04 سیرت سید الانبیاء ﷺ Seerat un Nabi

04 سیرت سید الانبیاء ﷺ

بعثت سے پہلی ہجرت ِ حبشہ تک

تحریر:شفیق احمد ابن عبد اللطیف آئمی

بعثت کے وقت دنیا کے حالات، پہلی وحی کی کیفیت، اعلان نبوت، السابقون الاولون کا قبول اسلام، کافروں کا ظلم و ستم اور پہلی ہجرت حبشہ

بعثت کے وقت دنیا کے حالات

   رسول اللہ ﷺ  پر وحی نازل ہونے سے پہلے ابتداء میں رویائے صالحہ یعنی سچے خواب دکھائی دینے لگے۔ ان خوابوں کی وجہ سے آپ ﷺ غورو فکر کرنے لگے اور اس کے لئے غارِ حرا میں تنہائی اختیار فرمائی اور زیادہ وقت غارِ حرا میں تنہائی میں گزارنے لگے۔ یہاں تک کہ اللہ تعالیٰ نے جبرئیل علیہ السلام کو غارِ حرا میں حضور صلی اللہ علیہ وسلم کی خدمت میں بھیجا اور حضور صلی اللہ علیہ وسلم کو اس منصبِ نبوت اور رسالت سے سرفراز فرمایا۔ جس کا ذکر اللہ تعالیٰ ہزاروں برسوں سے اپنی آسمانی کتابوں میں کرتا رہا اور تمام انبیائے کرام کو حکم دیتا رہا کہ وہ اپنی اپنی امتوں کو حضور صلی اللہ علیہ وسلم کے بارے میں بتائیںکہ اگر وہ یعنی اُن کی اُمتیں اگر حضور صلی اللہ علیہ وسلم کا زمانہ پائیں تو انھیں نبی اور رسول تسلیم کریں۔ اُن پر ایمان لائیں اور ان کی مدد کریں۔ یہاں تک کہ اللہ تعالیٰ نے تمام انبیائے کرام کو بھی حکم دیا تھا کہ اگر تمہاری زندگی میں حضور صلی اللہ علیہ وسلم اعلانِ نبوت کردیں تو تم بھی ان کی اتباع کرنااور ان پر ایمان لانا اور ان کی مدد کرنا۔ جس وقت حضور صلی اللہ علیہ وسلم نے اعلان ِ نبوت کیا اس وقت کوئی نبی یا رسول موجود نہیں تھے ،لیکن اُن کی امُتیںموجود تھیں۔ یوں تو پوری دنیا میں جو امتیں تھیں وہ شرک و بت پرستی میں مبتلاء ہو چکی تھیں۔ لیکن دو امتیں ایسی تھیں جو اللہ تعالیٰ کی عبادت کرنے کا دعویٰ کرتی تھیں اور وہ یہود ( بنی اسرائیل) اور نصاریٰ ( عیسائی ) تھیں۔ انہیں’’ اہلِ کتاب‘‘ کہا جاتا تھا۔ ان لوگوں نے بھی اپنی اپنی آسمانی کتابوں میں ملاوٹ کر دی تھی۔ لیکن اس کے باوجود وہپوری طرح حق کو چھپا نہیں سکے تھے۔ چونکہ یہ دونوں امتیں اپنی اپنی کتا ب کے محفوظ ہونے کا دعویٰ کرتی تھیں۔ ( حالانکہ ان کی بھی اصل کتابیں محفوظ نہیں تھیں) اور حضور صلی اللہ علیہ وسلم کی آمد اور آپ صلی اللہ علیہ وسلم کے’’ اعلانِ نبوت ‘‘کی منتظر تھیں۔ اس لئے مختصراً کچھ واقعات پیش کرکے ہم حضور صلی اللہ علیہ وسلم پر وحی نازل ہونے کے بارے میں اور آپ صلی اللہ علیہ وسلم کے اعلان ِ نبوت کا تفصیلی ذکر کریں گے۔ انشاء اللہ

یہود( بنی اسرائیل ) رسول اللہ ﷺ  کے منتظر تھے

   محمد بن اسحاق فرماتے ہیں کہ احبار ( یہودیوں کے بڑے عالم) اور رحبان ( عیسائیوں کے بڑے عالم ) اہلِ کتاب میں سے ہیں، وہ حضور صلی اللہ علیہ وسلم کو خوب پہچانتے تھے۔ آپ صلی اللہ علیہ وسلم کی بعثت سے قبل آپ صلی اللہ علیہ وسلم کے بارے میں عرب کے اندر حضور صلی اللہ علیہ وسلم کا انتظار کر رہے تھے۔ کیوں کہ وہ حضور صلی اللہ علیہ وسلم کے اوصاف اپنی اپنی کتابوں میں تفصیل سے پاتے تھے۔ جو اللہ تعالیٰ نے بیان فرماے تھے اور حضور صلی اللہ علیہ وسلم کا نام اُن کی کتابوں میں محفوظ اور ثابت تھا ۔ ( لیکن حسد کی وجہ سے حضور صلی اللہ علیہ وسلم کے’’ اعلان نبوت ‘‘کے بعد انھوں نے اپنی کتابوں میں سے مٹا دیا تھا) اور ان لوگوں سے آپ صلی اللہ علیہ وسلم کے بارے میں ’’عہد و میثاق‘‘ لیا جا چکا تھا۔ ان کے انبیائے کرام کے عہد میں اور ان کی کتابوں میں اور حضور صلی اللہ علیہ وسلم کی اتباع ( نقل) اور ایمان لانے اور مدد کرنے کا ’’میثاق ‘‘لیا گیا تھااور اسی بنا پر وہ مشرکوں پر حضور صلی اللہ علیہ وسلم کے ذریعے غلبہ حاصل کر نا چاہتے تھے اور اسی کی دعا کرتے تھے۔ وہ لوگ مشرکین کو اس بات کی خبر دیا کرتے تھے کہ’’ ایک نبی ‘‘( صلی اللہ علیہ وسلم) مبعوث ہونے والے ہیں۔ ’’ دین ابراہیم‘‘ کے ساتھ مبعوث ہوں گے۔ اُن کا نام’’ احمد‘‘ ( صلی اللہ علیہ وسلم) ہوگا۔

رسول اللہ ﷺ  کی خبر انصار کو ایک یہودی نے دی

   مدینہ منورہ میں’’ انصار‘‘ رہتے تھے۔ ان کے دو بڑے قبیلے’’ اوس‘‘ اور’’ خزرج ‘‘نام کے تھے۔ قبیلہ اوس کی ایک شاخ یا خاندان کا بنو عبد الاشہل ہے۔ اس شاخ یا خاندان سے حضرت سلمہ بن سلامتہ بن دقش رضی اللہ عنہ ہیں۔ یہ بدری صحابی ہیں محمد بن اسحاق ، حضرت سلمہ بن سلامتہ رضی اللہ عنہ سے روایت کرتے ہیں کہ انھوں نے فرمایا:’’ ایک یہودی شخص ہمارا پڑوسی تھا، وہ اپنے گھر سے نکل کر ایک روز ہمارے پاس آیا۔ بنی عبدا لاشہل کے لوگ ( انصار) بیٹھے ہوئے تھے۔ ان میں سب سے کم عمر میں تھا اور اپنے گھر کے صحن میں لیٹا اُن کی باتیں سن رہا تھا۔ اُس شخص نے قیامت ، حساب ، میزان ، جنت اور دوزخ کا ذکر کیا۔ اس وقت انصار شرک میں مبتلا تھے اور مرنے کے بعد کی زندگی کے قائل نہیں تھے۔ انھوں نے حیرت سے پوچھا:’’ کیا ایسا ہوگا؟‘‘ اس یہودی نے کہا :’’ یقینا ہوگا اور دوزخ کی آگ اتنی شدید ہے کہ اس کے مقابلے میں تم دنیا کی آگ میں جلنا پسند کرو گے۔ ‘‘ بنو عبدالاشہل کے انصار نے پوچھا:’’ اس کی نشانی کیا ہے؟ ‘‘ اس یہودی نے مکہ مکرمہ اور یمن کی طرف ہاتھ اٹھا کر کہا کہ ان شہروں میں سے کسی ایک شہر سے’’ ایک نبی ‘‘( صلی اللہ علیہ وسلم ) اٹھایا جائے گا۔‘‘ انھوں نے پوچھا :’’ وہ نبی ( صلی اللہ علیہ وسلم )کب اٹھایا جائے گا؟‘‘ اس یہودی نے میری طرف دیکھا اور کہا:’’ ہو سکتا ہے یہ لڑکا’’ اُن آخری نبی‘‘ (صلی اللہ علیہ وسلم ) کا زمانہ پالے گا۔ ‘‘حضرت سلمہ بن سلامتہ رضی اللہ عنہ نے اس کے بعد فرمایا:’’ اللہ تعالیٰ نے حضور صلی اللہ علیہ وسلم کو مبعوث فرمایا اور انصار آپ صلی اللہ علیہ وسلم پر ایمان لائے۔ لیکن وہ یہودی شخص گھمنڈ اورحسد کی وجہ سے ایمان نہیں لایا۔ ہم نے اس سے کہا:’’ تجھ پر افسوس ہے کہ تو نے ہی ہمیں رسول اللہ صلی اللہ علیہ وسلم کے بارے میں بتایا اور اب تو خود ان کا انکار کر رہا ہے۔ ‘‘ اس نے کہا:’’ہاں میں نے ہی تمہیں بتایا تھا۔ لیکن یہ رسول ( صلی اللہ علیہ وسلم ) وہ نہیں ہیں۔‘‘

عیسائی ( نصرانی ) بھی رسول اللہ ﷺ  کے منتظر تھے

   اس سے پہلے ہم آپ صلی اللہ علیہ وسلم کے بچپن کے حالات میں بحیریٰ راہب کا ذکر کر چکے ہیں کہ وہ کس بے چینی سے حضور صلی اللہ علیہ وسلم کا منتظر تھا اور لگ بھگ جب آپ صلی اللہ علیہ وسلم کی عمر مبارک 12بارہ برس تھی تو اس نے خدمت کرنے کا شرف بھی حاصل کیا۔ اس کے بعد اعلان ِ نبوت سے پہلے کی آپ صلی اللہ علیہ وسلم کی مکی زندگی میں آپ نسطورا راہب کا واقعہ بھی پڑھ چکے ہیں۔ انجیل میں تو حضور صلی اللہ علیہ وسلم کا بہت تفصیل سے ذکر ہے۔ ہم یہاں قرآن پاک کی وہ آیت پیش کر رہے ہیں جس میں حضرت عیسیٰ علیہ السلا م نے اپنی امت کو حضور صلی اللہ علیہ وسلم کے بارے میں بشارت دی۔ ( ترجمہ) ’’اے بنی اسرائیل ! میں تمہاری طرف رسول بنا کر بھیجا گیا ہوں اور مجھ سے پہلے جو توریت نازل ہوئی ہے اس کی تصدیق کرنے والا ہوں اور تمہیں بشارت دیتا ہوں کہ میرے بعد ایک’’ عظیم الشان رسول ‘‘( صلی اللہ علیہ وسلم ) تشریف لائیں گے۔ جن کا نام’’ احمد‘‘ ہے۔ ( سورہ الصف آیت نمبر 61) اللہ تعالیٰ نے حضور صلی اللہ علیہ وسلم کے توریت اور انجیل میں اتنے زیادہ اوصاف بیان فرمائے ہیں کہ اگر انھیں تحریر کریں تو ایک بہت ضخیم کتاب بن جائے گی ۔ اس لئے ہم یہاں مختصر میں انجیل میں حضرت عیسیٰ علیہ السلام کا فرمان تحریر کر کے آگے بڑھ جائیں گے۔ انجیل میں حضرت عیسیٰ علیہ السلام نے فرمایا:’’پس کاش’’ منحمنا‘‘( محمد) آگئے ہوتے ،جن کو اللہ تعالیٰ تمہاری طرف بھیجے گااور وہ اللہ تعالیٰ کی طرف سے آئیں گے اور میری تصدیق کریں گے۔‘‘ یہاں ہم آپ کو بتا دیں کہ’’ منحمنا ‘‘سِریانی زبان کالفظ ہے۔ جس کا عربی معنی اور مفہوم ’’محمد‘‘ ہوتا ہے۔اسی طرح رومی زبان کا لفظ’’ پر قلیطس‘‘ یا ’’فار قلیط‘‘ ہے۔ جس کا معنی اور مفہوم عربی زبان میں ’’محمد‘‘ اور’’ احمد ‘‘ہے۔

رسول اللہ ﷺ  پر وحی کا نزول اور کیفیت

   امام ابو عبد اللہ محمد بن اسماعیل بخاری اپنی صحیح لکھتے ہیں۔ اُم المومنین سیدہ عائشہ صدیقہ رضی اللہ عنہا فرماتی ہیں کہ حضرت حارث بن ہشام رضی اللہ عنہ نے دریافت کیا:’’ یا رسول اللہ صلی اللہ علیہ وسلم ، آپ صلی اللہ علیہ وسلم پر وحی کس طرح نازل ہوتی ہے؟ ‘‘حضور صلی اللہ علیہ وسلم نے فرمایا:’’ کبھی تو گھنٹی کی آواز کی مانند ہوتی ہے اور یہ میری طبیعت پر بہت گراں ( بوجھ) محسوس ہوتی ہے۔ پھر میں وہ پیغام یاد کر لیتا ہوں تو یہ کیفیت ختم ہو جاتی ہے۔ کبھی فرشتہ ( جبرئیل علیہ السلام) انسان کی صورت میں آتے ہیں اور مجھ سے بات کرتے ہیں اور جو وہ کہتے ہیں میں اسے یاد کر لیتا ہوں۔ اس کے بعد ام المومنین سیدہ عائشہ صدیقہ رضی اللہ عنہا فرماتی ہیں ۔ میں نے کڑاکے کی سردیوں میں آپ صلی اللہ علیہ وسلم پر وحی نازل ہوتے دیکھی ہے۔ جب وحی ختم ہو جاتی تھی تو آپ صلی اللہ علیہ وسلم کی پیشانی مبارک سے پسینہ بہہ نکلتا تھا۔

رسول اللہ ﷺ  کی خدمت ِ اقدس میں جبرئیل علیہ السلام کا آنا

   اُم المومنین سیدہ عائشہ صدیقہ رضی اللہ عنہا فرماتی ہیں:’’ رسول اللہ صلی اللہ علیہ وسلم پر پہلے پہل جو وحی اترنا شروع ہوئی وہ اچھے خواب ہوتے تھے۔ حضور صلی اللہ علیہ وسلم جب بھی خواب دیکھتے تھے ۔ و ہ صبح کی روشنی کی طرح ظاہر ہو جاتا تھا۔ پھر آپ صلی اللہ علیہ وسلم خلوت ( تنہائی) پسند بنتے گئے اور غارِ حرا میں قیام کرنے لگے۔ وہاں کئی راتیں غور و فکر میں بسر کرتے ، جب کھانے پینے کا سامان ختم ہو جاتا تو گھر آکر لے لیتے تھے۔ ام المومنین سیدہ خدیجہ رضی اللہ عنہا تو شہ تیار کر دیتی تھیںاور آپ صلی اللہ علیہ وسلم پھر غارِ حرا میں تشریف لے جاتے ۔ غارِ حرا مکہ مکرمہ سے لگ بھگ تین میل کے فاصلے پر ہے۔ اسی جگہ حضور صلی اللہ علیہ وسلم پر پہلی وحی نازل ہوئی۔ آپ صلی اللہ علیہ وسلم غور و فکر کرتے بیٹھے تھے کہ فرشتہ ( جبرئیل علیہ السلام) آیا اور کہا کہ پڑھیئے۔‘‘

