سلطنت امیہ56
تحریر : شفیق احمد ابن عبداللطیف آئمی
قسط نمبر 56
ا103 ھجری : سعید خذینہ کی معزولی، خراسان کے نئے گورنر کا خوف، اہل سغد ‘‘درۂ عصام’’ میں آباد، 103 ھجری کا اختتام، 103 ھجری میں انتقال کرنے والے اعیان، اہل سغد پر حملہ، اہل سغد کا قتل عام، سیدہ فاطمہ بنت حضرت حسین بن علی رضی اﷲ عنہا کی فریاد، عبدالواحد بن عبداﷲبن بشر نضری مدینۂ منورہ کا گورنر، عبدالرحمن بن ضحاک کا انجام، سلطنت ِ عباسیہ کے پہلے حکمراں کی پیدائش، 104 ھجری کا اختتام، 104 ھجری میں انتقال کرنے والے اعیان، 105 ھجری : رومیوں اور ترکوں سے جہاد، یزید بن عبدالملک کا انتقال،
ا103 ھجری : سعید خذینہ کی معزولی
مسلمہ بن عبدالملک نے سعیدخذینہ کو خراسان کا گورنر بنایا تھا لیکن جب اُس کی جگہ ملک عراق اور خراسان کا گورنر عمرو بن ہبیرہ بنا تو اُس نے سعید خذینہ کو معزول کر کے اپنا گورنر مقرر کیا ۔ علامہ محمد بن جریر طبری لکھتے ہیں : اِس سال 103 ھجری میں عمرو بن ہبیر ہ نے سعید خذینہ کو خراسان کی گورنری سے معزول کر دیا اور اُس کی جگہ سعید بن عمرو بن اسود بن مالک بن کعب حرشی کو خراسان کا گورنر مقرر کیا ۔ سعید خذینہ کو پنی برطرفی کی اطلاع اُس وقت ملی جب وہ سمر قند کے دروازے پر جہاد میں مصروف تھا ۔ برطرفی کے بعد وہ واپس پلٹ آیا اور ایک ہزار شہسوار سمرقند میں چھوڑ دیئے ۔سعید خذینہ نے صوبہ خراسان میں جن علاقوں پر اپنے گورنر مقرر کر رکھے تھے انہیں سعید بن عمرو حرشی نے معزول نہیں کیا بلکہ سب کو گورنری پر برقرار رکھا ۔
خراسان کے نئے گورنر کا خوف
سعید بن عمرو حرشی جب خراسان کا گورنر بن کر آیا تو اُس وقت پچھلا گورنر سمرقند کے دروازے پر اہل فرغانہ اور ترکوں سے جنگ کر رہا تھا ۔ علامہ محمد بن جریر طبری لکھتے ہیں : جب عمرو بن ہبیرہ ملک عراق کا گورنر بنا تو اُس نے یزید بن عبدالملک کو اُن لوگوں کے نام لکھ کر بھیجے جنہوں نے یزید بن مہلب کے خلاف ‘‘جنگ عقر’’ میں شجاعت اور جوانمردی کا مظاہرہ کیا تھا ۔ خط پڑھ کر یزید بن عبدالملک نے کہا: ‘‘ عمر بن ہبیرہ نے سعید بن عمرو حرشی کا ذکر کیوں نہیں کیا ؟’’ پھر اُسے لکھا: ‘‘ سعید بن عمرو حرشی کو خراسان کا گورنر مقرر کر دو۔’’ اُس نے سعید بن عمرو حرشی کو گورنر کی سند دیکر خراسان روانہ کیا ۔ جب سعید بن عمرو حرشی خراسان آیا تو اُس وقت مسلمان دشمن کے مقابلہ پر تھے اور انہیں دشمنوں کے مقابلہ میں ناکامی کا منہ دیکھنا پڑا تھا ۔ سعید بن عمرو حرشی نے اُن کے سامنے تقریر کی اور جہاد پر اُبھارا اور کہا: ‘‘ تم اسلام کے دشمنوں سے تعداد اور سامان جنگ کی وجہ سے نہیں فتح حاصل کرتے ہو بلکہ اﷲ کی مدد اور اسلام کی عزت کی وجہ سے تمہیں فتح حاصل ہوتی ہے ۔اِس لئے لا حول ولا قوۃ الاباﷲصرف اﷲ ہی کو طاقت اور قوت حاصل ہے ۔’’ اِس کے بعد اُس نے حملہ کیا تو دشمنوں کو شکست ہوئی ۔ اہل سغد اپنے شہروں کو چھوڑ کر فرغانہ چلے گئے اور وہاں کے بادشاہ سے مسلمانوں کے مقابلہ میں امداد کے طالب ہوئے ۔ اہل سغد نے سعید خذینہ کے خلاف جنگوں میں ترکوں کی امداد کی تھی ۔ اِسی لئے سعید بن عمرو حرشی کے خلاف انہیں اپنی جانوں کا خوف ہوا اور اُن کے سرداروں نے اپنے ملک سے چلے جانے کا ارادہ کر لیا ۔ مگر اُن کے بادشاہ نے کہا: ‘‘ ایسا نہ کرو! یہیں رہو اور پچھلے سال کا خراج لیکر خراسان کے نئے گورنر کے پاس جاؤ اور اگلے سالوں کے خراج کی ضمانت دے دو اور وعدہ کرو کہ زمینوں کو آباد کریں گے اور اگر وہ چاہے تو ہم اُس کے ساتھ جہاد میں شریک ہوں گے ۔ اپنے گذشتہ طرز عمل کی معذرت کرو اور اپنے یرغمال اُس کے حوالے کر دو۔’’
اہل سغد ‘‘درۂ عصام’’ میں آباد
اہل سغد کو بادشاہ نے جو مشورہ دیا اُسے انہوں نے قبول نہیں کیا اور فرغانہ کے بادشاہ سے امداد طلب کی ۔ علامہ محمد بن جریر طبری لکھتے ہیں : مگر رعایا نے کہا: ‘‘ ہمیں ڈر ہے کہ وہ خوش نہیں ہوگا اور نہ ہی ہماری بات کو قبول کرے گا ۔ ہم خجندہ چلے جاتے ہیں اور اُس کے بادشاہ کے پاس پناہ لیں گے ۔ ’’ بادشاہ نے کہا: ‘‘ میں بھی تم میں سے ہی ہوں اور جو مشورہ میں نے تمہیں دیا تھا وہ تمہاری بھلائی کے لئے دیا تھا ۔’’ مگر انہوں نے بادشاہ کا کہنا نہیں مانا اور خجندہ کی طرف چلے ۔ کاعزنج ، کشین ، بمیارکث اور ثابت باشندگان ِ اشتخن کو لے کر نکلے اور فرغانہ کے بادشاہ ‘‘طاؤ’’ کو لکھا کہ آپ ہماری حفاظت کریں اور ہمیں اپنے شہروں میں رہنے کی جگہ دیں ۔ اُس کی والدہ نے کہا: ‘‘ اِس شیطانوں کو اپنے دارالسلنطت میں نہیں رہنے دینا بلکہ اِن کے لئے کوئی قصبہ خالی کرادو جہاں یہ لوگ رہیں۔’’ بادشاہ نے اُن کو کہلا بھیجا: ‘‘ کسی قصبہ کو تم بتاؤ ! میں اُسے تمہارے لئے خالی کرا دیتا ہوں اور اِس کے لئے مجھے چالیس دن کی مہلت دواور اگر تم چاہو تو میں ‘‘درہ ٔعصام’’ (عصام بن عبداﷲ باہلی کو قتیبہ بن مسلم نے اس درے کا گورنر بنایا تھا ) کو تمہارے لئے خالی کرادو۔’’ اُن لوگوں نے فرغانہ کے بادشاہ کی اِس تجویز کو پسند کیا اور کہا: ‘‘ ٹھیک ہے! آپ ‘‘درۂ عصام’’ کو ہمارے لئے خالی کرادیں۔’’فرغانہ کے اُس وقت کے بادشاہ کا نا م‘‘بلا د،یا ، بیلاذ ، ابوانوجور’’ تھا اور اُس کے ولی عہد کا نام ‘‘رستاق’’ تھا۔
ا103 ھجری کا اختتام
اِس سال کے اختتام تک مملکت اسلامیہ کے کئی گورنر تبدیل ہو چکے تھے ۔ خراسان کا گورنر سعید بن عمرو حرشی تھا ۔ ملک عراق و ایران اور تمام مشرقی ممالک کا گورنر اور ناظم ِ اعلیٰ عمروہ بن ہبیرہ تھا ۔ افریقہ کا گورنر محمد بن یزید انصار تھا ۔قاسم بن عبدالرحمن کوفہ کے قاضی تھے اور عبدالملک بن یعلی بصرہ کے قاضی تھے ۔عبدالرحمن بن عبداﷲ نضری طائف کا گورنر تھا ۔اِس سال یزید بن عبدالملک نے مکۂ مکرمہ کے گورنرعبدالعزیز بن عبداﷲ کو معزول کر دیا اور عبدالرحمن بن ضحاک کو مدینۂ منورہ کے ساتھ ساتھ مکۂ مکرمہ کا بھی گورنر بنا دیا اور اُسی نے مسلمانوں کو اِس سال حج کرایا۔
