیاں کی گئی ہیں۔ مولانا سید ابو اعلیٰ مودودی لکھتے ہیں۔ اس قصے میں قرآن مجید حضرت ایوب علیہ السلام کو اس شان سے پیش کرتا ہے کہ آپ علیہ السلام صبر کی تصویر نظر آتے ہیں۔ اور پھر کہتا ہے کہ ان کی زندگی نیک لوگوں اور عبادت گزاروں کے لئے نمونہ ہے۔ لیکن دوسری طرف بائیبل ی سفرِ ایوب پڑھیئے تو وہاں آپ کو ایک ایسے شخص کی تصویر نظر آئے گی جو ( نعوذ باللہ ) اللہ تعالیٰ کے خلاف مجسم شکایت اور عیسائیوں یعنی نصاریٰ نے توریت اور انجیل ( ان کے مجموعہ کو بائیبل کہا جاتا ہے ) میں بہت سی ملاوٹ کر دی ہے۔ اور خاص طور سے انبیائے کرام علیہم السلام کی شان میں ایسی ایسی گستاخیاں کی ہیں کہ قلم اُن گستاخیوں کو لکھنے سے قاصر ہے۔ اور روح کانپ جاتی ہے۔

صبر اور شکر کرنے سے اللہ تعالیٰ اجر عطا فرماتا ہے

 اللہ تعالیٰ نے سورہ ص ٓ کی آیت نمبر43کے آخر میں فرمایا۔ کہ( ترجمہ )”ا س میں (حضرت ایوب علیہ السلام کے واقعہ میں) عقل مندوں کے لئے نصیحت ہے۔ “ اللہ تعالیٰ نے اس واقعہ میں بتایا کہ حضرت ایوب علیہ السلام نے کس طرح صبر اور شکر ادا کر کے ابلیس شیطان کے حربوں کو ناکام بنایا ہے۔ اور آزمائش پر پورے اترے ہیں۔ اسی طرح جب بھی اللہ تعالیٰ اپنے کسی بندے کا امتحان اور آزمائش لے گا اور وہ شخص حضرت ایوب علیہ السلام کی طرح اللہ کی رضا کے لئے صبر کرے گا اور اللہ تعالیٰ کا شکر ادا کرتا رہے گا اور ہر حال میں اللہ تعالیٰ پر بھروسہ رکھے گا تو بدلے میں اللہ تعالیٰ اس بندے سے بہت خوش ہوگا۔ اور اسے دنیا میں بھی عطا فرمائے گا اور آخرت میں بھی عطا فرمائے گا۔ اسی لئے ہر عقل مند شخص اس واقعہ سے نصیحت حاصل کرے گا۔ اور بے وقوف قصہ کہانی سمجھ کر پڑھے گا اور گزر جائے گا۔

اگلی کتاب

قارئین کرام ، حضرت ایوب علیہ السلام کا ذکر مکمل ہوا

اب انشاءاللہ آپ کی خدمت میں حضرت شعیب علیہ السلام کے حالات پیش کریں گے۔

  ٭........٭........٭