پہلی وحی ، سورہ علق کی ابتدائی آیتیں

رسول اللہ ﷺ غارِ حرا میں تشریف فرما تھے کہ اللہ تعالیٰ نے پہلی وحی نازل فرمائی۔ جبرئیل علیہ السلام آپ صلی اللہ علیہ وسلم کی خدمت میں حاضر ہوئے اور عرض کیا:’’ پڑھیئے۔ ‘‘ حضور صلی اللہ علیہ وسلم نے فرمایا:’’ میں پڑھا ہو ا نہیں ہوں۔ ‘‘ جبرئیل علیہ السلام نے آپ صلی اللہ علیہ وسلم کو گلے لگایا اور دبایا پھر چھوڑ کر کہا:’’ پڑھیئے ۔‘‘ آپ صلی اللہ علیہ وسلم نے دوبارہ فرمایا:’’ میں پڑھا ہوا نہیں ہوں۔‘‘ فرشتے نے دوبارہ گلے لگایا اور دبایا اور چھوڑ کر کہا:’’ پڑھیئے۔‘‘ حضور صلی اللہ علیہ وسلم نے پھر فرمایا:’’ میں پڑھا ہو ا نہیں ہوں۔ ‘‘تیسری مرتبہ جبرئیل علیہ السلام نے گلے لگا کر دبایا اور چھوڑ کر عرض کیا:’’ پڑھیئے اپنے رب کے نام سے ،جس نے انسان کو جمے ہوئے خون کے لوتھڑے سے پیدا کیا۔ پڑھیے اور آپ ( صلی اللہ علیہ وسلم ) کا رب بڑی عزتوں والا ہے۔‘‘ رسول اللہ صلی اللہ علیہ وسلم نے ان آیات کو دہرایا۔ اس کے بعد جبرئیل علیہ السلام چلے گئے۔

سیدہ خدیجہ رضی اللہ عنہا کی تسلّی

   رسول اللہ صلی اللہ علیہ وسلم فوراً غارِ حرا سے نکلے اور اپنے گھر تشریف لائے۔ حضور صلی اللہ علیہ وسلم کا دل بہت تیزی سے دھڑک رہا تھا۔ آپ صلی اللہ علیہ وسلم نے اُم المومنین سیدہ خدیجہ رضی اللہ عنہا سے فرمایا:’’ مجھے کمبل اڑھا دو۔‘‘ انھوں نے کمبل اُڑھادیا۔ آپ صلی اللہ علیہ وسلم کچھ دیر اسی حالت میں بیٹھے رہے۔ یہاں تک کہ دل کی دھڑکن معمول پر آگئی اور آپ صلی اللہ علیہ وسلم پر سکون ہو گئے ۔ تب رسول اللہ صلی اللہ علیہ وسلم نے سیدہ خدیجہ رضی اللہ عنہا کو سارا واقعہ سنایا اور فرمایا:’’ مجھے اپنی جان کا خطرہ لگتا ہے۔‘‘ ( در اصل حضور صلی اللہ علیہ وسلم کو یہ اندازہ ہو گیا تھا کہ اللہ تعالیٰ مجھ سے اتنا بڑا کام لینے والا ہے جس کو پورا کرنے میں آپ صلی اللہ علیہ وسلم کے اتنے دشمن پیدا ہوں گے کہ جان خطرے میں پڑ سکتی ہے۔ اسی لئے حضور صلی اللہ علیہ وسلم نے فرمایا اور سیدہ خدیجہ رضی اللہ عنہا نے جن الفاظ میں آپ صلی اللہ علیہ وسلم کو تسلی دی۔ اُن الفاظ سے ظاہر ہوتا ہے کہ انھیں بھی معاملے کی گہرائی کا اندازہ تھا) یہ سن کر سیدہ خدیجہ رضی اللہ عنہا نے فرمایا:’’ ہرگز نہیں! اللہ کی قسم !آپ صلی اللہ علیہ وسلم کو اللہ تعالیٰ کبھی رسوا نہیں کرے گا۔ آپ صلی اللہ علیہ وسلم تو صلہ رحمی کرنے والے ہیں، مہمان نوازی کرنے والے ہیں،راہِ حق میں مصیبتیں سہنے والے ہیں۔ ‘‘(صحیح بخاری جلد نمبر۱ کتاب الوحی حدیث نمبر ۳ ) یہ حدیث ابھی جاری ہے۔

ورقہ بن نوفل نے رسول اللہ ﷺ  کی تصدیق کی

   صحیح بخاری کی طویل حدیث جاری ہے۔ آگے اُم المومنین سیدہ عائشہ صدیقہ رضی اللہ عنہا فرماتی ہیں’’ پھر ام المومنین سیدہ خدیجہ رضی اللہ عنہا ، حضور صلی اللہ علیہ وسلم کو لے کر اپنے چچا زاد بھائی ورقہ بن نوفل کے پاس لے کر گئیں۔ یہ نصرانی ( عیسائی) ہو چکے تھے اور عبرانی زبان میں انجیل لکھتے تھے۔ ورقہ بہت بوڑھے ہو گئے تھے اور نابینا ( اندھے ) ہو چکے تھے۔ اُم المومنین سیدہ خدیجہ رضی اللہ عنہا نے اُن سے کہا:’’ اے میرے چچا زاد بھائی! اپنے بھتیجے محمد ( صلی اللہ علیہ وسلم ) کی بات سنو! انھوں نے حضور صلی اللہ علیہ وسلم سے دریافت کیا تو رسول اللہ صلی اللہ علیہ وسلم نے ( جبرئیل علیہ السلام سے ملاقات کا ) پورا واقعہ بیان فرما دیا۔ تمام واقعہ سننے کے بعد ورقہ بن نوفل نے کہا:’’ یہی و ہ ناموس ( اسلام یا فرشتہ ) ہے جو اللہ تعالیٰ نے حضرت موسیٰ علیہ السلام پر نازل فرمایا تھا، کاش میں جوان ہوتا، کاش میں اس قت زندہ رہتا جب آپ صلی اللہ علیہ وسلم کی قوم آپ صلی اللہ علیہ وسلم کو اپنے شہر سے نکال دے گی۔ ‘‘یہ سن کر حضور صلی اللہ علیہ وسلم نے فرمایا:’’ کیا میری قوم مجھے نکال دے گی؟‘‘ ورقہ بن نوفل نے کہا :’’ ہاں !جو پیغام ( اسلام ) آپ صلی اللہ علیہ وسلم لے کر آئے ہیں۔ ایسا پیغام جب بھی کوئی لایا ہے تو اس سے دشمنی کی گئی ہے۔ اگر میں آپ صلی اللہ علیہ وسلم کا زمانہ پائوں گا تو ضرور آپ صلی اللہ علیہ وسلم کی مدد کروں گا۔‘‘ ( لیکن کچھ دنوں بعد ورقہ بن نوفل کا انتقال ہو گیا) ( صحیح بخاری جلد نمبر ۱ کتاب الوحی حدیث نمبر۳)یہ طویل حدیث ابھی مکمل نہیں ہوئی ہے۔ انشاء اللہ آگے ہم اس حدیث کو مکمل کریں گے۔

جبرئیل علیہ السلام کا گواہی دینا

   سید الانبیاء ﷺ سے ورقہ بن نوفل نے کہا تھا:’’ اے محمد( صلی اللہ علیہ وسلم )! اب اگر وہ آواز سنائی دے ( یا وہ فرشتہ دکھائی دے) تو آپ صلی اللہ علیہ وسلم وہیں رکے رہیں اورتوجہ سے اس کی بات سنیں۔ حقیقت آپ صلی اللہ علیہ وسلم پر ظاہر ہو جائے گی۔ ‘‘لیکن اللہ تعالیٰ نے کچھ وقت کے لئے وحی روک دی۔ تا کہ حضور صلی اللہ علیہ وسلم وحی سے مانوس ہو جائیں اور وحی کا انتظار فرمائیں۔ صحیح بخاری کی طویل حدیث کو ہم آگے بڑھاتے ہیں۔ حضرت جابر بن عبداللہ رضی اللہ عنہ نے وحی کے رک جانے کا واقعہ بیان کرتے ہوئے فرمایا:’’ رسول اللہ صلی اللہ علیہ وسلم نے فرمایا:’’ میں ایک مرتبہ جا رہا تھا کہ آسمان سے ایک آواز سنی۔ میں نے اوپر دیکھا تو وہی فرشتہ تھا جو غارِ حرا میں میرے پاس آتا تھا۔ وہ آسمان اور زمین کے درمیان ایک کرسی پر بیٹھا ہوا تھا۔ ( صحیح بخاری جلد نمبر ۱ کتاب الوحی حدیث نمبر۳) حضور صلی اللہ علیہ وسلم کو ورقہ بن نوفل کی بات یاد تھی۔ اس لئے آپ صلی اللہ علیہ وسلم وہیں رکے رہے۔ طبقات ابن سعد میں حضرت عمر و بن شرجیل سے روایت ہے کہ حضور صلی اللہ علیہ وسلم کو آواز آئی:’’ اے محمد ( صلی اللہ علیہ وسلم ) !میں گواہی دیتا ہوں کہ اللہ کے سوا کوئی معبود نہیں ہے اور میں گواہی دیتا ہوں کہ محمد ( صلی اللہ علیہ وسلم ) اللہ کے بندے اور رسول ہیں۔ اسی واقعہ کو فتح الباری شرح صحیح بخاری میں امام ابن حجر عسقلانی نے جلد نمبر۱۲ میں پیش کیا ہے۔ کہ وحی رک جانے کی وجہ سے حضور صلی اللہ علیہ وسلم کووحی کاانتظا ررہنے لگا اور ساتھ ہی یہ غم ہوا کہ کہیں اللہ تعالیٰ مجھ سے ناراض تو نہیں ہیں۔ ایسے وقت میں جبرئیل علیہ السلام ظاہر ہوتے تھے اور عرض کرتے تھے :’’ اے محمد صلی اللہ علیہ وسلم ! آپ یقینا بلا شبہ اللہ تعالیٰ کے رسول ِ برحق ہیں۔‘‘ یہ سن کر حضور صلی اللہ علیہ وسلم کے دل کو اطمینان اور سکون حاصل ہو جاتا تھا۔ روض الانف میں امام سہیلی لکھتے ہیں ۔ ورقہ بن نوفل کے یہ کہنے پر کہ آپ صلی اللہ علیہ وسلم وہیں رکیں اور غور سے سنیں۔ جب آپ صلی اللہ علیہ وسلم رک کر سننے لگے تو مکمل سورہ الفاتحہ نازل ہوئی، یہ پہلی سورہ ہے، جو مکمل نازل ہوئی۔ اس سے پہلے متفرق آیات نازل ہوتی تھیں۔

نماز کا حکم

   جب رسول اللہ ﷺ  وحی سے مانوس ہو گئے اور آپ صلی اللہ علیہ وسلم کے قلب (دل ) کو اطمینان نصیب ہو گیا ۔ آپ صلی اللہ علیہ وسلم ،جبرئیل علیہ السلام سے بھی مانوس ہو گئے اور اللہ تعالیٰ کی وحدانیت آپ صلی اللہ علیہ وسلم کے قلب (دل) میں بس گئی تو اللہ تعالیٰ نے عبادت کا طریقہ بتایا اور نماز کا حکم دیا۔ جبرئیل علیہ السلام حضور صلی اللہ علیہ وسلم کی خدمت اقدس میں حاضر ہوئے اور زمین پر اپنی ایڑی سے ٹھوکر ماری تو پانی کا ایک چشمہ جاری ہوگیا۔ جبرئیل علیہ السلام نے وضو کیا اور آپ صلی اللہ علیہ وسلم دیکھتے رہے۔ پھر آپ صلی اللہ علیہ وسلم نے بھی وضو کیا۔ پھر جبرئیل علیہ السلام نے نماز (زور کی آواز سے )پڑھی ، آپ صلی اللہ علیہ وسلم دیکھتے رہے اور سنتے رہے ۔پھر آپ صلی اللہ علیہ وسلم نے بھی اسی طرح نماز پڑھی ۔اس بات پر تو تمام علمائے کرام کا اتفاق ہے کہ پانچ وقت کی نماز کا حکم معراج میں ہوا۔ اس سے پہلے حضور صلی اللہ علیہ وسلم کتنے وقت کی نماز پڑھتے تھے ؟اس میں علمائے کرام کا اختلاف ہے۔ بہر حال اتنا تو تمام علمائے کرام تسلیم کرتے ہیں کہ معراج سے پہلے بھی حضور صلی اللہ علیہ وسلم اور صحابہ کرام نماز پڑھتے تھے۔

اسلام کی’’ خاتون اول ‘‘ام المومنین سیدہ خدیجہ رضی اللہ عنہ

   ابو محمدعبد الملک بن ہشام لکھتے ہیں ۔ وہ ہستی جو سب سے پہلے اسلام کی دولت سے مالا مال ہوئی۔ وہ حضور صلی اللہ علیہ وسلم کی زوجہ محترمہ سیدہ خدیجہ رضی اللہ عنہا ہیں۔ انھوں نے قرآن پاک کی تصدیق کی، حضور صلی اللہ علیہ وسلم کی ہر معاملے میں مدد کی۔ اللہ تعالیٰ نے ان کی اس اعانت کی وجہ سے اپنے حبیب مکرم صلی اللہ علیہ وسلم کے بوجھ کو ہلکا فرمایا۔ جب کفار کے جھٹلانے اور انکار کرنے کی وجہ سے حضور صلی اللہ علیہ وسلم کو تکلیف پہونچتی تھی اور آپ صلی اللہ علیہ وسلم غمزدہ ہو جاتے تھے تو اللہ تعالیٰ سیدہ خدیجہ رضی اللہ عنہا کوہی تسلی کا اور اطمینان کا سبب بناتا تھا۔ وہ آپ صلی اللہ علیہ وسلم کا حوصلہ بڑھاتیںاور بوجھ کو ہلکا کرنے کی کوشش کرتیں اور لوگو ں کی اذیتوں پر ثابت قدم رہنے میں آپ صلی اللہ علیہ وسلم کا ہر طرح سے تعاون کرتیں ۔

حضرت علی بن ابی طالب کا قبول اسلام

   اس سے پہلے ہم آپ کو یہ بتا چکے ہیں کہ حضورصلی اللہ علیہ وسلم اپنے چچا ابوطالب کے معاشی بوجھ کو کچھ ہلکا کرنے کیلئے ان کے ایک بیٹے حضرت علی رضی اللہ عنہ کو اپنے گھر لے آئے تھے۔ اور وہ وہیں رہنے لگے تھے۔ حضرت علی رضی اللہ عنہ نے حضور صلی اللہ علیہ وسلم کو گھر میں نماز پڑھتے دیکھا تو حیرت سے دریافت کیا:’’ یہ کیا ہے ؟‘‘حضور صلی اللہ علیہ وسلم نے فرمایا:’’یہ اللہ کا دین ہے، یہی دین لیکر تمام انبیاء دنیا میں آئے ہیں۔ میں تم کو اللہ کی طرف بلاتا ہوں، اسی کی عبادت کرو اور بتوں کا انکار کردو۔‘‘حضرت علی رضی اللہ عنہ کی عمر اس وقت لگ بھگ دس برس کی تھی ،انھوں نے کہا:’’ یہ بالکل نئی چیز ہے، جب تک میں اپنے والد ابو طالب سے مشورہ نہ کرلوں ،تب تک میں کچھ بھی نہیں کہہ سکتا۔‘‘ اس وقت علانیہ تبلیغ کا حکم نہیں ہوا تھا اور آپ صلی اللہ علیہ وسلم خفیہ تبلیغ کررہے تھے۔ اس لئے آپ صلی اللہ علیہ وسلم نے فرمایا:’’ اے علی (رضی اللہ عنہ )!اگر تم اسلام قبول نہیں کرتے تو اسکا ذکر بھی کسی سے مت کرو۔ ‘‘حضرت علی رضی اللہ عنہ خاموشی سے اپنے کمرے میںآگئے۔ ایک رات بھی گذرنے نہ پائی تھی کہ اللہ تعالیٰ نے آپ رضی اللہ عنہ کا دل اسلام کی طرف مائل کردیا۔ جب صبح ہوئی تو حضور صلی اللہ علیہ وسلم کی خدمت میں حاضر ہوئے اور عرض کیا:’’ آپ صلی اللہ علیہ وسلم کس چیز کی دعوت دیتے ہیں۔‘‘ آپ صلی اللہ علیہ وسلم نے ارشاد فرمایا:’’ گواہی دو کہ اللہ ایک ہے اسکا کوئی شریک نہیں ہے اور محمد(صلی اللہ علیہ وسلم) اللہ کے رسول ہیں۔ ‘‘حضرت علی رضی اللہ عنہ نے گواہی دی اور اسلام قبول کرلیااور کافی عرصے تک اپنے اسلام کو اپنے والد ابو طالب سے بھی چھپائے رکھا۔