ا103 ھجری میں انتقال کرنے والے اعیان
اِس سال جن کا انتقال ہوا اُن میں سے کچھ کے نام یہ ہیں۔علامہ عماد الدین ابن کثیر لکھتے ہیں : اِس سال 103 ھجری میں یزید بن مسلم کا انتقال ہوا ۔ یہ جلیل القدر تابعی ہیں اور کئی صحابۂ کرام رضی اﷲ عنہم سے روایات بیان کی ہیں ۔ متعدد آئمہ نے ان کے ثقہ ہونے کی تصدیق کی ہے ۔ اسکندریہ میں انتقال ہوا۔ اِس سال مجاہد بن جبیر مکی کا انتقال ہوا ۔ یہ اپنے زمانے میں تفسیر کے سب سے زیادہ ماہر عالم مانے جاتے تھے ۔ اُس دورمیں امام طاؤس کے علاوہ کوئی ان کے پایہ کا نہیں تھا ۔امام مجاہد نے حضرت عبداﷲ بن عباس رضی اﷲ عنہ سے تفسیر کا علم حاصل کیا ہے ۔ آپ حضرت عبداﷲ بن عباس رضی اﷲ عنہ کے سب سے بہترین شاگردوں میں سے ہیں اور اُن کو دو مرتبہ قرآن پاک ایک ایک آیت کو پڑھ کر سمجھا اور یاد کیا اور سنایا ہے اور اس کے متعلق سوالات بھی کئے ہیں ۔ امام مجاہد نے حضرت عبداﷲ بن عُمر فاروق ، حضرت عبداﷲ بن عباس ، حضرت ابو ہریرہ ، حضرت ابو سعید خدری رضی اﷲ عنہم سے روایات بیان کی ہیں ۔ اِس سال مصعب بن سعد بن ابی وقاص کا انتقال ہوا ۔ یہ جلیل القدر تابعی ہیں ۔
اہل سغد پر حملہ
اِس سال سعید بن عمرو حرشی نے اہل سغد پر حملہ کیا ۔علامہ محمد بن جریر طبری لکھتے ہیں : 104 ھجری میں سعید بن عمرو حرشی جہاد کے لئے روانہ ہوا اور دریا کو عبور کر کے اپنی فوج کا باقاعدہ معائنہ کر رہا تھا کہ فرغانہ کا بادشاہ کا چچیرا بھائی نیلان اُس کے پاس آیا اور کہا: ‘‘ اہل سغد خجندہ میں فروکش ہیں ۔اِس سے پہلے کہ وہ ‘‘درہٌ عصام’’ میں داخل ہوں آپ اُن پر حملہ کر دیں کیونکہ ا’س وقت ہم پر اُن کی حفاظت کی ذمہ داری نہیں ہے ہاں اگر وہ ‘‘درہ ٔعصام’’ میں داخل ہو گئے تو ہماری ذمہ داری میں آجائیں گے ۔’’سعید بن عمرو حرشی نے نیلان کے ساتھ عبدالرحمن قشیری اور اُس کے بیٹے زیدہ بن عبدالرحمن قشیری کو ‘‘مقدمۃ الجیش’’ کا کمانڈر بنا کر روانہ کیا اور اپنی فوج لیکر اُن کے پیچھے روانہ ہوا۔ اُس نے اشرونہ میں قیام کیا اور وہاں کے باشندوں نے خراج پر صلح کرلی ۔ اِس کے بعد روانہ ہوا تو تیسرے دن اپنے ‘‘مقدمۃ الجیش’’ سے جا ملا ۔ اِس کے بعد سعید بن عمرو حرشی نے خجندہ کا محاصرہ کر لیا ۔ محاصرہ کافی دن چلا ۔ایک دن ایک عرب نے خجندہ کے پھاٹک کو گرز کی ضربوں سے توڑ کر کھول دیا۔ اہل خجندہ نے یہ ترکیب کی تھی کہ شہر کے اگلے دروازے کے نیچے چھتہ میں ایک خندق کھود کر اسے سر کنڈوں سے پاٹ کر اس پر مٹی بچھا دی تھی تاکہ اگر انہیں شکست ہو تو وہ معلوم دروازے سے پسپا ہو کر شہر کے اندر چلے جائیں گے اور مسلمان لا علمی میں اس خندق میں گر پڑیں گے مگر یہ تدبیر انہی پر اُلٹی پڑ گئی۔ جب اُس عرب نے شہر کے دروازے کو توڑا تو اہل خجندہ اور اہل سغد نے شہر سے نکل کر مسلمانوں کا مقابلہ کیا اور جب شکست کھا کر پسپا ہوئے تو راستہ بھول گئے اور اُسی خندق میں گرنے لگے ۔ خندق گرنے والوں میں سے چالیس آدمی ایسے نکالے گئے جنہوں نے دو دو زرہیں پہن رکھی تھیں ۔ اہل سغد نے فرغانہ کے بادشاہ کے پاس پیغام بھیجا کہ تم نے ہمارے ساتھ دھوکہ کیا ہے اب ہماری مدد کرو ۔ فرغانہ کے بادشاہ نے کہا: ‘‘ چالیس دن کی مدت سے پہلے مسلمانوں نے تم پر حملہ کر دیا ہے اِس لئے تم خود اپنی حفاظت کرو۔ ’’ جب اُس کی امداد سے مایوس ہو گئے تو سعید
بن عمرو حرشی سے امان کی درخواست کی اور ساتھ ہی یہ بھی کہا کہ ہمیں سغد واپس بھیج دیا جائے ۔
اہل سغد کا قتل عام
سعید بن عمرو حرشی نے اہل سغد کی کی درخواست قبول کر لی لیکن انہوں نے بدعہدی کی جس کے نتیجہ میں مسلمانوں نے اُن کا قتل عام کر دیا ۔ علامہ محمد بن جریر طبری لکھتے ہیں: سعید بن عمرو نے اِس شرط پر اُنہیں امان دی کہ وہ عربوں کے عورتوں اور بچوں کو واپس کردیں گے اور وہ تمام خراج جو انہوں نے ادا نہیں کیا وہ بھی ادا کریں اور کسی مسلمان پر دھوکہ سے حملہ نہیں کریں گے اور اہل سغد میں سے کوئی بھی شخص خجند میں نہیں رہے گا ۔ اگر اِن میں سے کوئی بھی بات اہل سغد کی طرف سے معاہدے کے خالف ہو گی تو مسلمانوں پر اہل سغد کا خون حلال ہو جائے گا ۔ صلح ہوجانے کے بعد مسلمانوں نے اہل سغد کو اُن کے محفوظ مقام تک پہنچانے کے لئے ایک سو پچاس مجاہدین کی نگرانی میں روانہ کر دیا ۔ راستے میں اہل سغد نے اُن سب کو شہید کر دیا اور اُن مسلمانوں میں سے ایک غلام جیسے تیسے جان بچا کر بھاگا آیا اور مسلمانوں کی شہادت کی اطلاع دی ۔ اِس کے بعد سعید بن عمرو حرشی نے اہل سغد کے قتل عام کا حکم دے دیا ۔ مسلمانوں نے تمام جنگجو مردوں کو قتل کردیا جن کی تعداد لگ بھگ تین ہزار تھی ۔ مسلمانوں کو مال غنیمت ملا اُس کا خمس نکال کر باقی مسلمانوں میں تقسیم کر دیا اور خمس یزید بن عبدالملک کے پاس بھیج دیا اور ساتھ ہی تمام حلات بھی لکھ کر بھیج دیئے ۔
سیدہ فاطمہ بنت حضرت حسین بن علی رضی اﷲ عنہا کی فریاد