حضرت زید بن حارثہ رضی اللہ عنہ کا قبول ِاسلام

   حضرت زید بن حارثہ رضی اللہ عنہ کے بارے میں تفصیل سے ہم حضور صلی اللہ علیہ وسلم کے اعلانِ نبوت سے پہلے کتاب میں کر چکے ہیں، بہت مختصراً یہاں پیش کرتے ہیں۔ حضرت زید رضی اللہ عنہ بہت خوبصورت اور سمجھ دار تھے۔ بچپن میں اپنی والدہ کے ساتھ ان کے میکے جارہے تھے کہ لٹیروں نے ان کے قافلے پر حملہ کر کے سب کچھ لوٹ لیا اور حضرت زید بن حارثہ کو ان کی والدہ سے چھین کر شام کے بازار میں لے جاکر بیچ دیا۔ وہاں سے سیدہ خدیجہ کے بھتیجے حکیم بن حزام نے آپ رضی اللہ عنہ کو خرید لیااور مکہ مکرمہ لی آئے اور اپنی پھوپھی سیدہ خدیجہ رضی اللہ عنہا کی خدمت میں دے دیا۔ آپ رضی اللہ عنہا حضرت زیدبن حارثہ کو لیکر آئیں اور حضور صلی اللہ علیہ وسلم کی خدمت میں دے دیا۔ ادھر ان کی والدہ نے گھر واپس جاکر ان کے والد کو بتایا کہ لٹیرے حضرت زید بن حارثہ رضی اللہ عنہ کو لے گئے ہیں۔ ان کے والد ان کی تلاش میں نکل پڑے اور تمام قافلے والوں سے کہتے تھے۔ جس علاقے میں بھی جانا میرا یہ پیغام وہاں کے لوگوں کو پہونچا دینا۔ اس پیغام میں حضرت زید بن حارثہ کی تلاش اور درد اشعار میں بیان کیا تھا۔ مکہ مکرمہ میں حضرت زید بن حارثہ کو اپنے والد کا پیغام ملا تو انھوں نے قافلہ والوں کے ذریعے اپنا پتہ اور تمام حال والد تک پہونچا دیا ۔ آپ رضی اللہ عنہ کے والد اور چچا حضور صلی اللہ علیہ وسلم کی خدمت میں حاضر ہوئے اور درخواست کی کہ فدیہ لیکر میرے بیٹے کو چھوڑدیں۔ آپ صلی اللہ علیہ وسلم نے فرمایا:’’ اگر یہ آپ لوگوں کے ساتھ جانا چاہے تو بغیر کسی معاوضے کے لے جائیں ۔ ‘‘حضرت زید بن حارثہ رضی اللہ عنہ نے اپنے والد کے ساتھ جانے سے انکار کردیا اور حضور صلی اللہ علیہ وسلم کی غلامی میں رہنا پسند فرمایا۔ یہ دیکھکر حضور صلی اللہ علیہ وسلم نے انھیں آزاد کردیا اور اپنا بیٹا بنالیا۔ لوگ انھیں حضرت زید بن محمد کے نام سے پکارنے لگے اور آپ رضی اللہ عنہ ،حضور صلی اللہ علیہ وسلم کے بیٹے بن کر ان کے گھر میں رہنے لگے۔ بعثت کے بعد آپ رضی اللہعنہ نے تینو ں حضرات کو نماز پڑھتے دیکھا تو دریافت کیا:’’یہ کیا ہے؟‘‘ حضور صلی اللہ علیہ وسلم نے ان پر اسلام پیش کیا اور انھوں نے اسلام قبو ل کیا۔پھرجب قرآن پاک میں اللہ تعالیٰ نے حکم نازل فرمایا کہ منہ بولا بیٹا اصل بیٹا نہیں ہوتاتو پھر سے تمام لوگ انھیں حضرت زید بن حارثہ کے نام سے پکارنے لگے۔

حضرت ابو بکر صدیق رضی اللہ عنہ کا قبول ِاسلام

   حضرت ابو بکر صدیق رضی اللہ عنہ اور حضور صلی اللہ علیہ وسلم ایک ہی محلے میں رہتے تھے۔ اور لگ بھگ ہم عمر تھے۔ دونوں کے مزاج میں ہم آہنگی تھی۔ اس لئے دونوں میں بہت گہری دوستی تھی۔ حضرت ابو بکر صدیق رضی اللہ عنہ بھی اپنے دوست حضور صلی اللہ علیہ وسلم کی طرح شروع سے ہی بت پرستی سے بیزار تھے۔ شراب سے بھی نفرت تھی۔ حضور صلی اللہ علیہ وسلم کے بعثت سے کچھ عرصہ پہلے حضرت ابو بکر صدیق رضی اللہ عنہ نے ایک خواب دیکھا کہ ایک نورِ عظیم مکہ مکرمہ پر نازل ہوا اور مکہ مکرمہ کا ہر گھر اُس نور سے روشن ہو گیا۔ اس کے بعد وہ نور اکٹھا ہو کر حضرت ابو بکر رضی اللہ عنہ کے گھر میں آگیا اور انھوں نے دروازہ بند کر لیا۔ صبح کے وقت آپ رضی اللہ عنہ نے ایک یہودی احبار ( عالِم) کو اپنا خواب سنایا۔ اس نے کہا:’’ اس خواب کا کوئی اعتبار نہیں ہے۔‘‘ اس کے بعد آپ رضی اللہ عنہ تجارتی سفر پر شام گئے اور وہاں ایک عیسائی راہب ( عالم) کو اپنا خواب بتایا۔ اس نے آپ رضی اللہ عنہ کے قبیلہ ، شہر اور پیشہ کے بارے میں پوچھا اور پھر کہا:’’ اگر اللہ تعالیٰ نے تمہیں سچا خواب دکھایا ہے تو اس کی تعبیر یہ ہے کہ تمہارے قبیلے میں’’ ایک نبی‘‘ مبعوث ہوگا۔ وہ’’ اعلان نبوت ‘‘کر ے گا تو تم اس کے’’ وزیر‘‘ اور اس کے وصال کے بعد اس کے’’ خلیفہ‘‘ ہوگے۔ حضور صلی اللہ علیہ وسلم کے گھر والے یعنی’’ اہل بیت‘‘ اسلام قبول کر چکے تھے ۔ اب حضور صلی اللہ علیہ وسلم اپنے سب سے قریبی دوست حضرت ابو بکر رضی اللہ عنہ کو اسلام کی دعوت دیناچاہتے تھے ،لیکن تجارتی سفر پر شام گئے ہوئے تھے۔ آپ رضی اللہ عنہ جیسے ہی شام کے تجارتی سفر سے واپس آئے فوراً اپنے دوست صلی اللہ علیہ وسلم کی خدمت میں حاضر ہوئے۔ حضور صلی اللہ علیہ وسلم نے انھیں اسلام کی دعوت دی اور انھوں نے فوراً قبول کر لی۔ رسول اللہ صلی اللہ علیہ وسلم نے فرمایا:’’ اے ابو بکر ( رضی اللہ عنہ)! اللہ تعالیٰ نے مجھے اپنا رسول بنا یا ہے۔‘‘ آپ رضی اللہ عنہ نے فوراً کہا :’’ میں مانتا ہوں کہ آپ صلی اللہ علیہ وسلم اللہ کے رسول ہیں۔‘‘ اسلام قبول کرنے سے پہلے آپ رضی اللہ عنہ کا نام عبدا لکعبہ تھا۔ اسلام قبول کرنے کے بعد حضور صلی اللہ علیہ وسلم نے حضرت ابوبکر صدیق رضی اللہ عنہ کا نام عبد الکعبہ سے بد ل کر ’’عبداللہ ‘‘رکھ دیا۔

السابقون الاولون

   امامِِ اعظم ابو حنیفہ سے جب دریافت کیا گیا کہ سب سے پہلے کس نے اسلام قبول کیا تو انھوں نے فرمایا:’’آزاد مردوں میں حضرت ابو بکر صدیق رضی اللہ عنہ ، خواتین میں سیدہ خدیجہ رضی اللہ عنہا، غلاموں میں حضرت زید بن حارثہ رضی اللہ عنہ اور لڑکوں میں حضرت علی بن ابو طالب رضی اللہ عنہ نے سب سے پہلے اسلام قبول کیا۔ کسی نے حضرت علی رضی اللہ عنہ سے دریافت کیا کہ آپ رضی اللہ عنہ نے پہلے اسلام قبول کیا یا حضرت ابو بکر صدیق رضی اللہ عنہ نے تو حضرت علی رضی اللہ عنہ نے فرمایا:’’ پہلی بات یہ کہ حضرت ابو بکر صدیق رضی اللہ عنہ نے سب سے پہلے اسلام قبول کیا اور دوسری بات یہ کہ حضور صلی اللہ علیہ وسلم کے ساتھ ہجرت کی ۔ تیسری بات یہ ہے کہ حضور صلی اللہ علیہ وسلم کے ساتھ غارِ ثور میں رہے اور چوتھی بات یہ کہ آپ رضی اللہ عنہ کھلے عام مکہ مکرمہ میں نماز پڑھتے رہے۔ جبکہ میں اس وقت شعیب ابی طالب میں محصور تھا۔ حضرت ابو بکر صدیق نے اسلام قبول کرنے کے بعد اپنے دوستوں اور جان پہچان والوں کو اسلام کی دعوت دینی شروع کر دی اور آپ رضی اللہ عنہ کی کوششوں سے ان حضرات نے اسلام قبول کیا۔ 1) حضرت عثمان بن عفّان رضی اللہ عنہ ،2) حضرت زبیر بن عوام ر ضی اللہ عنہ ، 3) حضرت عبدالرحمٰن بن عوف رضی اللہ عنہ ، 4) حضرت سعد بن ابی وقاص رضی اللہ عنہ ، 5) حضرت طلحہ بن عبیداللہ رضی اللہ عنہ ۔ ان تمام حضرات کا شمار’’ السابقون الاولون‘‘ میں ہوتا ہے۔پھر حضرت ابو عبیدہ بن جرّاح رضی اللہ عنہ نے اسلام قبول کیا۔ پھر حضرت ابو سلمہ رضی اللہ عنہ نے اسلام قبول کیا۔ ان کا نام عبداللہ بن عبدالاسدہے۔ پھر حضرت ارقم بن ابو ارقم رضی اللہ عنہ نے اسلام قبول کیا۔ پھر حضرت عثمان بن مظعون رضی اللہ عنہ نے اسلام قبول کیا۔ پھر حضرت عبیدہ بن حارث رضی اللہ عنہ نے اسلام قبول کیا۔ ان کے بعد حضرت سعید بن زید رضی اللہ عنہ اور ان کی زوجہ محترمہ(یہ حضرت عمر بن خطاب رضی اللہ عنہ کی بہن ہیں) نے اسلام قبول کیا۔ ان کا نام فاطمہ بنت خطاب رضی اللہ عنہا ہے۔ پھر سیدہ اسماء بنت ابو بکر رضی اللہ عنہا نے اسلام قبول کیا۔ پھر حضرت خباب بن ارت رضی اللہ عنہ نے اسلام قبول کیا۔ پھر حضرت عمیر بن ابی وقاص رضی اللہ عنہ نے اسلام قبول کیا۔ یہ حضرت سعد بن ابی وقاص رضی اللہ عنہ کے بھائی ہیں۔ پھر حضرت عبداللہ بن مسعود رضی اللہ عنہ نے اسلام قبو ل کیا۔پھر حضرت مسعود بن قاری رضی اللہ عنہ نے اسلام قبول کیا۔ پھر حضرت سلیط بن عمرو رضی اللہ عنہ نے اسلام قبول کیا۔ پھر حضرت عیاش بن ابی ربیعہ اور ان کی زوجہ سیدہ اسماء بنت سلامہ رضی اللہ عنہا نے اسلام قبول کیا۔ پھر حضرت عبداللہ جحش رضی اللہ عنہ اور ان کے بھائی حضرت ابو احمد بن جحش رضی اللہ عنہ نے اسلام قبول کیا۔ ان کے بعد حضرت جعفربن ابو طالب رضی اللہ عنہ (یہ حضرت علی رضی اللہ عنہ کے بڑے بھائی ہیں۔دس سال بڑے تھے) اور ان کی زوجہ محترمہ سیدہ اسما بنت عمیس رضی اللہ عنہا نے اسلام قبول کیا۔ ان کے بعد حضرت حاطب بن حار ث رضی اللہ عنہ اور ان کی زوجہ محترمہ فاطمہ بنت مجلل رضی اللہ عنہا نے اسلام قبول کیااور ان کے بھائی حضرت خطاب بن حارث رضی اللہ عنہ اور ان کی زوجہ فکیہہ بنت یسار رضی اللہ عنہا نے اسلام قبول کیا۔ ان کے بعد حضرت معمر بن حارث رضی اللہ عنہ ، حضرت سائب بن عثمان رضی اللہ عنہ ، حضرت مطّلب بن ازہر رضی اللہ عنہ ، اور ان کی زوجہ سیدہ رملہ بنت ابی عوف رضی اللہ عنہا ، حضرت نعیم نحام بن عبداللہ عنہ نے اسلام قبول کیا۔ ان کو نحام اس لئے کہا جاتا تھا کہ ان کے بارے میں حضور صلی اللہ علیہ وسلم نے فرمایا کہ میں نے ان کے کھانسنے کی آواز جنت میں سنی ہے۔ پھر حضرت عامر بن فہیرہ رضی اللہ عنہ نے اسلام قبول کیا ۔ یہ حضرت ابوبکر صدیق رضی اللہ عنہ کے آزاد کردہ غلام ہیں۔ ان کے بعد حضرت خالد بن سعید رضی اللہ عنہ اور ان کی زوجہ محترمہ امینہ بنت خلف نے اسلام قبول کیا۔ پھر حضرت حاطب بن عمرورضی اللہ عنہ اور حضرت ابو حذیفہ رضی اللہ عنہ نے اسلام قبول کیا۔ امام ابو محمد عبدا لملک بن ہشام کہتے ہیں ان کا نام مہشم بن عتبہ تھا۔ یہ تمام حضرات’’ السابقون الاوّلون ‘‘میں شمار ہوتے ہیں۔ ان کے بعد حضرت عمار بن یاسر رضی اللہ عنہ اور حضرت صہیب بن سنان رضی اللہ عنہ نے اسلام قبول کیا۔ یہ حضرات بھی’’ السابقون الاولون ‘‘میں شامل ہیں۔

حضرت عفیف کندی رضی اللہ عنہ کا قبول اسلام

   حضرت عفیف کندی کا نام شراحیل ہے اور عفیف لقب ہے۔ آپ رضی اللہ عنہ یمن کے ہیں اورعطر کے تاجر تھے۔حضرت عباس بن عبد المطلب بھی عطر کے تاجر تھے اور تجارت کے سلسلے میں یمن جاتے رہتے تھے۔ آپ رضی اللہ عنہ فرماتے ہیں :’’میں منیٰ میں اپنے دوست حضرت عباس بن عبد المطلب رضی اللہ عنہ کے ساتھ بیٹھا ہوا تھا۔ ہر طرف خیمے لگے ہوئے تھے اچانک میں نے دیکھا کہ ایک بے انتہا خوبصورت اور روشن چہرے والا شخص ایک خیمے سے باہر آیااور نماز کے لئے کھڑ اہو گیا۔ ابھی میں اس خوبصورت اور معصوم شخص کو دیکھ رہا تھا کہ ایک عورت خیمے سے نکل کر آئی اور اس بے انتہا خوب صورت شخص کے پیچھے کھڑے ہو کر نماز پڑھنے لگی پھر میں نے دیکھا کہ ایک گیارہ سالہ لڑکا باہر آیا اور اس بے انتہا خوب صورت روشن چہرے والے شخص کے دائیں طرف ذرا سا پیچھے کھڑا ہوگیا اور نماز شروع کر دی۔ میں حیرت سے اپنے دوست حضرت عباس بن عبد المطلب رضی اللہ عنہ کودیکھنے لگا تو انھوں نے مجھے بتایا:’’ یہ جو بے انتہا خوبصورت شخص کو دیکھ رہے ہو، یہ میرے بھائی حضرت عبداللہ کا بیٹا محمد( صلی اللہ علیہ وسلم) ہیں۔ ان کا خیال یہ ہے کہ وہ اللہ کے رسول ہیں اور اللہ نے انھیں دین اسلام دیکر بھیجا ہے اور یہ خاتون ان کی زوجہ محترمہ سیدہ خدیجہ رضی اللہ عنہا ہیں۔ یہ اپنے شوہر پر ایمان لے آئی ہیں اور وہ گیارہ سالہ لڑکا حضرت علی بن ابو طالب ہے ،میرے بھائی ابو طالب کا بیٹا، یہ بھی مسلمان ہو گیا ہے۔ ‘‘اس کے بعد حضرت عفیف کندی فرماتے ہیں :’’ اس منظر نے میرے دل پر بہت گہرا اثرکیا تھالیکن اس وقت میں پوری طرح اسلام کی سچائی کو سمجھ نہیں پایا تھا۔ بعد میں جب میں نے اسلام قبول کیا تو مجھ سے پہلے بہت سے لوگ اسلام قبول کرچکے تھے اور اس بات کا مجھے ہمیشہ افسوس رہا ہے کہ کاش اگر میں اسی وقت اسلام قبول کر لیتا تو شاید میں چوتھا مسلمان ہوتا۔ ‘‘

حضرت خالد بن سعید رضی اللہ عنہ کا قبول اسلام

   حضرت خالد بن سعید رضی اللہ عنہ مردوں میں چوتھے یا پانچویں مسلمان ہیں۔ انھوں نے ایک خواب دیکھا کہ ایک آگ کی بہت گہری اور بڑی خندق کے کنارے وہ کھڑے ہیں اور اُن کا باپ انھیں آگ کی خندق میں دھکیل کر گرانے کی کوشش کر رہا ہے اور وہ بچنے کی کوشش کر رہے ہیں۔ اچانک حضو رصلی اللہ علیہ وسلم کہیں سے آئے اور اُن کی کمر پکڑ کر کھینچ لیا۔ خواب سے بیدار ہوئے تو انھوں نے کہا :’’اللہ کی قسم یہ خواب سچا ہے۔ ‘‘حضرت ابو بکر صدیق رضی اللہ عنہ اُن کے دوست تھے۔ اُن کے پاس آئے اور خواب بیان کیا۔ انھوں نے فرمایا:’’ اللہ تعالیٰ نے تمہارے ساتھ بھلائی کا ارادہ فرمایا ہے۔ تمہارا باپ بُت پرستی تم سے کروا کر دوزخ کی آگ میں گرانا چاہتا ہے اور حضور صلی اللہ علیہ وسلم اسلام کی دعوت دیتے ہیں۔ اگر تم اسلام قبول کر لو تو دوزخ کی آگ سے بچ جائو گے۔ آئو میرے ساتھ۔ ‘‘حضرت ابو بکر صدیق رضی اللہ عنہ انھیں ساتھ لے کر حضور صلی اللہ علیہ وسلم کی خدمت میں حاضر ہوئے ۔ آپ صلی اللہ علیہ وسلم نے انھیں اسلام کی دعوت دی اور فرمایا :’’ میں تم کو اللہ کی طرف بلاتا ہوں، جو ایک ہے، کوئی اس کا شریک نہیں ہے اور محمد ( صلی اللہ علیہ وسلم) اللہ کے بندے اور رسول ہیں اور اس بات کی دعوت دیتا ہوں کہ بت پرستی چھوڑ دو۔ جو کسی نفع اور نقصان کے مالک نہیں ہیں اور وہ یہ بھی نہیں جانتے کہ کون ان کی پوجا کررہا ہے اور کو ن نہیں کر رہا ہے۔‘‘ حضرت خالد بن سعید رضی اللہ عنہ نے کہا:’’ میں گواہی دیتا ہوں کہ اللہ ایک ہے اور اس کے سوا کوئی عبادت کے لائق نہیں ہے اور گواہی دیتا ہوں کہ حضرت محمد صلی اللہ علیہ وسلم اللہ کے رسول ہیں‘‘ اور اسلام قبول کر لیا۔ آپ رضی اللہ عنہ کے باپ کو معلوم ہوا تو چھڑی سے مارنے لگا یہاں تک چھڑی ٹوٹ گئی اور آپ رضی اللہ عنہ کا سر پھٹ گیا اور خون بہنے لگا۔ با پ نے کہا :’’تُو اُس محمد ( صلی اللہ علیہ وسلم) کی بات مانتا ہے جو ہمارے معبودوں ( بُتوں) کو برا کہتا ہے اور ہمارے آبائو اجداد کو احمق بتاتا ہے۔ آپ رضی اللہ عنہ نے فرمایا:’’محمد صلی اللہ علیہ وسلم نے بالکل سچ فرمایا ہے۔‘‘ باپ کو اور غصہ آگیا اور آپ رضی اللہ عنہ کو گھر سے نکال دیا۔

حضرت طلحہ بن عبیداللہ رضی اللہ عنہ کا قبول اسلام

   حضر ت طلحہ بن عبید اللہ رضی اللہ عنہ فرماتے ہیں۔ میں اپنا تجارتی سامان لیکر بصریٰ گیا ہوا تھا۔ ایک دن بصریٰ کے بازار میں تھا کہ ایک راہب( عیسائی عالم) اپنے صومعہ (عبادت گاہ ) سے پکار رہا تھا:’’ کوئی حرم( مکہ مکرمہ) کا رہنے والا ہے؟میں نے کہا کہ میں حرم شریف (مکہ مکرمہ )کا رہنے والا ہوں ۔ ‘‘ راہب نے کہا :’’کیا احمد (صلی اللہ علیہ وسلم ) کا ظہور ہو گیا؟ ‘‘میں نے پوچھا :’’کون احمد( صلی اللہ علیہ وسلم ) ؟‘‘ راہب نے کہا:’’ عبد اللہ بن عبد المطلب کے بیٹے۔ یہ مہینہ ان کے ظہور کا ہے۔ وہ حرم شریف (مکہ مکرمہ) میں ظاہر ہوں گے ۔ ایک پتھریلی اور نخلستانی زمین ( مدینہ منورہ )کی طرف ہجرت کریں گے۔ وہ ’’خاتم النبین‘‘ اور’’ آخری رسول ‘‘ہیں۔ دیکھو تم پیچھے نہ رہنا ۔‘‘راہب کی گفتگو مجھے یاد رہی ۔ جب میں مکہ مکرمہ آیا اورحضرت ابو بکر صدیق رضی اللہ عنہا سے ملاقات کی اور راہب کا واقعہ انھیں بتایا۔ انھوں نے فرمایا:’’یہ سچ ہے‘‘ اور مجھے لے کر حضور صلی اللہ علیہ وسلم کی خدمت میں حاضر ہو ئے ۔ آپ صلی اللہ علیہ وسلم نے مجھے اسلام کی دعوت دی اور میں نے آپ صلی اللہ علیہ وسلم کے دست مبارک پر اسلام قبول کیا۔

حضرت سعد بن ابی وقاص رضی اللہ عنہ کا قبول اسلام

   حضرت سعد بن ابی وقاص رضی اللہ عنہ فرماتے ہیں:’’ اسلام قبول کرنے سے تین راتوں پہلے میں نے ایک خواب دیکھا کہ میں شدید تاریکی اور اندھیرے میں ہوں ۔اچانک اس اندھیرے میں چاند نکلتادکھائی دیا، میں اس روشنی کی طرف بڑھنے لگا۔ جب اس روشنی کے قریب پہنچا تو دیکھا کہ مجھ سے پہلے حضرت ابو بکر صدیق رضی اللہ عنہ، حضرت علی بن ابی طالب رضی اللہ عنہ اور حضرت زید بن حارثہ رضی اللہ عنہ پہنچ چکے ہیںاور کھڑے ہیں۔ میں نے ان سے پوچھا :’’آپ لو گ کب آئے؟ ‘‘ انھوں نے کہا :’’بس ابھی ابھی آئے ہیںاور میری آنکھ کھل گئی۔ ‘‘میں حضرت ابو بکر صدیق رضی اللہ عنہ کے پاس آیا اور اپنا خواب بیان کیا۔ انھوں نے کہا:’’ تم نے جو اندھیرا دیکھا وہ کفر ہے اور جو روشنی رکھی وہ اسلا م ہے ۔ میں اور حضرت علی رضی اللہ عنہ اور حضرت زید بن حارثہ رضی اللہ عنہ اسلام قبول کر چکے ہیں اور مجھے لے کر حضور صلی اللہ علیہ وسلم کی خدمت میں حاضر ہوئے۔ آپ صلی اللہ علیہ وسلم نے مجھے اسلام کی دعوت دی اور میں نے کہا :’’میں گواہی دیتا ہوں کہ اللہ کے سواکوئی معبود نہیں اور گواہی دیتا ہوں کہ محمد صلی اللہ علیہ وسلم اللہ کے بندے اور رسول ہیں۔‘‘

حضرت عبدا لرحمن بن عوف رضی اللہ عنہ کا قبول اسلام

   حضرت عبدالرحمن بن عوف رضی اللہ عنہ تجارت کی غرض سے یمن جایا کرتے تھے ۔ وہاں عسکلان حُمیری سے اکثر ملاقات ہوتی تھی اور وہ مکہ مکرمہ ، خانہ کعبہ اور چاہِ زمزم کے بارے میںپوچھتا رہتا تھا۔آپ رضی اﷲ عنہ فرماتے ہیں :’’ ایک مرتبہ میں تجارت کی غرض سے یمن گیا اور اُن سے ملاقات کی ۔ وہ بہت بوڑھے ہو چکے تھے اور تکلیف میں مبتلا تھے۔ لیکن مجھے دیکھ کر اٹھ کر بیٹھ گئے اور اپنے بیٹوں ، پوتوں اور نواسوں کو بھی بلالیا اور کہا :’’ اے عبد الرحمن ! میں تمہیں ایک ایسی بشارت نہ دوں جو تمہارے لئے نفع مند تجارت سے بہتر ہو؟ ‘‘میں نے کہا :’’ضرور! میں منتظر ہوں۔‘‘ انھوں نے کہا :’’ اے عبد الرحمن! تُو سفر میں ہے، لیکن تیرے شہر مکہ مکرمہ میں اللہ تعالیٰ نے اپنے ایک ’’برگزیدہ نبی ‘‘کو مبعوث فرما دیا ہے اور انھیں کتاب ِ ہدایت( قرآن پاک) دے دی ہے۔ وہ بت پرستی سے روکتے ہیں اور اسلام کی دعوت دیتے ہیں۔ بھلائی کا حکم دیتے ہیں اور خود بھی عمل کرتے ہیں ۔ برائی سے روکتے ہیں اور خود بھی رکتے ہیں۔ اے عبدالرحمن! تمہارا خاندان’’ اس نبی ‘‘( صلی اللہ علیہ وسلم) کا ننھیال ہے۔ فوراً واپس جائواور اُن پر ایمان لائو۔ اِسی میں بھلائی ہے اور میرا یہ پیغام اُن تک پہنچا دو ۔ میں اللہ تعالیٰ کوگواہ بنا کر کہتا ہوں جو رات و دن کا خالق اور مالک ہے کہ آپ صلی اللہ علیہ وسلم قریش کے سربرآوردہ فرد ہیں۔‘‘(اِس کے بعد انہوں نے حضرت عبد الرحمن بن عوف رضی اﷲ عنہ سے کہا کہ رسول اﷲ صلی اﷲ علیہ وسلم کے پاس جاکر میرا یہ پیغام پہنچا دینا)’’ اے حضرت عبدا للہ کے بیٹے صلی اﷲ علیہ وسلم ! جن کے بدلے میں اونٹ ذبح کئے گئے تھے، آپ صلی اللہ علیہ وسلم کو رسول بنا کر بھیجا گیا ہے۔ آپ صلی اللہ علیہ وسلم ایمان و یقین کی دعوت دیتے ہیں اور حق اور کامیابی کا راستہ بتا تے ہیں۔ میں اللہ تعالیٰ ربِّ موسیٰ علیہ السلام کو گواہ بنا کر کہتا ہوں کہ بے شک آپ صلی اللہ علیہ وسلم مکہ مکرمہ میں رسول بنا کر بھیجے گئے ہیں۔ اے مخلوق کو نجات اور کامیابی کی طرف بلانے والے رسول! اللہ تعالیٰ کی بارگاہ میں آپ صلی اللہ علیہ وسلم میری بھی شفاعت فرما ئیں۔ ‘‘یہ سن کر میں بے تاب ہو گیا اور جلدی سے اپنا مال فروخت کرکے مکہ مکرمہ واپس پہنچا۔ گھر جانے کی بجائے اپنے دوست حضرت ابو بکر صدیق رضی اللہ عنہ کے پاس پہنچا اور تمام باتیں بتائیں۔ حضرت ابو بکر صدیق رضی اللہ عنہ نے فرمایا :’’ سعادت اور ہمیشہ کی کامیابی تمہارا انتظار کر رہی ہے، وہ اللہ کے رسول صلی اللہ علیہ وسلم ہیں، دیر نہ کروورنہ پیچھے رہ جانے والوں میں سے ہو جائو گے۔ میرے ساتھ چلو اور ایمان لے آئو۔ حضور صلی اللہ علیہ وسلم اپنے گھر میں تشریف فرما ہیں۔ ‘‘میں حضرت ابو بکر صدیق رضی اللہ عنہ کے ساتھ آپ صلی اللہ علیہ وسلم کی خدمت میں حاضر ہوا۔ حضور صلی اللہ علیہ وسلم نے اسلام کی دعوت دی اورمیں نے اسلام قبول کر لیا۔ پھر عسکلان حمیری کا پیغام آپ صلی اللہ علیہ وسلم کودیا۔ حضور صلی اللہ علیہ وسلم نے فرمایا:’’ بے شک قبیلہ حمیر کا یہ شخص خاص مومنین میں سے ہے۔ ‘‘پھر فرمایا:’’کئی ایسے لوگ ہیں جو مومن ہیں۔ لیکن انھوں نے ہمیں دیکھا نہیں ہے اور کئی لوگ ایسے ہیں جو ہماری تصدیق کرنے والے ہیں مگر وہ ہم سے مل نہیں سکے یہی لوگ ہمارے بھائی ہیں۔ ‘‘