اِس سال مدینہ منورہ کے گورنر عبدالرحمن بن ضحاک نے ‘‘اہل بیت’’ پر ظلم کیا جس کی فریاد سیدہ فاطمہ بنت حضرت حسین بن علی رضی اﷲ عنہا نے امیر المومنین یزید بن عبدالملک کے دربار میں کی۔ علامہ محمد بن جریر طبری لکھتے ہیں : عبدالرحمن بن ضحاک نے حضرت امام حسین بن علی رضی اﷲ عنہ کی بیٹی سیدہ فاطمہ بن حسین رضی اﷲ عنہا کو نکاح کا پیغام دیا جو آپ نے قبول نہیں کیا اور انکار کر دیا۔ مگر عبدالرحمن بن ضحاک مسلسل اصرار کرتا رہا اور آپ رضی اﷲ عنہا کو یہ دھمکی دی : ‘‘ اگر تم مجھ سے نکاح نہیں کرو گی تو میں تمہارے بڑے بیٹے کو شراب نوشی کے الزام میں کوڑے لگواؤں گا ۔’’ اُسی دوران مدینۂ منورہ کا میر منشی ایک شامی ابن ہرمز کو امیر المومنین یزید بن عبدالملک نے لکھا: ‘‘ میرے پاس آکر حساب پیش کرو ۔’’ ابن ہرمز جب ملک شام جانے لگا تو سیدہ فاطمہ بنت امام حسین رضی اﷲ عنہا سے ملنے آیا اور بولا: ‘‘ اگر کوئی ضرورت ہو تو فرمایئے۔’’ آپ رضی اﷲ عنہا نے فرمایا: ‘‘ عبدالرحمن بن ضحاک کی حرکت کے بارے میں امیر المومنین کو بتا دینا۔’’ اِس کے بعد آپ رضی اﷲ عنہا نے ایک خط میں تمام واقعہ لکھ کر ایک قاصد کو دیا اور فرمایا: ‘‘ امیرالمومنین کو یہ خط دے دینا۔’’ اتفاق سے ابن ہرمز اور قاصد آگے پیچھے ملک شام میں دربار میں پہنچے ۔ ابن ہرمز جب دربار میں یزید بن عبدالملک کے سامنے گیا تو اُس نے کہا: ‘‘ مدینۂ منورہ میْں کوئی عجیب واقعہ تو پیش نہیں آیا ہے نا؟’’ ابن ہرمز نے کہا: ‘‘ نہیں کوئی عجیب واقعہ پیش نہیں آیا ہے ۔’’ اتنے میں دربان نے بلند آواز سے سیدہ فاطمہ بنت امام حسین رضی اﷲ عنہا کے قاصد کے آنے کیا اطلاع دی تو یزید بن عبدالملک نے دربار میں حاضر ہونے کا حکم دیا ۔ اب ابن ہرمز نے کہا :‘‘ امیرالمومنین جس روز میں مدینۂ منورہ سے روانہ ہوا تھا تو سیدہ فاطمہ بنت امام حسین رضی اﷲ عنہا نے مجھے یہ پیغام دیا تھا ۔ ’’ یزید بن عبدالملک نے کہا: ‘‘ اﷲ تمہارا برا کرے! میں نے تم سے سوال نہیں کیا تھا کہ کوئی عجبیب خبر ہو تو بتاؤ مگر تم نے بیان نہیں کی ۔’’ ابن ہرمز نے کہا: ‘‘ امیرالمومنین! میں بھول گیا تھا ۔’’
عبدالواحد بن عبداﷲبن بشر نضری مدینۂ منورہ کا گورنر
سیدہ فاطمہ بنت امام حسین رضی اﷲ عنہا کے قاصد نے آپ رضی اﷲ عنہا کا خط یزید بن عبدالملک کو دیا ۔ علامہ محمد بن جریر طبری لکھتے ہیں : یزید بن عبدالملک تخت سے اُتر آیا اور قاصد کو اندر آنے کی اجازت دی اور اُس نے سیدہ فاطمہ بنت امام حسین رضی اﷲ عنہا کا خط یزید بن عبدالملک کو دیا ۔ اُس نے خط لیا اور خود پڑھنے لگا ۔ اُس وقت اُس کے
ہاتھ میں ایک بید تھا اسے زمین پر مارتا جاتا تھا اور کہتا جاتاتھا :‘‘ اﷲ اکبر! ابن ضحاک کی یہ جرأت۔کیا کوئی ایسا شخص ہے جو ابن ضحاک کو ایسی سخت سزا دے کہ اُس کے چیخنے کی آواز میں اپنے بستر پر لیٹا ہوا سن لوں ۔’’ درباریوں نے عبدالواحد بن عبداﷲ بن بشر نضری کا نام لیا ۔ یزید بن عبدالملک نے کاغذ منگوایا اور اپنے ہاتھ سے عبدالواح بن عبداﷲ کو لکھا جو اس وقت طائف میں تھا :‘‘ السلام علیکم! امابعد! میں نے تمہیں مدینۂ منورہ کا گورنر مقرر کر دیا ہے ۔ جس وقت تمہیں میرا خط ملے تم اُسی وقت عبدالرحمن بن ضحاک کو معزول کردو اور چالیس ہزار دینار اُس پر جرمانہ عائد کرو اور اُسے ایسی سخت تکلیف اور سزا دو کہ میں بستر پر لیٹا ہوا اُس کی آواز سنوں۔’’ قاصد یہ خط لیکر مدینۂ منورہ آیا اور عبدالرحمن بن ضحاک کے پاس نہیں گیا مگر ابن ضحاک کے دل میں خطرہ پیدا ہوگیا تھا ۔اُس نے قاصد کو بلوایا اور اپنی مسند کا ایک کونہ ہٹا کر بتایا تو وہاں ایک ہزار دینار رکھے ہوئے تھے ۔عبدالرحمن بن ضحاک نے کہا: ‘‘ اگر تم وہ بات جانتے ہو جس کے لئے بھیجے گئے ہو تو میں تمہیں ایک ہزار دینار دوں گا اور اِس کا کسی سے ذکر نہیں کروں گا۔’’ قاصد نے وہ بات اُسے بتا دی ۔ عبدالرحمن بن ضحاک نے اُسے تین دن اپنے پاس ٹھہرایا پھر اُسے مدینۂ منورہ سے باہر بھیج دیا ۔
عبدالرحمن بن ضحاک کا انجام
قاصد سے اصل بات اُگلوا لینے کے بعد عبدالرحمن بن ضحاک اپنے بچاؤ کی فکر میں لگ گیا لیکن اُس نے ‘‘آل رسول’’ کی شان میں جو گستاخی کی تھی اﷲ تعالیٰ نے اُسے اُس کی سزا دی ۔ علامہ محمد بن جریر طبری لکھتے ہیں : عبدالرحمن بن ضحاک مدینۂ منورہ سے روانہ ہوا اور تیز رفتاری سے منزلیں طے کرتا ہوا مسلمہ بن عبدالملک کے پاس پہنچا۱ اور اُس سے کہا: ‘‘ میں آپ کی حمایت میں ہوں اور آپ میری مدد کیجیئے۔’’ مسلمہ بن عبدالملک دوسرے دن یزید بن عبدالملک کے پاس گیا اور اِدھر اُدھر کی میٹھی باتیں کرنے کے بعد عرض پرداز ہوا :‘‘ میں ایک غرض لیکر حاضر ہوا ہوں ۔’’ یزید بن عبدالملک نے کہا: ‘‘ عبدالرحمن بن ضحاک کے علاوہ تمہاری ہر درخواست مجھے منظور ہے ۔’’ مسلمہ بن عبدالملک نے کہا: ‘‘ مجھے اُسی کے بارے میں عرض کرنا ہے ۔’’ یزید بن عبدالملک نے کہا: ‘‘ اُس نے آل رسول کی شان میں گستاخی کر کے ایسی نا شائستہ حرکت کی ہے کہ میں اُسے کبھی معاف نہیں کر سکتا۔ ’’ یزید بن عبدالملک نے عبدالرحمن بن ضحاک کو سپاہیوں کی نگرانی میں مدینۂ منورہ بھیج دیا ۔ عبداﷲ بن محمد کہتے ہیں :‘‘ میں نے عبدالرحمن بن ضحاک کو مدینۂ منورہ میں ایسی حالت میں دیکھا کہ پشمینہ کا جبہ پہنے وہ لوگوں سے بھیک مانگتا پھرتا تھا ۔عبدالواحد بن عبداﷲ بن بشر نضری نے اُس پر طرح طرح کی سختیاں کی تھیں اور اُس کا بہت ہی برا حال ہوگیا تھا۔’’
سلطنت ِ عباسیہ کے پہلے حکمراں کی پیدائش
ا104 ھجری میں ‘‘خاندان ِ بنو عباس’’ میں وہ شخص پیدا ہوا جو ‘‘سلطنت ِ عباسیہ’’ کا پہلا حکمراں بنا ۔ علامہ عماد الدین ابن کثیر لکھتے ہیں : اِس سال ۱۰۴ ھجری میں ‘‘سفاح’’ پیدا ہوا جو بنو عباس کا پہلا حکمراں بنا۔ علامہ محمد بن جریر طبری لکھتے ہیں : اِس سال ‘‘ابوالعباس عبداﷲ بن محمد بن علی ’’ پیدا ہوا ۔ ( جس کا لقب ‘‘سفاح’’ تھا)اِس سال ابومحمد صادق اور اُس کے چندخراسان کے دوست محمد بن علی کے پاس آئے اور ابوالعباس اِس ملاقات سے چند روز پہلے پیدا ہو چکا تھا ۔ محمد بن علی ایک خرقہ میں ابوالعباس کو اُن کے پاس لایا اور کہا: ‘‘ اﷲ کی قسم! اِس کام کو یہ لڑکا پورا کرے گا یہاں تک کہ تم اپنے دشمنوں سے بدلہ لے لو گے ۔’’