حضرت عثمان بن عفان رضی اللہ عنہ کا قبول اسلام

   حضرت عثمان بن عفان رضی اللہ عنہ فرماتے ہیں :’’میں ایک مرتبہ گھر آیا تو میر ی خالہ سعدی کو بیٹھادیکھاوہ میری والدہ اور گھر والوں سے باتیں کر رہی تھیں ۔ میری خالہ کہا نت کرتی تھی، مجھ کو دیکھتے ہی کہا :’’ اے عثمان تجھ کو بشارت ہو سلامتی کی بار بار دس بار، تُوبھلائی سے ملے گا اور برائی سے محفوظ ہو جائے گا۔ اللہ کی قسم !تُو ایک نہایت پاک دامن حسین عورت سے نکاح کرے گا۔‘‘ یہ سن کر مجھے بہت تعجب ہوااور میں نے کہا :’’ اے خالہ یہ کیا کہہ رہی ہو؟ ‘‘انھوں نے کہا :’’اے عثمان ! تیرے لئے جمال بھی ہے اور شان بھی ہے، یہ وہ نبی صلی اللہ علیہ وسلم ہیں جن کے ساتھ نبوت و رسالت کے دلائل اور نشانیاں ہیں۔ اللہ تعالیٰ نے ان کو حق دے کر بھیجا ہے، اُن پر اللہ کا کلام ( قرآن پاک) اترتا ہے جو حق اور باطل میں فرق کرتا ہے۔ پس تو اُن کی اتباع کر کہیں بُت تجھ کو گمراہ نہ کردیں۔‘‘ میں نے کہا :’’اے خالہ آپ ایسی بات کا ذکر کر رہی ہیں جس کا شہر میں کہیں تذکرہ نہیں سنا ۔خالہ نے جواب دیا:’’ عبداللہ کے بیٹے محمد(صلی اللہ علیہ وسلم ) اللہ کے رسول ہیں اللہ کی طرف سے وہ اللہ کی طرف بلاتے ہیں۔ ان کا قول نجات اور کامیابی ہے، وہ ضرور کامیاب ہوں گے۔ ان کے مقابلے میں چیخ و پکار فائدہ نہیں دے گی۔ چاہے کتنی ہی تلواریں اور نیزے اُن کے مقابلے میں چلائی جائیں۔‘‘ یہ کہہ کر وہ چلی گئیں، مگر میں غور و فکر میں پڑ گیا۔ حضرت ابو بکر صدیق رضی اللہ عنہ سے میرے تعلقات تھے۔ میں اُن کے پاس آکر بیٹھ گیا۔ انھوں نے مجھے متفکر دیکھا تو وجہ پوچھی۔ میں نے اپنی خالہ سے جو سنا تھا وہ ان سے کہہ دیا۔ انھوں نے فرمایا:’’ اے عثمان ( رضی اللہ عنہ)! ماشاء اللہ تم ہوشیار اور سمجھ دار ہو، حق اور باطل کے فرق کو سمجھ سکتے ہو۔ یہ بُت جن کی پوجا میں ہماری قوم مبتلا ہے، یہ کچھ بھی نہیں کر سکتے۔ نہ ہمیں نفع پہنچا سکتے ہیں اور نہ ہی نقصان پہنچا سکتے ہیں۔ ‘‘میں نے کہا :’’بے شک یہ ایسے ہی ہیں جیساآپ رضی اللہ عنہ کہہ رہے ہیں۔‘‘ یہ سن کر حضرت ابو بکر صدیق رضی اللہ عنہ نے فرمایا :’’ اللہ کی قسم !تمہاری خالہ نے بالکل سچ کہا ہے۔ محمد بن عبداللہ صلی اللہ علیہ وسلم اللہ کے رسول ہیں، اللہ تعالیٰ نے آپ صلی اللہ علیہ وسلم کو اپنا پیغام دے کر تمام مخلوق کی طرف بھیجا ہے۔ تم اگر مناسب سمجھو تو اُن کا کلام ضرور سنو۔‘‘ اتفاق سے اسی وقت حضور صلی اللہ علیہ وسلم آتے دکھائی دیئے ،اُن کے ساتھ حضرت علی رضی اللہ عنہ ( ابھی لڑکے تھے) بھی تھے۔ حضرت ابو بکر صدیق رضی اللہ عنہ نے اٹھ کر حضور صلی اللہ علیہ وسلم سے کچھ عرض کیا،آپ صلی اللہ علیہ وسلم تشریف لائے اور بیٹھ گئے اور مجھ سے فرمایا:’’ اے عثمان ( رضی اللہ عنہ)! اللہ تعالیٰ جنت کی دعوت دیتا ہے، تم اللہ کی دعوت قبول کر لو اور میں اللہ کا رسول ہوں جو تمہاری طرف اور تمام مخلوق کی طرف بھیجا گیا ہوں۔‘‘ اللہ کی قسم آپ صلی اللہ علیہ وسلم کا کلام سنتے ہی میں ایسا بے خود ہواکہ فوراً اسلام قبول کرلیا اور یہ کلمات ادا کئے۔ ’’میں گواہی دیتا ہوں کہ اللہ کے سواکوئی معبود نہیں، وہ اکیلا ہے، اُس کا کوئی شریک نہیں ہے اور محمدصلی اللہ علیہ وسلم اللہ کے بندے اور رسول ہیں۔‘‘ کچھ روز گزرنے کے بعد حضور صلی اللہ علیہ وسلم کی بیٹی سیدہ رقیہ رضی اللہ عنہا سے میرا نکاح ہوا تو میر ی خالہ نے مجھے مبارکباد دی اور کہا:’’ اللہ نے اپنے بندے عثمان کو ہدایت دی اور اللہ ہی حق کی ہدایت دیتا ہے۔ پس عثمان نے اپنی صحیح رائے سے محمدصلی اللہ علیہ وسلم کا اتباع کیا۔ آخر ارویٰ کا بیٹا ہے۔ ( ارویٰ بنت کریز حضرت عثمان غنی کی والدہ کا نام ہے) سمجھ سے کام لیااور حق کو قبول کیا اور اس پیغمبر برحق نے اپنی ایک بیٹی اس کے نکاح میں دے دی۔ پس یہ ایسا ہوا جیسے چاند اور سورج جمع ہو ئے ہوں۔ اے ہاشم کے بیٹے محمد بن عبداللہ صلی اللہ علیہ وسلم میری جان آپ صلی اللہ علیہ وسلم پر قربان ہو۔آپ صلی اللہ علیہ وسلم امین ہیں اور مخلوق کی ہدایت کے لئے بھیجے گئے ہیں۔ ‘‘

ابو طالب کو اسلام کی دعوت

   خفیہ تبلیغ کا سلسلہ جاری تھا اور ایک ایک کر کے مسلمان ہوتے جا رہے تھے۔ حضرت علی رضی اللہ عنہ کی عمر لگ بھگ گیارہ برس ہو چکی تھی اور آپ رضی اللہ عنہ ہر وقت حضور صلی اللہ علیہ وسلم کے ساتھ ساتھ لگے رہتے تھے۔ جب نماز پڑھنا ہوتی تو حضور صلی اللہ علیہ وسلم حضرت علی رضی اللہ عنہ کے ساتھ پہاڑوں کے درمیان کسی گھاٹی یا درّہ میں جا کر پوشیدہ نماز پڑھتے ۔ ایک مرتبہ حضور صلی اللہ علیہ وسلم اورحضرت علی رضی اللہ عنہ نماز پڑھ رہے تھے کہ اتفاق سے ابو طالب ادھر سے گزرے ۔ وہ حیرت سے کھڑے اپنے بھتیجے اور بیٹے کو قیام ، رکوع ، سجدہ ،قعدہ کرتے اور سلام پھیرتے دیکھتے رہے۔ جب دونوں حضرات نماز سے فارغ ہو گئے تو انھوں نے حضور صلی اللہ علیہ وسلم سے پوچھا:’’ اے بھتیجے !وہ کون سا دین ہے جسمیں ایسی عبادت کی جاتی ہے ؟‘‘آپ صلی اللہ علیہ وسلم نے فرمایا:’’پیاے چچا !وہ اللہ کا دین اسلام ہے، اُس کے فرشتوں اوررسولوں کا دین ہے اور ہمارے جدامجد حضرت ابراہیم علیہ السلام کا دین ہے ۔ اللہ تعالیٰ نے مجھے اس دین کے ساتھ تمام بندوں کی طرف بھیجا ہے اور اے میرے پیارے چچا !آپ سب سے زیادہ اس بات کے حق دارہیں کہ میں آپ کو اس دین کی دعوت دوں اور ہدایت کی طرف بلائوں۔ آپ کا بھی یہ حق بنتا ہے کہ آپ اس دعوت کو قبول کریں اور اس کی دعوت و تبلیغ میں میری مدد کریں۔‘‘

ابو طالب کی حضرت علی رضی اﷲ عنہ کو تاکید

   سید الانبیاء ﷺ کی دعوت کو سن کر ابو طالب نے جواب دیا:’’ اے میرے پیارے بھتیجے ! میں اپنے آبائو اجداد کا دین اور ان کا طریقہ نہیں چھوڑ سکتا۔ لیکن اتنی بات ضرور ہے کہ جب تک میں زندہ ہوں تمہاری ہر ممکن مدد کرتا رہوں گا اور کوشش کروں گا کہ تمہیں کوئی دکھ یا تکلیف نہ پہنچے ۔‘‘ اس کے بعد ابوطالب نے اپنے بیٹے حضرت علی رضی اللہ عنہ سے پوچھا :’’ اے پیارے بیٹے !یہ کون سادین ہے جو تم نے اختیار کیا ہے؟ ‘‘آپ رضی اللہ عنہ نے جواب دیا:’’ پیارے ابا جان !میں اللہ تعالیٰ اور اس کے رسول صلی اللہ علیہ وسلم پر ایمان لے آیا ہوں اور اُن کی تعلیمات ( جو وہ اللہ تعالیٰ کی طرف سے لائے ہیں) کو دل و جان سے قبول کرتا ہوں اور اللہ کی رضا کے لئے ان کے ساتھ مل کر عبادت(نماز) کرتا ہوں۔‘‘ یہ سن کر ابو طالب نے کہا:’’ اے میرے پیارے بیٹے !بے شک تمہارا بھائی ( صلی اللہ علیہ وسلم ) تمہیں بھلائی اور کامیابی کی طرف لے جائے گا ۔ اس لئے ہر حال میں اپنے بھائی کا ساتھ نبھانا اور اس کا ساتھ کبھی مت چھوڑنا۔ ‘‘

حضرت جعفر طیاّر بن ابو طالب رضی اللہ عنہ کا قبولِ اسلام

   حضرت جعفر طیّار بن ابی طالب رضی اللہ عنہ اپنے چھوٹے بھائی حضرت علی بن ابی طالب رضی اللہ عنہ سے دس سال کے بڑے ہیں۔ آپ رضی اللہ عنہ بہت ہی سلیم الفطرت تھے۔ ہر وقت اپنے والد صاحب کی خدمت میں حاضر رہتے تھے۔ اسلام کی حقانیت سے دل منور ہو چکا تھا، لیکن والد صاحب کی اجازت کے انتظار میں تھے۔ ایک دن اپنے والد کے ساتھ جارہے تھے کہ وہیں سے گزر ہوا جہاں اُن کے بھائی حضرت علی رضی اللہ عنہ حضور صلی اللہ علیہ وسلم کے ساتھ نماز اد ا کر رہے تھے۔ ابو طالب کھڑے ہو کر ان کی عبادت دیکھنے لگے اور حضرت جعفر بن ابی طالب رضی اللہ عنہ بھی دیکھنے لگے۔ ابو طالب نے جب اپنے بیٹے حضرت جعفر بن ابی طالب رضی اللہ عنہ کودیکھا تو چونک پڑے۔ انھیں اندازہ ہو گیا کہ بیٹے کے دل میں اسلام کی شمع جل چکی ہے۔ انھوں نے حضرت جعفر بنابی طالب رضی اللہ عنہ سے مخاطب ہو کر کہا:’’ بیٹے تم بھی اپنے بھائی علی کی طرح اپنے چچا زاد بھائی کے قوتِ بازو بن جائو۔ علی دائیں طرف نماز پڑھ رہے ہیں،تم بائیں طرف کھڑے ہو جائو اور ان کے ساتھ نماز میں شامل ہو جائو۔‘‘ اتنا سننا تھا کہ حضرت جعفر بن ابی طالب رضی اللہ عنہ کا چہرہ خوشی سے کھل اٹھا۔ آپ رضی اللہ عنہ خوشی خوشی حضور صلی اللہ علیہ وسلم کی خدمت میں حاضر ہوئے اور اسلام قبول کر لیا۔ آپ رضی اللہ عنہ اسلام قبول کرنے والے چھبیسویں 26ویں یا بتیسویں 32ویں صحابی ہیں۔

خفیہ تبلیغ کے تین سال اور مسلمانوں کا ’’مرکز‘‘ دار ارقم

   رسول اللہ ﷺ  اسلام کی خفیہ تبلیغ کرتے رہے اور اس میں اسلام قبول کرنے والے صحابہ کرام بھی ساتھ دیتے رہے۔ خاص طور سے حضرت ابو بکر صدیق رضی اللہ عنہ نے خفیہ تبلیغ میں بڑھ چڑھ کر حصہ لیا اور آپ رضی اللہ عنہ کی کوششوں سے کئی حضرات نے اسلام قبول کیا۔ جب مسلمانوں کی تعداد تیس30سے زیادہ ہو گئی تو یہ ضرورت پیش آئی کہ مسلمانوں کا کوئی ایسا ’’مرکز‘‘ ہو جہاں سب مسلمان جمع ہو ں اور رائے مشورہ کریں۔ اسلام کی تعلیمات ایک دوسرے کو دیں اور آگے کا لائحہ عمل طے کریں۔ تمام صحابہ کرام نے حضور صلی اللہ علیہ وسلم کی بارگاہ میں مرکز بنانے کی درخواست کی۔ حضرت ارقم بن ابی الارقم رضی اللہ عنہ نے اس کے لئے اپنا مکان پیش کر دیا ان کا مکان’’ صفا‘‘ پہاڑی کے دامن میں تھا۔ حضور صلی اللہ علیہ وسلم نے غور و خوض کرنے کے بعد اس تجویز کو منظور کر لیا اور حضرت ارقم بن ابی الارقم رضی اللہ عنہ کے مکان کو مسلمانوں کا مرکز بنا دیا۔ اس کے بعد جب بھی کوئی واقعہ یا بات ہوتی تو تمام مسلمان وہاں جمع ہو جاتے تھے۔ اس کے علاوہ بھی مسلمانوں کا ایک دوسرے سے رابطے کا ذریعہ یہی مرکز تھا۔

رشتہ داروں اور خاندان والوں کو اسلام کی دعوت

   اللہ تعالیٰ کے حکم سے تین برس تک حضور صلی اللہ علیہ وسلم خفیہ دعوت و تبلیغ کرتے رہے۔ اور اس میں کامیابی بھی ملی۔ لیکن کامیابی کی یہ رفتار دھیمی تھی۔ جب تین برس ہو گئے تو اللہ تعالیٰ نے آیت نازل فرمائی (ترجمہ )’’ اور آپ صلی اللہ علیہ وسلم ڈرائیں ( اسلام کی دعوت دیں) اپنے قریبی رشتہ داروں کو‘‘ ( سورہ الشعرا ء آیت نمبر214) حضرت علی رضی اللہ عنہ فرماتے ہیں :’’ جب یہ آیت ’’ وانذرعشیرتک الاقربین ‘‘( اپنے قریبی رشتہ داروں کو ڈرائیں) نازل ہوئی تو حضور صلی اللہ علیہ وسلم نے مجھ کو حکم دیا کہ ایک صاع غلّہ (اناج) اور بکری کا ایک دست ( گوشت) اور دودھ کا ایک پیالہ مہیا کرو۔ ( یعنی کھانے پینے کا انتظام کرو) اور بنو ہاشم کو کھانے کی دعوت دو اور جمع کرو( حضرت علی رضی اللہ عنہ نے حضور صلی اللہ علیہ وسلم کے تمام چچائوں اور ان کی اولاد اور پھوپھیوں اور ان کی اولاد کو کھانے کی دعوت دی) میں نے خاندان ِ ہاشم ( یہ یاد رہے کہ عبد المطلب کے والد کا نام ہاشم ہے) کو کھانے کی دعوت دی اور کم و بیش چالیس40افراد جمع ہو گئے ۔‘‘ (حضرت علی رضی اﷲ عنہ اُس وقت رسول اﷲ صلی اﷲ علیہ وسلم کی کفالت میں تھے اور آپ صلی اﷲ علیہ وسلم کے ساتھ اُن کے گھر میں ہی رہتے تھے۔اُس وقت آپ رضی اﷲ عنہ کی عُمر بہ مشکل تیرہ 13سال کی تھی۔)

ابو لہب نے سننے سے منع کر دیا

   حضرت علی رضی اﷲ عنہ آگے فرماتے ہیں :’’جب تمام لوگ آگئے تو حضور صلی اللہ علیہ وسلم نے سب کو کھانے کے لئے بٹھایا۔ ان میں ابو طالب ، حضرت حمزہ ، حضرت عباس اور ابولہب بھی تھے۔ حضور صلی اللہ علیہ وسلم نے اپنے مبارک ہاتھوں سے سب کو کھانا کھلایا۔ تمام لوگ پیٹ بھر کر کھا چکے تھے پھر بھی وہ کھانا اُتنا ہی رہا جتنا پہلے تھا۔ اس کے بعد حضورصلی اللہ علیہ وسلم نے دودھ کا پیالہ اٹھایا اور مجھ سے فرمایا :’’ اے علی ( رضی اللہ عنہ) ! ان سب کو دودھ پلائو۔‘‘ دودھ کا پیالہ دیتے رہے ،سب نے دودھ پیا، پھر بھی پیالے میں دودھ اتنا ہی تھا۔ جب تمام لوگ فارغ ہو گئے تو حضور صلی اللہ علیہ وسلم تقریر کرنے کے لئے کھڑے ہو ئے۔ آپ صلی اللہ علیہ وسلم کے کچھ کہنے سے پہلے ہی ابو لہب کھڑا ہو گیا اور بولا :’’ لوگو !دیکھا تم نے! اس شخص نے تم پر کیسا جادو کیا ہے اور جادو کا تماشہ تمہیں دکھایا ہے‘‘ اس کا اشارہ کھانے اور دودھ کے برتن کی طرف تھا۔ اتنا کہہ کر وہ جانے لگا تو تمام لوگ بھی اٹھ کر چلے گئے۔ دوسرے دن پھر حضور صلی اللہ علیہ وسلم نے مجھے کھانے اور پینے کا انتظام کرنے اور تمام رشتہ داروں کو دعوت دینے کا حکم دیا۔دوسرے دن بھی سب نے کھایا اور پیا ۔ لیکن جیسے ہی حضور صلی اللہ علیہ وسلم کچھ کہنے کے لئے کھڑے ہو ئے تو پھر ابو لہب نے وہی حرکت کی اور سب چلے گئے۔ ‘‘

اپنے گھرانے میں سید الانبیاء صلی اللہ علیہ وسلم کی تقریر

   حضرت علی رضی اﷲ عنہ آگے فرماتے ہیں :’’سید الانبیاء صلی اللہ علیہ وسلم نے پھر تیسرے دن مجھ سے کھانے پینے کا انتظام کرنے اور تمام رشتہ داروں کو دعوت دینے کا حکم دیا۔ تیسرے دن بھی تمام لوگوں کے کھانے اور پینے کے بعد حضور صلی اللہ علیہ وسلم کچھ کہنے کے لئے کھڑے ہوئے تو ابو لہب پھر وہی بکواس کرنے لگا۔ لیکن اس مرتبہ تمام لوگ بیٹھے رہے اور ابو لہب کی بکواس پر توجہ نہیں کی۔ یہ دیکھ کر ابولہب بھی خاموش بیٹھ گیا۔ حضور صلی اللہ علیہ وسلم نے تمام حاضرین سے مخاطب ہو کر فرمایا:’’ میں تم سب کے لئے دنیا اور آخرت کی کامیابی لے کر آیا ہوں اور عرب میں اس سے بہتر اور افضل شئے کوئی نہیں لایا۔ مجھے اللہ تعالیٰ نے حکم دیا ہے کہ میں آپ لوگوں کو اس کی ( اسلام کی ) دعوت دوں۔ بتلائو تم میں سے کون میرا ساتھ دے گا۔ یہ سن کر تمام لوگ خاموش رہے۔ بلکہ کچھ لوگ تو اٹھنے کی بھی تیاری کرنے لگے۔ میں نے جب یہ دیکھا تو کھڑے ہو کر کہا:’’ میں آپ صلی اللہ علیہ وسلم کی مدد اور حمایت کے لئے تیار ہوں۔ ‘‘( حضرت علی رضی اللہ عنہ کی عمر اس وقت لگ بھگ تیرہ برس کی تھی) یہ سن کر حضور صلی اللہ علیہ وسلم نے حضرت علی رضی اللہ عنہ کی کلائی تھام کر فرمایا:’’یہ میرا بھائی اور میرا وزیر ہے۔ اب تم اس کی بات سنو اور اطاعت کرو۔‘‘ آپ صلی اللہ علیہ وسلم سے یہ سن کر سب لوگ ہنسنے لگے اور ابو طالب سے بولے:’’ کیا اب ہمیں ( تمہارے بھتیجے کے علاوہ) تمہارے کم سِن بیٹے کی بات سننی اور اطاعت کرنی پڑے گی۔ ‘‘ علامہ ابن کثیر نے اپنی کتاب البدایہ والنہایہ میں یہ حدیث پیش کرکے اس کے راویوں میں سے ایک راوی پر جرح کی ہے۔ لیکن اسی کتاب میں آگے اسی مضمون کی حدیث کو دوسرے راویوں سے پیش کی ہے اور ان پر اطمینان کا اظہار کیا ہے۔ مضمون پورا یہی ہے۔ اس حدیث میں اتنا زیادہ ہے کہ جب حضور صلی اللہ علیہ وسلم نے تمام رشتہ داروں پر اسلام پیش کیا اور فرمایا :’’ تم سب میرے قریبی عزیز ہولیکن تم میں سے کون شخص میرا بھائی بن کر اشاعتِ اسلام میں میری مدد کرے گا۔؟‘‘تو سب لوگ خاموش رہے۔ جب دوسری مرتبہ آپ صلی اللہ علیہ وسلم نے اپنا سوال دہرایا تو حضرت علی رضی اللہ عنہ کھڑے ہوئے اور عرض کیا :’’ یا رسول اللہ صلی اللہ علیہ وسلم! میں‘‘ ( آپ کی مد د کروں گا) ۔آپ صلی اللہ علیہ وسلم نے حیرت سے دیکھا اور فرمایا:’’تم ؟‘‘حضرت علی رضی اللہ عنہ نے عرض کیا:’’ میری عمر اس وقت کم ہے لیکن میں جسمانی طور سے صحت مند ہوں۔ میری بات سن کر آپ صلی اللہ علیہ وسلم مسکرا دیئے۔ ‘‘

 مکۂ مکرمہ والوں کودعوتِ اسلام

   اپنے رشتہ داروں ، گھر انے اور خاندان والوں کو اسلام کی دعوت دینے کے بعد حضور صلی اللہ علیہ وسلم کھلے عام ہر ایک کو اسلام کی دعوت دینے کے لئے کوہِ صفا پر چڑھے اس سے پہلے ہم آپ کو’’ حلف الفضول ‘‘میں بتا چکے ہیں کہ مکہ مکرمہ میںیہ قاعدہ تھا کہ جب کسی شخص کو پورے مکہ مکرمہ والوں تک اپنی بات پہنچانا ہوتی تھی تو وہ کوہِ صفا یا کوہِ مروہ اور کسی قریبی پہاڑی پر چڑھ کر قریش کے خاندانوں یا قبیلوں کے نام لے کر زور زور سے پکارتا تھا۔ جس سے تمام مکہ مکرمہ والوں کو پتہ چل جاتا تھا کہ کوئی شخص تمام مکہ مکرمہ والوں سے کوئی اہم بات کرنا چاہتا ہے اور تمام لوگ فوراً جمع ہو کر اس کی بات سنتے تھے۔ اسی قاعدے کے مطابق حضور صلی اللہ علیہ وسلم کوہِ صفا پر چڑھے اور قریش کے ایک ایک خاندان یا قبیلے کا نام لے کر پکارنے لگے۔ پور ے مکہ مکرمہ میں کہرام مچ گیا کیوں کہ حضور صلی اللہعلیہ وسلم کی عزت مکہ مکرمہ کا بچہ بچہ کرتا تھا۔ جب تمام لوگ جمع ہو گئے تو حضور صلی اللہ علیہ وسلم نے فرمایا :’’ بتائو اگر میں تمہیں بتائوں کہ دشمن کے سوار اس پہاڑ کے دامن سے نکل کر تم پر حملہ کرنے والے ہیں تو کیا تم مجھے سچا مانو گے۔ ‘‘لوگوں نے جواب دیا :’’یقینا ہم سچا مانیں گے کیوں کہ ہم نے آپ( صلی اللہ علیہ وسلم ) کو کبھی جھوٹ بولتے نہیں سنا ہے۔‘‘ ( اور اسی وجہ سے آپ صلی اللہ علیہ وسلم کو ’’صادق‘‘ اور ’’امین‘‘ کا لقب دے رکھا ہے) حضور صلی اللہ علیہ وسلم نے فرمایا:’’میں تمہیں اس عذاب سے ڈراتا ہوں جو تمہارے سامنے موجود ہے۔‘‘ (یعنی اگر تم لوگ بُتوں کی پوجا کرتے رہو گے اور اسلام قبول نہیں کرو گے تو اﷲ کے عذاب کا آخرت میں شکار ہو جاؤ گے)

اﷲ تعالیٰ نے ابو لہب کی مذمت کی

   سید الانبیاء صلی اﷲ علیہ وسلم مکۂ مکرمہ والوں کو اسلام کی دعوت دے رہے تھے اور اﷲ کے عذاب سے ڈرا رہے تھے ،اس مجمع میں ابولہب بھی موجود تھا۔ اُس نے جب دیکھا کہ حضور صلی اللہ علیہ وسلم اسلام کی دعوت دے رہے ہیں اور لوگ اُن کی بات مان بھی سکتے ہیںتو اس نے وہی حرکت کی جو تین دنوں تک کھانے کے بعد کرتا رہا تھا۔ اس نے ہاتھ جھٹکتے ہوئے کہا:’’اے محمد (صلی اﷲ علیہ وسلم ) ! تُونے ہمیں اسی لئے جمع کیا تھا‘‘ اور واپس جانے لگا۔ اسے جاتا دیکھ کر تمام لوگ واپس چلے گئے۔ ( جب ہم کسی کی بات کو فضول ثابت کرنا چاہتے ہیں تو ہاتھ سے اس کی طرف اشارہ کر کے ہاتھ جھٹک دیتے ہیں اور کہتے ہیں اتنی فضول بات تم کر رہے ہو) ابولہب نے بھی حضور صلی اللہ علیہ وسلم کی بات کی اہمیت کم کرنے کے لئے اور اثر زائل کرنے کے لئے ہاتھ جھٹکا تھا۔ اللہ تعالیٰ کو اس کی یہ حرکت بہت ناگوار گزر ی اور قرآن پاک میں سورہ لہب ( ترجمہ) ’’ٹوٹ گئے ابولہب کے ہاتھ اور وہ برباد ہو گیا…… ۔ آخر تک ۔ ‘‘نازل ہوئی(صحیح بخاری حدیث نمبر 4971)علامہ ابن کثیر نے البدایہ والنہایہ میں مسند امام احمد بن حنبل کی حدیث پیش کی ہے۔ اس میں ہے کہ ابو لہب نے کہا۔:’’ تُو ہمیشہ برباد رہے۔‘‘ ( نعوذ باللہ ) کیا تُونے بس یہ سنانے کے لئے بلایا تھا۔‘‘ اس کے ناز یبا الفاظ کی وجہ سے اللہ تعالیٰ نے سورہ لہب میں فرمایا :’’ ٹوٹ جائیں ابولہب کے ہاتھ اور وہ برباد ہوگیا…آخر تک ۔‘‘ نازل فرمائی۔

ابولہب کی اسلام دشمنی

   ابو لہب کا نام عبدا لعزیٰ بن عبد المطلب ہے۔ اس کی بیوی اُم جمیل کا نام ارویٰ بنت حرب ہے ،یہ ابو سفیان کی بہن ہے۔ ابولہب بہت سخت کافر تھا، اسے اسلام سے اور خاص طور سے حضور صلی اللہ علیہ وسلم سے بہت نفرت تھی۔ اسی لئے وہ حضور صلی اللہ علیہ وسلم کو ہر ممکن تکلیف پہنچانے کی کوشش کرتا تھا۔ قبیلہ ویل کے ربیعہ بن عبادکہتے ہیں ( یہ بعد میں مسلمان ہوگئے تھے اور اسلام قبول کرنے کے بعد بتایا) :’’زمانہ جاہلیت میں ایک روز ذی المجاز کے بازار میں رسول اللہ صلی اللہ علیہ وسلم کو یہ کہتے ہوئے سنا :’’ اے لوگو !تم لا الہ الا اللہ کہو تو فلاح ( کامیابی ) پا ئو گے اور اسی بازار میں ایک دوسرا شخص جو بھینگا تھا اور اس کے رخساروں پر گڑھے پڑے ہوئے تھے، یہ کہہ رہا تھا :’’ لوگو! اِس کی باتوں میں نہ آنا، یہ دیوانہ ہے‘‘ ( نعوذ باللہ) اور جو چاہتا تھا بکتا رہتا تھا۔ یہ دوسرا شخص وہی ابو لہب تھا جس نے اس سے قبل اپنے خاندان والوں سے کہا تھا:’’ لوگو !تم اس کھانے اور دودھ کی ذراسی مقدار سے سیر ہو کر کھانے پینے سے اندازہ لگا لو کہ یہ شخص ( نعوذ باللہ) کتنا بڑا جادو گر ہے۔ ‘‘یہ حدیث امام احمد بن حنبل نے’’ مسند احمد‘‘ میں بیان فرمائی ہے اور امام بیہقی’’ دلائل النبوۃ ‘‘میں او’’ر شعب الایمان‘‘ میں اِنہی ربیعہ ویلی کی روایت بیان کی ہے کہ میں نے رسول اللہ صلی اللہ علیہ وسلم کو ذی المجاز کے بازار میں دیکھا۔ آپ صلی اللہ علیہ وسلم فرماتے جا رہے تھے:’’ لوگو! لا الہ الا اللہ کہو تم فلاح پائو گے۔‘‘ اور آپ صلی اللہ علیہ وسلم کے پیچھے پیچھے ایک شخص کہتا جا رہا تھا :’’ لوگو !یہ شخص تمہیں اپنے آبائو اجداد کے دین سے پھیر نہ دے، تم اس کی بات مت سنو۔ ‘‘میں نے لوگوں سے پوچھا :’’یہ شخص کون ہے؟ ‘‘ وہ بولے :’’یہ ابولہب ہے۔‘‘ ایک روایت میں ہے کہ حضور صلی اللہ علیہ وسلم لوگوں کو اللہ کی طرف بلاتے اور اسلام کی دعوت دیتے جا رہے تھے اور ابولہب پیچھے سے آپ صلی اللہ علیہ وسلم پر مٹی پھینکتا جا رہا تھا اور کہتا جا رہا تھا :’’ لوگو !یہ شخص تمہیں تمہارے آبائو اجداد کے دین سے پھیر نہ دے۔ تم لات و عزیٰ کی عبادت کو مت چھوڑنا ۔ ‘‘

ابو لہب کی بیوی اُم جمیل کی اسلام دشمنی

   سید الانبیاء ﷺ کا پڑوسی ابولہب تھا۔وہ اور اسکی بیوی ام ِجمیل اسلام دشمنی میں بہت آگے آگے رہتے تھے اور حضور صلی اللہ علیہ وسلم کو تکلیف پہنچانے کی ہر ممکن کوشش کرتے تھے۔ام جمیل انتظار میں رہتی تھی اور جب حضور صلی اللہ علیہ وسلم گھر سے نکلتے تو ان کے راستے میں کانٹے پھیلا دیتی تھی۔ اللہ تعالیٰ نے سورہ لہب میں دونوں میاں بیوی کا انجام بیان کر دیا۔(ترجمہ):’’ ٹوٹ جائیں ابو لہب کے ہاتھ اور وہ برباد ہوگیا۔ اسکامال اور جو کچھ اس نے کمایا اسے فائدہ نہیں پہونچائے گا۔ عنقریب جلد ہی وہ بھڑکتی ہوئی آگ میں داخل ہوگا اور اسکی بیوی بھی( بھڑ کتی آگ میں ڈالی جائے گی)جو لکڑیوں کا گھڑا اٹھا کر لاتی ہے اور اسکی گردن میں منج (کجھور کی بٹی ہوئی)رسی ہوگی۔‘‘ (سورہ لہب)جب یہ سورہ نازل ہوئی تو ابو لہب اور اسکی بیوی کے ہوش اڑگئے۔ کیونکہ ان دونوں کا یقین تھا کہ حضور صلی اللہ علیہ وسلم جو فرمادیتے ہیں وہی ہوتا ہے۔ ام جمیل تو پاگل ہوگئی اور ایک بڑا پتھر اٹھا کر حضور صلی اللہ علیہ وسلم کو ڈھونڈے لگی اور غصہ سے کہتی جارہی تھی کہ آج میں محمد(صلی اللہ علیہ وسلم)کا(نعوذباللہ )سر پھوڑ کر رہوں گی۔ حضور صلی اللہ علیہ وسلم حرم شریف میں حضرت ابوبکر صدیق رضی اللہ عنہ کے ساتھ بیٹھے ہوئے تھے۔ انھوں نے اس عورت کو آتے دیکھاتو گھبرا گئے اور عرض کیا:’’ یا رسول اللہ صلی اللہ علیہ وسلم! یہ بڑی بد زبان عورت ہے اور پتھر لئے آرہی ہے۔‘‘ حضور صلی اللہ علیہ وسلم نے فرمایا:’’تم آرام سے بیٹھو وہ مجھے نہیں دیکھ سکے گی۔‘‘ وہ غصہ سے بھری ہوئی سیدھا حضرت ابو بکر صدیق رضی اللہ عنہ کے سامنے کھڑی ہوئی اور پوچھا :’’تمھارے وہ صاحب کہاں ہیں؟ آج میں اسکا سر پھوڑ دوں گی۔‘‘ حضرت ابو بکر صدیق رضی اللہ عنہ نے فرمایا:’’ کیا وہ تمھیں دکھائی نہیں دے رہے ہیں؟‘‘ وہ بولی :’’مجھے پاگل سمجھتے ہو‘‘اور بکواس کرتی ہوئی چلی گئی۔