ا104 ھجری کا اختتام
ا104 ھجری کا اختتام ہوا اور اِس سال بھی کئی گورنر تبدیل ہوئے ۔ علامہ محمد بن جریر طبری لکھتے ہیں: اِس سال آذربائیجان اور آرمینیہ کے گورنرجراح بن عبد حکمی نے ترکوں سے جہاد کیا اور قلعہ بلنجر کو فتح کیا اور ترکوں کو شکست دی اور اُن کے متعلقین کو پانی میں غرق کر دیا ۔ بہت سے لونڈی اور غلام قید کئے اور وہ قلعے بھی جو بلنجر کے قریب تھے اُس نے فتح کر لئے اور اُن کے باشندوں کو جلا وطن کر دیا ۔ اِس سال عمرو بن ہبیرہ نے سعید بن عمرو حرشی کو خراسان کی گورنری سے معزول کردیا اور اُس کی جگہ مسلم بن سعید بن اسلم بن زرعۃ کلابی کو گورنر بنایا ۔ اِس سال کے اختتام پرعمرو بن ہبیرہ ملک عراق و ایران اور تمام مشرقی ممالک کا گورنر تھا ۔ بصرہ کے قاضی عبدالملک بن یعلیٰ تھے اور کوفہ کے قاضی حسین بن حسن کندی تھے ۔ مکۂ مکرمہ ، مدینۂ منورہ اور طائف کا گورنر عبدالواحد بن عبداﷲ نضری تھا اور اُسی نے مسلمانوں کو حج کرایا۔
ا104 ھجری میں انتقال کرنے والے اعیان
ا104 ھجری میں جن کا انتقال ہوا اُن میں سے چند حضرات یہ ہیں ۔ علامہ عمادالدین ابن کثیر لکھتے ہیں : اِس سال 104 ھجری میں خالد بن سعدان کلاعی کا انتقال ہوا ۔ یہ جلیل القدر تابعی ہیں اور چند مشہور علماء اور آئمہ میں شمار ہوتے تھے ۔ آپ نے بہت سے صحابۂ کرام رضی اﷲ عنہم سے روایات بیان کی ہیں ۔ جب یہ روزہ رکھتے تھے تو اُس دن چالیس ہزار تسبیح پڑھتے تھے۔ یہ اہل حمص کے امام تھے اور ماہ رمضان میں تراویح پڑھاتے تھے تو ایک دن میں تہائی قرآن ختم کر لیتے تھے ۔ اِس سال عامر بن سعد بن ابی وقاص کا انتقال ہوا ۔ یہ جلیل القدرصحابی رضی اﷲ عنہ کے بیٹے ہیں اور جلیل القدر تابعی ہیں اور ثقہ ہیں۔ اِس سال عامر بن شراحیل شعبی کا انتقال ہوا۔اِن کی کنیت ابوعمرو ہے ۔یہ اہل کوفہ کی شناخت و علامت تھے اور اپنے زمانے کے امام ، حافظ اور صاحب ِ فنون بزرگ تھے ۔انہوں نے بہت سے صحابۂ کرام رضی اﷲ عنہم سے روایات بیان کی ہیں۔ابو مجاوز نے کہا: ‘‘ میں نے امام شعبی سے بڑا فقیہ نہیں دیکھا ۔ یہ کوفہ میں قاضی رہ چکے ہیں۔ اِس سال ابوبردہ بن ابوموسیٰ اشعری کا انتقال ہوا ۔ یہ امام شعبی سے بھی سے بھی پہلے کوفہ کے قاضی کے عہدہ مامور رہ چکے ہیں۔ امام شعبی کو تو حضرت عُمر بن عبدالعزیز رحمتہ اﷲ علیہ نے انے دور ِ حکومت میں قاضی کے عہدہ پر مامور کیا تھا جبکہ امام ابوبردہ ابوموسیٰ اشعری حجاج بن یوسف کی گورنری کے دور میں قاضی رہ چکے تھے ۔ یہ بہت بڑے عالم ، حافظ اور فقیہ تھے اور اِن سے بہت سی روایات مشہور ہیں۔اِس سال ابو قلادہ جرمی کا انتقال ہوا ۔ اِن کا نام عبداﷲ بن یزید بصری ہے ۔ان سے کثیر روایات مروی ہیں اور صحابۂ مرام رضی اﷲ عنہم کے علاوہ بہت سے تابعین نے بھی اِن سے روایات بیان کی ہیں۔ یہ کبار آئمہ اور فقہا میں سے تھے ۔