سید الانبیاء ﷺ کی اعلانیہ دعوت اسلام اور قریش کی دشمنی

   اب سید الانبیاء ﷺ اعلانیہ دعوتِ اسلام دینے لگے اور لوگوں کو اللہ تعالیٰ کی طرف بلانے لگے۔ شروع میں تو قریش نے کوئی توجہ نہیں کی ۔ لیکن دھیرے دھیرے ان کو اندازہ ہونے لگا کہ اسلام ان کے’’ معبودِ باطلہ‘‘ یعنی بتوں کی جڑ کاٹ دے گا۔ کیوں کہ بہت سی نیک روحوں نے اسلام قبول کیا اور بتوں کی پوجا سے نفرت کا اظہار کیا اور ان کے گھر والے اس(ان کے مطابق) نئے مذہب اسلام کے متعلق اس غلط فہمی کا شکا ہوگئے کہ یہ باپ بیٹے ،بھائی بھائی ، میاں بیوی، اور ماں بیٹے میں دشمنی ڈال دیتا ہے۔ ابو طالب مکہ مکرمہ کے بڑے سردار تھے اور حضور صلی اللہ علیہ وسلم کی حمایت کرتے تھے۔اسلئے قریش کے دوسرے سردار حضورصلی اللہ علیہ وسلم کے ساتھ ایسا کچھ نہیں کر سکتے تھے کہ آپ صلی اللہ علیہ وسلم کی جان پر بن آئے۔ لیکن انھوں نے طئے کیا کہ سب ملکر حضور صلی اللہ علیہ وسلم کو اتنا پریشان کریں کہ وہ اسلام کی دعوت سے باز آجائیں اور وہ لوگ کبھی آپ صلی اللہ علیہ وسلم کے راستے میں کانٹے بچھا دیتے۔ کبھی آپ صلی اللہ علیہ وسلم کے جسم مبارک پر نجاست (گندگی ) پھینک دیتے۔ کبھی آپ صلی اللہ علیہ وسلم کو دھکا دیتے اور زبان سے برا کہہ کر تکلیف پہونچانے کی کوشش کرتے۔ لیکن ہر تکلیف کے بعد حضور صلی اللہ علیہ وسلم ہر نئے عزم کے ساتھ اسلام کی دعوت دینے لگتے۔

سید الانبیاء ﷺ کی دشمنی میں پیش پیش لوگ

   یوں تو مکہ مکرمہ کا ہر کافر سید الانبیاء صلی اللہ علیہ وسلم سے دشمنی رکھتا تھا۔لیکن کچھ لو گدشمنی میں بہت سخت اور آگے آگے تھے۔ ان کے نام آپ کی خدمت میں پیش ہیں۔ کیونکہ آگے یہ نام بار بار آئیں گے ۔ ۱) ابو لہب ، ۲) ابو جہل اسکا نام عمر بن ہشام ہے، ۳) اسود بن عبد یغوث، ۴) حارث بن قیس، ۵) ولید بن مغیرہ ، ۶) امیہ بن خلف، ۷) ابی بن خلف ، ۸) ابو قیس، ۹) عاص بن وائل ، ۱۰) نصر بن حارث، ۱۱) عقبہ بن ابی معیط۔حضور صلی اللہ علیہ وسلم کی دو صاحب زادیوں کا نکاح ابولہب کے دو بیٹوں سے ہوا تھا۔ لیکن رخصتی ابھی نہیں ہوئی تھی اور دونوں صاحبزادیاں اپنے والد کے گھر ہی رہتی تھیں۔ ابو لہب نے حضور صلی اللہ علیہ وسلم کو تکلیف پہنچانے کے لئے اپنے دونوں بیٹوں سے کہا کہ وہ حضور صلی اللہ علیہ وسلم کی دونوں بیٹیوںکو طلاق دے دیں تو اسکے دونو ںبیٹوں نے طلاق دے دی۔ح

ضرت بلال بن ر باح رضی اللہ عنہ کا قبول اسلام او ر صبر

   حضرت بلال بن رباح رضی اللہ عنہ حبشہ کے ہیں۔ السراۃ کے خالص عربوں میں سے ہیں۔ آپ رضی اللہ عنہ کی والدہ کا نام حمامہ ہے۔ جو بنو جمح میں کسی کی مملوکہ(باندی ) تھیں۔آپ رضی اللہ عنہ کے بارے میں رسول اللہ صلی اللہ علیہ وسلم نے فرمایاکہ حضرت بلال رضی اللہ عنہ’’ سابق الحبشہ‘‘ ہیں۔ (یعنی حبشیوں میں سب سے پہلے اسلام قبول کرنے والے ہیں)۔آپ رضی اللہ عنہ امیہ بن خلف کے غلام تھے۔ رسول اللہ صلی اللہ علیہ وسلم سے بے پناہ محبت کرتے تھے۔ان کا مالک انھیں کسی بھی کام کے لئے بھیجتا تو وہ حضورصلی اللہ علیہ وسلم کے پاس پہنچ جاتے ۔ آپ صلی اللہ علیہ وسلم حرم شریف میں نماز پڑھ رہے ہوتے یا کسی کو دعوت اسلام دیتے رہتے تو حضرت بلال رضی اللہ عنہ خاموشی سے دور کھڑے ہوکر حضور صلی اللہ علیہ وسلم کا دیدار کرتے رہتے تھے۔ جب تک حضور صلی اللہ علیہ وسلم وہاں موجود رہتے ۔تب تک یہ خاموشی سے کھڑے آپ صلی اللہ علیہ وسلم کو دیکھتے رہتے ۔ جب آپ صلی اللہ علیہ وسلم اٹھ کر اپنے گھر تشریف لے جاتے تھے۔ تب حضرت بلال رضی اللہ عنہ اپنا کام کر کے واپس آتے تو ان کا مالک امیہ بن خلف دیر ہوجانے کی وجہ سے ناراض ہوتا تھا اور سزا دیتا تھا اور یہ روز کا معمول بن گیا تھا۔ایک دن حضور صلی اللہ علیہ وسلم آپ رضی اللہ عنہ کی طرف متوجہ ہو ئے اور اسلام کی دعوت دی ۔ جسے حضرت بلال نے فوراً قبول کرلی اور اسلام کی نعمت سے سرفراز ہوگئے۔ امیہ بن خلف کو جب آپ رضی اللہ عنہ کے مسلمان ہونے کا علم ہوا تو اس نے آپ رضی اللہ عنہ کو سزائیں دینا شروع کردیں تاکہ آپ رضی اللہ عنہ اسلام کو چھوڑ دیں۔ مگر آپ رضی اللہ عنہ سختی سے اسلام پر قائم رہے اور ایک بھی کفریہ لفظ نہیں کہا جو امیہ بن خلف چاہتا تھا۔ جب امیہ بن خلف اور اسکے بیٹے حضرت بلال رضی اللہ عنہ پر عذاب کی شدت کرتے اور آپ رضی اللہ عنہ کو تپتی ریت پر ڈال دیتے اور اوپر سے گائے کی کھال ڈال کر دبائے رکھتے تھے۔ آپ رضی اللہ عنہ کے بدن کا پانی سوکھنے لگتاتھا تو پانی پانی فرماتے ۔ ان کا مالک اور اسکے بیٹے کہتے کہ تمھارا رب لات و عزیٰ ہے یہ کہو تو پانی ملے گا۔ مگر آپ رضی اللہ عنہ اللہ احد اللہ احد اﷲ احد بار بار فرماتے تھے۔ سزا دینے کا ان کا روز کا معمول ہوگیا تھا۔

سید الانبیاء ﷺ کی خدمت میں

   سید الانبیاء ﷺ اورحضرت ابو بکر رضی اللہ عنہ اس ظلم کو دیکھتے اور اللہ تعالیٰ سے حضرت بلال رضی اللہ عنہ کی نجات کی دعا کرتے ۔ ایک دن حضرت ابو بکر رضی اللہ عنہ نے امیہ بن خلف سے کہا:’’ کب تک تم اس شخص پر عذاب کرو گے۔ کیا اسے میرے ہاتھوں بیچنا پسند کرو گے؟‘‘ امیہ بن خلف بہت لالچی آدمی تھا ،اُس نے سودا کیا اور بہت مہنگی قیمت لی۔اُس نے حضرت بلال رضی اﷲ عنہ کوسات اوقیہ ( تقریباً 23تولہ سونا ) سونے کے عوض حضرت ابو بکر رضی اللہ عنہ کے ہاتھوں بیچ دیا۔ یہ محمد کی روایت ہے کہ حضرت ابو بکر رضی اللہ عنہ نے حضرت بلال رضی اللہ عنہ کو سات اوقیہ سونا میں خریدا۔ اور قیس کی روایت ہے کہ پانچ اوقیہ سونا میں خریدا اور آزاد کردیا۔ حضرت بلال رضی اللہ عنہ آزاد ہوتے ہی حضور صلی اللہ علیہ وسلم کی خدمت میں آگئے۔ اور آپ صلی اللہ علیہ وسلم کے وصال تک ساتھ ہی رہے۔ حضرت جابر بن عبداللہ رضی اللہ عنہ سے روایت ہے۔ کہ حضرت عمر فاروق رضی اللہ عنہ اکثر فرماتے تھے۔ حضرت ابو بکر صدیق رضی اللہ عنہ ہمارے ’’سردار ‘‘ہیں۔ اور انھوں نے ہمارے ’’سردار ‘‘حضرت بلال رضی اللہ عنہ کو آزاد کروایا ہے۔

مکہ مکرمہ کے کافروں کے ظلم ستم

   مکہ مکرمہ کے کافروں نے دیکھا کہ اسلام تیزی سے پھیلتا جارہا ہے اور لوگ مسلمان ہوتے جارہے ہیںتو ان کے سرداروں نے طئے کیا کہ ہر طرح کا ظلم وستم ان مسلمانوں پرکیا جائے اور انھیں ہر طرح سے مجبور کیا جائے کہ یہ لوگ اسلام چھوڑدیں۔ جو غلام مسلمان ہوتے تھے ان کے مالک ان پرطرح طرح کے ظلم و ستم کرتے تھے اور جو آزاد لوگ اسلام قبول کرتے تھے تو ان کے گھر والے انھیں اسلام چھوڑ دینے پر مجبور کرتے تھے۔ حضرت مصعب بن عمیر رضی اللہ عنہ کی والدہ نے قسم کھائی کہ جب تک حضرت مصعب بن عمیر رضی اللہ عنہ اسلام نہیں چھوڑیں گے تب تک میں دھوپ میں بیٹھی رہوں گی۔ آپ رضی اللہ عنہ اپنی والدہ کی خوشامد کرتے اور سمجھاتے تھے۔ حضرت سعد بن ابی وقاص رضی اللہ عنہ کی والدہ نے قسم کھائی کے جب تک حضرت سعد بن ابی وقاص رضی اللہ عنہ اسلام نہیں چھوڑیں گے تب تک وہ نہ کھائیں گی اور نہ سر میں تیل لگائیں گی۔ حضرت عمار بن یاسر رضی اللہ عنہ اور ان کے والد حضرت یاسر رضی اللہ عنہ اور والدہ سیدہ سمیّہ رضی اللہ عنہا غلام تھے ان کے مالکوں نے ان پر ظلم کی انتہا کردی۔

سب سے پہلے اسلام کا اظہار کرنے والے

   حضرت مجاہد سے مروی ہے کہ سب سے پہلے جنھوں نے اسلام کو ظاہر کیا وہ سات لوگ ہیں 1) رسول اللہ صلی اللہ علیہ وسلم 2) حضرت ابو بکر صدیق رضی اللہ عنہ 3) حضرت بلال رضی اللہ عنہ 4) حضرت خباب بن ارت رضی اللہ عنہ 5) حضرت صہیب بن سنان رضی اللہ عنہ 6) حضرت عمار بن یاسر رضی اللہ عنہ 7) حضرت سمیّہ رضی اللہ عنہا(حضرت عمار بن یاسر کی والدہ ) رسول اللہ صلی اللہ علیہ وسلم کی حفاظت ابو طالب نے کی اور حضرت ابو بکر صدیق رضی اللہ عنہ کی حفاظت ان کے قبیلہ یا خاندان والوں نے کی ۔ باقی دوسرے صحابہ کرام کو پکڑ لیا گیا، انھیں لوہے کی زرہ پہنا کر تپتی دھوپ میں ڈال دیا جاتاتھا،کنویں میں الٹا لٹکا کر پانی میں غچکہ دیئے جاتے تھے ،حضرت عمار بن یاسررضی اﷲ عنہ کو کنویں میں الٹا لٹکایا گیا۔حضرت خباب بن ارت رضی اللہ عنہ کو کوئلے دہکا کر ان پر لٹا دیا گیا، پہلے چمڑی جلی، پھر چھچھڑا جلا، پھر چربی پگھلنے لگی تو کوئلے کچھ ٹھنڈے پڑے۔بیس، پچیس برس بعد جب حضرت خباب رضی اللہ عنہ نے دوسرے صحابہ کرام کو جب اپنی پیٹھ دکھائی تو ان کی پیٹھ پر جلنے کے نشان دیکھ کر تمام صحابہ کرام رضی اﷲ عنہم کانپ گئے ۔ حضرت عمار کی والدہ سید ہ سمیّہ رضی اللہ عنہا کو بد بخت ابو جہل نے برچھی مار کر شہید کردیا ،یہ اسلام کی پہلی شہید ہیں۔

اسلام کے لئے پہلا حملہ

   مکہ مکرمہ کے کافر مسلمانوں پر ظلم ستم کر رہے تھے۔ اسلئے حضورصلی اللہ علیہ وسلم اور صحابہ کرام یا تو دار ارقم میں چھپ کر نماز ادا کرتے تھے یا پھر مکہ مکرمہ کے باہر پہاڑیوںکی گھاٹیوں میں جاکر نماز ادا کرتے تھے۔ ایک مرتبہ پہاڑیوں کے درمیان وادی یا گھاٹی میں نماز ادا کرتے وقت اچانک کافروں کا ایک گروہ اُدھر آگیا اور حضور صلی اللہ علیہ وسلم اور مسلمانوں اور اسلام کا مذاق اڑانے لگے اور نوبت یہاں تک پہونچی کہ مار پیٹ پر اتر آئے۔ نوجوان صحابہ کرام نے بھی جوابی حملہ کیا، حضرت سعد بن ابی وقاص رضی اللہ عنہ نے قریب پڑی ہو ئی اونٹ کے جبڑے کی ہڈی اٹھائی اور پوری طاقت سے سامنے والے مشرک کے سر پر ماردی۔ اسکا سر پھٹ گیااور خو ن بہنے لگا۔ یہ دیکھ کر تمام مشرکین بھاگ گئے ۔ اسلام کے لئے کیا گیا یہ پہلا حملہ ہے۔