ا105 ھجری : رومیوں اور ترکوں سے جہاد
اِس سال مسلمانوں نے رومیوں اور ترکوں سے جہاد کیا ۔ علامہ محمد بن جریر طبری لکھتے ہیں : اِس سال 105 ھجری میں جراح بن عبداﷲ حکمی نے لان میں جہاد کیا اور اس سے بھی آگے بڑھ کر اُن شہروں اور قلعوں کو فتح کیا جو ‘‘ماورالنہر’’ میں واقع تھے ۔ اِن میں سے بعض کو اُس نے فتح کرلیا اور وہاں کے باشندوں کو جلا وطن کردیا اور بہت سا مال غنیمت حاصل کیا ۔ اِس سال سعید بن عبدالملک نے رومیوں کے علاقے میں جہاد کیا اور ایک ہزار سپاہیوں کی فوج بھیجی جو سب کے سب دشمن کے ہاتھوں مارے گئے ۔ اِس سال مسلم بن سعید نے ترکوں سے جہاد کیا مگر کوئی فتح حاصل نہیں کرسکا ۔ اِس کے بعد سغد کے ایک ‘‘فشینہ’’ پر حملہ کیا اور اُس کے بادشاہ نے صلح کر لی ۔ اِس کے بعد مسلم بن سعید اِس سال کے آخر میں پھر ترکوں سے جہاد کرنے گیا مگر بغیر کامیابی کے لوٹ آیا اور ترکوں نے مسلمانوں کا تعاقب کیا اور جب مسلمان دریائے بلخ عبور کر رہے تھے تو ترک فوجی پہنچ گئے ۔اُس وقت لشکر کے ‘‘ساقہ’’ پر بنو تمیم تھے ۔انہوں نے دشمنوں کی یلغار کو روکا اور مسلمانوں نے حفاظت سے دریا عبور کر لیا ۔ اِسی دوران میں مملکت اسلامیہ کے حکمراں یزید بن عبدالملک کا انتقال ہوگیا ۔ اُس وقت مسلم بن سعید شہر ‘‘افشین’’ کا محاصرہ کئے ہوئے تھا ۔افشین کے بادشاہ نے چھ ہزار راس پر صلح کر لی اور قلعہ مسلم بن سعید کے حوالے کردیا ۔ مسلم بن سعید اِس مہم سے فراغت پا کر 105 ھجری کے اختتام اپنے دارالحکومت ‘‘مرو’’ واپس آیا ۔
یزید بن عبدالملک کا انتقال
اِس سال مملکت اسلامیہ کے حکمراں یزید بن عبدالملک کا انتقال ہوگیا ۔ علامہ محمد بن جریر طبری لکھتے ہیں : اِس سال 105 ھجری میں یزید بن عبدالملک کا ماہ شعبان ختم ہونے میں ابھی پانچ راتیں باقی تھیں کہ انتقال ہو گیا ۔ امام واقدی کہتے ہیں کہ یزید بن عبدالملک کا انتقال اڑتیس (38) سال کی عُمر میں دمشق کے نواح ‘‘بلقاء’’ انتقال ہوا۔ بعض راویوں نے چالیس سال عُمر بیان کی اور بعض نے چھتیس سال بیان کی ہے ۔ امام ابی معشر ، ہشام بن محمد اور علی بن محمد کے مطابق یزید بن عبدالملک نے چار سال ایک مہینے حکومت کی ہے مگر امام واقدی کے مطابق چار سال حکومت کی ۔ اُس کے پندہ سالہ لڑکے ولید بن یزید نے نماز جنازہ پڑھائی ۔ اُس دن ہشام بن عبدالملک ‘‘حمص’’ میں تھا ۔ہشام بن محمد کے مطابق یزید بن عبدالملک کا انتقال تینتیس (33) کی عُمر میں ہوا۔
باقی ان شاءاللہ اگلی قسط میں.....!
.png)