حضرت عمار بن یاسر رضی اللہ عنہ کے گھرانہ کو تکلیفیں

   حضرت عمار بن یاسر رضی اللہ عنہ کے والد حضرت یاسر رضی اللہ عنہ قحطان کے رہنے والے تھے۔ اپنے گمشدہ بھائی کی تلاش میںاپنے دو بھائیوںکے ساتھ مکہ مکرمہ آئے تھے۔ مکہ مکرمہ حضرت یاسر رضی اللہ عنہ کو پسند آیا اور یہیں ابو حذیفہ کے پڑوس میں آباد ہوگئے۔ ان کے دونوں بھائی قحطان واپس چلے گئے۔ ابو حذیفہ نے اپنی کنیز سمیّہ رضی اللہ عنہا سے ان کا نکاح کردیا۔ ان سے حضرت عمار بن یاسر رضی اللہ عنہ پیدا ہوئے۔ یہ لوگ ابو حدیفہ کے انتقال تک اسکے ساتھ رہے۔ اسکے بعد حضور صلی اللہ علیہ وسلم نے اعلان نبوت فرمایا تو حضرت یاسر ، سیدہ سمیّہ ، حضرت عمار اور ان کے بھائی حضرت عبداللہ بن یاسر ان سب نے اسلام قبول کیا۔چونکہ مکہ مکرمہ میں ان کا کوئی قبیلہ یا خاندان نہیں تھاجو اُن کی طرف سے قریش کے سینہ سُپر ہوتا، اس لئے مکہ مکرمہ کے کافروں نے ان سب کو بہت تکلیف دی۔ عین دوپہر میں تپتی ریت پر لٹاتے اور اتنا مارتے کہ بے ہوش ہوجا تے، کبھی پانی میں غوطے دیتے ،کبھی انگاروں پر لٹاتے۔آل یاسر یعنی حضرت عمار بن یاسر رضی اﷲ عنہ کے گھر والے اِن تمام تکلیفوں کو برداشت کرتے تھے ،لیکن اسلام کو چھوڑنا گوارا نہیں کرتے تھے۔

سید الانبیاء ﷺ کی بے چینی اور تسلی

   حضرت عمار بن یاسر رضی اﷲ عنہ پر اُن کے والدین پر اور اُن کے بھائی پر مسلسل تشدد کر رہے تھے اور انہیں مسلسل تکلیفیں دے رہے تھے ۔ایسے میں حضور صلی اللہ علیہ وسلم انھیں دیکھتے تو یہ فرماتے:’’ اے آگ تو عمار پر سلامتی بن جا، جس طرح حضرت ابراہیم علیہ السلام پر سلامتی بن گئی تھی ۔ ‘‘ اور فرماتے :’’ اے آل یاسر صبر کرو۔‘‘ اور کبھی دعا فرماتے :’’ اے اللہ ! تُو آل یاسر کی مغفرت فرما ‘‘ اور کبھی حضرت یاسر ، سیدہ سمیّہ ، حضرت عمار اور حضرت عبداللہ رضی اﷲ عنہم سے فرماتے:’’ اے آل یاسر ! تم کو بشارت ہو جنت تمھارا انتظار کررہی ہے۔‘‘حضرت علی رضی اللہ عنہ فرماتے ہیں:’’ رسول اللہ صلی اللہ علیہ وسلم نے فرمایا :’’حضرت عمار بن یاسر رضی اللہ عنہ سر سے پیر تک ایمان سے بھرا ہوا ہے۔ حضرت یاسر رضی اللہ عنہ کا انتقال ہوگیا اور سیدہ سمیّہ رضی اللہ عنہا کو ابو جہل نے شہید کردیا۔

حضرت خباب بن ارت رضی اللہ عنہ

   حضرت خباب بن ارت رضی اللہ عنہ’’ السابقون اوّلون ‘‘میں سے ہیں اور اسلام قبول کرنے والے چھٹے مسلمان کہے جاتے ہیں۔ام انمار کے غلام تھے ،جب آپ رضی اللہ عنہ نے اسلام قبول کیا تو ام انمار نے آپ رضی اللہ عنہ کو بہت سخت تکلیفیں دیں۔ حضرت خباب بن ارت رضی اللہ عنہ فرماتے ہیں:’’ میں زمانہ جاہلیت میں لوہار تھا اور تلواریں بنایا کرتا تھا۔ایک بار عاص بن وائل کے لئے تلوار بنائی ۔ جب پیسے لینے گیا تو اس نے کہا:’’ جب تک تم محمد (صلی اللہ علیہ وسلم) کا انکار نہیں کروگے اور اسلام کو نہیںچھوڑو گے تب تک میں تمھیں پیسے نہیں دوں گا۔ ‘‘حضرت خباب رضی اللہ عنہ نے فر ما یا:’’ اگر تو مر جائے اور پھر زندہ ہوجائے تب بھی محمد صلی اللہ علیہ وسلم کا انکار نہیں کروں گا۔ ‘‘ عاص نے کہا :’’کیا میں مرنے کے بعد زندہ کیا جائوں گا ؟‘‘ حضرت خباب رضی اللہ عنہ نے فرمایا :’’ ہاں ! اللہ تعالیٰ سب کو دوبارہ زندہ کرے گا۔ ‘‘یہ سن کر عاص بن وائل نے کہا:’’ ٹھیک ہے ! جب میں دوبارہ زندہ ہوں گا تو میرا مال میرے ساتھ رہے گا۔ تب میں تمھارے پیسے ادا کردوں گا۔‘‘ اس پر اللہ تعالیٰ نے سورہ مریم میں یہ آیتیں نازل فرمائی (ترجمہ):’’ بھلا آپ (صلی اللہ علیہ وسلم ) نے اس شخص کو دیکھا ہے !جو ہماری آیتوں کا انکار کرتا ہے اور کہتا ہے آخرت میں مجھ کو مال اور اولاد دیئے جائیں گے۔ کیا وہ غیب پر مطلع ہوگیاہے یا اللہ تعالیٰ سے کوئی عہد لیا ہے؟ ہر گز نہیں !بالکل غلط کہتا ہے۔ ہم اسکو لکھ لیتے ہیں تاکہ قیامت کے دن حجت قائم ہو اور اس پرعذاب بڑھاتے جائیں گے ۔ اور جس مال و اولاد کو وہ کہتا ہے اس سب کے وارث ہم ہوں گے اور وہ ہمارے پاس مال اور اولاد سے خالی ہاتھ آئے گا۔‘‘ (سورہ مریم آیت 77سے 80تک)

حضرت خباب بن ارت رضی اﷲ عنہ پر تکلیفیں

   حضرت خباب بن ارت رضی اﷲ عنہ کا بھی کوئی مدد گار قبیلہ یا خاندان نہیںتھا اور آپ رضی اﷲ عنہ بالکل اکیلے تھے۔ایسے میں مکۂ مکرمہ کے کافروں کے لئے اُن کو تکلیفیں اور اذیت دینا بہت آسان ہو گیا تھا اور وہ آپ رضی اﷲ عنہ پر ظلم کرنے کا کوئی موقعہ ہاتھ سے نہیں جانے دیتے تھے۔لگ بھگ بیس سال بعد حضرت عمر فاروق رضی اللہ عنہ کے دور خلافت میں حضرت خباب رضی اللہ عنہ ان سے ملاقات کے لئے گئے تو انھوں نے اپنی مسند(بیٹھنے کے بچھائی ہوئی چیز) پراپنے ساتھ بٹھایا اور فرمایا:’’ اس مسند کا آپ رضی اللہ عنہ اور حضرت بلال رضی اللہ عنہ سے زیادہ حقدارکوئی نہیں ہے۔ ‘‘یہ سن کر حضرت خباب رضی اللہ عنہ مسکرائے اور فرمایا:’’ امیر المومنین !جب ہم دونوں پر مشرکوں نے مصائب اور مظالم کئے ، اُس وقت حضرت ابوبکر صدیق رضی اﷲ عنہ ،حضرت بلال رضی اللہ عنہ کی حمایت میں تھے، لیکن میرا حامی کوئی نہیں تھا۔ ایک روز مشرکینِ مکہ نے مجھے دہکتے ہوئے انگاروں پر چت لٹادیاتھا اور سب نے اپنے پیر میرے اوپر رکھکر دبائے رکھاتاکہ میں حرکت نہ کرسکوں،آگ نے میری پیٹھ کو جلانا شروع کر دیا ۔پہلے چمڑی جلی ، چھچھڑا جلا، پھر چربی پگھلی اور اسکی وجہ سے آگ کچھ ٹھنڈی ہوئی۔‘‘ اسکے بعد اپنی قمیص اٹھاکر حضرت عمر فاروق رضی اللہ عنہ کو بتائی۔ پیٹھ پر سفید سفید چھچھڑوں کو دیکھ کر حضرت عمر فاروق رضی اللہ عنہ کانپ اٹھے۔ آپ رضی اللہ عنہ پر رقت طاری ہوگئی اور بے ساختہ آنکھوں سے آنسو بہنے لگے۔

رسول اللہ ﷺ  پر مکہ مکرمہ کے کافروں کا ظلم و تشدد

   محمد بن اسحاق کہتے ہیں۔ پھر مکہ مکرمہ کے کافروں نے حضور صلی اللہ علیہ وسلم اور صحابہ کرام رضوان اللہ علیھم اجمعین پر ظلم و تشدد بہت شدید کردیا ۔انھوں نے اپنے احمقوں کو نبی ٔ رحمت صلی اللہ علیہ وسلم کے خلاف اکسایا۔ انھوں نے آپ صلی اللہ علیہ وسلم کو جھٹلایا، اذیت دی اور آپ صلی اللہ علیہ وسلم پر شاعر ، کاہین اور مجنون ہونے کے الزامات لگائے۔ لیکن حضور صلی اللہ علیہ وسلم صبر سے اسلام کی تبلیغ فرماتے رہے ۔ آپ صلی اللہ علیہ وسلم کافروں کی نا پسندیدگی کے باوجود انھیں بتوں کی پوجا سے منع فرماتے رہے۔

پہلی حجرت حبشہ

   سید الانبیاء صلی اللہ علیہ وسلم نے تین سال تک خفیہ اسلام کی دعوت دی۔ پھر اللہ تعالیٰ کے حکم سے نبوت کے چوتھے سال اعلانیہ اسلام کی دعوت دینے لگے۔ سید الانبیاء صلی اللہ علیہ وسلم پر اور مسلمانوں پر مکہ مکرمہ کے کافروں نے چوتھے سال کے درمیان یا آخر میں ظلم و تشدد کا سلسلہ شروع کیا۔ یہاں تک کہ نبوت کے پانچویں سال میں یہ سلسلہ اتنا بڑھ گیا کہ مسلمانوں کا مکہ مکرمہ میں رہنا دوبھر ہوگیا اور انھیں اس ظلم و ستم اور تشدد سے نجات کی تدبیر سوچنے کے لئے مجبور ہونا پڑا۔ ایسے وقت میں سورہ کہف نازل ہوئی۔ ( اسکے بارے میں انشااللہ آگے کچھ تفصیل پیش کریں) ۔سیدالانبیاء صلی اللہ علیہ وسلم نے جب مسلمانوں پر زیادہ ظلم وستم ہوتے دیکھا تو انھیں حبشہ کی طرف ہجرت کرنے کا مشورہ دیا۔ آپ صلی اللہ علیہ وسلم کو معلوم تھا کہ حبشہ کا بادشاہ نجاشی(اصل نام اصمحہ ہے ) ایک عادل اوررحم دل انسان ہے۔

حضرت ابراہیم اور لوط علیہم السلام کے بعد ہجرت کرنے والا پہلا جوڑا

   اسکے بعد ایک طئے شدہ پروگرام کے مطابق رجب 5 ؁ نبوی میں صحابہ کرام کے پہلے گروہ نے حبشہ کی طرف ہجرت کی ۔اس گروہ میں بارہ مرد اور چار عورتیں (ایک دوسری روایت کے مطابق گیارہ مرد اور پانچ عورتیں) تھیں۔سید الانبیاء صلی اللہ علیہ وسلم نے حضرت عثمان بن عفان رضی اللہ عنہ کو ان کا امیر بنایا ۔ ان کے ساتھ رسول اللہ صلی اللہ علیہ وسلم کی صاحبزادی سیدہ رقیہ رضی اللہ عنہا بھی تھیں۔ جو حضرت عثمان بن عفان رضی اللہ عنہ کی زوجہ (بیوی ) تھیں۔سیدالانبیاء صلی اللہ علیہ وسلم نے اس جوڑے کے بارے میں فرمایا:’’ حضرت ابراہیم علیہ السلام اور حضرت لوط علیہ السلام کے بعدیہ پہلا گھرانہ (جوڑا) ہے جس نے اللہ کے لئے ہجرت کی۔‘‘

پہلی حجرت حبشہ کرنے والوں کے نام

   یہ لوگ رات کی تاریکی میں چپکے سے نکل کر اپنی نئی منزل کی جانب روانہ ہوئے۔ رازداری کا مقصد یہ تھا کہ قریش کو اسکا علم نہ ہوسکے۔ رخ ’’بحر احمر‘‘ کی بندرگاہ ’’شعیبہ‘‘ کی طرف تھا۔ خوش قسمتی سے وہاں دو تجارتی کشتیاں موجود تھیںجو انھیں لیکر سمندر کے اس پار’’ ملک حبشہ ‘‘چلی گئیں۔ مکہ مکرمہ کے کافروں کو کسی قدر بعد میں ان کی روانگی کا علم ہوسکا۔ تاہم انھوں نے پیچھا کیا اور ساحل تک پہونچے ، لیکن مسلمان نکل چکے تھے۔حبشہ میںمسلمان وہاں آرام سے رہنے لگے۔ فتح الباری شرح صحیح بخاری میں گیارہ مرد اور پانچ عورتوں کے نام لکھے ہیں ۔ وہ ہم یہاں پیش کرتے ہیں۔ مرد حضرات(1)حضرت عثمان بن عفان رضی اللہ عنہ، (2) حضرت عبدالرحمٰن بن عو ف رضی اللہ عنہ، (3) حضرت زبیر بن عوام رضی اللہ عنہ، (4) حضرت ابو حذیفہ بن عتبہ رضی اللہ عنہ، (5) حضرت مصعب بن عمیر رضی اللہ عنہ، (6) حضرت ابو مسلمہ بن عبدلاسد رضی اللہ عنہ، (7) حضرت عثمان بن مظعون رضی اللہ عنہ ، (8) حضرت عامر بن ربیعہ رضی اللہ عنہ، (9) حضرت سہیل بن بیضا رضی اللہ عنہ، (10) ابو سبرۃ بن ابی رہم عامری، (11) حضرت حاطب بن عمرو رضی اللہ عنہ۔ خواتین عورتوں کے نام (1) سیدہ رقیہ رضی اللہ عنہا(رسول اللہ صلی اللہ علیہ وسلم کی دختر) ، (2) سہلہ بنت سہیل رضی اللہ عنہا، (3) سیدہ ام سلمہ رضی اللہ عنہا(حضرت ابو سلمہ رضی اللہ عنہ کی وفا ت کے بعد ان سے رسو ل اللہ صلی اللہ علیہ وسلم نے نکاح کیا اور انھیں ام المومنین بننے کا شرف حاصل ہوا)(4) سیدہ لیلیٰ بنت ابی حشمہ رضی اللہ عنہا(یہ عامر بن ربیعہ کی بیوی ہیں)(5) سیدہ ام کلثوم بنت سہیل رضی اللہ عنہا(یہ ابو سبرہ کی بیوی ہیں) ۔ جو لوگ ہجرت کر کے حبشہ گئے وہ وہاں سکون سے رہنے لگے۔ لیکن یہاں مکہ مکرمہ میں مسلمانوں اور سید الانبیاء صلی اللہ علیہ وسلم پر کافروں کا ظلم جاری تھا۔ اس کے باوجود سلیم الفطرت لوگ اسلام کی طرف مائل ہو رہے تھے اور لگاتار اسلام قبول کر تے جا رہے تھے۔ یہ دیکھ کر مکہ مکرمہ کے کافر بہت پریشان ہو گئے اور کافی سوچ بچار کے بعد انھوں نے ابو طالب سے ملنے کا فیصلہ کیا۔

باقی ان شاءاللہ اگلی قسط میں........!